ProCredit Superliga po hyn në fazën vendimtare të kampionatit me rrethin e katërt, që premton ndeshje shumë të forta, dhe luftë deri në fund për çdo pozitë.

Sigal Prishtina dhe Proton Cable Prizreni ndeshen në kryeqytet, me të dy skuadrat që kanë pasur formë të ndryshme së fundi. Bardhekaltrit kanë shtatë fitore radhazi në elitë, duke mos pësuar humbje në vitin 2025 në ProCredit Superligë, derisa prizrenasit janë në vështirësi, pasi ndodhen në pozitën e fundit me pesë fitore e 16 humbje, derisa prishtinasit janë në vendin e tretë me 13 fitore e tetë humbje.

Takim interesant shihet ai ndërmjet Pejës dhe Vëllaznimit, vendit të pestë dhe katërt në renditje. Verdhezinjtë kanë dhjetë fitore e 11 humbje, kurse kuqezinjtë 11 fitore e dhjetë humbje, andaj pritet një sfidë e baraspeshuar të shtunën mbrëma.

Takimi kryesor i kësaj jave është ndërmjet Trepcës dhe Bashkimit në “Minatori”. Këto dy skuadra u përballën në finalen e ProCredit Kupës më 12 shkurt, ku ‘Xehetarët’ fituan 85:79, për të fituar Kupën për herë të katërt radhazi apo për herë të tetë në histori të klubit. Po ashtu kjo sfidë është për vendin e parë. Prizrenasit janë liderë me 15 fitore e gjashtë humbje, ndërsa mitrovicasit janë në vendin e dytë me 14 fitore e shtatë humbje. Në tri takimet mes këtyre dy skuadrave në këtë edicion të elitës, prizrenasit kanë dy fitore dhe një mitrovicasit, ku tri ndeshjet u fituan nga vendasit.

ProCredit Superliga-Java 22

E shtunë

19:00 Sigal Prishtina – Proton Cable Prizreni

19:00 Peja – Vëllaznimi

E diel

19:00 Trepça – Bashkimi

19:00 Golden Eagle Ylli – Bora

Bora arriti një fitore shumë të rëndësishme, duke mundur kampionët dhe fituesit e Kupës në basketboll, Trepçën me shifrat 89:88 (17:15, 16:22, 33:20, 23:31).

Në takimin e javës së 21-të të ProCredit Superligës, prishtinasit kishin deri 17 pikë epërsi, por në fund mitrovicasit u rikthyen, derisa drama vazhdoi deri në çastet e fundit, me vendasit që triumfuan në fund.

Vendasit arritën epërsinë më të lartë në 17 pikë, 79:62, por kampionët me një seri të jashtëzakonshme 4:22 përmbysën shifrat në 83:84, derisa dramë u zhvillua deri në sekondat e fundit me shumë ndërrime në rezultat, ndërsa vendimtar në fund ishte Cambridge për vendasit, i cili me dy ngulitje për 89:88 i solli Borës dy pikë shumë të rëndësishme. Ai kaloi te Bora, pikërisht nga Trepça.

Bora ka shtatë fitore e 14 humbje, ndërsa Trepça 14 fitore e shtatë humbje, raporton KosovaPress.

Përkundër humbjes, Trepça mbetet në vendin e dytë në tabelë me 35 pikë, vetëm një më pak se Bashkimi që është lider i Superligës.

Bora nga ana tjetër pozicionohet si e shtata në tabelë me 28 pikë.

Po vazhdon shkëlqimi i boksierëve kosovarë në turneun ndërkombëtar të boksit “Strandja” që po zhvillohet në Sofje të Bullgarisë.

Pas Donjeta Sadikut, në qerekfinale ishin dy boksierë kosovarë Bashkim Bajoku që kishte për kundërshtar boksierin Sabyrkhan Makhmud nga Kazakistani i cili nuk arriti të hjeq peshën dhe Bajoku fitoi duelin pa luftë dhe siguroi medaljen e bronzët dhe u kualifikua për gjysëmfinale.

Po ashtu në luftë për medalje boksieri Loris Idrizi për kundërshtar kishte boksierin Bullgar Mitev Kristiyan të cilin e mundi dhe siguroi medaljen e 3 të bronztë për Kosovën.

Këto janë medaljet e para pas më shumë se 40 viteve nga turneu ndërkombëtar “Strandja” për Kosovën.

Tashmë janë kompletuar klubet që do të luajnë në fazën gjysmëfinale të Kupës së Kosovës në futboll.

Drita e ka mposhtur Prishtinën e Re me rezultat të pastër 4-0. Golat për skuadrën gjilanase i realizuan Broja, Selmani, Zylfiu dhe Manaj.

Në ndeshjen tjetër, Prishtina e ka mposhtur me shumë lehtësi Vëllaznimin duke triumfuar me rezultat 4-0. Për bardhekaltërit shënuan Najeeb Yakubu, Rron Raqi, Bytyqi dhe Shillova.

Ndërsa të mërkurën gjymsëfinalen e siguruan edhe Llapi dhe Drenica.