Presidenti francez, Emmanuel Macron do të pritet nga homologu i tij rus, Vladimir Putin në Moskë, ndërkohë që kancelari gjerman, Olaf Scholz ndodhet në Uashington për të takuar presidentin Joe Biden, thënë ndryshe një ”balet” intensiv diplomatik fillon sot në përpjekje për të zbutur krizën rreth Ukrainës.
Perëndimorët akuzojnë Moskën se ka grumbulluar dhjetëra mijëra trupa në kufirin ukrainas për një pushtim të mundshëm, të cilin Rusia e mohon, duke pretenduar vetëm se garanton sigurinë e saj.
Presidenti Macron, vendi i të cilit mban presidencën e radhës të Bashkimit Evropian, do të pritet sot në Moskë rreth orës 16:00 dhe takimi me homologun e tij Vladimir Putin mund të zgjasë.
”Ai do të përfundojë me një konferencë të përbashkët për shtyp”, sipas Élysée.
”Emmanuel Macron dhe Vladimir Putin janë të vendosur t’i “përfundojnë gjërat gjatë takimit të tyre, duke shqyrtuar masat e shpërshkallëzimit në krizën në kufijtë e Ukrainës”, tha të premten presidenca franceze.
Presidenti francez foli dje me homologun e tij amerikan, Joe Biden. Një shkëmbim telefonik 40-minutësh, i cili është pjesë “në një logjikë koordinimi”, sipas presidencës franceze, përpara udhëtimit të zotit Macron në Moskë dhe më pas të martën në Kiev, ku ai do të takohet me presidentin ukrainas, Volodymyr Zelensky.
Kreu i shtetit francez gjatë fundjavës u takua edhe me kryeministrin britanik Boris Johnson, shefin e NATO-s Jens Stoltenberg dhe krerët e tre vendeve baltike, presidenten e Lituanisë Gitana Nauseda dhe kryeministrat letonez, Krisjanis Karins dhe estonez, Kaja Kallas.
Nga ana e tij, kancelari gjerman Olaf Scholz, i dyshuar për njëfarë vetëkënaqësie ndaj Moskës, shkon në Uashington të hënën për takimin e tij të parë me presidentin, Joe Biden.
“Ne kemi punuar shumë për t’i dërguar mesazhin Rusisë se do të ketë një çmim të rëndë për të paguar nëse ajo ndërhyn në Ukrainë”, tha Scholz për ”Washington Post” në një intervistë përpara vizitës së tij.
“Unë e vlerësoj shumë atë që presidenti Biden po bën në diskutimet dypalëshe midis Shteteve të Bashkuara të Amerikës dhe Rusisë. Ato janë shumë të vështira”, shtoi ai.
Olaf Scholz do të takohet gjithashtu me krerët e shteteve baltike në Berlin këtë javë, përpara se të udhëtojë në Kiev më 14 shkurt dhe më pas në Moskë më 15 shkurt.
Para se të nisej për në Uashington, ai tha të dielën se Gjermania ishte gati të dërgonte trupa shtesë në vendet baltike.
“Ne jemi gati të bëjmë gjithçka që është e nevojshme për të forcuar praninë e Gjermanisë në operacionet e NATO-s në vendet baltike”, tha Scholz për stacionin televiziv gjerman, ARD.
Kievi relativizon
Në Kiev, dita diplomatike do të jetë gjithashtu e ngarkuar: ministrja gjermane e Mbrojtjes Annalena Baerbock pritet të hënën, si dhe ministrat e Jashtëm çek, Jan Lipavsky, sllovak, Ivan Korcok dhe austriak, Alexander Schallenberg.
Përpjekjet diplomatike evropiane vijnë mes frikës në rritje se Rusia po përgatitet të pushtojë Ukrainën.
Shërbimi sekret amerikan ka paralajmëruar se Rusia ka tashmë 70% të forcës së nevojshme për një pushtim të plotë të Ukrainës dhe mund të ketë kapacitete të mjaftueshme, ose 150 000 trupa, për të nisur një ofensivë brenda dy javësh, sipas zyrtarëve amerikanë.
Kievi është përpjekur ta vërë në perspektivë këtë rrezik, veçanërisht për të mbrojtur ekonominë e tij të brishtë, ende të dobësuar nga rreziku i një pushtimi.
”Mos u besoni parashikimeve të fundit të botës”, shkroi në Twitter ministri i Jashtëm ukrainas Dmytro Kouleba.
“Ukraina ka një ushtri të fuqishme, mbështetje të paprecedentë ndërkombëtare dhe është e gatshme për çdo zhvillim”, shtoi ai.
Por, amerikanët nuk kanë vërtetuar nëse Vladimir Putin mori vendimin për të sulmuar apo jo, me opsione që variojnë nga një pushtim i pjesshëm i enklavës separatiste të Donbasit deri në një pushtim të plotë.
”Në rast të një pushtimi të plotë, forcat ruse mund të rrethojnë Kievin dhe të rrëzojnë presidentin Volodymyr Zelensky brenda 48 orëve”, thonë zyrtarët amerikanë.
Uashingtoni ka vendosur të dërgojë përforcime për të mbrojtur vendet e NATO-s kundër çdo agresioni, me kontingjentet e para të ushtarëve amerikanë që mbërritën në Poloni të shtunën dhe të dielën.
Këshilltari për sigurinë kombëtare i Shtëpisë së Bardhë, Jake Sullivan, siguroi se SHBA, që vendosi 3 000 përforcime ushtarake në Evropë, nuk i dërguan këto trupa për të nisur një luftë kundër Rusisë në Ukrainë.
Rusia mohon çdo aluzion për pushtim, duke thënë se dëshiron vetëm të garantojë sigurinë e saj.
Moska njoftoi gjithashtu manovra ushtarake të përbashkëta me Bjellorusinë, ku grumbulloi disa batalione në veri të Kievit dhe në rajonin e Brestit, jo shumë larg kufirit polak.
Moska konsideron se një lehtësim i tensioneve rreth Ukrainës do të jetë i mundur vetëm nëse NATO heq dorë nga politika e saj e zgjerimit dhe largohet nga fqinjët e Rusisë, një kërkesë e refuzuar unanimisht nga Aleanca e Atlantikut të Veriut.ATSH-AFP
Lajmet nga UBT3 months ago
Aktualitet2 weeks ago
Kërkime2 months ago
Aktualitet2 months ago