Të shtëna me armë kanë shpërthyer në një demonstratë në Bejrut që po kërkon largimin e një gjyqtari që drejtonte një hetim për shpërthimin vdekjeprurës të gushtit të vitit të kaluar, transmeton UBT News.

Hezbollah, grupi militant dhe politik libanez i mbështetur nga Irani, ka qenë një kundërshtar i fortë i Tarek Bitar, gjykatësit i cili po udhëheq hetimin për shpërthimin në portin e Bejrutit që vrau më shumë se 200 njerëz gushtin e kaluar.

Kryqi i Kuq Libanez tha se pesë persona janë konfirmuar të vdekur dhe më shumë se 30 të plagosur në protestë.

Të shtënat me armë ende janë duke vazhduar, sipas mediave të huaja.

Dhuna e sotme erdhi para një proteste që kërkonte largimin e një gjykatësi i cili po heton shpërthimin e portit të vitit të kaluar, shpërthim i cili ka shkaktuar tronditje pasi ka prekur edhe figura të elitës politike të Libanit.

Që nga emërimi i tij në hetim në shkurt, Tarek Bitar ka kërkuar zyrtarë të lartë politikë dhe të sigurisë për t’i marrë në pyetje.

Këtë javë Bitar lëshoi ​​një urdhër arresti për ish-ministrin e financave Ali Hassan Khalil, një zyrtar i lartë nga partia Amal, aleate e Hezbollahut, transmeton UBT News.

Ai gjithashtu ka lëshuar urdhër-arreste për ligjvënësin Nouhad Machnouk, një aleat i ish-kryeministrit Saad Hariri dhe një ish-ministër të brendshëm.

Bitar, i cili gjithashtu drejton gjykatën penale të Bejrutit, është hetuesi i dytë gjyqësor që drejton hetimin e portit. Gjyqtari i parë u shkarkua pasi dy ish-ministra të akuzuar në hetim paraqitën me sukses një mocion për largimin e tij.

Disa peticione ligjore nga zyrtarët që ndiqen për të shkarkuar Bitarin kanë qenë të pasuksesshme.

Ushtria libaneze paralajmëroi se do të qëllojë çdo person të armatosur në zonat ku kanë shpërthyer përplasjet./UBTNews/