Me një sërë aktivitetesh akademike dhe diskutimesh të thella, është përmbyllur me sukses Akademia Verore “Zhvillimi i Qëndrueshëm dhe Inovacioni në fushën e Medias”, në kuadër të Global UBT Fest. Kjo akademi shërbeu si platformë për bashkëpunim ndërmjet studentëve, ekspertëve të komunikimit dhe profesionistëve të angazhuar në mediat kosovare, duke theksuar rëndësinë e inovacionit dhe etikës në këtë fushë.

Një nga pikat e rëndesishme të akademisë ishte ligjerata e hapur me temën: “Komunikimi si mjeti më i rëndësishëm në zhvillimin dhe transformimin e shoqërisë”. Gjatë kësaj ligjërate u diskutua roli kyç i komunikimit – verbal, joverbal dhe vizual – në formësimin e marrëdhënieve sociale dhe suksesin e një shoqërie të emancipuar. U theksua se megjithëse komunikimi është i pranishëm në çdo aspekt të jetës sonë, ai shpesh merret i mirëqenë dhe nuk analizohet si proces kompleks dhe ndikues në zhvillim shoqëror.

Pjesë tjetër e rëndësishme e programit ishte edhe forumi-tryezë debati me temën “Etika në raportimin e lajmeve të ndjeshme”, që mblodhi ish-studentë të UBT të angazhuar në media të ndryshme dhe studentë aktualë të fushës së komunikimit. Në këtë diskutim u trajtuan raste konkrete të raportimit joprofesional, me fokus në pasojat që sjellin shkeljet etike në perceptimin e publikut dhe besueshmërinë e mediave.

Studentët pjesëmarrës patën mundësinë të marrin pjesë në prezantime tematike dhe debate të drejtpërdrejta, ku ndanë pikëpamjet e tyre mbi sfidat me të cilat përballen mediat në raportimin e temave të ndjeshme. Punëtoria u zhvillua për rreth dy orë dhe ofroi një ambient të hapur për shkëmbim përvojash, duke nxitur mendimin kritik dhe vetëdijen profesionale.

Akademia Verore e këtij viti dëshmoi edhe një herë përkushtimin e UBT-së në ndërtimin e një gjenerate të re gazetarësh dhe profesionistësh të medias, të pajisur me dije, etikë dhe aftësi për të ndikuar pozitivisht në zhvillimin shoqëror dhe kulturor të vendit.

Më 11 korrik 2025, përmbylli aktivitetet e saj Akademia Verore e Fakultetit Juridik të UBT, organizuar nga prodekanja e Fakultetit, Prof. Asoc. Dr. Egzone Osmanaj. Aktiviteti, i cili u zhvillua për pesë ditë radhazi, ofroi një përvojë intensive dhe gjithëpërfshirëse në fushën e ndërmjetësimit civil, penal dhe tregtar, duke përfshirë sesi teoritë përkthehen në praktikë.

Përmbyllja e Akademisë Verore u shoqërua me një vizitë studimore në Gjykatën Themelore në Prishtinë, ku studentët u pritën nga autoritete të larta të sistemit gjyqësor, përfshirë Kryetaren e Gjykatës, Albina Shabani Rama, Nënkryetaren Ilire Vitija, Administratori i Gjykatës, Shaban Gërxhaliu, dhe gjyqtarin e Departamentit Special, Ngadhnjim Arrni.

Gjatë takimit, u zhvillua një diskutim i thelluar mbi rëndësinë dhe rolin që ka ndërmjetësimi në procedurat civile, penale dhe tregtare, si dhe mbi aplikimin e tij në praktikën gjyqësore në Kosovë. Studentët patën mundësinë të mësojnë direkt nga profesionistët e sistemit gjyqësor dhe të kuptojnë përpjekjet e vazhdueshme për të përmirësuar praktikat e ndërmjetësimit.

Vizita përfshiu një ekskursion në hapësirat e brendshme të Gjykatës Themelore, duke përfshirë sallat ku mbahen seancat gjyqësore, hapësirat administrative dhe qelitë e paraburgosurve. Ky vizitë u dha mundësinë studentëve të njoftoheshin nga afër me mënyrën se si funksionon sistemi gjyqësor në Kosovë, si dhe me procedurat që ndiqen për të garantuar drejtësinë për të gjithë qytetarët.

Kjo vizitë u vlerësua si një mundësi e shkëlqyer për lidhjen e studimeve akademike me praktikën profesionale, duke u dhënë studentëve një pasqyrë të thellë të funksionimit të sistemit gjyqësor dhe të aplikimit të ndihmës ligjore në situata reale.

Akademia Verore e Fakultetit Juridik i UBT-së ofroi një mundësi të shkëlqyer për studentët që të zhvillojnë aftësitë e tyre profesionale dhe të forcojnë njohuritë e tyre përmes një kombinimi të teorisë dhe praktikës në fushën e ligjit.

Fakulteti i Shkencave të Sportit dhe të Lëvizjes i UBT-së ka përmbyllur me sukses një tjetër edicion të Akademisë Verore, duke organizuar një seri aktivitetesh dhe garash sportive gjatë javës së kaluar. Gara të tilla si volejboll, futsall dhe pingpong u mbajtën në ambientet e kampusit, duke sjellë studentët në një atmosferë dinamike dhe të ngjeshur me emocion.

Studentët tanë u angazhuan me shumë pasion dhe energji, duke krijuar një frymë të jashtëzakonshme bashkëpunimi dhe sportiviteti në garat e futsallit, ku secili ekip tregoi aftësi të larta dhe një moral të shkëlqyer sportiv. Pjesëmarrësit kontribuuan në ndërtimin e një atmosfere pozitive dhe motivuese, e cila e bëri këtë ngjarje një festë të vërtetë të sporteve.

Aktivitetet përmbyllëse të Akademisë Verore 2025 përfunduan me shpërblime për fituesit: medalje dhe kupa që simbolizuan përkushtimin dhe angazhimin e secilit pjesëmarrës. Të gjithë ata që morën pjesë në gara u shpërblyen për performancën e tyre të shkëlqyer, ndërsa atmosfera e ngrohtë e krijuar nga organizatorët dhe pjesëmarrësit ndihmoi në rritjen e motivimit dhe pasionit për sport.

Një grup studentësh të Fakultetit të Stomatologjisë në UBT, në bashkëpunim me Prof. Ass. Dr. Jeta Kiseri Kubati, kanë publikuar me sukses një hulumtim të rëndësishëm në revistën shkencore të Odës së Stomatologëve të Kosovës (OSK), në numrin 4 të saj.

Studimi, me titull “Perceptimi i ankthit stomatologjik te studentët e Kolegjit UBT në Prishtinë”, ofron një vështrim të thelluar mbi përjetimet emocionale të studentëve përballë trajtimeve dentare dhe shkaqet kryesore të ankthit në këtë kontekst.

Hulumtimi u realizua përmes një ankete të dërguar me email, që përfshinte 17 pyetje dhe u plotësua nga 120 studentë të programeve të ndryshme në UBT, përfshirë stomatologjinë, farmacinë, ekonominë, arkitekturën, shkencat kompjuterike dhe të tjera.

Studimi arrin në përfundimin se komunikimi ndërmjet dentistit dhe pacientit, si dhe përdorimi i metodave të qasjes së ndjeshme, janë çelësi për reduktimin e frikës dhe përmirësimin e përvojës dentare.

Ky publikim është një kontribut i rëndësishëm akademik dhe profesional, që jo vetëm pasuron literaturën shkencore të fushës së stomatologjisë në Kosovë, por edhe fuqizon rolin kërkimor të studentëve të UBT-së në nivel vendor dhe ndërkombëtar.

Autorë të studimit janë: Yllka Rugova, Festina Bala, Rudina Kurteshi, Delvina Panxhaj dhe Jeta Kiseri Kubati. Ky është një tjetër dëshmi se në UBT, edukimi shoqërohet me kërkim, ndërsa teoria lidhet drejtpërdrejt me praktikën dhe inovacionin në shërbim të pacientit dhe shëndetit publik.