Sport

Basketbollistet e Kosovës të etura për sukses në arenën ndërkombëtare

Published

6 years ago

August 18, 2020

Esad Dujaka

Kosova A (femrat) pritet të marrë pjesë në FIBA Kampionatin Evropian të Shteteve të Vogla, që do të organizohet në vitin e ardhshëm në Nicosia të Qipros prej 15 deri më 20 Qershor.

Bordi i Federatës së Basketbollit të Kosovës, detyrën e përzgjedhësit ia ka besuar Fidan Shatrit, i cili më herët ka qenë përzgjedhës i Kosovës U16, U18, U20 te femrat, derisa tani edhe i Kosovës A (femrat).

Shatri ka fituar pesë trofe me KBF Prishtinën dhe për vite të tëra ka punuar në basketbollin e femrave në Kosovë.

Në një intervistë për faqen zyrtare të FBK-së, ai flet për formimin e Kosovës A te femrat, pjesëmarrjen në garat ndërkombëtare dhe synimet.

Sa është e rëndësishme formimi i Kosova A (Femrat)?

Fidan Shatri: Formimi i Përfaqësues A të femrave është shumë i rëndësishëm, sepse vashat tona fitojnë përvojë në garat ndërkombëtare dhe kemi mundësi të shohim se në çfarë niveli jemi në krahasim me vendet tjera. Gjithashtu është një motivim për lojtaret e reja, që të ‘luftojnë’ për 12-shen më të mirë të Kosovës, sepse deri më tani një gjë e tillë nuk ka ndodhur.

Sa ka rëndësi pjesëmarrja në garat ndërkombëtare?

Fidan Shatri: Në garat ndërkombëtare basketbollistet e Kosovës do të fitojnë përvojë, që do të ju ndihmoj shumë atyre në të ardhmen. Është shumë e rëndësishme të përfaqësosh shtetin tënd në garat ndërkombëtare. Besoj se do të japim maksimumin tonë në çdo paraqitje në arenën ndërkombëtare.

Sa ndihmon kjo basketbollin e femrave në Kosovë?

Fidan Shatri: Për të gjitha lojtaret është një motivim shumë i madh, në mënyrë që të luajnë për Kosovën A. Shumë gjenerata kanë ëndërruar për këtë ditë që të luajmë në arenën ndërkombëtare, ndërsa ne do të kemi fatin që të prezantojmë vendin në vitin e ardhshëm. Mendoj se edhe për vashat e Kosovës është një motivim i madh që të luajnë për Kosovën A. Ato e dinë rëndësinë dhe besoj se do të japin maksimumin.

Ku do të jetë fokusi juaj?

Fidan Shatri: Ne do të mundohemi të kemi paraqitje sa më të mira. Sigurisht se nuk do të jetë lehtë për shkak se, është hera e parë. Do të mundohemi të krijojmë një ekip, me lojtare me përvojë, por edhe me ato më të reja në moshë që premtojnë shumë në të ardhmen. Kemi disa basketbolliste që luajnë jashtë Kosovës, që mund të grumbullohen, por edhe nga Superliga e Femrave.

Cilat janë synimet?

Fidan Shatri: Qëllimi ynë është të krijojmë një skuadër për të ardhmen. Na mungon përvoja në gara të tilla, por sigurisht se nuk do të luajmë me flamur të bardhë. Synimet janë të fitojmë përvojë, por edhe për paraqitje dinjitoze në garat ndërkombëtare. Besoj se angazhimi do të jetë maksimal nga të gjithë, sepse dëshira është e madhe për të pasur sukses në arenën ndërkombëtare.

Në FIBA Kampionatin Evropian për Shtetet e Vogla-Femrat në vitin 2020 janë paraqitur për të garuar: Andorra, Qipro, Gjibraltari, Irlanda, Luksemburgu, Malta dhe Norvegjia, por që u anulua për shkak të pandemisë Covid-19. Regjistrimi i shteteve për pjesëmarrje në FIBA Kampionate Evropiane në FIBA Europe do të bëhet si zakonisht, pra ndërmjet muajve Shtator/Tetor 2020.

FIBA Evropa ka kërkuar nga të gjitha Federatat Nacionale që të regjistrojnë ekipet e tyre për vitin 2021, pasi regjistrimet e paraqitura për vitin 2020 nuk do të merren parasysh.

Sport

Pas 19 ditësh, rikthehet Superliga e Kosovës

Published

2 hours ago

October 8, 2026

UBTNews

Pas 19 ditësh pauzë, këtë të premte rikthehet aksioni në Superligën e Kosovës në futboll me ndeshjet e xhiros së tetë.

Kjo ishte pauza më e gjatë në kampionatin kosovar gjatë dekadës së fundit dhe erdhi si pasojë e grumbullimit të përfaqësueses së Kosovës për katër ndeshjet e Ligës së Kombeve.

Xhiroja e tetë hapet me dy ndeshje. Në Podujevë, Llapi nga ora 14:00 pret Ballkanin, ndërsa në Gjilan, nga ora 18:00, Drita përballet me Malishevën.

Llapi vjen pas një forme të dobët, me vetëm një fitore në shtatë ndeshje. Skuadra e Tahir Batatinës pësoi humbje 4:0 nga Drenica në ndeshjen e fundit para pauzës.

“Besoj se na ka shërbyer për të mirë kjo pauzë, sepse janë kthyer nga lëndimet lojtarët dhe jemi të kompletuar si skuadër. Kishim pesë lojtarë të lënduar në fillim të kampionatit. Jemi gati”, ka thënë Batatina.

Edhe Ballkani nuk ka fituar në tri ndeshjet e fundit. Therandasit kanë humbur nga Malisheva dhe Gjilani, ndërsa kanë barazuar pa gola me Dukagjinin.

Ndërkohë, Malisheva renditet e dyta me 16 pikë, dy më pak se liderja Prishtina, por me një ndeshje më shumë të zhvilluar. Megjithatë, skuadra ka mbetur pa trajner pas largimit të Thomas Brdariq, i cili u prezantua te një klub i kategorisë së dytë në Arabinë Saudite.

Në përballjen ndaj Dritës, Malisheva do të drejtohet nga ndihmësi i Brdariqit, Kastriot Rexha. Drita, kampionia në fuqi, në ndeshjen e fundit mposhti Dukagjinin.

Të shtunën zhvillohen dy ndeshje të tjera: Vushtrria – Gjilani nga ora 14:00 dhe Drenica – Feronikeli 74 nga ora 18:00.

Xhiroja mbyllet të dielën me duelin Prishtina – Dukagjini, që nis në ora 18:00.

Xhiroja e tetë:

E premte
Llapi – Ballkani (14:00)
Drita – Malisheva (18:00)

E shtunë
Vushtrria – Gjilani (14:00)
Drenica – Feronikeli 74 (18:00)

E diel
Prishtina – Dukagjini (18:00)

D.L

Sport

Kurti pret legjendën e Prishtinës, Xhevdet Muriqin

Published

2 hours ago

October 8, 2026

UBTNews

Kryeministri i Kosovës, Albin Kurti, ka pritur në zyrën e tij legjendën e FC Prishtinës, Xhevdet Muriqi, me të cilin ka kujtuar vitet e arta të klubit nga kryeqyteti.

Kurti ka treguar se Muriqin e ka përcjellë nga afër në stadium, por edhe përmes radios e televizorit, ndërsa takimi i tyre i ka rikthyer te ndeshjet, emocionet dhe golat e paharrueshëm të viteve të 80-ta.

Gjatë bisedës, ata kanë diskutuar edhe për figura të njohura të asaj gjenerate, si Fadil Vokrri, Kujtim Shala dhe trajneri Qiro Bllazheviq, si dhe për vëllain e Xhevdetit, Fadil Muriqin, i cili jeton në Australi.

Muriqi kaloi 28 vite duke jetuar e punuar në Kroaci dhe 12 të tjera në Gjermani, ndërsa vitin e kaluar u rikthye për të jetuar në Kosovë.

Kurti ka thënë se FC Prishtina në atë kohë i mblidhte tifozët në stadium, por edhe pranë radios e televizorit, ndërsa sukseset dhe humbjet e klubit përjetoheshin me të njëjtin emocion.

Në takim është diskutuar edhe për futbollin aktual, me Kurtin dhe Muriqin që kanë folur për paraqitjet e fundit të Kosovës, ngritjen e përfaqësueses dhe ndeshjet e radhës që e presin Kosovën gjatë muajit nëntor.

D.L

Sport

Jeta Zeka, gjyqtarja e parë kosovare në garat evropiane të FIBA-s

Published

3 hours ago

October 8, 2026

UBTNews

Jeta Zeka ka shkruar historinë në basketbollin kosovar, duke u bërë gjyqtarja e parë femër nga Kosova që do të ndajë drejtësinë në garat evropiane të klubeve të FIBA-s.

Gjyqtarja nga Peja është nominuar për dy ndeshje të FIBA EuroCup Women, të cilat do të zhvillohen në Itali.

Më 14 tetor, Zeka do të jetë pjesë e ndeshjes Magnolia Basket Campobasso – Cinkarna Celje, në Campobasso.

Ndërsa më 21 tetor, ajo do të ndajë drejtësinë në përballjen GEAS Basket SSDRL – Panathinaikos A.C., në Milano.

Kjo përbën një arritje të rëndësishme për Zekën dhe një moment të veçantë për basketbollin kosovar, duke shënuar një tjetër hap të grave nga Kosova në skenën evropiane.

D.L

Sport

Xhaka dënohet për falsifikimin e certifikatave të COVID-19

Published

3 hours ago

October 8, 2026

UBTNews

Kapiteni i Zvicrës, Granit Xhaka, është dënuar për falsifikimin e certifikatave të vaksinimit kundër COVID-19.

34-vjeçari e bëri të ditur vendimin përmes një postimi në Instagram, duke treguar se është dënuar me 50 tarifa ditore nga 3 mijë franga, me kusht për një periudhë prove prej dy vitesh.

Kjo do të thotë se Xhaka nuk do të duhet ta paguajë gjobën, për sa kohë që gjatë periudhës së provës nuk kryen ndonjë vepër tjetër penale. Ai ka paguar tashmë shpenzimet gjyqësore.

Xhaka pranoi se kishte falsifikuar dy certifikata vaksinimi gjatë pandemisë, rast i cili ishte bërë publik pas një hetimi nga Prokuroria Publike e Luzernit.

“E pranoj vendimin dhe marr përgjegjësinë”, ka shkruar Xhaka në Instagram.

D.L