Këngëtarja me origjinë shqiptare Donna Dafi ka tërhequr sërish vëmendjen e mediave ndërkombëtare, kësaj here me këngën dhe videoklipin e saj të ri, “GODDESS”.

Platforma ndërkombëtare e muzikës dhe kulturës Bong Mines Entertainment i ka kushtuar një artikull të veçantë projektit, duke e përshkruar atë si një ndërthurje të pop-it bashkëkohor dhe R&B-së.

Në artikullin me titull “Donna Dafi Reclaims Her Power With ‘GODDESS’”, media vlerëson vokalin dhe produksionin e këngës, si dhe mesazhin e saj për vetëvlerësimin, zhvillimin personal dhe rikthimin e fuqisë së brendshme.

Sipas Bong Mines Entertainment, Donna Dafi e trajton vetëbesimin në një mënyrë më njerëzore, si një forcë që mund të humbet përkohësisht dhe që duhet rigjetur sërish.

Media ka vlerësuar gjithashtu anën vizuale të videoklipit, ku Donna shfaqet mes ujit, natyrës, shkëmbinjve dhe arkitekturës së vjetër. Kombinimi i peizazheve, modës dhe estetikës vizuale lidhet me temat e feminilitetit, ripërtëritjes dhe fuqisë personale.

Në shkrim theksohet edhe mënyra se si artistja ndërthur muzikën, modën, arkitekturën dhe dizajnin, duke krijuar një identitet artistik që shkon përtej muzikës.

“GODDESS” është pjesë e kapitullit artistik që Donna Dafi e quan “Primadonna Era”, pas projekteve “Primadonna”, “Touch Me Like That”, “ManGo” dhe “Trouble”.

Vëmendja e Bong Mines Entertainment ndaj projektit shënon një tjetër paraqitje të Donna Dafit në mediat ndërkombëtare dhe një tjetër hap në prezantimin e artistes me origjinë shqiptare në skenën globale të pop-it dhe R&B-së./A.K/

Të paktën 162 persona u vranë në Nepal dhe tre të tjerë në Tibet pasi vërshimet masive në një zonë kufitare mes Nepalit dhe Kinës përmbytën komunitetet të mërkurën, raportuan mediat shtetërore të Kinës, duke paralajmëruar se deri në 1,000 persona mbeten ende të zhdukur në Nepal dhe Tibet nga kjo katastrofë.

Rrëshqitjet e dheut në Tibet lanë tre të vdekur dhe 558 të zhdukur; rreth 260 nga 558 të zhdukurit në Tibet ishin të huaj, ndërsa dy banorë fshati u shpëtuan, raportuan të enjten në mëngjes agjencia shtetërore kineze e lajmeve Xinhua dhe transmetuesi CCTV.

Pamjet nga dronët në Nepal treguan rrugë të shkatërruara dhe ndërtesa të varrosura nga ujërat e furishme me ngjyrë çimentoje të lagur.

“Kur arrita në pazarin Dhunge, brenda gjysmë ore erdhi përmbytja dhe e dëmtoi të gjithë tregun. Njerëzit po bëheshin gati për të shkuar në punë atëherë,” tha një banor tibetian, Shoyam Rajbhandari. “Se sa njerëz janë të zhdukur apo të vdekur, nuk e dimë.”

Shtetas të huaj mes të zhdukurve

Ministrja e Jashtme e Australisë, Penny Wong, u tha gazetarëve të enjten se të paktën 34 australianë që ndodheshin në pelegrinazhe dhe ture ecjeje (hiking) rezultojnë të zhdukur.

“Kuptojmë se këta australianë ishin pjesë e grupeve të ndara të pelegrinazhit dhe tureve,” u tha Wong gazetarëve në Adelaide të Australisë.

Qeveria e Nepalit ende nuk kishte kërkuar ndihmë, por Australia po koordinonte një përgjigje humanitare me Nepalin, Kombet e Bashkuara, Kryqin e Kuq dhe organizata të tjera, tha ajo.

55 malajzianë në Katmandu tani janë të paatreachëm për shkak të vonesave serioze në infrastrukturë, sipas Ministrisë së Jashtme të Malajzisë, e cila rriti numrin e të zhdukurve të enjten. Ajo deklaroi se po bashkëpunon ngushtë me autoritetet për të përcaktuar sigurinë dhe vendndodhjen e viktimave malajziane, por se nuk ka ende ndonjë konfirmim zyrtar për praninë e tyre.

Herët të mërkurën, Shërbimi Gjeologjik i SHBA-së (USGS) raportoi një tërmet me madhësi 4.4 rreth 66 kilometra në veri të Katmandusë, afër kufirit.

USGS më vonë e përditësoi analizën e tij duke sqaruar se ngjarja sizmike që kishte matur ishte faktikisht një shkëputje/shembje akullnaje me madhësi 5.2, e cila dërgoi mbetje që rrodhën teposhtë me një ndikim katastrofik mbi komunitetet.

Ai tha se ky përfundim u bazua në të dhënat nga stacionet sizmike pranë, valët sizmike me periudhë të gjatë dhe imazhet satelitore, dhe se nuk kishte ndodhur asnjë tërmet. /BBC/

Takimi i pestë radhazi i zhvilluar mbrëm mes kryetarit të Lëvizjes Vetëvendosje, Albin Kurti, dhe atij të Lidhjes Demokratike të Kosovës, Lumir Abdixhiku, ka përfunduar pa një epilog final, por me një hap të rëndësishëm përpara drejt zgjidhjes së nyjës politike. Për herë të parë, dy liderët kanë hedhur në tavolinë emra të përveçëm për postin e presidentit të ri konsensual.

Megjithatë, asnjëri prej tyre nuk ka pranuar të zbulojë emrat e propozuar, meqë janë dakorduar që të ruajnë konfidencialitetin e plotë deri në arritjen e një marrëveshjeje përfundimtare, e cila do t’i hapte rrugë konstituimit të Kuvendit dhe formimit të Qeverisë së re.

Pas takimit, kreu i LVV-së, Albin Kurti, e ka vlerësuar bisedën si mjaft serioze dhe ka shpjeguar dinamikën e re të negociatave.

“Diskutimi ishte i hapur, serioz, i sinqertë. Do të vazhdojmë bisedimet për shkak se është rritur mirëbesimi dhe është hera e parë që kemi biseduar me dhe për emra të përveçëm. Tash negocimi është shumë i vështirë sepse duhet të diskutohet hollësisht dhe gjerësisht… Por lista zvogëlohet kur është e qartë se nuk mund të ketë dakordim për emër të përveçëm”, ka thënë Kurti.

Ai po ashtu sqaroi se personat e propozuar nuk janë pyetur paraprakisht.

“Paraprakisht duhet të dakordohemi ne, andaj në këtë fazë nuk mund të flasim konkretisht për emra të përveçëm që sot për herë të parë jemi duke i trajtuar si emra për president të mundshëm”, shtoi ai.

Sa i përket vonesave në konstituimin e Kuvendit, Kurti ka hedhur poshtë pretendimet për shkelje të Kushtetutës.

“Kushdo që konsideron se ka pasur shkelje kushtetuese, mund t’i drejtohet Gjykatës Kushtetuese. Deputetët e kanë dhënë betimin, ata janë deputetë të Republikës së Kosovës ndonëse s’ka Kuvend të konstituuar… Neve na duhet marrëveshja politike, nuk besoj se po e shkelim Kushtetutën”, u shpreh Kurti, duke rikujtuar se edhe vitin e kaluar procesi kishte marrë më shumë se gjashtë muaj kohë.

Nga ana tjetër, kryetari i LDK-së, Lumir Abdixhiku, konfirmoi se propozimet e bëra përkojnë me kornizën e diskutuar deri më tani.

“Në tërësinë e emrave të prezantuar mund të thëm se të gjithë emrat, dikush më shumë e dikush më pak, janë në vijë me parimet e dakorduara deri më tani dhe në këtë drejtim le të thëmi se ky është një hap përpara. Nuk mund të diskutoj për emra konkretë në këtë fazë, por do të takohemi sërish për të finalizuar dhe për të përzgjedhur presidentin e ardhshëm”, deklaroi Abdixhiku.

Kreu i LDK-së nëvizoi se prania e partisë së tij në këto negociata është konstruktive, por bëri me dije se LDK-ja mbetet me pozicion të pavarur.

“LDK-ja është garanci institucionale. LDK-ja as nuk e konstituon Kuvendin vetvetiu, as nuk e thërret seancën e Kuvendit. Për LDK-në jemi në paqartësi të thella kushtetuese, gjënë e vetme që mund ta bëjë është që të jetë e arsyeshme për zgjedhjen e presidentit. Por nëse dikush ende beson se LDK-ja është vagon i ndonjë partie tjetër, kohët kanë ndryshuar shumë”, nëvizoi ai.

Përderisa LVV dhe LDK kanë zhvilluar takime disa herë , dy partitë e tjera opozitare, PDK dhe AAK, vazhdojnë të refuzojnë përfshirjen në këtë proces. Të dyja këto subjekte insistojnë vetëm në konstituimin e menjëhershëm të Kuvendit, një opsion ky që sipas LVV-së rrezikon të ripërsërisë skenarin e paszgjedhjeve të dhjetorit 2025, ku mungesa e marrëveshjes për presidentin bllokoi funksionimin e plotë të institucioneve.

Palët pritet të takohen sërish në ditët në vijim për të ngushtuar listën e kandidatëve dhe për të tentuar arritjen e marrëveshjes finale. /E.A/

Moti sot në Kosovë do të jetë kryesisht me diell dhe vranësira të lehta, të cilat do të mbeten më të fokusuara rreth zonave malore.

Sipas Institutit Hidrometeorologjik të Kosovës, temperaturat minimale do të lëvizin nga 11 deri në 16 gradë celsius, ndërsa ato maksimale do të arrijnë nga 29 deri në 34 gradë celsius.

Era do të fryjë nga drejtimi i veriperëndimit me një shpejtësi të lehtë prej 1 deri në 4 metra për sekondë. /E.A/