Lajmet

Azem Syla: Pse o akademik Mehmet Kraja?

Ai ka potencuar se Kraja ka hedhur baltë mbi vlerën kombëtare.

Published

on

Komandanti i Përgjithshëm i UÇK-së, Azem Syla, sot ka reaguar ndaj një shkrimi të akademik Mehmet Krajës, të publikuar në emër të Akademisë së Shkencave dhe Arteve të Kosovës.

Ai ka potencuar se Kraja ka hedhur baltë mbi vlerën kombëtare dhe ka shtuar se shqiptarët me luftë e kanë bërë mirë detyrën e atdheut.

“Pse o akademik Mehmet Kraja arrite deri atje sa të shfrytëzosh emrin e institucionit më të lartë shkencor të Kosovës – Akademinë e Shkencave dhe të Arteve të Kosovës – për të dhënë goditje kundër luftës dhe luftëtarëve? Çfarë zori të shtyu bre akademik?”, ka shkruar Syla mes tjerash.

Ish-deputeti i Kuvendit të Kosovës e ka pyetur Mehmet Krajën se pse sipas tij, ka dalur në pozicion antikombëtar.

“Po pse o akademik Mehmet Kraja pa përgjegjësi del dhe deklaron se Ushtria Çlirimtare e Kosovës ka bërë krime lufte dhe krime kundër njerëzimit? A e njeh ti rrjedhën e asaj lufte dhe atë ushtri që bëri luftën. Po ti u ktheve në shtëpinë tënde veç kur ata luftëtarë e çliruan Kosovën bre? Ku i pe ti ato krime, a nëpër Evropë ku ishe në ato kohë? O akademik Mehmet Kraja, a e dinë se një ditë Hashim Thaçi do të kthehet me pafajësi nga Gjyqi i Hagës, po ti ku do t’i fusësh ato fjalë që ke thënë për të? Sepse ai e ka kryer detyrën ndaj atdheut me armë në dorë kur ti nuk di ku ishe”, ka shkruar ndër të tjera ai.

Tutje, Syla ka pyetur Krajën se pse ka mendimin se askush nga udhëheqësit shqiptarë në gjithë hapësirën kombëtare nuk është i aftë të udhëheqë shqiptarët, nuk është i pastër të udhëheqë shqiptarët, nuk është i ditur të udhëheqë shqiptarët, nuk është me vizion të udhëheqë shqiptarët dhe ka shtuar duke u shprehur se Serbia nuk kthehet më.

Shkrimi i plotë Azem Sylës, Komandanti i Përgjithshëm i UÇK-së:

As që kisha ndonjë dëshirë të merrem me ty e shkrimin qe ke publikuar në emër të Akademisë së Shkencave dhe Arteve të Kosovës, por unë jam i tillë që nuk bëhem rehat, në qoftë se nuk i them gjërat ashtu siç i ndijë në shpirt.

E pra, more akademik Mehmet Kraja, shumë gjëra mund t’i kem menduar, por, që ti të dalësh me vlerësime dhe akuza të tilla shpifëse tamam si të ishin gatuar në gazhinën e Beogradit, këtë kurrë nuk e kisha menduar. Veç po të them: Ti hodhe baltë mbi vlerën tonë kombëtare dhe të jesh i sigurt ti, të jenë të sigurt ata që mendojnë si ti (nëse ka), të jenë të sigurt edhe armiqtë, por të jenë të sigurt edhe të gjithë qytetarët shqiptarë, që ne me luftën tonë e kemi bërë shumë mirë detyrën atdheut e kombit, për të cilën jemi krenar se i kemi vënë një kurorë lavdie historisë kombëtare shqiptare. Ama po të them se shpifjet dhe akuzat tua janë të pa falshme, janë të dënueshme, janë antikombëtare dhe kundër vlerave të shqiptarëve.

Po pse o akademik Mehmet Kraja, a nuk e ke kuptuar akoma se ajo luftë e lavdishme u bë nga ky popull i Kosovës dhe gjithë shqiptarët për të rritur vlerat e fituar lirinë? Pse o akademik Mehmet Kraja, a nuk e ke kuptuar akoma se ata luftëtarët e Ushtrisë Çlirimtare të Kosovës, nuk qenë të importuar, siç na kanë akuzuar Serbia dhe bashkëpunëtorët e saj, por qenë bijtë dhe bijat më të mirë të këtij populli të lavdishëm shqiptarë të këtyre trevave të Kosovës e gjithë hapësirave kombëtare shqiptare?

Pse o akademik Mehmet Kraja arrite deri atje sa të shfrytëzosh emrin e institucionit më të lartë shkencor të Kosovës – Akademinë e Shkencave dhe të Arteve të Kosovës – për të dhënë goditje kundër luftës dhe luftëtarëve? Çfarë zori të shtyu bre akademik? A ke diçka të ligë personale apo ke marrë mision prej dikujt, që i shërben ndoshta me apo pa interes, por realisht me ligësi?

Pse o akademik Mehmet Kraja nuk e vlerësove se pavarësisht çka, shqiptari pak i ndershëm nuk e bën e zhbën a bën e maskon fjalën e tij, dhe gjithë kjo në emër të ajkës së dijes së Kosovës, siç veprove ti, duke bërë maskim të ulëta me arsyetime të pa pranueshme? Se ndryshime nuk bëre.

Pse o akademik Mehmet Kraja dole në këtë pozicion antikombëtar? A mendon se është e rastit, apo kështu ke qenë i ndërtuar mbrapsht por tani të doli fytyra e vërtetë, apo ndonjë interes i ligë? Uroj të mos jetë aq i ligë sa të vijë nga Beogradi, por që i shërbeve më mirë dhe më fortë se askush tjetër kësaj radhe kjo po është shumë e qartë.

O akademik Mehmet kraja, si i keni marrëdhëniet me akademikët e tjerë? A e dëgjove qëndrimin e akademik Sabri Hamitit? A mendon se nuk do të shkojnë edhe të tjerë në atë qëndrim? Gabohesh o akademik Mehmet Kraja, që mendon se akoma je e mund të jesh koka e asaj akademie. Sepse të jesh në karrigen e kryetarit nuk do të thotë të jesh kryetar. Pasi kryetar je edhe duke mos qenë në atë karrige ku jeni ulë ju por të tjerët akademikë të përulen me nderim për dijen që ke. Ndërsa ti ku je sot? A je kryetar? Nuk besoj, veç i ndonjë të pa merituari, që ti vetë më herët ke thënë se janë të pa merituar, i cili mund të të përkëdhelë krahët. Sa keq për ty o akademik.

Po pse o akademik Mehmet Kraja pa përgjegjësi del dhe deklaron se Ushtria Çlirimtare e Kosovës ka bërë krime lufte dhe krime kundër njerëzimit? A e njeh ti rrjedhën e asaj lufte dhe atë ushtri që bëri luftën. Po ti u ktheve në shtëpinë tënde veç kur ata luftëtarë e çliruan Kosovën bre? Ku i pe ti ato krime, a nëpër Evropë ku ishe në ato kohë? Çudi more zotëri me ty. Unë kurrë nuk kam menduar se mundesh ti pa as më të voglin informacion t’i ngarkosh vetes atë barrë aq të madhe sa të përpiqesh të shfajësosh krimet serbe duke e kriminalizuar luftën e shenjtë të popullit shqiptar për liri e pavarësi. Mision i rendë ky i yti zotëri. Por punë të tilla si kjo puna që bëre ti, deri tani kanë bërë vetëm shërbimet antishqiptare. Ndërsa për ty dua të them se duhet të kesh ndonjë interes të madh ose ke marrë ndonjë urdhër të rëndë.

O akademik Mehmet Kraja, a e dinë se një ditë Hashim Thaçi do të kthehet me pafajësi nga Gjyqi i Hagës, po ti ku do t’i fusësh ato fjalë që ke thënë për të? Sepse ai e ka kryer detyrën ndaj atdheut me armë në dorë kur ti nuk di ku ishe. Ashtu sikurse edhe atje ku është ka shkuar për të mbrojtur me bindje pastërtinë e asaj lufte. Ndërsa ti përpiqesh ta trajtosh Hashim Thaçin si të ishte ndonjë hajn, që përpiqet të fshihet nga e vërteta e hajnisë të tij. Jo o akademik Mehmet Kraja, ai dhe të gjithë luftëtarët bashkë me mua, që kur ka ngritur dorën për ta miratuar atë ligj të kësaj gjykate e ka ditur se do të jetë atje për ta mbrojtur pastërtinë e kësaj lufte, siç e kanë ditur të gjithë ata që e kanë votuar atë ligj. Luftëtarët o akademik Mehmet Kraja nuk janë prej atij malli që fshihen as që e merr era, siç merr qëndrimet tua.

Po Ali Ahmeti o akademik Mehmet Kraja çfarë borxhi të ka? A edhe ai po të bën hije, pse po udhëheq shumë shumë mirë politikën shqiptare në Republikën e Maqedonisë së Veriut? A kaq dhimbje ke nga sukseset që kanë arritur shqiptarët në të drejtën e tyre në atë shtet?

Si nuk i more në mbrojtje as edhe me një fjalë shqiptarët në Kosovën Lindore bre akademik Mehmet Kraja? Veç se u the që kurrë nuk do të jenë pjesë e Kosovës, a për t’i moralizuar ua the këtë, që të mundësosh të ikin nga sytë këmbët? Jo zotëri, gabohesh përsëri, koha e ikjes së shqiptarëve dhe e shpërnguljeve të tyre ka perënduar njëherë e përgjithmonë. Kosova Lindore do të jetë Kosovë Lindore sot e përgjithmonë. Mos e harro këtë akademik.

Po Shqipëria çfarë të ka bërë që nuk le gjë pa thënë për të? Apo se të jepte bukë kur nuk kishe shtëpi. Sa keq. Po si nuk e the një fjalë të mirë për shqiptarët more akademik Mehmet Kraja? A nuk ka asnjë shqiptar tjetër përveç teje që të meritojë të jetë ai që i duhet kombit shqiptar?

Pse o akademik Mehmet Kraja ke mendimin se askush nga udhëheqësit shqiptarë në gjithë hapësirën kombëtare nuk është i aftë të udhëheqë shqiptarët, nuk është i pastër të udhëheqë shqiptarët, nuk është i ditur të udhëheqë shqiptarët, nuk është me vizion të udhëheqë shqiptarët? Po kush mendon ti se duhet t’i udhëheqë shqiptarët? Pasi ne paskemi fuqi të korruptojmë edhe shtetet e botës, të korruptojmë edhe organizatat ndërkombëtare, si i bëhet?

Jo akademik Mehmet Kraja, Serbia nuk kthehet më. Nuk kthehet.

Continue Reading

Vendi

Dështon mbledhja e Kryesisë së Kuvendit për mungesë kuorumi, shtyhet shqyrtimi i Projektligjit për Gjykatën Speciale

Published

on

Mbledhja e Kryesisë së Kuvendit të Kosovës ka dështuar të mbahet të martën për shkak të mungesës së kuorumit.

Këtë e bëri të ditur nënkryetari i Kuvendit, Ardian Gola, i cili para gazetarëve foli edhe për Projektligjin për Gjykatën Speciale. Ai tha se vazhdimi i seancës së ndërprerë, ku ishte paraparë shqyrtimi i këtij projektligji, kërkon koordinim dhe dakordim mes partive politike.

“Është çështje komplet jashtë rendit të ditës së Kryesisë. Arsyeja që është ndërprerë seanca ka të bëjë me mungesë të kuorumit dhe realisht kryetarja Haxhiu ka autorizuar që, në koordinim me shefat e grupeve parlamentare, të caktohet një datë kur do të vazhdojë ajo seancë. Mbetet çështje e dakordimit politik, të menaxhuar dhe drejtuar nga kryetarja e Kuvendit”, theksoi Gola.

Ai u pyet edhe për dënimin e ish-presidentit Hashim Thaçi nga Dhomat e Specializuara në Hagë.

Gola shprehu keqardhje për procesin gjyqësor që po zhvillohet në këtë institucion, ndërsa bëri të ditur se vendimi i fundit do të trajtohet edhe në kuadër të grupit punues për strategjinë lidhur me ish-krerët e UÇK-së, të udhëhequr nga zëvendëskryeministri Glauk Konjufca.

“Shprehim keqardhjen tonë për gjithë procesin që po zhvillohet në Dhomat e Specializuara. Ne e kemi themeluar një grup punues, në krye të të cilit është zëvendëskryeministri Glauk Konjufca, dhe shpresojmë që edhe ky vendim të jetë si pjesë shtesë e këtij grupi punues”, tha ai./A.K/

Continue Reading

lajme

Gjykata e Lartë në Beograd cakton paraburgimin dhe lëshon urdhërarrest për Milan Radoiçiqin

Published

on

By

Gjykata e Lartë në Beograd ka marrë vendim për caktimin e masës së paraburgimit dhe lëshimin e urdhërarrestit ndaj ish-nënkryetarit të Listës Serbe, Milan Radoiçiq, pasi ky i fundit nuk është paraqitur në stacionin policor, konfirmim ky i dhënë për median serbe Insajder nga vetë Gjykata e Lartë në Beograd.

Sipas Gjykatës, vendimi për paraburgim dhe fletarrest është marrë për shkak se Radoiçiq i cili ndodhet nën hetime për pjesëmarrje në sulmin e armatosur në fshatin Banjskë nuk është lajmëruar në stacionin policor më 15 nëntor. Paraqitja periodike në polici ishte një nga masat e sigurisë të caktuara nga gjykata si garanci se ai do të ishte i disponueshëm gjatë kohëzgjatjes së hetimeve. Sipas po të njëjtave burime gjyqësore, paraburgimi u caktua për shkak të rrethanave që tregojnë se i pandehuri po fshihet ose është arratisur. Informacionin fillimor se për Radoiçiq është lëshuar urdhërarrest e kishte publikuar portali BIRN.

Milan Radoiçiq po hetohet në Serbi në kuadër të lëndës “Banjska”, e cila u iniciua pas konfliktit të armatosur në fshatin Banjskë të Kosovës më 24 shtator 2023, ku mbetën të vrarë katër persona, rreshteri i Policisë së Kosovës,  Afrim Bunjaku i cili ishte në detyrë dhe tre anëtarë të grupit të armatosur.

Radoiçiq kishte pranuar përmes avokatit të tij, Goran Petronijević, se kishte qenë përgjegjës logjistike për organizimin e grupit terrorist.

Ndonëse Prokuroria e Lartë në Beograd kishte kërkuar paraburgim pas nisjes së procedurës penale për vepra të tilla si armëmbajtje pa leje dhe vepra kundër sigurisë përgjithëshme, gjykata e kishte lënë të mbrohet në liri, me kusht që të dorëzonte pasaportën, të mos udhëtonte në Kosovë dhe të paraqitej në polici çdo dy javë. Që atëherë, prokuroria nuk kishte dhënë asnjë informacion për ndonjë përparim tjetër në këtë hetim.

Paralelisht me këto zhvillime në Serbi, në Kosovë është duke u zhvilluar një proces gjyqësor kundër 45 personave, ku rasti në Banjskë është cilësuar si terrorizëm dhe sulm ndaj rendit kushtetues, proces në të cilin dy persona tashmë janë dënuar me burgim të përjetshëm dhe një tjetër me 30 vjet burgim.

Në kohën kur ndodhi sulmi terrorist në Banjskë, Milan Radoiçiq ushtronte funksionin e nënkryetarit të Listës Serbe, subjekti kryesor i serbëve të Kosovës me lidhje të ngushta me Partinë Përparimtare Serbe (SNS) në pushtet, ndërsa më parë ishte shfaqur shpesh në tubime politike dhe në shoqërinë e zyrtarëve më të lartë shtetërorë të Serbisë. /E.A/

 

Continue Reading

Vendi

Marko Hatlak kërkon falje për interpretimin e këngës “Oj Kosovo, Kosovo” në Bruksel

Published

on

Muzikanti dhe fizarmonicisti slloven, Marko Hatlak, ka kërkuar falje për përzgjedhjen dhe interpretimin e këngës “Oj Kosovo, Kosovo” gjatë ceremonisë hapëse të Forumit të Zgjerimit të Bashkimit Evropian 2026 në Bruksel.

Kënga, e cila përmban pretendime nacionaliste serbe ndaj Kosovës, kishte nxitur reagime të shumta pas interpretimit të saj në këtë aktivitet.

Hatlak, i cili ishte përgjegjës për përgatitjen e programit muzikor në emër të Komisionit Evropian, ka thënë se përzgjedhja ishte e paqëllimshme dhe se nuk ishte në dijeni të kontekstit historik e politik të këngës.

Në një reagim publik, ai ka shpjeguar se ishte ngarkuar të përzgjidhte dhjetë këngë, nga një për secilin vend pjesëmarrës në forum, dhe t’ia dorëzonte ato organizatorëve për miratim.

Sipas tij, gjatë kërkimit në Google për një këngë tradicionale nga Kosova, kishte hasur në “Oj Kosovo, Kosovo”, e cila ishte përshkruar si këngë patriotike.

“Unë e përzgjodha atë nga këndvështrimi i një muzikanti, pra duke u bazuar në harmoninë, ritmin dhe tingullin e saj”, ka shpjeguar Hatlak.

Ai ka thënë se kishte vetëm një javë kohë për përgatitjen dhe interpretimin e programit dhe se, për shkak të afatit të shkurtër, nuk kishte arritur të hulumtonte prejardhjen dhe domethënien e këngës. Sipas tij, as organizatorët nuk e kishin vënë në pah natyrën problematike të përzgjedhjes gjatë shqyrtimit të programit.

“U kërkoj sinqerisht falje të gjithë atyre që janë prekur nga kjo ngjarje”, ka deklaruar muzikanti.

Hatlak ka bërë të ditur se kërkimfaljen ua ka dërguar drejtpërdrejt edhe ambasadorit të Kosovës në Slloveni, Valdet Sadiku, ambasadorit të Kosovës në Belgjikë, Agron Bajrami, kryenegociatorit për Integrimin Evropian, Jeton Zulfaj, si dhe komisioneres evropiane për Zgjerim, Marta Kos.

Ai ka theksuar se nuk kishte pasur qëllim të ofendonte askënd dhe se nuk do ta kishte interpretuar këngën po ta kishte ditur kontekstin e saj.

“Po ta kisha ditur kontekstin dhe domethënien e saj, sigurisht që nuk do ta kisha interpretuar. Gjatë gjithë karrierës sime, jam përpjekur që përmes muzikës t’u sjell njerëzve vetëm gëzim dhe paqe të brendshme. Nuk ka qenë kurrë qëllimi im të fyej askënd”, ka shkruar ai.

Në fund, Hatlak ka shprehur keqardhje për situatën e krijuar, duke shpresuar që kërkimfalja e tij të pranohet./A.K/

Continue Reading

Lajmet

Studimi i profesorëve të UBT-së publikohet në revistën ndërkombëtare “Pharmacoepidemiology”

Published

on

By

Punimi shkencor i profesorëve të Shkencave Mjekësore në UBT, Prof. Dr. Fitim Alidema dhe Prof. Dr. Zejdush Tahiri, në bashkëautorësi me Mr. Ph. Flakron Alidema, është publikuar në revistën prestigjioze ndërkombëtare Pharmacoepidemiology.

Ky studim vëzhgues retrospektiv ka analizuar të dhënat e 4.668 pacientëve të trajtuar me aspirinë 100 mg në kujdesin parësor shëndetësor. Gjetjet kryesore të hulumtimit tregojnë se përdorimi potencialisht i papërshtatshëm i aspirinës është dukshëm më i lartë në parandalimin parësor kardiovaskular (52,3%) krahasuar me atë dytësor (1,8%).

Kontributi i veçantë i këtij punimi të profesorëve të UBT-së qëndron në vlerësimin e përbashkët të indikacionit mjekësor, profilit të rrezikut për gjakderdhje dhe barnave shoqëruese, në raport me ndërprerjen e dokumentuar të terapisë. Sipas analizës, historia e gjakderdhjes gastrointestinale rezultoi të jetë faktori kryesor i lidhur me ndërprerjen e trajtimit me aspirinë, duke nxjerrë në pah nevojën për rivlerësim individual të raportit përfitim–rrezik te secili pacient.

Revista Pharmacoepidemiology, e botuar nga MDPI, renditet në kuartilin Q2 sipas SCImago 2025 në kategorinë e farmakologjisë dhe toksikologjisë, indeksohet në platformat e njohura Scopus dhe Web of Science (ESCI), dhe ka faktor ndikimi 1,6 sipas Clarivate.

Continue Reading

Të kërkuara