Lajmet

Brad Pitt shpreh dëshirën të luajë rolin e keqbërësit në filmin e ri të James Bond

Published

on

Aktori amerikan Brad Pitt ka thënë se do të dëshironte të luante një personazh negativ në filmin e ri të James Bond, ku Robert Pattinson pritet të marrë rolin e agjentit 007.

Pitt foli për “Extra TV” gjatë premierës së filmit “The Further Mis-Adventures of Cliff Booth”, të hënën në Los Angeles, ku vlerësoi edhe përzgjedhjen e Pattinsonit për rolin e spiunit britanik.

“Robert… E di çfarë, do të më pëlqente shumë. Javieri im e bëri një punë të shkëlqyer. Standardet janë të larta, por unë do ta bëja”, deklaroi Pitt.

Aktori iu referua bashkëpunëtorit të tij në filmin “F1”, Javier Bardem, i cili luajti personazhin negativ Raoul Silva në filmin e James Bond “Skyfall”, të vitit 2012.

Pitt shprehu gjithashtu mbështetje për zgjedhjen e Pattinsonit si agjenti i ri 007.

“Më pëlqen kjo ide. Më pëlqen ajo që bën dhe çfarë lloj rolesh zgjedh. Mendoj se është i duhuri. Është një vendim i mirë”, tha ai.

Pattinson u njoftua të hënën si aktori i shtatë që do të interpretojë James Bondin. Ai do të jetë protagonist në filmin e 26-të të kësaj serie, i cili do të drejtohet nga Denis Villeneuve, me skenar të Steven Knight.

Ai merr rolin nga Daniel Craig, i cili e interpretoi për herë të fundit agjentin 007 në vitin 2021.

Ndërkohë, në filmin e ri, Pitt rikthehet në rolin e kaskaderit Cliff Booth nga filmi i Quentin Tarantinos “Once Upon a Time in Hollywood”. Për këtë rol, ai fitoi çmimin Oscar për aktorin më të mirë në rol dytësor në vitin 2020./A.K/

Continue Reading

Lajmet

Vrasje në Suharekë: Arrestohet i dyshuari pas plagosjes me armë zjarri

Published

on

By

Një person ka rënë viktimë e një sulmi me armë zjarri të mërkurën në Suharekë, ndërsa autoritetet policore kanë arritur ta arrestojnë të dyshuarin pak kohë pas ngjarjes.

Lajmin e ka konfirmuar zëdhënësi i Policisë për rajonin e Prizrenit, Shaqir Bytyqi, i cili ka bërë të ditur se pavarësisht përpjekjeve mjekësore, viktima nuk ka mundur t’i mbijetojë plagëve të marra.

Sipas Policisë, ngjarja ka ndodhur rreth orës 12:20, kur një person ka shtënë me armë zjarri në drejtim të viktimës mashkull. Pas të shtënave, i lënduari është dërguar në gjendje të rëndë shëndetësore në Qendrën Emergjente, ku më pas është konfirmuar vdekja e tij.

I dyshuari fillimisht ishte larguar nga vendi i ngjarjes, por reagimi i shpejtë i Policisë ka bërë të mundur lokalizimin dhe arrestimin e tij. Autoritetet po vazhdojnë hetimet për të zbardhur rrethanat e plota të rastit.

 

Continue Reading

Lajmet

Tetova prezanton programin “Nëntori në Festë 2026” me aktivitete kulturore e artistike

Published

on

Qendra e Kulturës në Tetovë ka prezantuar programin “Nëntori në Festë 2026”, i cili përfshin një sërë aktivitetesh kulturore dhe artistike që do të zhvillohen nga 17 deri më 28 nëntor.

Programi përfshin ekspozita personale dhe kolektive, koncerte muzikore, aktivitete folklorike dhe shfaqje teatrale, ndërsa do të kulmojë me aktivitetet e organizuara më 28 nëntor, në kuadër të shënimit të kësaj date.

Ndër aktivitetet e parapara janë ekspozita personale “Rrënjë të padukshme”, koncerti “Rok përrallë në vjeshtë”, koncerti folklorik me fëmijë, koncerti vjetor i Qendrës së Kulturës “Festojmë Nëntorin”, si dhe paraqitjet e ansambleve dhe grupeve artistike.

Programi përfshin gjithashtu ekspozita në hapësirat kulturore dhe shkollore të Tetovës, koncertin e Ansamblit Shtetëror dhe një shfaqje teatrale nga Teatri i Tetovës.

Aktivitetet do të përmbyllen më 28 nëntor me programin “Festojmë 28 Nëntorin”, i cili do të mbahet në INQ “Ilo Anteski Smok” në Tetovë.

Përmes këtij kalendari, Tetova do ta shënojë muajin nëntor me aktivitete që ndërthurin muzikën, artin pamor, folklorin dhe teatrin./A.K/

Continue Reading

Lajmet

Në rastin e Arlinda Zekajt mungoi plani individual, udhëheqësi i QPS-së pranon se nuk vlerësoi punën e zyrtarëve

Published

on

By

Udhëheqësi i Qendrës për Punë Sociale në Pejë, Durim Kelmendi, ka pranuar se në rastin e Arlinda Zekajt nuk ishte hartuar plani individual, ndonëse një dokument i tillë është obligativ. Ai po ashtu ka pranuar se nuk kishte bërë vlerësimin e punës së zyrtarëve të përfshirë në këtë rast.

Kelmendi, i cili është punësuar në QPS në vitin 2018, është intervistuar të mërkurën nga Komisioni Hetimor Parlamentar për hetimin e vrasjes së Arlinda Zekajt.

Gjatë përgjigjeve ndaj pyetjeve të deputetëve, ai ka thënë se shërbimi që udhëheq ka vetëm katër punëtorë dhe se për shkak të ngarkesës me punë përballen me mungesë të stafit.

“Në shërbimin tim i kam vetëm katër punëtorë, për shkak të volumit kemi mungesë të punëtorëve. Së pari i kontrolloj dhe jam bashkëpunues me ta”, ka deklaruar Kelmendi.

Deputeti i Lëvizjes Vetëvendosje, Adnan Rrustemi, e ka pyetur nëse hartimi i planit individual është obligim ligjor dhe nëse një plan i tillë ishte përgatitur për rastin e Arlinda Zekajt.

Në përgjigjen e tij, Kelmendi ka konfirmuar se plani individual kishte munguar, ndërsa ka sqaruar se dokumentacioni ishte plotësuar në një formë tjetër, por jo sipas standardit të kërkuar.

Ai ka folur edhe për mungesën e psikologes së QPS-së, e cila në atë periudhë ishte në pushim të lehonisë.

“Po ka pasur, në rastin konkret ka munguar plani. Është obligative, 05 ka qenë i plotësuar, është plotësuar në një formë tjetër jo sipas standardit. Pasi ka përfunduar seanca kam marrë një telefonatë se seanca ka përfunduar për shkak se punëtorja ka munguar. Psikologia e qendrës është në pushim të lehonisë, kemi thirrur psikologen tjetër”, ka thënë ai.

Ndërkaq, deputetja e PDK-së, Besa Kabashi-Ramaj, e ka pyetur Kelmendin se për çfarë arsye rasti kishte përfunduar në Qendrën për Punë Sociale.

Ai ka deklaruar se rasti ishte raportuar si dhunë në familje dhe se vlerësimin e nivelit të rrezikshmërisë e bën Policia.

“Ka ndodhur rasti, është raportuar si dhunë në familje. Nivelin e rrezikshmërisë e vlerëson policia, çdo informacion që e kemi ia bashkëngjisim, mbetet në vullnetin e punëtorit. E kemi planin e veprimit. QPS në momentin që raportohet rasti së pari i ofrohet siguria”, ka deklaruar ai.

Gjatë seancës, deputetja e LDK-së, Doarsa Kica-Xhelili, e ka pyetur nëse kishte bërë vlerësimin e punës së zyrtarëve që ishin nën përgjegjësinë e tij dhe që ishin përfshirë në rastin konkret.

“Po, në rastin konkret jo”, është përgjigjur Kelmendi.

Ndërkohë, deputeti i PDK-së, Eman Rrahmani, ka kërkuar të dijë se sa raste të dhunës trajtohen nga QPS-ja në Pejë dhe sa prej tyre janë aktive.

Kelmendi ka bërë të ditur se janë gjithsej 73 raste të dhunës, prej të cilave 50 janë aktive. Ai ka treguar se QPS-ja ka gjithsej 1 mijë e 150 dosje.

“Janë 73 raste të dhunës, aktive janë 50. Katër punëtorë i kemi aktivë. Kemi raportime javore të dokumentuara. 70 shërbime janë në QPS. Total 1150 dosje që kemi kryer shërbime aty ndahet secila kategori”, ka thënë ai.

Në fund të intervistimit, Kelmendi ka bërë të ditur se ndaj punëtorëve të përfshirë në rastin e Arlinda Zekajt është iniciuar procedurë disiplinore.

Continue Reading

Lajmet

Të shtëna me armë zjarri në Suharekë, një person në gjendje të rëndë

Published

on

By

Një person ka mbetur i plagosur rëndë si pasojë e të shtënave me armë zjarri në qytetin e Suharekës. Viktima është dërguar për trajtim mjekësor në Emergjencën e Suharekës.

Lajmin për Ekonomia Online e ka konfirmuar zëdhënësi i Policisë për rajonin e Prizrenit, Shaqir Bytyqi.

Ai ka bërë të ditur se rasti është raportuar më 18 nëntor 2026, rreth orës 12:20, kur një person i panjohur ka shtënë me armë zjarri në drejtim të një personi të gjinisë mashkullore.

“Më datën 18.11.2026, rreth orës 12:20, është raportuar se në qytetin e Suharekës, një person i panjohur ka shtënë me armë zjarri në drejtim të një personi të gjinisë mashkullore. Si pasojë e të shtënave, viktima ka pësuar lëndime trupore dhe, në gjendje të rëndë shëndetësore, është transportuar për trajtim mjekësor në Emergjencë”, ka deklaruar Bytyqi.

Sipas tij, i dyshuari është larguar nga vendi i ngjarjes, ndërsa Policia është duke ndërmarrë veprimet e nevojshme për identifikimin dhe arrestimin e tij.

“Njëkohësisht, është bërë sigurimi i vendit të ngjarjes dhe po ndërmerren veprimet e nevojshme hetimore për mbledhjen e provave dhe dëshmive që mund të ndihmojnë në zbardhjen e rrethanave të këtij rasti”, ka thënë Bytyqi për Ekonomia Online. /Ekonomia Online/

Continue Reading

Të kërkuara