Franca ka filluar të zbatojë masa të rrepta kundër përdorimit të drogës në administratën shtetërore. Sipas kryeministrit francez, Sébastien Lecornu, masa është e nevojshme për arsye sigurie.

Kryeministri francez, Sébastien Lecornu, kishte njoftuar disa javë më parë se do të zhvillohen testime të papritura dhe të paparalajmëruara për droga në ministri, një vendim që shkaktoi debat të madh. Tani njoftohet për pushimet e para nga puna.

Sipas agjencisë së lajmeve dpa disa punonjës ministrish janë detyruar të largohen nga detyra pasi rezultatet e testeve të tyre dolën pozitive. Lecornu e konfirmoi këtë në një intervistë për revistën “Paris Match”. “Shumë thonë se e bëra këtë për të dhënë një shembull në Francë. Kjo është e vërtetë. Por mbi të gjitha e bëra për arsye sigurie”, deklaroi Lecornu.

Ai theksoi se shumë prej punonjësve të testuar kanë qasje në informacione jashtëzakonisht të ndjeshme, ndaj përdorimi i drogës përbën rrezik për sigurinë dhe funksionimin e shtetit.

Në mes të muajit qershor Lecornu u kishte dërguar ministrive një qarkore ku urdhëronte teste të detyrueshme dhe të paparalajmëruara të pështymës për zbulimin e përdorimit të drogave. Sipas mediave franceze ai kërkoi që të kontrollohen anëtarët e ministrive, zyrtarët e lartë shtetërorë dhe personeli që u nënshtrohet verifikimeve të sigurisë.

Në qarkore thuhej se, në rast se rezultatet e testeve dalin pozitive, autoritetet përkatëse duhet të shqyrtojnë pasojat e mundshme, përfshirë edhe masa disiplinore ndaj punonjësve.

Shteti duhet të mbetet i besueshëm në luftën kundër drogës

Përveç mbrojtjes së informacioneve të ndjeshme në nivelet më të larta të administratës shtetërore, një arsye tjetër për testet e drogës në qeveri është dëshira që shteti të ruajë besueshmërinë në luftën e tij kundër kriminalitetit të lidhur me drogën.

Siç deklaroi Sébastien Lecornu për revistën “Paris Match” trafiku i drogës përbën “sfidën më të madhe të politikës së brendshme me të cilën vendi ynë po përballet aktualisht dhe do të përballet edhe në vitet e ardhshme”. Ai tha se në Francë ka pothuajse një milion konsumues droge.

“Kjo prek të gjitha shtresat e shoqërisë”, tha Lecornu. Sipas tij, as bota politike nuk është e imunizuar ndaj këtij fenomeni.

Kryeministri francez theksoi se lufta e shtetit kundër drogës mund të mbetet e besueshme vetëm nëse ata që e udhëheqin atë nuk lënë vetë shkak për dyshim. Sipas tij në trajtimin e problemit nuk mund të ketë standarde të dyfishta .

“Nuk mund të dënojmë vrasjet e 16-vjeçarëve në periferitë e qyteteve dhe në të njëjtën kohë të tolerojmë konsumimin e drogës në lagjet e pasura.”

Me këtë qëndrim qeveria franceze synon të japë sinjalin se lufta kundër drogës duhet të zbatohet njësoj për të gjithë, pavarësisht statusit shoqëror apo pozicionit politik.

Kontrollet do të vazhdojnë

Sipas kryeministrit francez Sébastien Lecornu, testet e drogës në qeveri dhe ministri nuk janë një masë e përkohshme apo simbolike. “Testet do të kryhen në mënyrë  rastësore dhe do të vazhdojnë. Nuk kam asnjë dyshim se pasardhësit e mi mund të shkojnë madje edhe më tej”, tha ai.

Kjo do të thotë se kontrollet e paparalajmëruara do të vazhdojnë të mbeten pjesë e mekanizmave të sigurisë në administratën shtetërore franceze me qëllim parandalimin e përdorimit të drogës nga zyrtarët dhe punonjësit që kanë përgjegjësi të rëndësishme.

Ndërkohë ekipet e testimit të drogës shkuan pa paralajmërim edhe në Hôtel de Matignon, selinë e qeverisë franceze. Sipas televizionit TF1, rezultatet e testeve ishin lehtësuese për ekzekutivin francez: kryeministri dhe bashkëpunëtorët e tij rezultuan negativë, pra nuk kishin përdorur drogë.

Kjo nismë është pjesë e përpjekjeve më të gjera të qeverisë franceze për të forcuar luftën kundër drogës dhe për të garantuar që zyrtarët publikë të përmbushin standardet që shteti kërkon nga qytetarët e tij.

/DW/A.K/

Dogana e Kosovës ka zbuluar mallra të padeklaruara me vlerë rreth 15 mijë euro gjatë një kontrolli rutinor në Pikën e Kalimit Kufitar Vërmicë.

Sipas njoftimit, zyrtarët doganorë kanë ndaluar për kontroll një automjet të tipit Volkswagen që po hynte në Kosovë. Gjatë kontrollit fizik janë gjetur disa thasë me mallra të natyrës komerciale, të cilat nuk ishin deklaruar pranë autoriteteve doganore.

Gjatë intervistimit, drejtuesi i automjetit kishte deklaruar se nuk posedonte mallra apo mjete monetare për t’i deklaruar, megjithatë kontrolli zbuloi mallra me vlerë të përafërt prej rreth 15 mijë eurosh.

Në përputhje me Kodin Doganor dhe të Akcizave, mallrat janë ndaluar përkohësisht në PKK Vërmicë, ndërsa ndaj rastit janë iniciuar procedurat administrative përkatëse.

Dogana e Kosovës rikujton se mbetet e përkushtuar në luftimin e kontrabandës, evazionit doganor dhe çdo forme të tregtisë së paligjshme, duke u bërë thirrje qytetarëve dhe operatorëve ekonomikë që të deklarojnë mallrat gjatë hyrjes dhe daljes nga territori doganor i Republikës së Kosovës./A.K/

Ministria e Arsimit dhe Shkencës (MASH) ka njoftuar se nga sot, 27 korrik, është hapur aplikimi për subvencionimin e teksteve dhe materialeve shkollore për nxënësit e arsimit fillor të ulët dhe të mesëm të ulët, përkatësisht për klasat 1 deri në 9.

Sipas njoftimit të ministrisë, aplikimi do të realizohet përmes platformës eKosova dhe do të jetë i hapur deri më 9 gusht 2026.

“Nga sot, më 27 korrik, hapet aplikimi për subvencionimin e teksteve dhe materialeve shkollore për nxënësit e arsimit fillor të ulët dhe të mesëm të ulët (klasat 1–9). Aplikimi do të realizohet përmes platformës eKosova dhe do të jetë i hapur për një periudhë prej dy javësh: 27 korrik – 9 gusht 2026”, thuhet në njoftimin e MASH-it.

Ministria ka bërë të ditur se mjetet financiare do të transferohen drejtpërdrejt në xhirollogarinë bankare të prindit ose kujdestarit që aplikon.

“Mjetet financiare do të transferohen drejtpërdrejt në xhirollogarinë bankare të prindit/aplikuesit. Para se të aplikoni, ju lutemi sigurohuni që xhirollogaria juaj bankare është aktive dhe e saktë, si dhe të dhënat tuaja në eKosova janë të përditësuara”, thekson ministria.

Sipas MASH-it, aplikimi u mundësohet edhe shtetasve të huaj me leje qëndrimi të përkohshme ose të përhershme në Kosovë, fëmijët e të cilëve vijojnë mësimin në institucionet arsimore të vendit.

“Për shtetasit e huaj që ende nuk posedojnë leje qëndrimi, por kanë fëmijë të regjistruar në shkolla të Republikës së Kosovës, MASH do t’ia dorëzojë ASHI-së listën e këtyre rasteve me qëllim të krijimit të qasjes në eKosova për aplikim. Dokumentet për këtë kategori do të dorëzohen me email në adresën [email protected]”, thuhet në njoftim.

Ministria rikujton gjithashtu se, në përputhje me Udhëzimin Administrativ nr. 13/2016, nxënësit dhe prindërit janë përgjegjës për ruajtjen e teksteve shkollore, të cilat duhet të dorëzohen në fund të vitit mësimor në gjendje të rregullt.

“Në rast se tekstet dëmtohen me dashje, nga pakujdesia ose humbin, prindi është i obliguar t’i zëvendësojë ose t’i kompensojë ato”, theksohet më tej.

MASH ka bërë të ditur se të gjitha aplikimet do të verifikohen nga shkollat përkatëse përmes koordinatorëve të autorizuar, ndërsa për paqartësi qytetarët mund të kontaktojnë ministrinë përmes adresës elektronike [email protected] ose në numrin e telefonit +383 (0) 38 200 65 049./A.K/

Magjistralja Prishtinë–Podujevë është bllokuar përkohësisht pasi një kamioni që transportonte pije në shishe qelqi i janë rrëzuar një pjesë e ngarkesës në rrugë.

Si pasojë, në këtë segment janë krijuar kolona të gjata automjetesh, ndërsa qarkullimi është vështirësuar për drejtuesit e mjeteve.

Pamjet e siguruara nga RTK tregojnë arkat me pije të shpërndara në rrugë, duke penguar lëvizjen e automjeteve.

Ekipet përgjegjëse janë angazhuar në largimin e pengesave dhe pastrimin e rrugës, me qëllim rikthimin sa më të shpejtë të qarkullimit normal.

Deri në normalizimin e situatës, shoferëve u rekomandohet të tregojnë kujdes të shtuar gjatë kalimit në këtë aks rrugor./A.K/