Përzgjedhësi i Argjentinës, Lionel Scaloni, nuk arriti t’i përmbante emocionet pas humbjes 1-0 ndaj Spanjës në finalen e Kupës së Botës 2026, duke e ndërprerë para kohe konferencën për shtyp.

Sipas raportimit të Stan Sport Football, tekniku argjentinas u shfaq i prekur teksa foli për rrugëtimin e ekipit dhe sfidën e madhe për të ndërtuar sërish një skuadër si kjo.

“Të gjithë ne në stafin teknik kemi menduar për të qenë në këtë moment. Por për të vazhduar më tej duhen shumë gjëra, mbi të gjitha të rifillosh gjithçka nga e para. Të ndërtosh sërish një grup si ky është shumë e vështirë… dhe kjo më dhemb në shpirt”, u shpreh Scaloni.

Menjëherë pas këtyre fjalëve, ai u ngrit nga karrigia, kërkoi ndjesë me fjalët “Më falni” dhe u largua nga konferenca, pa vazhduar më tej deklaratën e tij.

Pavarësisht humbjes, Argjentina arriti ta çojë finalen në vazhdime edhe pse luajti për një pjesë të madhe të ndeshjes me një futbollist më pak. Scaloni la të kuptohej se ndeshja mund të kishte marrë një tjetër rrjedhë nëse skuadra e tij nuk do të mbetej me 10 lojtarë.

Pas finales, trajneri i Spanjës, Luis de la Fuente, shprehu mbështetjen për homologun e tij.

“Më vjen shumë keq për atë që po kalon. Megjithatë, ai duhet të jetë krenar për atë që ka arritur. Ka thyer çdo rekord. Është ende i ri dhe ka shumë futboll përpara”, deklaroi De la Fuente.

Kontrata e Lionel Scalonit me Federatën Argjentinase të Futbollit skadon në muajin dhjetor, ndërsa trajneri ka bërë të ditur se do ta respektojë marrëveshjen deri në fund.

Burimi: Stan Sport Football

D.L

Presidenti i Shteteve të Bashkuara, Donald Trump, dhe presidenti i FIFA-s, Gianni Infantino, u pritën me fishkëllima nga një pjesë e tifozëve gjatë ceremonisë së ndarjes së trofeut pas finales së Kupës së Botës, ku Spanja u shpall kampione.

Trump mbërriti në stadium me helikopterin presidencial Marine One dhe e ndoqi ndeshjen nga lozha VIP së bashku me Infantinon. Në mesin e të pranishmëve ishin edhe mbreti i Spanjës, Felipe VI, kryeministri i Kanadasë, Mark Carney, si dhe presidentja e Meksikës, Claudia Sheinbaum.

Sipas The Guardian, reagimi më i fortë i publikut erdhi gjatë ceremonisë së dorëzimit të medaljeve dhe trofeut, kur Trump dhe Infantino zbritën në fushë. Raporti i Shtëpisë së Bardhë thekson se niveli i zhurmës në stadium u rrit nga rreth 78 në 84 decibel në momentin kur presidenti amerikan hyri në fushë, duke reflektuar fishkëllimat dhe reagimet e tifozëve.

Pas dorëzimit të trofeut për kombëtaren e Spanjës, Trump tentoi të qëndronte pranë lojtarëve gjatë festës së tyre në podium. Megjithatë, presidenti i FIFA-s, Gianni Infantino, e udhëhoqi në mënyrë diskrete larg ekipit, duke i lënë futbollistët të festonin vetëm.

The Guardian shkruan se kjo ishte një situatë e ngjashme me atë të finales së Kupës së Botës për Klube verën e kaluar, kur Trump gjithashtu kishte qëndruar pranë lojtarëve të Chelseat gjatë festimeve, duke shkaktuar habi te futbollistët.

Kjo ishte hera e parë që një president në detyrë i SHBA-së merr pjesë në një finale të Kupës së Botës të zhvilluar në territorin amerikan. Trump njihet për marrëdhënien e tij të afërt me Gianni Infantinon dhe gjatë këtij Botërori kishte ndërhyrë edhe për të kërkuar rishikimin e kartonit të kuq të futbollistit amerikan Folarin Balogun.

D.L

Finalja e New Jersey-t nuk ishte thjesht fundi i një Botërori, por skena e fundit e njërës prej historive më madhështore të futbollit modern. Lionel Messi është parë në lot tek mbante në qafë medaljen e argjendtë, në atë që pritet të jetë kapitulli i tij i fundit me fanellën e Argjentinës. Në moshën 39-vjeçare, kapiteni legjendar ka gjasa t’i ketë dhënë lamtumirën skenës ndërkombëtare, duke e mbyllur një epokë që ka rritur dhe frymëzuar breza të tërë.

Rrugëtimi i Messit me kombëtaren ka qenë një slitë e vërtetë emocionesh, e shtrirë në më shumë se dy dekada, që nga debutimi i tij i hershëm në vitin 2005. Përpara se të prekte lavdinë absolute, atij iu desh të kalonte nepër sprova të rënda, përfshirë finalen e humbur të Botërorit 2014 dhe tri finale të humbura në Copa América, momente që madje e shtynë të tërhiqej përkohësisht në vitin 2016. Megjithatë, këmbëngulja e tij u shpërblye me një rikthim përrallor: ai udhëhoqi “Albicelestet” drejt triumfit në Copa América në vitin 2021 dhe preku qiellin në Katar në vitin 2022, duke ngritur trofeun e lakmuar të Kampionit të Botës që i mungonte Argjentinës që nga koha e Maradonës.

Me më shumë se 180 paraqitje dhe mbi 100 gola të shënuar, Messi largohet si golashënuesi dhe lojtari me më së shumti ndeshje në historinë e Argjentinës. Edhe pse ky Botëror i fundit u mbyll me lotët e hidhur të vendit të dytë përballë Spanjës, trashëgimia e tij mbetet e paprekshme. Ai nuk largohet thjesht si një kampion, por si lideri që ndryshoi përgjithmonë historinë e futbollit argjentinas. /E.A/