Reperja Cardi B ka reaguar ashpër ndaj Nicki Minajt në rrjetin social X, pasi kjo e fundit e akuzoi për manipulim të shitjeve të albumit të saj më të ri “Am I the Drama”.

Në një seri postimesh të drejtpërdrejta, Cardi e akuzoi Nickin se po e përmend vazhdimisht pa arsye, duke ironizuar rolin dhe ndikimin në industrinë e muzikës.

Ajo u shpreh se Minaj, me mbi 16 vite karrierë, duhet të krahasohet me emra të mëdhenj si Rihanna, Taylor Swift apo Drake, dhe jo me artiste që kanë nisur së fundmi rrugëtimin e tyre muzikor.

“Pse vazhdon ta përmendësh albumin tim? Ti ke qenë në industrinë e muzikës për 16 vjet. Unë isha ende në shkollë të mesme kur ti ishe tashmë në skenë. Pse më krahason mua me veten tënde?”, shkroi Cardi B.

Debati u ashpërsua më tej kur Cardi u ndal edhe në jetën personale të Minajt, duke përmendur thashethemet për shëndetin e saj dhe duke i rikujtuar publikut rastin e vëllait të saj, Jelani Maraj, i cili u dënua më 2020 me 25 vite burg për abuzim seksual ndaj një të miture.

“Vëllai yt merret me vajza 12-vjeçare”, shkroi Cardi në një nga postimet. /A.Z/UBT News/

Rita Ora ka fituar betejën ligjore kundër fqinjëve të saj për ndërtimin e një palestre moderne në kopshtin e vilës luksoze prej 7.5 milionë funtesh (8.5 milionë euro), e cila gëzon statusin e ndërtesës së mbrojtur si trashëgimi kulturore.

Planet e këngëtares 34-vjeçare shkaktuan kundërshtime të forta nga banorët lokalë, të cilët pretenduan se projekti do të prishte qetësinë e zonës dhe do të dëmtonte ambientin natyror.

Ata ngritën shqetësime për zhurmën, ndriçimin artificial dhe humbjen e privatësisë, madje një bllok banesash paraqiti një ankesë kolektive.

Banorët theksuan se dyert e mëdha me xhama e bënin objektin të ngjante si një “pavijon ndriçimi e zhurme”, duke kundërshtuar idenë se izolimi akustik do të ishte i mjaftueshëm.

Ata e cilësuan projektin një “shëmtim vizual” dhe rikujtuan deklaratat e mëparshme të Rita Orës për rëndësinë e ruajtjes së kopshtit të saj, të cilin e kishte përshkruar si një “strehë për fluturat dhe shpendët”.

Megjithatë, pavarësisht kundërshtimeve, Këshilli i Camden-it i dha dritën jeshile projektit.

Një burim pranë këngëtares tha për The Sun se Rita ka respektuar të gjitha rregullat dhe nuk kishte ndërmend të prishte qetësinë e lagjes.

Përfaqësuesit e saj nuk kanë dhënë ende një koment zyrtar. /A.Z/UBT News/

Spotify ka njoftuar një operacion të gjerë kundër keqpërdorimit të inteligjencës artificiale, duke bërë të ditur se gjatë vitit të kaluar ka hequr më shumë se 75 milionë këngë “spam”.

Sipas kompanisë, ky hap synon të mbrojë artistët nga paraqitjet e rreme, mashtrimet dhe përmbajtja e dobët e gjeneruar nga AI. Spotify ka prezantuar gjithashtu rregulla dhe mjete të reja që synojnë të mbrojnë identitetin e artistëve dhe të rrisin transparencën për dëgjuesit.

Këto masa vijnë në një kohë kur teknologjia gjenerative e AI po ndryshon rrënjësisht industrinë e muzikës, duke sjellë shqetësime për përmbajtje të padëshiruar, vokale “deepfake” dhe publikime mashtruese.

Spotify ka miratuar politikë të re që ndalon klonimin e zërit të artistëve dhe incizimet “deepfake”, përveç rasteve kur ato janë të licencuara zyrtarisht. Kompania po merr masa për të ndaluar publikimet e rreme që paraqiten si krijime të artistëve të tjerë.

Për të parandaluar manipulimet, këtë vjeshtë Spotify prezanton një sistem të ri që identifikon përmbajtjen e padëshiruar.

Ky filtër do të zbulojë llogaritë që përdorin taktika të tilla si duplikimet, këngët shumë të shkurtra dhe strategjitë mashtruese, duke i ndaluar këto materiale nga rekomandimet e platformës. Gjithashtu, Spotify mbështet standardin e ri për etiketimin e përmbajtjes së krijuar me AI, që u lejon artistëve dhe shtëpive botuese të tregojnë se si është përdorur gjatë krijimit të një kënge, qoftë tek vokalet apo instrumentalet.

Etiketat do të shfaqen direkt në aplikacion, sipas informacionit të dhënë nga distributorët dhe partnerët.

Që nga qershori, përdoruesit e Spotify vunë re një grup të ri të quajtur The Velvet Sundown, dhe shumë dyshuan se ishte i krijuar nga AI.

Megjithëse grupi e mohoi këtë në rrjetet sociale, më vonë u zbulua se këngët ishin vërtet të gjeneruara nga inteligjenca artificiale, duke treguar se publiku nuk është gjithmonë i lehtë për t’u mashtruar. /A.Z/UBT News/

Ikona e popit, Madonna, ka folur për herë të parë hapur mbi problemet serioze shëndetësore që e çuan në spital, duke ndarë detaje të dhimbshme nga ajo periudhë.

Në paraqitjen e saj të parë në një podcast, këngëtarja e njohur i tregoi Jay Shetty-t në “On Purpose” se në qershor të vitit 2023 kishte përjetuar një infeksion të rëndë bakterial, i cili e detyroi të qëndronte në kujdes intensiv.

Ajo zbuloi se kishte qenë pa ndjenja për katër ditë dhe se mjekët kryen një ndërhyrje gjatë hospitalizimit. Më herët, në dhjetor të po atij viti, Madonna u kishte rrëfyer fansave në një koncert në Brooklyn se kishte kaluar një “komë të induktuar për 48 orë”.

“Po përgatitesha për turneun tim kur papritur u përballa me një infeksion bakterial,” kujtoi ajo.

“Një moment isha duke vallëzuar, dhe momentin tjetër u zgjova në kujdes intensiv, pas katër ditësh pa ndjenja.” /A.Z/UBT News/