Galeria Kombëtare e Kosovës do të rihapë dyert për publikun më 9 korrik, në orën 19:00, pas përfundimit të procesit të rinovimit dhe zgjerimit, i cilësuar si më i rëndësishmi në historinë e saj të pasluftës.

Si institucioni qendror i vendit për artin modern dhe bashkëkohor, Galeria Kombëtare e Kosovës do ta shënojë këtë moment me një ceremoni të hapur për të gjithë qytetarët.

Rihapja pritet të shënojë një kapitull të ri për institucionin, duke ofruar hapësira të përmirësuara për ekspozita, aktivitete artistike dhe programe kulturore, në funksion të zhvillimit dhe promovimit të artit bashkëkohor në Kosovë.

Ngjarja do të mbahet më 9 korrik, duke filluar nga ora 19:00, ndërsa hyrja do të jetë e lirë për të gjithë të interesuarit./A.K/

Orkestra e Fëmijëve dhe të Rinjve “Amadeus” do të përfaqësojë Kosovën në Festivalin Ndërkombëtar “Musica Orbis Festivals 2026”, i cili mbahet në Pragë të Çekisë.

Lajmin e kanë bërë të ditur drejtuesit e orkestrës, duke njoftuar se kjo paraqitje vjen pas një sërë sukseseve dhe vlerësimeve të marra në gara të ndryshme ndërkombëtare.

Gjatë festivalit, Orkestra “Amadeus” do të marrë pjesë në koncertin e hapjes, koncertin gala, si dhe në garën ndërkombëtare të orkestrave, e cila konsiderohet një nga momentet më të rëndësishme të këtij aktiviteti.

Përveç performancave, anëtarët e orkestrës do të kenë mundësi të marrin pjesë edhe në masterklasa me dirigjentë dhe anëtarë të jurisë së festivalit.

Ceremonia e ndarjes së çmimeve do të mbahet të shtunën, më 11 korrik 2026, në orën 19:30, në “National House of Vinohrady” në Pragë.

Sipas drejtuesve të orkestrës, pjesëmarrja në këtë festival është rezultat i muajve të tërë punë, disipline dhe përkushtimi të të rinjve që përmes muzikës do të prezantojnë Kosovën në skenën ndërkombëtare.

Orkestra “Amadeus” ka ftuar bashkatdhetarët që jetojnë në Pragë dhe zonat përreth që t’i bashkohen koncerteve të tyre dhe të mbështesin këtë paraqitje të rëndësishme./A.K/

Ministrja e Kulturës dhe Turizmit, Saranda Bogujevci, së bashku me sekretarin e MKT-së, Bislim Bislimi, kanë zhvilluar takim me tenorin Ramë Lahaj, fotografin Fadil Berisha dhe ekipin organizues të Festivalit Ndërkombëtar të Operës “Ramë Lahaj”.

Në takim është diskutuar për edicionin e gjashtë të festivalit, i cili tashmë ka nisur dhe gjatë muajit korrik do të sjellë në Prishtinë dhe qytete të tjera të Kosovës një program të pasur artistik.

Festivali synon ta shndërrojë Kosovën në një pikë të rëndësishme të operës dhe kulturës, duke sjellë artistë dhe aktivitete që promovojnë skenën muzikore vendore dhe bashkëpunimin ndërkombëtar.

Ministrja Bogujevci ka vlerësuar kontributin e Festivalit Ndërkombëtar të Operës “Ramë Lahaj” në promovimin e kulturës së Kosovës dhe në forcimin e lidhjeve artistike me botën.

Ajo i ka uruar sukses Ramë Lahajt dhe gjithë ekipit organizues për edicionin e radhës të festivalit./A.K/

Nëse jeni në kërkim të një libri që ndërthur aventurën, filozofinë dhe frymëzimin, “The Alchemist” nga Paulo Coelho është një nga veprat që nuk duhet t’i mungojë listës suaj të leximit.

I botuar për herë të parë në vitin 1988, romani rrëfen historinë e Santiagos, një bariu të ri nga Andaluzia, i cili niset në një udhëtim për të gjetur një thesar të fshehur pranë piramidave të Egjiptit. Gjatë rrugës, ai përballet me sfida, takon njerëz që ndryshojnë mënyrën e tij të të menduarit dhe kupton se thesari më i madh shpesh gjendet brenda vetes.

“The Alchemist” është përkthyer në dhjetëra gjuhë dhe ka shitur miliona kopje në mbarë botën, duke u bërë një nga romanet më të suksesshme dhe më të dashura të letërsisë bashkëkohore.

Mesazhi kryesor i librit është se secili duhet të ndjekë ëndrrat e tij, të mos dorëzohet përballë pengesave dhe të besojë se çdo udhëtim sjell mësime të vlefshme.

Me një stil të thjeshtë, por plot simbolikë dhe reflektime për jetën, “The Alchemist” mbetet një vepër që frymëzon lexues të të gjitha moshave dhe vazhdon të jetë një nga librat më të rekomanduar në botë.

Për këdo që dëshiron një lexim motivues dhe plot kuptim, “The Alchemist” është zgjedhja ideale për librin e kësaj jave./A.K/