Feride Rushiti, drejtoresha e Qendrës Kosovare për Rehabilitimin e të Mbijetuarve të Torturës (QKRMT), ka deklaruar se dhuna seksuale gjatë luftës nuk ka pasur hapësirë në diskursin shoqëror dhe nga parlamentarët në periudhën e kaluar. Ajo ka përmendur seancat parlamentare të vitit 2014, ku gjuha dhe qëndrimi i disa deputetëve ndaj kësaj kategorie ishin të dhimbshme dhe të papranueshme.

Rushiti, e nominuar për Çmimin Nobel, ka treguar për rrugën që e çoi drejt këtij nominimi dhe si fillim të punës me parlamentarët, ku diskursi mbi dhunën seksuale ishte shumë më i ngurtë dhe i papërballueshëm. Ajo theksoi se verifikimet e dhunës dhe mënyra e trajtimit të këtyre çështjeve ka qenë e dhimbshme.

Drejtoresha e QKRMT-së gjithashtu ka rrëfyer takimet e saj të para me të mbijetuarit e dhunës seksuale gjatë luftës, duke përmendur vitin 1998 në Kukës, ku u përball me dëshmitë e tmerreve të luftës. Këto përvoja e motivuan atë të hapte një organizatë në Kosovë që ofron mbështetje dhe mundësi për të mbijetuarit që të flasin për përjetimet e tyre në një ambient të sigurt.

Rushiti ka lavdëruar guximin e Vasfijes Grasniqi, e cila e ka thyer heshtjen dhe ka folur publikisht për dhunimin seksual që ka përjetuar. Ajo ka thënë se ky akt ka pasur një ndikim të fuqishëm në shoqëri, duke ndihmuar në thyerjen e paragjykimeve dhe stigmës që i rrethonte viktimat e dhunës seksuale./UBTNews/

Komisioni Qendror i Zgjedhjeve (KQZ) ka pranuar një donacion të rëndësishëm nga Gjermania, i cili përfshin serverë dhe pajisje teknologjike për Qendrën e Numërimit dhe Rezultateve. Ky donacion ka si qëllim përmirësimin e infrastrukturës zgjedhore dhe avancimin e standardeve zgjedhore në Kosovë.

Kryesuesi i KQZ-së, Kreshnik Radoniqi, vlerësoi mbështetjen e shtetit gjerman dhe theksoi se ky donacion është një investim i madh në integritetin e procesit zgjedhor, duke ndihmuar në përmirësimin e besimit të qytetarëve ndaj procesit. Radoniqi bëri thirrje për një proces zgjedhor të qetë dhe ftoi qytetarët që të shfrytëzojnë të drejtën e tyre të votës në zgjedhjet e 9 shkurtit.

Ambasadori i Gjermanisë në Kosovë, Jorn Rohde, shprehu besimin e tij se zgjedhjet do të zhvillohen pa vështirësi, duke shtuar se donacioni do të sigurojë një proces zgjedhor të sigurt dhe do të fuqizojë organet e administratës zgjedhore, duke rritur besimin e publikut.

Po ashtu, Ushtruesja e detyrës së shefes së Misionit të OSBE-së në Kosovë, Cornelia Taylor, theksoi se ky donacion do të mundësojë një strukturë të besueshme teknologjike për KQZ-në, duke garantuar funksionimin e lehtë dhe të sigurt të proceseve zgjedhore.

Në kuadër të këtij donacioni, janë arritur gjithashtu fletëvotimet, dhe më 9 shkurt, qytetarët e Kosovës do të ushtrojnë të drejtën e tyre për të votuar në zgjedhjet e përgjithshme të rregullta të Kosovës./UBTNews/

Presidentja e Republikës së Kosovës, Vjosa Osmani, me ftesë të një grupi kongresistësh amerikanë, udhëtoi për në Ëashington, D.C., për të marrë pjesë në Lutjet Nacionale të Mëngjesit si dhe për të mbajtur fjalim në njërën nga ngjarjet kryesore të këtij organizimi të Kongresit amerikan.

Kështu ka njoftuar presidenca përmes një postimi në rrjetin social Facebook, duke thënë se në kuadër të kësaj ngjarje Osmani do ta mbaj fjalimin kryesor nga përfaqësuesit ndërkombëtar.

“Në kuadër të kësaj ngjarjeje, e cila mbledh mijëra kongresistë, politikanë, biznesmenë dhe përfaqësues të shoqërisë civile nga mbarë bota, Presidentja Osmani do të mbajë fjalimin kryesor nga përfaqësuesit ndërkombëtar në kuadër të Drekës Ndërkombëtare. Me këtë rast, ajo do të flasë për rrugëtimin e popullit të Kosovës nga ditët më të vështira deri te sukseset e sotme, duke theksuar besimin e pashoq dhe qëndrueshmërinë e qytetarëve tanë. Gjatë qëndrimit në Washington, Presidentja Osmani do të zhvillojë gjithashtu takime me kongresistë amerikanë dhe zyrtarë të administratës së SHBA-së, me fokus në forcimin e partneritetit strategjik ndërmjet Kosovës dhe Shteteve të Bashkuara të Amerikës, si dhe avancimin e aspiratave euroatlantike të vendit tonë”, thuhet në njoftim.

Lutjet Nacionale të Mëngjesit janë një traditë gjashtëdekadëshe, ku çdo vit mblidhen zyrtarët më të lartë amerikanë, anëtarë të Kongresit, politikanë dhe udhëheqës ushtarakë, si dhe mysafirë nga shumë vende të botës për lutje të përbashkëta.

Në Kosovë, përkatësisht në Qendrën e Numërimit dhe Rezultateve para disa ditësh kanë arritur mbi 1 milionë e 752 mijë fletëvotime për zgjedhjet e përgjithshme të 9 shkurtit.

Ndërsa, edhe në përfaqësitë diplomatike ku më 8 shkurt mërgimtarët do të mund të ushtrojnë të drejtën e tyre për të votuar tashmë kanë shkuar mbi 21 mijë fletëvotime.

Kështu ka njoftuar zëdhënësi i Komisionit Qendror të Zgjedhjeve, Valmir Elezi i cili tha se në bazë të vendimit të KQZ janë shtypur 323 mijë e 218 apo 15.57 përqind. fletëvotime më pak se numri i votuesve.

Bazuar në Listën Votuese të certifikuar nga Komisioni Qendror i Zgjedhjeve numri i shtetasve të Kosovës me të drejtë vote është 2 milionë e 75 mijë e 868 votues, prej të cilëve 1 milion e 970 mijë 944 votues janë votues që i takojnë Listës Votuese brenda Kosovës dhe 104 mijë 924 votues janë pjesë e Listës Votuese jashtë Kosovës.

“Këto fletëvotime janë shtypur në Celie të Sllovenisë dhe kanë ardhur para disa ditësh në Kosovë, dhe do të shpërndahen brenda disa ditësh sigurisht para ditës së zgjedhjeve në qendrat e votimit ku do të zhvillohet procesi zgjedhor më 9 shkurt. Sipas vendimit të KQZ-së, janë shtypur 1,752,650 fletëvotime, prej të cilave 1,664,100 për votimin në vendvotime të rregullta, 28,450 për votimin me kusht; 38,650 për votimin e personave me nevoja të veçanta dhe si fletëvotime rezervë. Ndërkaq për votimin jashtë vendit në përfaqësi diplomatike janë shtypur 21,450 fletëvotime”, tha ai.

Zëdhënësi i KQZ-së, Valmir Elezi u shpreh se fletëvotimet e shtypura kanë arritur tashmë edhe në përfaqësitë diplomatike ku më 8 shkurt do të votojnë mërgata e Kosovës.

“Fletëvotimet të cilat janë shtypur për votimin në përfaqësi diplomatike dhe që në përgjithësi janë 21 mijë e 450 fletëvotime ato janë dërguar veçse në përfaqësi diplomatike dhe do të jenë të gatshme për procesin e votimit i cili do të zhvillohet me datë 8 shkurt”, deklaroi zëdhënësi i KQZ-së.

E mbrëmjen e kaluar në Komisionin Qendror të Zgjedhjeve kanë arritur edhe dërgesat e para me fletëvotime nga diaspora të cilat janë pjesë e votimit me postë.

Sipas Elezit ato janë në vend të sigurt dhe fillimisht do t’i nënshtrohet procesi të vlerësimit e pas ditës së zgjedhjeve do të numërohen.

“Gjatë mbrëmjes së kaluar në KQZ në një hapësirë të veçantë të sigurt e cila ruhet 24 orë nga Policia e Kosovës kanë ardhur dërgesat e para të fletëvotimeve jashtë Kosovës të cilat janë pjesë e votimit përmes postës dhe këto pako me fletëvotime fillimisht do t’i nënshtrohen procesit të vlerësimit më pas në një fazë të mëvonshme pas ditës së zgjedhjeve pas disa procedurave do të numërohen në Qendrën e Numërimit dhe Rezultateve”, theksoi Elezi.

Më 9 shkurt do të mbahen zgjedhjet e përgjithshme në Kosovës. Ndërsa, fushata zgjedhore ka filluar më 11 janar.