Elon Musk ka premtuar se vitin e ardhshëm do t’i japë nga një aksion të kompanisë SpaceX çdo fëmije në Shtetet e Bashkuara, një nismë që, sipas llogaritjeve të raportuara, mund të ketë vlerë totale prej rreth 10.66 miliardë dollarësh.

Sipas Associated Press, miliarderi e bëri njoftimin të hënën, më 19 tetor, pasi kompania e inteligjencës artificiale Anthropic deklaroi se do të ndajë 5 për qind të aksioneve të saj për një fond të ri që synon të mbështesë interesin publik.

Duke reaguar ndaj njoftimit të Anthropic në rrjetet sociale, Musk tha se aksionet duhet t’u shpërndahen drejtpërdrejt qytetarëve. Më pas, ai premtoi se çdo fëmijë amerikan do të përfitonte nga një aksion i SpaceX gjatë vitit të ardhshëm, duke e cilësuar këtë si nismën e parë nga shumë të tjera.

Sipas të dhënave të përmendura në raportim, aksionet e SpaceX e kishin mbyllur tregtimin të premten me çmim prej 146.03 dollarësh. Duke marrë parasysh rreth 73 milionë fëmijë nën moshën 18-vjeçare në SHBA, vlera e përgjithshme e premtimit llogaritet në afërsisht 10.66 miliardë dollarë.

Megjithatë, Musk nuk ka dhënë hollësi se si do të realizohet shpërndarja, cilat do të jenë kriteret e përfitimit apo çfarë procedurash duhet të ndjekin familjet. Prandaj, mënyra konkrete e zbatimit të kësaj nisme mbetet e paqartë.

Ndërkohë, Anthropic ka njoftuar krijimin e fondit “Anthropic Public Benefit Fund”, në të cilin do të kalojnë 5 për qind e aksioneve të kompanisë. Vlera e tij mund të ndryshojë në varësi të ecurisë financiare të kompanisë dhe çmimit të aksioneve.

Këto njoftime vijnë në një periudhë kur shqetësimet për zhvillimin e shpejtë të inteligjencës artificiale po shtohen në SHBA. Një sondazh i Associated Press dhe Qendrës NORC për Kërkimin e Çështjeve Publike tregon se 64 për qind e amerikanëve mendojnë se kjo teknologji po zhvillohet shumë shpejt. Ndërkohë, 27 për qind e të anketuarve e konsiderojnë të përshtatshëm ritmin aktual, ndërsa 8 për qind mendojnë se zhvillimi është shumë i ngadalshëm.

Pavarësisht diskutimeve për rreziqet e mundshme të inteligjencës artificiale, konkurrenca mes kompanive dhe shteteve vazhdon. Premtimi i Musk për shpërndarjen e aksioneve te fëmijët amerikanë mbetet për t’u konkretizuar, ndërsa nuk janë bërë të ditura detajet e realizimit të tij./A.K/

Kroacia planifikon të investojë 932.1 milionë euro deri në vitin 2032 në zhvillimin e inteligjencës artificiale (AI), përfshirë krijimin e një modeli të madh gjuhësor për gjuhën kroate dhe një asistenti digjital për qytetarët.

Plani Kombëtar për Zhvillimin e Inteligjencës Artificiale u prezantua nga ministri kroat i Drejtësisë, Administratës dhe Transformimit Digjital, Damir Habijan. Për planin e parë të veprimit, i cili përfshin periudhën deri në vitin 2028, janë paraparë 382.1 milionë euro dhe 33 masa konkrete.

Një pjesë e rëndësishme e investimeve do të dedikohet për kërkime shkencore, inovacion, zhvillimin ekonomik dhe infrastrukturën kompjuterike e të të dhënave, për të cilën janë ndarë 139 milionë euro në kuadër të planit të parë.

Inteligjenca artificiale pritet të përdoret edhe në shërbimet publike. Një nga projektet kryesore është krijimi i një asistenti në sistemin “e-Qytetarët”, i cili synon t’ua lehtësojë qytetarëve qasjen në informacione dhe shërbime administrative.

Teknologjia do të përdoret gjithashtu për të mbështetur punën e zyrtarëve në sistemin e drejtësisë. Megjithatë, autoritetet theksojnë se inteligjenca artificiale duhet të shërbejë si mjet ndihmës dhe jo si zëvendësim i njeriut në marrjen e vendimeve.

Plani parasheh që deri në vitin 2028 të trajnohen 7 mijë qytetarë për njohuritë bazë të inteligjencës artificiale, 10 mijë mësimdhënës dhe 5 mijë nëpunës shtetërorë.

Ndërkohë, konsultimet publike për planin kombëtar dhe atë të veprimit do të zgjasin 30 ditë, gjatë të cilave qytetarët, institucionet dhe bizneset mund të paraqesin propozimet dhe vërejtjet e tyre.

Në korrik, qeveria kroate kishte siguruar edhe 39 milionë euro grante për krijimin e fabrikës së parë kroate të inteligjencës artificiale, si dhe 10 milionë euro për pjesëmarrjen në një fabrikë të ardhshme evropiane të kësaj teknologjie./A.K/

Ditën e sotme në vendin tonë do të mbajë mot me diell dhe vranësira të shpërndara, ka bërë të ditur Instituti Hidrometeorologjik i Kosovës (IHMK).

Temperaturat minimale do të lëvizin ndërmjet 4 dhe 7 gradë Celsius, ndërsa ato maximale pritet të arrijnë nga 16 deri në 20 gradë Celsius.

Sipas meteorologëve, do të fryjë erë e lehtë nga drejtimi i jugperëndimit me shpejtësi prej 1 deri në 3 metra për sekondë. /E.A/