Të shtunën në Premier League zhvillohen disa përballje interesante ku Arsenal FC pret AFC Bournemouth në ora 13:30, ndërsa në ora 16:00 luajnë Brentford FC kundër Everton FC dhe Burnley FC ndaj Brighton & Hove Albion, ndërsa në mbrëmje Liverpool FC përballet me Fulham FC në ora 18:30.

Në La Liga, Real Sociedad luan ndaj Deportivo Alavés në ora 14:00, Elche CF pret Valencia CF në ora 16:15, ndërsa derbi i madh mes FC Barcelona dhe RCD Espanyol luhet në ora 18:30, dhe në mbrëmje Sevilla FC përballet me Atlético Madrid.

Në Bundesliga, në orën 15:30 zhvillohen disa duele të forta ku Borussia Dortmund luan ndaj Bayer 04 Leverkusen, RB Leipzig pret Borussia Mönchengladbach, FC Heidenheim përballet me 1. FC Union Berlin dhe VfL Wolfsburg luan ndaj Eintracht Frankfurt, ndërsa në ora 18:30 FC St. Pauli pret Bayern Munich.

Të dielën në Premier League në ora 15:00 zhvillohen tri ndeshje ku Crystal Palace FC pret Newcastle United FC, Nottingham Forest FC luan ndaj Aston Villa FC dhe Sunderland AFC përballet me Tottenham Hotspur FC, ndërsa në ora 17:30 luhet superndeshja mes Chelsea FC dhe Manchester City FC.

Në La Liga, në ora 14:00 CA Osasuna pret Real Betis, në ora 16:15 RCD Mallorca luan ndaj Rayo Vallecano, në ora 18:30 RC Celta de Vigo përballet me Real Oviedo dhe në ora 21:00 Athletic Club luan ndaj Villarreal CF.

Në Bundesliga, në ora 15:30 1. FC Köln përballet me SV Werder Bremen dhe VfB Stuttgart luan ndaj Hamburger SV, ndërsa në ora 19:30 1. FSV Mainz 05 pret SC Freiburg.

Kryetari i Prishtinës, Përparim Rama, ka bërë të ditur se janë ndërmarrë masa ndëshkimore ndaj përgjegjësve për shkatërrimin e rrugës “Don Shtjefën Kurti”.

Sipas të parit të komunës, investitori ka shpërfillur urdhrin paraprak për mbylljen e gropës në sektorët 4 dhe 5, çka ka çuar në shqiptimin e gjobave të majme.

Për këtë shkelje, kompania investuese është ndëshkuar me 30 mijë euro, ndërsa personi përgjegjës ligjor me 3 mijë euro të tjera. Përveç sanksioneve financiare, Rama ka kërkuar masa edhe ndaj stafit teknik që ka mbikëqyrur punimet.

“Deri më sot nuk janë prezantuar vendimet e inxhinierëve mbikëqyrës, prandaj kërkojmë nga Oda e Inxhinierëve të Republikës së Kosovës, inicimin e procedurave për tërheqjen e licencave të inxhinierëve mbikëqyrës”, ka deklaruar Rama.

Kryetari theksoi se mungesa e raporteve dhe vendimeve nga inxhinierët mbikëqyrës është e papranueshme, duke insistuar që Oda e Inxhinierëve të reagojë menjëherë për të sanksionuar profesionalisht ata që lejuan këtë dëmtim të infrastrukturës publike.

 

Çështja e ndarjes së pagës së 13-të për punonjësit e sektorit publik ka shkaktuar diskutime midis ministrit të Financave, Hekuran Murati, dhe deputetit të AAK-së, Besnik Tahiri. Ky i fundit ka kërkuar llogari nga ministri se përse kjo mbështetje po mungon për punëtorët e sektorit privat, duke kërkuar masa konkrete për këtë kategori.

Ministri Murati u mbrojt duke listuar ndihmat e deritanishme dhe sugjeroi që detyrimi për sektorin privat mund të rregullohet vetëm përmes ndryshimeve ligjore.

“Ne kemi ndarë 70 milionë euro në dhjetor të vitit të kaluar janë dhënë si pagese e njëhershme prej 100 eurosh. Tashmë çdo vit jepen 200 milionë euro për lehonat dhe fëmijë. Ka pasur rritje të pagës minimale. Sa i përket pagës së 13 i kemi dhënë ato paga sepse ne jemi punëdhënësi për sektorin publik. Nëse ju mendoni qe edhe sektori privat duhet ta bëjë një gjë të tillë këtë ndoshta mund ta amandamentojmë me ligj. Nëse mendoni se duhet të bëhet obligative me ligj jemi të hapur ta bëjmë një gjë të tillë”, deklaroi Murati.

Nga ana tjetër, Besnik Tahiri e ka cilësuar këtë përgjigje si shmangie nga realiteti, duke theksuar se mbështetja për kategoritë e tjera nuk mund të ngatërrohet me nevojat e punëtorëve aktivë në sektorin privat.

“Pashë zotin a e dëgjuat ministrin çka tha, tha pensionistëve u kemi dhënë mbështetje, pensionistëve, lehonave, ata s’janë në punë, kjo e ka emrin skemë sociale. Jemi për mbështetje të tyre. Fëmija 13 vjet nuk punon. Të fola shqip, thashë ja ke dhënë 65 milionë për pagën e 13, çka ke bërë për sektorin privat, për atë që është në skele, gratë në supermarkete, për gazetarët”, reagoi Tahiri.

Pas një debati të gjatë dhe mungese fillestare të konsensusit, deputetët e Kuvendit të Kosovës kanë arritur dakordim për rendin e ditës, duke miratuar atë me 91 vota për. Ndryshimi kryesor erdhi me propozimin e PDK-së, ku me votat e 86 deputetëve u vendos që rezoluta për mbrojtjen e viktimave të luftës të trajtohet si pikë e parë menjëherë pas pyetjeve parlamentare.

Për të finalizuar këtë dokument, një grup i deputetëve të ngarkuar për harmonizimin e tekstit është tërhequr nga salla pas konsultave me Kryetaren e Kuvendit dhe shefat e grupeve parlamentare. Paralelisht, me kërkesë të LDK-së, rezoluta për rritjen e çmimeve është zhvendosur nga pika e nëntë në pikën e gjashtë të rendit të ditës.

Ndërkohë, seanca u përcoll me një veprim politik nga Lista Serbe, deputetët e së cilës lëshuan sallën në momentin kur po votoheshin këto ndryshime. Pavarësisht kësaj, punimet e Kuvendit po vazhdojnë sipas prioriteteve të reja të votuara nga shumica parlamentare.

Dështon propozimi i LVV-së për ndryshimin e rendit të ditës pas kundërshtimit të opozitës

Opozita ka refuzuar propozimin e Lëvizjes Vetëvendosje për të përfshirë tetë projektligje të reja në rendin e ditës të seancës së 10 prillit, duke bërë që nisma të dështojë.

Partitë opozitare si PDK, LDK dhe AAK u shprehën kundër kësaj kërkese, duke e cilësuar si një tentativë për fushatë zgjedhore dhe duke kritikuar procedurën e përshpejtuar për tema me rëndësi të lartë si çmimet tavan, sigurimet shëndetësore dhe banimi social.

Ndërsa grupi multietnik e mbështeti propozimin, deputetët e opozitës kërkuan që të respektohen procedurat e rregullta parlamentare dhe të mos krijohet praktikë e ndryshimit të vazhdueshëm të agjendës pa analizë të mirëfilltë.