Teknologji

Arsyet e fshehjes së likeve nga Instagram!

Published

4 years ago

June 15, 2021

Betim Gashi

Që prej vitit të kaluar, Instagram testoi në disa shtete idenë e tyre më të re: atë të zhdukjes së numrit të likeve nga fotot.

Edhe pse nuk do të mund të shohim më numrin e likeve tek të tjerët, përsëri do të mund të shohim numrin e likeve tek postimet tona, pra do të vazhdojmë të marrim feedback se çfarë pëlqehet dhe çfarë jo.

Së dyti, edhe tek postimet e të tjerëve, nëse klikojmë tek “others” do të na shfaqet lista e atyre që e kanë pëlqyer një postim. Nëse të intereson vërtet numri i likeve tek dikush, mund të numërosh të gjithë personat e listës. Por është diçka që zor se do ta bëjë dikush, sidomos në postime që kanë qindra apo mijëra likes.

Por, pse e ka bërë Instagram këtë lëvizje?

Për t’u diferencuar nga rrjetet e tjera. Për të qenë inovues, duke u munduar të krijojë një të ardhme ndryshe në rrjetet sociale, ku kryesore të jetë përmbajtja, jo forma. Është një përpjekje për të rritur kreativitetin dhe të mos mundohesh të përshtasësh postimet në mënyrë të tillë që të marrë më shumë like, por të bësh atë që realisht mendon se sjell një impakt pozitiv në komunitet. Insta do të thotë e çastit. Dhe kjo është çfarë i ka dhënë kaq popullaritet duke e bërë rrjetin social më të madh në botë. Sepse në fillimet e tij njerëzit por edhe bizneset ishin më të vërtetë, nuk kuroheshin kaq shumë, por vetëm postonin një foto të momentit, sido që të ishte.
Për të rritur të ardhurat. Ky është një biznes në fund të fundit. Instagram ka kuptuar që platforma e vetë ka filluar të përdoret nga influencers për të fituar miliona e miliona euro e dollarë, përmes postimeve të paguara nga markat e ndryshme. Por Instagram i fiton vetë të ardhurat nëpërmjet reklamimit të markave. Prandaj influencers po konkurojnë Instagramin për paratë që bizneset paguajnë për promovim në Instagram. Me fshehjen e likeve, Instagram mendon se gradualisht tërheqja që markat kanë për influencers do të bjerë dhe të paktën një përqindje e parave që u jepen atyre, bizneset t’i përdorin direkt në Instagram.
Për të mirën mendore të njerëzve. Nuk duhet të të shkojë në mend xhelozia dhe inati pse dikush merr më shumë like se ty. E dini që ka njerëz që postojnë diçka, presin 1 orë, shohin se nuk kanë numrin e likeve që prisnin dhe e fshijnë foton? Është e tmerrshme. Nëse ti mendon se po publikon diçka me vlerë, nuk mund të ndryshosh mendim mbi vlerës e asaj vetëm sepse nuk ke marrë X like. Njerëzit thjesht mund ta shohin, e pëlqejnë me vete, por nuk bëjnë like. Ndoshta është momenti që të mbështetemi më shumë tek komentet dhe mesazhet për t’i dhënë feedback njëri-tjetrit dhe jo vetëm me një prekje të dyfishtë në xhamin e smartphone-it.

Teknologji

Honda prezanton motorin e ri V6 dhe teknologjinë hibride të gjeneratës së ardhshme

Published

11 hours ago

November 8, 2025

UBT News

Honda ka zbuluar teknologjitë kryesore të sistemeve të saj hibride të mëdha të gjeneratës së ardhshme, duke përfshirë motorin e ri V6 që përmbush standardet më të rrepta mjedisore, si dhe njësitë e përmirësuara të fuqisë dhe bateritë me efikasitet të lartë dhe kosto më të ulët.

Kompania synon të rrisë efikasitetin e karburantit me mbi 30% krahasuar me modelet aktuale me motorë me djegie të brendshme në të njëjtin segment.

Kombinimi i motorit V6 me sistemin e ri hibrid do të ofrojë drejtim më ekonomik dhe performancë të lartë, veçanërisht për automjetet e mëdha dhe të rënda.

Honda parashikon gjithashtu një përmirësim prej mbi 10% në përshpejtim, falë rritjes së efikasitetit të motorit, optimizimit të njësive të fuqisë dhe mbështetjes nga bateria.

Kjo teknologji pritet të debutojë më 2027 në modelet e mëdha të Hondës, fillimisht në tregun amerikan, me mundësi zgjerimi në Evropë. /A.Z/UBT News/

Teknologji

Pse Google dëshiron t’ju pengojë të përdorni ChatGPT?

Published

1 day ago

November 7, 2025

UBT News

Në përditësimin e fundit të shfletuesit Chrome, Google ka shtuar një buton të ri të quajtur “AI Mode”, i cili shfaqet direkt nën fushën e kërkimit në telefonat inteligjentë.

Ky opsion aktualisht është i disponueshëm për përdoruesit në SHBA në pajisjet iOS dhe Android, ndërsa Google planifikon ta zgjasë përhapjen globale në deri 160 vende në javët në vijim.

Butoni ndodhet mbi shkurtesat e faqeve më të vizituara, duke e bërë të lehtë qasjen për përdoruesit sapo të hapin një tab të ri.

Qëllimi është i qartë: Google synon që përdoruesit të klikojnë “AI Mode” para se të përdorin shërbime si ChatGPT ose Perplexity.

AI Mode ofron qasje të shpejtë në kërkimin me AI të Google e mbështet disa gjuhë. Në praktikë, kjo do të thotë se përdoruesit bëjnë pyetje dhe të marrin përgjigje, përmbledhje apo rekomandime pa pasur nevojë të hapin aplikacione të tjera.

Google ka prezantuar përmirësime të reja me “agentic AI”, që mundësojnë që AI Mode të rezervojë automatikisht bileta për ngjarje ose termine në sallonet e bukurisë. Ndërkohë, konkurenca nuk qëndron pasive – Perplexity po zhvillon shfletuesin e vet, Comet, ndërsa OpenAI po punon në Atlas, një shfletues me bazë AI që mund të ndryshojë mënyrën e përdorimit të internetit.

Përdoruesit e Chrome përfitojnë nga kjo veçori duke përditësuar shfletuesin; AI Mode duhet të shfaqet automatikisht kur hapin një tab të ri. /A.Z/UBT News/

Teknologji

Italia bëhet vendi i parë i BE-së që miraton ligj gjithëpërfshirës për Inteligjencën Artificiale

Published

1 day ago

November 7, 2025

UBT News

Italia ka bërë histori duke u bërë vendi i parë në Bashkimin Evropian që miraton një ligj të plotë për Inteligjencën Artificiale, vendosur rregulla të qarta dhe dënime të rrepta për abuzimet me teknologjinë.

Sipas ligjit të ri, përdorimi i AI për të krijuar ose shpërndarë përmbajtje të manipuluar, si “deepfakes”, mund të sjellë dënime nga 1 deri në 5 vjet burg. Masat bëhen edhe më të rënda nëse teknologjia përdoret për krime si mashtrimi, vjedhja e identitetit ose dëmtimi i reputacionit.

Ligji vendos rregulla për transparencën dhe mbikëqyrjen njerëzore në vendet e punës, për të siguruar që AI të mos dëmtojë proceset sociale dhe të drejtësisë. Kryeministrja Giorgia Meloni e konsideroi hap vendimtar për të ardhmen e Italisë dhe të BE-së.

“Qëllimi ynë është një inteligjencë artificiale e përqendruar te njeriu, transparente dhe e sigurt, që ruan privatësinë dhe sigurinë kibernetike, ndërsa nxit inovacionin”, tha ajo.

Një pikë kyçe e ligjit është mbrojtja e të miturve: fëmijët nën 14 vjeç nuk mund të përdorin AI pa miratimin e prindërve.

Ky ligj, i harmonizuar me Aktin Evropian për Inteligjencën Artificiale, pritet të shërbejë si model për vendet e tjera anëtare, duke vendosur Italinë në qendër të diskutimeve mbi përdorimin etik dhe të sigurt të teknologjisë. /A.Z/UBT News/

Teknologji

WhatsApp teston “drynin” për siguri maksimale

Published

1 day ago

November 7, 2025

UBT News

WhatsApp po përgatit një veçori të re, të quajtur përkohësisht “dryn”, që synon të ofrojë mbrojtje të avancuar për përdoruesit që mund të jenë në rrezik nga sulmet kibernetike a ndërhyrjet e programeve spiune Pegasus apo Graphite.

Sipas faqes së specializuar WaBetaInfo, funksioni është zbuluar në versionin beta 2.25.33.4 të aplikacionit për Android, dhe aktualisht ndodhet në fazën e testimit.

“Dryni” përfshin një kombinim të opsioneve të sigurisë dhe privatësisë, që aktivizohen automatikisht për të forcuar mbrojtjen e përdoruesit.

Këto përfshijnë:

Bllokimin e skedarëve mediatikë dhe bashkëngjitjeve nga dërgues të panjohur;

Çaktivizimin e pamjeve paraprake të lidhjeve në mesazhe;

Heshtjen e thirrjeve hyrëse nga persona që nuk janë në listën e kontakteve;

Kufizimin e shtimit në grupe vetëm nga kontaktet tuaja;

Njoftime automatike kur ndryshon kodi i sigurisë në një bisedë të enkriptuar nga fillimi në fund;

Aktivizimin e verifikimit me dy hapa;

Kufizimin e dukshmërisë së fotos së profilit, informacionit, statusit dhe datës së fundit të lidhjes vetëm për kontaktet;

Dhe madje fshehjen e adresës IP gjatë thirrjeve, duke i bërë ato të kalojnë përmes serverëve të WhatsApp-it.

Nëse zbatohet. kjo veçori do të rrisë ndjeshëm nivelin e mbrojtjes kundër kërcënimeve të mundshme, pa qenë nevoja që përdoruesit të ndryshojnë manualisht shumë cilësime të privatësisë.

Aktualisht, nuk dihet ende se kur WhatsApp do ta lëshojë këtë funksion për të gjithë përdoruesit, por pritet të jetë hap i rëndësishëm drejt sigurisë së avancuar në komunikimet digjitale. /A.Z/UBT News/