Sokol Cikalleshi, një prej emrave më të spikatur të sulmit kuqezi në dekadën e fundit, ka vendosur t’i japë fund karrierës së tij si futbollist profesionist.

Lajmi është mësuar nga burime të “Panorama Sport”, që raportojnë se ky është vendimi aktual i sulmuesit kavajas, edhe pse një komunikim zyrtar ende nuk është bërë nga vetë lojtari.

Cikalleshi e mbylli sezonin e fundit në Turqi, ku aktivizohej me skuadrën e Adanasporit, pjesë e ligës së dytë turke.

Megjithatë, përfundimi i aventurës nuk ishte ai që do të kishte dëshiruar sulmuesi: skuadra nuk arriti të siguronte mbijetesën në kategori dhe për pasojë edhe kontrata afatshkurtër e Cikalleshit, që ishte vetëm për 6 muaj, nuk u rinovua.

Pas shumë vitesh karrierë mes Shqipërisë, Kroacisë, Turqisë dhe Arabisë Saudite, ku ka qenë pjesë e disa klubeve me peshë dhe ka qenë një emër i qëndrueshëm në listën e trajnerëve të Kombëtares, 34-vjeçari ka vendosur të mbyllë një kapitull të rëndësishëm të jetës së tij.

Me 60 ndeshje dhe 13 gola të shënuar me fanellën kuqezi, Cikalleshi do të mbahet mend si një prej sulmuesve më të rëndësishëm të brezit të tij.

Juventusi dha një paraqitje të jashtëzakonshme në ndeshjen e parë të Kupës së Botës për Klube, duke mposhtur bindshëm skuadrën arabe Al Ain me rezultatin 5-0. Pavarësisht formës së mirë të kundërshtarit, që kishte pësuar vetëm një gol në shtatë ndeshjet e fundit, “Zonja e Vjetër” dominoi lojën nga minuta e parë deri në fund.

Randal Kolo Muani hapi serinë e golave vetëm pas 11 minutash, ndërsa Francisco Conceição dhe Kenan Yıldız shënuan gola të bukur për të thelluar avantazhin. Pak para përfundimit të pjesës së parë, Kolo Muani realizoi edhe golin e tij të dytë personal.

Në pjesën e dytë, Conceição shënoi përsëri për të vulosur fitoren, ndërsa Juventusi kontrolloi totalisht ndeshjen. Portieri i Al Ainit, Rui Patrício, ishte një nga më të mirët në fushë, duke parandaluar disfatën edhe më të thellë, përmes një pritjeje të madhe ndaj një goli të mundshëm të Kolo Muanit për hat-trick.

Kjo fitore për Juventusin është një sinjal i fortë përpara sfidës së ardhshme kundër Wydad AC, ndërsa Al Ain do të ketë një përballje tepër sfiduese me Manchester Cityn në fazën tjetër të turneut.

Sot në Vjenë, kryetari i Federatës së Futbollit të Kosovës, Agim Ademi, ka zhvilluar një takim të rëndësishëm me përzgjedhësin e Kosovës Franco Foda, raporton KosovaPress.

“Sot në Vjenë, një kafe dhe një bisedë e frytshme për të ardhmen e kombëtares me përzgjedhësin Franco Foda”, ka shkruar Ademi në ‘Facebook’.

Kjo lëvizje vjen në një kohë kur emri i Fodas është përmendur në media si një trajner që mund të largohet, për shkak të interesimit nga disa klube arabe. Megjithatë, takimi i sotëm duket të jetë sinjal se FFK po tenton ta mbajë strategun gjerman në krye të ekipit dhe të qartësojë planet afatshkurtra e afatgjata për përfaqësuesen.

FC Malisheva ka prezantuar sulmuesin Xhemajl Ibishi si përforcimin e parë të këtij afati kalimtar, transmeton KosovaPress.

Ibishi ishte një nga më të mirët me FC Shkupi në Maqedoni të Veriut, ndërsa vije tek Malisheva për të qenë vlerë e shtuar në skuadrën e drejtuar nga Bekim Isufi për garat evropiane dhe për edicionin e ri në Albi Mall Superligë.

Ibishi njihet për cilësitë e tij fizike dhe ‘vrasës’ para portës, andaj pritet që me kualitetin e tij të dhuroj spektakël, shumë gola dhe asiste.

Klubi po ashtu ka bërë të ditur se do të punohet edhe më tutje për të rritur vlerat dhe konkurrueshmërinë përbrenda skuadres, për të qenë sa më të gatshëm për sfidat që i presin dhe realizimin e objektivave në të gjitha drejtimet.