Lajmet

Biden: Kishte ardhur koha ta përfundonim këtë luftë

Lufta kundër terrorizmit vazhdon.

Published

on

Pas tërheqjes së plotë të të gjithë ushtarëve amerikanë nga Afganistani, Presidenti amerikan Joe Biden ka mbrojtur përsëri vendimin e tij të diskutueshëm. “Ishte koha për t’i dhënë fund luftës”, tha Biden në fjalimin e tij para kombit në Shtëpinë e Bardhë. Tërheqja e trupave deri më 31 gusht nuk u bë pa plan. “Ajo u caktua për të shpëtuar jetë amerikanësh,” tha Biden. Sipas Biden-it, fajtor për situatën e krijuar kishte qenë paraardhësi i tij, Donald Trump.Biden kishte bërë në maj një marrëveshje me talibanët dhe kishte premtuar tërheqjen e trupave amerikane. Ai tha se nuk kishte alternativë tjetër: ose të tërhiqte trupat ose të lejonte përshkallëzimin e konfliktit.

90 përqind e amerikanëve në siguri

Biden e quan evakuimin një “sukses të jashtëzakonshëm”. Presidenti përsëri i hodhi poshtë kritikat se tërheqja mund të ishte bërë në mënyrë më të rregullt. Biden tha se “sfidat” me të cilat u përballën ushtarët gjatë tërheqjes ishin të pashmangshme. Sipas tij, një evakuim i mëparshëm do të kishte shkaktuar kaos në aeroport. Biden theksoi se rezultati ishte se 90 përqind e amerikanëve, që donin të largoheshin nga Afganistani, ishin në siguri. “U bë e mundur të dilnin nga Afganistani dyfish më shumë njerëz nga sa pritej fillimisht. Vetëm SHBA janë të afta ta bëjnë këtë”, tha ai. “Ushtria dhe diplomatët rrezikuan jetën për të shpëtuar të tjerët. 20 ushtarë u plagosën dhe 13 u vranë. Shtetet e Bashkuara u janë mirënjohës atyre dhe familjeve të tyre.” 

Presidenti Biden, më 29 gusht 2021, duke pritur të zbresin në tokën amerikane trupat e 13 ushtarëve të vrarë në aeroportin e Kabulit më 26 gusht.

Lufta kundër terrorizmit vazhdon

Pas tërheqjes nga Afganistani, SHBA do të vazhdojë të ndërmarrë veprime kundër degës lokale të milicisë terroriste, “Shteti Islamik” (IS). Ai paralajmëroi grupin që mori përgjegjësinë për sulmin e fundit në aeroportin e Kabulit se SHBA do të vazhdojë t’i kërkojë.

“Ne nuk kemi mbaruar ende me ju, djema,” tha Biden. Lufta kundër terrorizmit vazhdon edhe pas tërheqjes nga Afganistani, megjithëse pa trupa tokësore. Shtetet e Bashkuara do t’i gjuajnë dhe gjejnë terroristët “deri në fund të botës”, tha Biden.

Biden fajësoi gjithashtu ish-qeverinë afgane dhe forcat e sigurisë së vendit që ua lanë në dorë kontrollin talibanëve. Në kundërshtim me pritmëritë, forcat afgane të sigurisë nuk ishin një kundërshtar i fortë në luftën kundër talibanëve. Qeveria afgane u rrëzua dhe Presidenti Ashraf Ghani u largua nga vendi. Ata do t’i kishin “dorëzuar vendin armiqve të tyre, talibanëve”. Kjo rrit rrezikun për forcat e armatosura amerikane dhe aleatët e tyre.

Aeroporti i Kabulit, më 31 gusht u largua edhe ushtari i fundit amerikan.

Ndërkohë, sipas një telefonate, një kopje të së cilës e ka siguruar agjencia e lajmeve Reuters, Biden ka lavdëruar më parë në mënyrë eksplicite ushtrinë afgane para se talibanët të vinin në pushtet. “Ju keni ushtrinë më të mirë,” kishte thënë Biden në një telefonatë me Presidentin Ghani në korrik. Me largimin e ushtarëve të fundit amerikanë nga aeroporti i Kabulit, misioni ndërkombëtar në Afganistan përfundoi pas gati 20 vjetësh. Biden kishte njoftuar në korrik se të gjitha trupat amerikane do të tërhiqeshin deri më 31 gusht. Pas njoftimit për tërheqjen e trupave amerikanë, talibanët kishin përparuar me shpejtësi në drejtim të Kabulit. 

Continue Reading

Bota

​Kanadaja njofton pako ushtarake për të ndihmuar Ukrainën

Published

on

Kryeministri i Kanadasë Mark Carney njoftoi një paketë ndihme ushtarake prej 1.46 miliardë dollarësh amerikanë për Ukrainën, ndërsa vizitoi Kievin, për të marrë pjesë në shënimin e pavarësisë së Ukrainës.

Carney ndau detajet e paketës së ndihmës ushtarake, e cila u premtua në Samitin e G7 në qershor.

Pakoja gjithëpërfshirëse e ndihmës përfshin pajisje kritike si automjete të blinduara, pajisje mjekësore, pjesë këmbimi, armë të vogla, municione dhe eksplozivë, aftësi shtesë me dronë, blerjen e pajisjeve ushtarake me prioritet nga NATO e SHBA për aftësitë e mbrojtjes ajrore, dronëve dhe kundërdronëve, duke përfshirë veprimet e përbashkëta midis industrive ukrainase dhe kanadeze.

“Ukraina është edhe një herë në vijën e parë të luftës për demokraci dhe liri. Ky është një moment kritik ku aleatët duhet të ngrihen dhe të udhëheqin, dhe Kanadaja po i përgjigjet kësaj thirrjeje”, tha kryeministri Carney.

Kanadaja mban lidhje të forta me Ukrainën, duke u bërë një nga vendet e para perëndimore që njohu pavarësinë e saj në vitin 1991 dhe duke pritur mbi 1 milion ukrainas. Që nga shkurti i vitit 2022, kur filloi agresioni ushtarak rus, Kanadaja ka angazhuar 22 miliardë dollarë kanadezë në ndihmë.

Carney gjatë vizitës në Kiev u takua me presidentin ukrainas Volodymyr Zelensky, kryeministren Yulia Svyrydenko dhe anëtarët e Kabinetit.

Njoftimi vjen mes përpjekjeve intensive diplomatike nga presidenti i SHBA-së, Donald Trump, i cili së fundmi u takua me homologun e tij rus Vladimir Putin në Alaska dhe më pas priti Zelensky me liderët evropianë në Uashington. Trump ka njoftuar planet për bisedime dypalëshe Putin-Zelensky, ndërsa garancitë e sigurisë për Ukrainën janë duke u shqyrtuar.

Continue Reading

Aktualitet

Deri në 1 orë pritje për dalje nga pika kufitare Dheu i Bardhë

Published

on

Qytetarët që po dalin nga Kosova po përballen me pritje të zgjatura në disa pika kufitare. Sipas të dhënave të fundit nga Qendra Kombëtare për Menaxhim Kufitar, pritjet më të gjata janë regjistruar në pikën kufitare në Merdarë ku ato arrijnë deri në 60 minuta.

Ndërkohë, në pikën kufitare te Dheu i Bardhë pritjet shkojnë deri në 50 minuta.

Në të gjitha pikat e tjera kufitare, pritjet janë më të shkurtra dhe variojnë nga 5 deri në 10 minuta.

Përditësimi i fundit është në ora 06:57.

 

Continue Reading

Aktualitet

Dështoi zgjedhja e tre kandidatëve të Vetëvendosjes për kryetar të Kuvendit

Published

on

Në vazhdimin e seancës konstituive, Hekuran Murati, Arbërie Nagavci dhe Dimal Basha nga Lëvizja Vetëvendosje ishin emrat që s’arritën të siguronin 61 votat e nevojshme për t’u zgjedhur në krye të Kuvendit të Kosovës.

Kjo ishte hera e dytë që Murati u propozua për këtë post dhe hera e parë për Nagavcin dhe Bashkën. Për Muratin dhe Nagavcin votuan 55 deputetë, 46 ishin kundër. Për Muratin abstenuan pesë deputetë, e për Nagavcin katër.

Ndërsa, Basha mori 57 vota për, 25 ishin kundër dhe 24 abstenuan. Ai mori votën e Arben Gashit dhe Bekë Berishës, nga partitë që mandatin e kaluar ishin në opozitë.

Seanca konstituive u ndërpre dhe do të vazhdojë më 26 gusht, duke filluar nga ora 11:00.

Vazhdimi i sotëm i seancës konstituive ishte i treti pas publikimit të aktgjykimit të plotë të Gjykatës Kushtetuese, që përcaktoi zgjedhjen e kryeparlamentarit brenda 30 ditësh përmes votimit të hapur, që kandidati i njëjtë mund të votohet vetëm tri herë dhe se të gjithë deputetët duhet të marrin pjesë në votim.

Continue Reading

Aktualitet

​Vdes 26-vjeçari në Skenderaj pasi ra nga kati i tetë i një objekti

Published

on

Një 26-vjeçar ka vdekur në Skenderaj pasi dyshohet se ka rënë nga kati i tetë i një objekti banesor. Në njoftimin e Policisë së Kosovës thuhet se rasti i rëndë tragjik ka ndodhur rreth orës 21:00.

Policia në Skenderaj është njoftuar se një person kishte rënë nga kati i tetë i një objekti banesor dhe ishte transportuar menjëherë në emergjencën e QKMF në Skenderaj.

Ekipi mjekësor ka konfirmuar se personi 26-vjeçar, i gjinisë mashkullore, si pasojë e lëndimeve të pësuara kishte humbur jetën.

Njësitë policore kanë dalë menjëherë në vendin e ngjarjes dhe po merren me hetimin e rrethanave të rastit.

Continue Reading

Të kërkuara