Mesfushori anglez i Borussia Dortmundit, Jude Bellingham është shpallur lojtari i sezonit në Bundesligë.

Bellingham ishte kyç në luftën e titullit për skuadrës së tij, por një barazim 2-2 me Mainzin në xhiron e fundit të sezonit i bëri ata të humbasin ndaj Bayern Munich.

Ai shënoi tetë gola dhe pesë asistime në 31 paraqitje në ligë këtë sezon pasi Dortmundi përfundoi si nënkampion.

“Çdo vit që kam luajtur në këtë klub përgjegjësia ime është rritur”, tha Bellingham.

“Më duhet të vazhdoj të jem kudo në fushë dhe të përpiqem të jap maksimumin tim për të kontribuar në sulm dhe mbrojtje dhe të përpiqem të kontrolloj lojën dhe të dominoj mesfushën. Shokët e mi të skuadrës, trajnerët dhe stafi më kanë ndihmuar të zhvillohem. Erdha në klub si një djalë i talentuar, por kam shtuar elementë në lojën time që e kanë çuar atë në një nivel tjetër dhe mendoj se kjo u takon atyre kryesisht”, ka thënë 19 vjeçari.

Bellingham pritet t’i bashkohet Real Madridit këtë verë në një marrëveshje me vlerë mbi 100 milionë euro.

Ai iu bashkua Dortmundit nga Birmingham City në vitin 2020 për 25 milionë funte dhe ka bërë mbi 130 paraqitje për klubin.

Bellingham ka bërë 24 paraqitje për Anglinë dhe ishte një nga lojtarët më të spikatur për skuadrën e Gareth Southgate në garën e tyre deri në çerekfinale në Kupën e Botës në Katar.

Napoli është në kërkim të një trajneri të ri pasi Luciano Spalletti ka kërkuar të largohet nga klubi edhe pse ia doli që ta fitojë titullin e kampionit në Itali.

Presidenti i Napolit, Aurelio De Laurentis tha dje për mediat italian se Spalletti ka kërkuar vet që të largohet nga klubi edhe pse kishte edhe një vit të mbetur në kontratën e tij.

“Spalletti kërkoi të largohej nga Napoli”, tha shkurtimisht De Laurentis.

Si rezultat i kësaj situate, Napoli tani duhet të gjejë një trajner të përshtatshëm për të zëvendësuar Spallettin, duke shpresuar të vazhdojë projektin dhe të konfirmojë rritjen e nivelit të skuadrës.

Siç raportohet nga “Calciomercato”, Napoli tani është i përqendruar në emërimin e Luis Enriques si trajner të ri të tyre, duke përgatitur një kontratë dyvjeçare me vlerë 10 milionë euro neto në sezon për spanjollin.

De Laurentis është i gatshëm të garantojë të ardhmen e Khvicha Kvaratskhelia dhe Victor Osimhen gjithashtu, duke shpresuar se prania e dy yjeve do të bindë më tej Luis Enriques për të pranur ofertën. Shpresa është të përcaktohet një marrëveshje gjatë kësaj jave.

Nëse Napoli nuk arrin të sigurojë Luis Enrique-n, ata do të përqendrohen në objektivat e tyre të tjerë, si Thiago Motta i Bolonjës dhe Vincenzo Italiano i Fiorentinës .

Federata e Futbollit e Kosovës ka ndarë çmimin “Ylli i javës” për xhiron e 36-të në Superligën e Kosovës në futboll që shënoi edhe fundin e sezonit 2022/23.

Ky çmim i takoi portierit të Malishevës, Flamur Gashi. Pasi mori këtë çmim, Gashi u shpreh i lumtur që skuadra e tij e përmbushi me sukses misionin e saj për mbetje në elitë.

“Ndihem shumë mirë dhe i lumtur për këtë vlerësim dhe dua t’i falënderoj bashkëlojtarët e skuadrës dhe shtabin teknik pa të cilët sigurisht se nuk do të mund ta fitoja këtë çmim. Shpresoj se ky çmim, i cili është i pari për mua, nuk do të jetë i fundit, ndonëse të shpërblehesh në fund të kampionatit është qershia mbi tortë. Me lojën e djeshme e kemi mbyllur kampionatin me sukses si ekip por edhe në aspektin individual. Kemi merituar më shumë, por ky është futbolli dhe duhet të jemi të lumtur me atë që kemi arritur”, ka thënë Flamur Gashi për faqen zyrtare të FFK-së.

Malisheva e mbylli sezonin me 46 pikë, duke u renditur në vendin e gjashtë me 46 pikë, derisa në ndeshjen e fundit e mposhti Llapin me rezultat 3-2.

Kylian Mbappé ka folur edhe zyrtarisht për të ardhmen e tij pas shumë spekulimeve gjatë muajve të fundit.

Ai ka bërë të ditur se do të vazhdojë të qëndrojë në Paris-Saint-Germain.

“Nuk ka më dyshime për të ardhmen time? Jam shumë i lumtur këtu dhe me zgjedhjen time për të qenë pjesë e këtij projekti. Do të jem këtu në PSG sezonin e ardhshëm”, sqaroi Mbappé.

Ai theksoi se ndihet i privilegjuar që është pjesë e gjigantit francez.

“Është një privilegj për mua të luaj në PSG. Falënderoj stafin, presidentin, njerëzit në prapaskenë që na lejojnë të jemi në kushtet më të mira dhe të vazhdojmë të fitojmë”, tha në fund ai.