Real Madridi ka regjistruar një fitore bindëse ndaj Sevillas, duke triumfuar me rezultat 4:1 në stadiumin “Santiago Bernabeu”, në kuadër të xhiros së nëntë të La Ligas.

Skuadra madrilene kaloi në epërsi në minutën e 30-të, falë një goli të bukur të Arda Gulerit, ndërsa shtatë minuta më vonë, Kylian Mbappe dyfishoi rezultatin.

Sulmuesi francez u rikthye në listën e golashënuesve në minutën e 63-të, duke realizuar nga pika e bardhë me një goditje të stilit “Panenka”. Me këtë dygolësh, Mbappe arriti në kuotën e nëntë golave në po aq paraqitje në kampionat.

Sevilla ngushtoi epërsinë në minutën e 80-të përmes Manuel Buenos, por reagimi i madrilenëve ishte i menjëhershëm. Vetëm dy minuta më vonë, Yan Diomande realizoi një tjetër gol të bukur, duke vulosur rezultatin përfundimtar 4:1.

Me këtë fitore, Real Madridi ngjitet në pozitën e tretë me 21 pikë, një më pak se Atletico Madridi i vendit të dytë, ndërsa Barcelona kryeson tabelën me 27 pikë. Sevilla mbetet në vendin e gjashtë me 14 pikë.

D.L

Kjo fundjavë pritet të sjellë emocione të shumta për adhuruesit e futbollit evropian, me ndeshje interesante në Premier League, La Liga, Bundesliga, Serie A dhe Ligue 1.

Sipas programit të ndeshjeve, e shtuna do të nisë me përballjen ndërmjet Evertonit dhe Chelseat në orën 13:30, ndërsa Brentfordi do të presë Liverpoolin nga ora 16:00.

Në La Liga, Espanyoli do të përballet me Atletico Madridin në orën 14:00, ndërsa një nga takimet më interesante pritet të jetë ai ndërmjet Real Betisit dhe Barcelonës, që është paraparë të zhvillohet në orën 18:30.

Bundesliga sjell përballjen ndërmjet Union Berlinit dhe Borussia Dortmundit nga ora 15:30, ndërsa Bayern Munichu do të presë RB Leipzigun në orën 18:30.

Në Serie A, Venezia do të luajë kundër Napolit nga ora 15:30, kurse Bologna dhe Interi do të përballen në orën 18:30.

Ndërkohë, në kampionatin francez, Strasbourgu do të presë Paris Saint-Germainin në orën 17:15, ndërsa Lille–Brest dhe Troyes–Lens janë paraparë të zhvillohen nga ora 20:45.

Edhe e diela sjell një program të ngjeshur. Në Premier League, Bournemouthi do të përballet me Sunderlandin në orën 15:00, në të njëjtën kohë kur Leedsi do të luajë kundër Manchester Unitedit. Nottingham Foresti do të presë Arsenalin nga ora 17:30.

Në La Liga, Malaga do të përballet me Real Sociedadin në orën 18:30, ndërsa Real Madridi do të presë Sevillan në orën 21:00.

Në Bundesliga, Bayer Leverkuseni do të luajë kundër Freiburgut në orën 15:30, kurse Borussia Mönchengladbach do të përballet me Hoffenheimin nga ora 17:30.

Serie A sjell takimin Udinese–Lecce në orën 12:30, Milan–Atalanta në orën 18:00 dhe përballjen Juventus–Lazio në orën 20:45.

Në Ligue 1, Paris FC do të presë Rennesin nga ora 17:15, ndërsa Lyoni do të përballet me Nicen në orën 20:45.

Përballjet ndërmjet Bayern Munichut dhe Leipzigut, Real Betisit dhe Barcelonës, si dhe Milanit dhe Atalantës, pritet të jenë ndër takimet që do të tërheqin më së shumti vëmendje gjatë kësaj fundjave.

Ndeshjet do të zhvillohen më 17 dhe 18 tetor, ndërsa skuadrat do të synojnë rezultate pozitive në vazhdim të garës për pozitat e larta në kampionatet përkatëse.

D.L

Përfaqësuesja e Spanjës është dënuar nga FIFA me mbyllje të pjesshme të stadiumit në ndeshjen e ardhshme miqësore, pas thirrjeve diskriminuese të tifozëve ndaj myslimanëve gjatë përballjes me Egjiptin.

Incidenti ndodhi më 31 mars, në stadiumin “RCDE” të Espanyolit në Barcelonë, ku një grup tifozësh spanjollë u dëgjuan duke bërë thirrje islamofobike në minutën e dhjetë të pjesës së parë, të cilat u përsëritën edhe gjatë pjesës së dytë.

Gjatë ndeshjes, në ekranin e madh të stadiumit u shfaq një mesazh paralajmërues, përmes të cilit tifozëve iu kërkua të ndalonin thirrjet diskriminuese.

Pas incidentit, FIFA nisi procedurë disiplinore për sjellje islamofobike dhe ksenofobike, ndërsa vendimi për dënimin u zyrtarizua të premten.

Sipas vendimit, Spanja do të duhet të mbyllë 15 për qind të kapacitetit të stadiumit për tifozët në miqësoren e ardhshme. Megjithatë, këto vende mund të shfrytëzohen nga familjarë, studentë dhe përfaqësues të organizatave që luftojnë diskriminimin.

Përveç këtij dënimi, Federata Spanjolle e Futbollit është gjobitur me rreth 20 mijë euro.

Përballja miqësore ndërmjet Spanjës dhe Egjiptit kishte përfunduar pa gola, 0:0.

D.L

Kryetari i Prishtinës, Përparim Rama, ka paralajmëruar se Kosova rrezikon të humbasë organizimin e Lojërave Mesdhetare “Prishtina 2030”, pasi Komiteti Ndërkombëtar i Lojërave Mesdhetare (ICMG) ka ngritur shqetësime për mospërmbushjen e detyrimeve financiare dhe vonesat në procesin përgatitor.

Në një konferencë për media, Rama tha se ICMG-ja, përmes një letre zyrtare të dërguar më 15 tetor, ka paralajmëruar për vonesat dhe mungesën e përmbushjes së detyrimeve. Ai theksoi se më 19 dhjetor 2026 do të shqyrtohet e ardhmja e organizimit të Lojërave Mesdhetare në Prishtinë.

“Dje, pra më 15 tetor, komiteti ndërkombëtar i lojërave mesdhetare ICMG ka dërguar një letër zyrtare përmes së cilës paralajmëron për vonesat dhe mospërmbushjen e detyrimeve që rrezikojnë organizimin e lojërave mesdhetare në Prishtinë. Kjo nuk është letra e parë; është vazhdimësi e paralajmërimeve që kanë nisur muaj më parë dhe që, fatkeqësisht, nuk kanë marrë përgjigjen e duhur nga qeveria. ICMG konstaton se letra 21 shtatorit ka mbetur pa përgjigje. Garancia bankare ose e sigurimit e kërkuar që nga janari nuk është dorëzuar dhe detyrimet financiare që është dashur të përmbushen në qershor nuk janë paguar. Për më tepër, afatet për funksionalizimin e strukturave organizative, përgatitjen e masterplanit, buxhetit dhe proceseve të tjera janë shkelur vazhdimisht”, tha Rama.

Ai akuzoi Qeverinë e Kosovës për mungesë koordinimi dhe mosreagim ndaj kërkesave të kryeqytetit për mbledhjen e bordit drejtues, duke thënë se kryeministri Albin Kurti, si kryesues i këtij bordi, ka përgjegjësi për thirrjen e mbledhjeve.

Sipas Ramës, pas mbledhjes së 14 gushtit nuk është thirrur asnjë mbledhje tjetër e bordit, pavarësisht kërkesave të përsëritura nga kryeqyteti.

“Më 30 shtator, duke parë seriozitetin e situatës, kryeqyteti ndërmori iniciativën për thirrjen e mbledhjes së jashtëzakonshme më 8 tetor. Sipas statusit, nga 13 anëtarët e bordit kërkoheshin të paktën pesë nënshkrime. Tre përfaqësuesit e kryeqytetit e nënshkruan kërkesën. Përfaqësuesit e qeverisë dhe të Komitetit Olimpik të Kosovës nuk iu përgjigjën ftesës për nënshkrim. Si rezultat, mbledhja nuk u mbajt”, tha ai.

Rama theksoi se Komuna e Prishtinës ka përmbushur një sërë angazhimesh, përfshirë miratimin e statusit të komitetit organizativ, regjistrimin e organizatës dhe propozimin e pesë porteve urbane, të cilat, sipas tij, janë miratuar nga ICMG-ja më 29 qershor.

Ai theksoi se kryeqyteti ka paraqitur edhe propozimet për lokacionet sportive në Kuvendin Komunal, ndërsa ka kërkuar që institucionet përgjegjëse të veprojnë me urgjencë për të shmangur rrezikimin e organizimit.

“Në anën tjetër, kryeqyteti ka përmbushur një sërë angazhimesh konkrete. Së bashku me Komitetin Olimpik të Kosovës, kemi miratuar statusin e komitetit organizativ më 8 qershor dhe kemi përfunduar procesin e regjistrimit të organizatës më 24 qershor. Kemi propozuar pesë porte urbane, të cilat janë miratuar nga ICMG-ja më 29 qershor. Po ashtu, kemi paraqitur për votim në Kuvendin e kryeqytetit propozimet për lokacionet sportive. Por sot, kemi një paralajmërim që nuk mundemi me e injoru. ICMG-ja ka vendosur afate të reja për përmbushjen e detyrimeve. Dhe më e rëndësishmja, më 19 dhjetor 2026 do të shqyrtohet e ardhmja e lojërave mesdhetare Prishtina 2030. Kjo do të thotë se nuk kemi kohë sot për vonesa, nuk kemi kohë për mungesë koordinimi, nuk kemi kohë për heshtje institucionale. Lojërat mesdhetare nuk janë projekt i vetëm një individi, apo i një partie, apo i një institucioni. Lojërat mesdhetare janë një angazhim ndërkombëtar i Republikës së Kosovës dhe një mundësi historike për zhvillimin e sportit, të infrastrukturës, ekonomisë dhe promovimit të vendit tonë”, tha Rama.

Kreu i Prishtinës ia atribuoi një pjesë të vonesave edhe kërkesës së kryeministrit Kurti për ndryshimin e emrit të ngjarjes nga “Prishtina 2030” në “Kosova 2030”, si dhe insistimit që kryeministri të jetë kryetar i bordit drejtues.

“Edhe ta bëj edhe një gjë shumë të qartë: dy vjet, dy vjet i kemi humbur sepse kryeministri Albin Kurti ka kërkuar që emri i lojërave mesdhetare të ndryshohet nga Prishtina 2030 në Kosova 2030. Natyrisht, kjo kërkesë nuk është aprovuar, sepse në të gjithë botën lojërat mesdhetare mbajnë emrin e qytetit. Absurditeti tjetër ka qenë kërkesa e tij, apo insistimi i tij, që kryeministri të jetë kryetar i bordit drejtues, një praktikë e paparë faktikisht askund tjetër. Pra, vetëm te ne kryeministri kërkon të jetë edhe kryetar i bordit drejtues i lojërave mesdhetare, derisa natyrisht ka shumë pak kohë, apo hiç kohë, sepse ka punë të tjera më të mëdha për t’u marrë”, tha Rama.

Ai kërkoi përgjegjësi nga institucionet përkatëse, duke ngritur shqetësimin se mungesa e përgjigjeve dhe e vendimmarrjes mund ta rrezikojë një mundësi të rëndësishme për Kosovën.

“Pse nuk janë përmbushur detyrimet financiare? Po them, po e përmend edhe një herë: kemi këtu letrën nga ICMG, e cila është dërgu dje, që e bën këtë pyetje të saktë. Pse nuk është dërguar garancia e kërkuar? Pse nuk janë thirrë mbledhjet e bordit drejtues, pra po them edhe kemi letrën tjetër që vetëm kryeqyteti e ka nënshkruar, deri sa të tjerët e kanë injoruar? Dhe kush do ta marrë përgjegjësinë nëse Kosova e humb këtë mundësi historike? Prishtina i ka përmbushur përgjegjësitë e saj, dhe vazhdimisht ka kërkuar me u mbledh bordi pa përgjigje, qeveria nuk e ka kthyer asnjë email, as te ne, as te komiteti ndërkombëtar, dhe jemi në rrezik të humbjeve të lojërave. Nuk jam këtu për me u ankuar. Po ngre alarm publik për alarmet që ka ngritur ICMG. Që për shkak të mospërgjigjeve, mosveprimit të qeverisë, mund t’i humbim lojërat mesdhetare. Edhe ta bëj edhe një gjë shumë të qartë: 2 vjet, 2 vjet i kemi humbur sepse kryeministri Albin Kurti ka kërkuar që emri i lojërave mesdhetare të ndryshohet nga Prishtina 2030 në Kosova 2030. Natyrisht, kjo kërkesë nuk është aprovuar, sepse të gjithë botën lojërat mesdhetare mbajnë emrin e qytetit. Absurditeti tjetër ka qenë kërkesa e tij, apo insistimi i tij, që kryeministri të jetë kryetar i bordit. Drejtues, një praktikë e paparë, faktikisht askund tjetër. Pra, vetëm te ne kryeministri kërkon të jetë edhe kryetar i bordit drejtues i lojërave mesdhetare, derisa natyrisht ka shumë pak kohë, apo hiç kohë, sepse ka punë të tjera më të mëdha për me u marrë”, tha ai./A.K/