Vlefshmëria e një vote të prerë poshtë, kishte shkaktuar sherr mes anëtarit të Komisionit Qendror të Zgjedhjeve nga Lëvizja Vetëvendosje Sami Kurteshi dhe një komisioneri të Aleancës për Ardhmërinë e Kosovës.

Anëtari i KQZ-së Sami Kurteshi, gjatë numërimit të fletëvotimeve të ardhura me postë është akuzuar nga koordinatori i vëzhguesve të AAK-së, se ka tentuar për të ndikuar në shpalljen e vlefshmërisë së një vote ani pse ajo kishte qenë e prerë poshtë.

Kjo është mohuar nga ana e Sami Kurteshit i cili tha para mediave se nuk e vendos askush përpos komisionerëve për votën në fjalë dhe se nuk po u bënë presion komisionerëve.

E sipas tij, komisionerët po kryejnë punën me nderë, e nuk kanë nevojë të frikësohen nga anëtarët e KQZ-së, derisa iu ka drejtuar komisionerit në fjalë se mund të ankohet në PZAP.

“Ai thotë është e pavlefshme, por nuk vendos as ti as ai, vendosin ata. Nëse ty ta merr mendja që të është bë e padrejtë, e ke të drejtën e ankesës në PZAP. Llogaritjet nuk mundem me i pa, se ti llogaritë ndryshe unë ndryshe, por prej pozitës të vëzhguesit, nuk vendosi dhe nuk është presion. Kurrkush nuk po iu thotë juve me u ndalë dhe mos me i këqyrë. Unë e kam ndikimin në zyre të KQZ-së, atje e ngriti dorën. Një person që kryen punën me nderë, hiç nuk ka nevojë me u tut prej askujt, ka kaluar ajo kohë”, tha Kurteshi.

Ndërsa, koordinatori i vëzhguesve të AAK-së, Lavdim Mehani shtoi se të njëjtën votë të prerë poshtë të AAK-së në Deçan, para tre ditësh vëzhguesit e LVV-së kanë insistuar ta shpallin të pavlefshme.

Lavdim Mehani këtë e llogaritë tentim për të ndikuar në votë dhe se do të ankohet në PZAP.

“Para tre dite, vëzhguesit e LVV-së, kanë insistuar me e shpallë një votë të AAK-së në Deçan të pavlefshme, për shkak se e ka prerjen, ka ndodhur, është shpallur e pavlefshme edhe e kanë krijuar atë standard me atë prerje. Sipas informacioneve Samia ka ardhur te një tavolinë dhe i ka thënë komisionerit shpalle këtë të vlefshme, derisa ka qenë e njëjta votë, e prerë poshtë. E llogarisim si ushtrim ndikimi ose tentim për të ndikuar për ta shpallur të vlefshme apo pavlefshme”, shtoi ai.

Në Qendrën e Numërimit dhe Rezultateve, është duke vazhduar numërimi i votave me postë.

Sipas përditësimit të fundit në faqen e Komisionit Qendror të Zgjedhjeve, deri më 3 mars ora 00:54 janë numëruar 124 kuti të votimit nga 187 sa janë apo 66.31 për qind.

Në Qendrën e Numërimit dhe Rezultateve janë parë zyrtarë të Panelit Zgjedhor për Ankesa dhe Parashtresa për të verifikuar kuti me fletëvotime të pavlefshme.

Më herët ka pasur ankesa nga Lëvizja Vetëvendosje rreth disa fletëvotimeve që janë shpallur të pavlefshme.

Në QNR edhe të hënën po vazhdon procesi i numërimit të fletëvotimeve nga votimi përmes postes.

Nga të dhënat e fundit të Komisionit Qendror të Zgjedhjeve (KQZ), deri më tani janë numëruar 66.31 për qind e votave me postë.

Bazuar në të dhënat e KQZ-së,  në numërimin e deritanishëm të votave me postë për zgjedhjet parlamentare te 9 shkurtit, prin Lëvizja Vetëvendosje në koalicion me Guxo dhe Alternativa me 52.72 për qind, e pasuar nga Lidhja Demokratike e Kosovës me 29.80 për qind, Partia Demokratike e Kosovës me 7.98 për qind, Aleanca për Ardhmërinë e Kosovës – Nisma me 3.32 për qind.

Ndërkaq, pas përfundimit të numërimit të këtyre votave, do të nis numërimi i atyre me kusht dhe personave me aftësi të kufizuara

Kina ka paralajmëruar masa kundërvënëse në përgjigje të kërcënimit të SHBA për të vendosur një tarifë shtesë prej 10% për mallrat kineze, e cila do të hyjë në fuqi më 4 mars, nën pretekstin e luftës kundër fentanilit. “Global Times”, një tabloide e lidhur me Partinë Komuniste, raportoi se Kina do të ndërmarrë “masa të forta” nëse SHBA vazhdon me këtë vendim. Ky kërcënim erdhi pas një deklarate të Presidentit Donald Trump, i cili tha se SHBA do të vendosë tarifa 25% ndaj Kanadasë dhe Meksikës, dhe 10% për Kinën në të njëjtën datë.

Ministria e Tregtisë e Kinës reagoi duke theksuar se vendi është një nga më të angazhuarit në luftën kundër drogës dhe se bashkëpunon me SHBA-në për të luftuar trafikun e fentanilit. Ajo theksoi se fajësimi i vendeve të tjera për këtë problem nuk do të ndihmojë, por mund të rrisë barrën për konsumatorët dhe kompanitë amerikane, si dhe të dëmtojë stabilitetin e zinxhirit global industrial.

Kina ka shprehur shpresën se SHBA do të heqë dorë nga këto masa dhe do të zgjidhë mosmarrëveshjet përmes dialogut. Megjithatë, nëse SHBA vazhdon të ndjekë këtë rrugë, Kina ka paralajmëruar se do të marrë kundërmasat e nevojshme për të mbrojtur interesat dhe të drejtat e saj. Zëdhënësi i Ministrisë së Jashtme, Lin Jian, theksoi se Kina do të mbrojë me vendosmëri interesat e saj legjitime dhe paralajmëroi se përdorimi i çështjes së fentanilit për shantazh do të ketë pasoja negative./UBTNews/