Sport

Bayern Munich synon titullin e gjashtë të sezonit 2019/20

Published

on

Një përshkrim i thjeshtë i sezonit 2019/20 të Bayern Munichut, mund të kufizohet me fjalët: rekorde, rekorde dhe më shumë rekorde. Bavarezët vendosën një pikë referimi përgjatë edicionit të 56-të të Bundesligës dhe e kurorëzuan sezonin me një arritje historike, duke fituar “tripletën” e përbërë nga trofetë e Bundesligës, Kupës së Gjermanisë dhe Ligës së Kampionëve.

Kjo ishte vetëm hera e dytë në histori të Bayernit pasi bavarezët një arritje të tillë e bën në vitin 2013. Mirëpo, Bayerni nuk u ndal me kaq në edicionin e fundit pasi ia shtoi koleksionit të trofeve edhe dy të tjerë. Arriti të triumfojë në Superkupën e Gjermanisë dhe atë të Evropës.

Këtë sukses të pesëfishtë Bayerni po synon ta shndërrojë në sukses të gjashtëfishtë. Në fillim të shkurtit, Bayerni do të udhëtojë në Katar për të marrë pjesë në Botërorin e klubeve dhe me sukses në këtë garë të FIFA-s, Bayerni do të përmbyllte një edicion të pabesueshëm.

“Ne kemi punuar shumë dhe të gjitha këto suksese janë fryt i punës sonë që e kemi bërë. Kështu që do të ishte fantastike të dalim të parët edhe muajin tjetër në Katar”, është shprehur trajneri i Bayernit, Hansi Flick.

Rrugëtimi i Bayernit mori kthesë në mënyrë dramatike kur drejtuesit e klubit e emëruan Hansi Flickun si trajner të ekipit. Para kësaj, Flick 55-vjeçar ka qenë ndihmës i Niko Kovaqit, i cili u shkarkua pas humbjes së thellë të Bayernit (5:1) nga Eintracht Frankfurti në fillim të muajit nëntor të vitit 2019. Shtatë muaj pasi Flick mori frenat, Bayerni fitoi titullin e kampionit për herën e tetë rresht, të cilin e siguroi dy xhiro para fundit. Flicku e ka udhëhequr skuadrën e tij drejt fitores në 88 për qind të ndeshjeve të Bundesligës që nga emërimi i tij (21 nga 24), duke i dhënë atij bilancin më të mirë fitues të çdo trajneri në historinë e ligës. Robert Lewandowski shënoi 34 gola për të përfunduar si golashënuesi më i mirë i Bundesligës për të pestën herë në shtatë sezonet e fundit. Gerd Muelleri është i vetmi lojtar tjetër që ka fituar çmimin e golashënuesit më të mirë në të paktën pesë raste, duke e arritur shtatë herë.

Pas titullit, erdhi triumfi në Kupën e Gjermanisë. Në finale, Bayerni e mposhti Bayer Leverkusenin (4:2) në fillim të korrikut të vitit të shkuar për ta ngritur trofeun për herën e 20-të. Pasoi suksesi në Evropë, saktësisht Ligën e Kampionëve. Skuadra e trajnerit Flick kishte një bilanc të përsosur në Evropë në sezonin 2019/20, duke fituar të gjitha 11 ndeshjet dhe duke shënuar 43 gola karshi tetë të pësuarve – një arritje e paparë në historinë e Ligës së Kampionëve. Turneu final në Lisbonë ishte në të vërtetë një paradë triumfi për Bayernin, i cili poshtëroi Barcelonën (8:2) në çerekfinale përpara se të triumfonte në finale ndaj Paris Saint-Germainit me rezultatin minimal, 1:0. Kingsley Coman u bë i njohur te Bayerni me nofkën “Mr. Lisbon” pasi francezi shënoi golin e fitores në finale, me kokë, pas harkimit të Joshua Kimmichut, më 23 gusht të vitit të shkuar.

“Sukseset e fundit janë një arritje e jashtëzakonshme dhe do të ishte fantastike nëse pesë trofeve të fituar ia shtojmë edhe atë të botërorit të klubeve”, shtoi Coman.

Me suksesin në Champions, u mbyll edhe sezoni 2019/20. Pas një pushimi të shkurtër veror, Bayerni u kthye me stil dhe sezonin e ri e nisi me fitore në ndeshjen e parë zyrtare. Mposhti nënkampionin në fuqi të Bundesligës, Borussia Dortmundin (3:2) për ta fituar për herën e tetë Superkupën e Gjermanisë. Nuk shkoi shumë kohë dhe bavarezët e rrëmbyen edhe trofeun e dytë, atë të Superkupës së Evropës pas fitores 2:1 ndaj Sevillas, ekip që kishte triumfuar në Ligën e Evropës.

“Dëshira ime ishte të shpallem trajneri më i mirë i vitit, por më gëzon fakti që lojtarët e ekipit tim dolën më të mirët në kategoritë e tyre”, shtoi Flicku.

Në të vërtetë, Bayerni dominoi edhe në çmimet e ndara nga FIFA për më të mirët e vitit 2020. Sulmuesi Lewandowski u shpall lojtari më i mirë derisa epiteti i portierit më të mirë të vitit i takoi Manuel Neuerit. Trajneri Flick ishte në mesin e tre më të mirëve, por në fund çmimin e fitoi Juergen Kloppi. Katër lojtarë të Bayernit u përfshinë në 11-shen më të mirë të vitit.

Tani, fokusi i Bayernit do të jetë në Doha, ku prej datës 1 deri më 11 shkurt do të mbahet Botërori i klubeve. Te Bayerni po synojnë ta fitojnë këtë trofe, të cilin e fituan në vitin 2013 për herën e fundit. Që nga viti 2000, kur nisi të mbahet ky turne, skuadrat nga Evropa kanë triumfuar 12 herë, kurse katër herë suksesin e kanë shijuar ekipet nga Amerika e Jugut. Finalja e këtij edicioni të botërorit të klubeve do të mbahet në “Education City Stadium” të Dohas. Çiftet do të përcaktohen më 19 janar, kur do të tërhiqet shorti në Zuerich, në selinë e FIFA-s. Krahas Bayernit, në këtë turne do të paraqiten edhe skuadrat si Ulsan Hyundai FC (Koreja e Jugut), Al Ahly SC (Egjipt), Tigres UANL (Meksikë), Auckland City FC (Zelandë e Re) e Al Duhail SC (Katar). Ndërkohë, përfaqësuesi nga Amerika e Jugut do të përcaktohet më 31 janar.

Lajmet

Kurti: Mungesa e unitetit me Komunën e Prishtinës po e rrezikon organizimin e Lojërave Mesdhetare 2030

Published

on

By

Kryeministri i Kosovës, Albin Kurti, ka paralajmëruar se mungesa e unitetit institucional dhe mospajtimet me Komunën e Prishtinës po e vështirësojnë organizimin e Lojërave Mesdhetare “Prishtina 2030”.

Për këtë ka folur Kurti, i cili ka bërë të ditur se bashkëpunimi me Komitetin Olimpik të Kosovës është shumë i mirë, por situata është ndryshe në raport me Komunën e Prishtinës, raporton Ekonomia Online.

Gjatë deklarimit të tij, Kurti ka kritikuar edhe përplasjet publike pas mbledhjeve të Këshillit Organizativ, duke theksuar se vendimet dhe diskutimet e brendshme nuk duhet të shoqërohen me akuza dhe sulme mes palëve.

Ai ka thënë se vazhdon të jetë optimist për mbajtjen e lojërave, por e ka cilësuar optimizmin e tij si të përmbajtur, për shkak të mospajtimeve dhe mungesës së bashkëpunimit institucional.

“Ne duhet të jemi unikë për këtë gjë dhe kjo mungesë e unitetit të brendshëm na ka sjellë në këtë pikë, kur edhe po rrezikohet organizimi i Lojërave Mesdhetare 2030”, ka deklaruar Kurti.

Kreu i Qeverisë e ka cilësuar fitore të madhe faktin që Kosova ka marrë përsipër organizimin e kësaj ngjarjeje sportive, duke përmendur përfshirjen e dhjetë komunave të Kosovës dhe të Durrësit nga Shqipëria në projekt.

Ai ka theksuar se planifikimet për investime dhe projekti mbi të cilin Kosova ka fituar të drejtën e organizimit duhet të zbatohen në tërësi, ndërsa ka pranuar se mes palëve ka dallime, mospajtime dhe mungesë besimi.

“Do ta bëjmë më të mirën e mundshme, por do ta bëjmë me çdo kusht, pa korrupsion”, ka përfunduar Kurti.

D.L

Continue Reading

Sport

Dion Kaçuri mund të largohet përfundimisht nga Baseli, Austria Lustenau synon ta mbajë

Published

on

By

Dion Kaçuri mund të mos rikthehet te Baseli pas përfundimit të huazimit, pasi Austria Lustenau ka mundësinë ta blejë përfundimisht mesfushorin kosovar gjatë verës së ardhshme.

22-vjeçari po kalon një periudhë të mirë te skuadra austriake, ku është shndërruar në një futbollist të rëndësishëm në repartin e mesfushës, duke luajtur në rolin e mesfushorit defensiv.

Madje, Kaçuri ka fituar edhe besimin për të mbajtur shiritin e kapitenit në një prej ndeshjeve të skuadrës.

Për paraqitjet e tij ka shkruar edhe mediumi zviceran “4-4-2”, i cili thekson rëndësinë që mesfushori ka fituar te Austria Lustenau, duke përmendur edhe ftesën e tij të parë në tetor nga përzgjedhësi Franco Foda për Përfaqësuesen e Kosovës.

Në fanellën e skuadrës austriake, Kaçuri ka regjistruar deri më tani dy gola dhe një asistim.

Ndërkohë, me Baselin ai ka kontratë të vlefshme deri në vitin 2028, por aktivizimi i mundësisë së blerjes nga Austria Lustenau mund të bëjë që aventura e tij në Zvicër të përfundojë përfundimisht.

Në nivel ndërkombëtar, mesfushori tashmë ka tri paraqitje me Përfaqësuesen e Kosovës.

D.L

Continue Reading

Lajmet

Lushaku-Sadriu ngre shqetësimin për Lojërat Mesdhetare “Prishtina 2030”: Kosova rrezikon të mos i organizojë

Published

on

By

Kosova rrezikon të mos jetë nikoqire e Lojërave Mesdhetare “Prishtina 2030”, për shkak të mos përmbushjes së obligimeve institucionale dhe vonesave në procesin e përgatitjeve.

Për këtë ka ngritur shqetësim shefja e Grupit Parlamentar të Lidhjes Demokratike të Kosovës (LDK), Jehona Lushaku-Sadriu, gjatë seancës së Kuvendit, raporton Ekonomia Online.

Ajo ka theksuar se anulimi i takimit të paraparë të mbahej të enjten në Athinë, ku pritej të përcaktoheshin përgjegjësitë për organizimin e lojërave, është një tjetër sinjal shqetësues për të ardhmen e këtij projekti.

Sipas Lushaku-Sadriut, organizimi i Lojërave Mesdhetare do të përbënte një mundësi të rëndësishme për zhvillimin e sportit, turizmit dhe investimeve në infrastrukturën sportive të vendit.

Ajo ka paralajmëruar se papërgjegjësia institucionale mund ta rrezikojë realizimin e një projekti që do ta vendoste Kosovën në qendër të vëmendjes sportive dhe kulturore, duke sjellë mijëra sportistë dhe vizitorë ndërkombëtarë.

Lushaku-Sadriu ka përmendur edhe shqetësimet e ngritura nga Komiteti Olimpik i Kosovës lidhur me obligimet e papërmbushura nga institucionet, duke kërkuar përgjegjësi dhe angazhim më të madh për realizimin e këtij projekti.

Ajo ka vlerësuar se Kosova nuk duhet ta humbasë këtë mundësi për ndërtimin e sallave, stadiumeve dhe qendrave të reja sportive, të cilat do të kishin ndikim afatgjatë në zhvillimin e sportit në vend.

D.L

Continue Reading

Sport

Infantino për herë të parë me rivalë në garën për presidencën e FIFA-s

Published

on

By

Gianni Infantino do të përballet për herë të parë me kundërkandidat në garën për rizgjedhjen në krye të FIFA-s, që nga marrja e presidencës në vitin 2016.

FIFA ka konfirmuar zyrtarisht se Philippe Diallo, president i Federatës Franceze të Futbollit (FFF), dhe Kozo Tashima, president i Federatës Japoneze të Futbollit, kanë paraqitur kandidaturat për zgjedhjet që do të mbahen në mars të vitit 2027.

Diallo e bëri publike kandidaturën të hënën, duke siguruar mbështetjen e federatave anëtare të UEFA-s të përfaqësuara në organet drejtuese të FIFA-s. Ndërkohë, Tashima kishte shprehur interesimin për këtë post më herët gjatë muajit, ndërsa kandidaturën zyrtare e dorëzoi të mërkurën.

Megjithatë, të dy kandidaturat duhet t’i nënshtrohen fillimisht shqyrtimit nga komisioni zgjedhor i FIFA-s, i cili do të vendosë për pranimin e tyre.

Sipas njoftimit të FIFA-s, lista përfundimtare e kandidatëve të propozuar dhe të pranuar do t’u dërgohet federatave anëtare jo më vonë se 18 shkurti 2027.

Kjo do të jetë hera e parë që Infantino do të ketë kundërshtarë në garën presidenciale, pasi në vitin 2023 ishte rizgjedhur pa asnjë rival.

Presidenti 56-vjeçar është përballur kohëve të fundit me kritika dhe thirrje për dorëheqje, pas polemikave rreth projektit FIFA Forward Enterprise (FFE), përmes të cilit ishte propozuar shitja e aksioneve në Kupën e Botës dhe gara të tjera madhore të organizuara nga FIFA.

Një zhvillim interesant në këtë garë është edhe fakti se Philippe Diallo, i cili mori drejtimin e Federatës Franceze të Futbollit në vitin 2023, më herët kishte luajtur rol të rëndësishëm në sigurimin e mbështetjes evropiane për Infantinon lidhur me këtë projekt.

Pavarësisht kritikave dhe kundërkandidatëve të mundshëm, Infantino mbetet optimist për rizgjedhjen, duke shprehur bindjen se ka mbështetjen e mjaftueshme të federatave anëtare për të siguruar një mandat tjetër në krye të futbollit botëror.

D.L

Continue Reading

Të kërkuara