Policia e Kosovës ka njoftuar për një rast të dyshuar të falsifikimit të dokumenteve në Aeroportin Ndërkombëtar të Prishtinës “Adem Jashari”.

Rasti është raportuar më 8 shtator, rreth orës 17:45, kur gjashtë shtetas të huaj, gjatë arritjes, kanë prezantuar dokumente të cilat dyshohet se janë të falsifikuara.

Me vendim të prokurorit, pasaportat e dyshuara janë konfiskuar, ndërsa të gjashtë personat janë dërguar në Qendrën e Azilit./A.K/

Policia e Kosovës ka raportuar për pesë raste të dhunës në familje në Prishtinë dhe Mitrovicë gjatë datës 8 shtator.

Në Prishtinë, një grua ka raportuar se është dhunuar nga një burrë, i cili aktualisht ndodhet në kërkim policor. Në një rast tjetër, një i dyshuar është arrestuar nën dyshimin për dhunë ndaj disa viktimave dhe, me vendim të prokurorit, është dërguar në mbajtje.

Po ashtu, në Prishtinë është arrestuar edhe një burrë, i dyshuar se ka ushtruar dhunë ndaj një burri tjetër. Pas intervistimit, ai është dërguar në mbajtje.

Në Mitrovicë të Jugut, një burrë është arrestuar nën dyshimin se ka sulmuar një grua. Nuk raportohet për të lënduar dhe, pas intervistimit, palët janë liruar. Rasti vazhdon në procedurë të rregullt.

Ndërkaq, në një rast tjetër në Mitrovicë të Jugut, një grua dyshohet se pas një mosmarrëveshjeje ka dëmtuar një televizor dhe ka sulmuar një grua tjetër. Edhe në këtë rast nuk raportohet për të lënduar, ndërsa procedura vazhdon në mënyrë të rregullt./A.K/

Mëngjesin e të mërkurës, një ngjarje e rëndë ka ndodhur në zonën e Brrylit në Tiranë.

Sipas njoftimit të Policisë së Tiranës, një shpërthim ka ndodhur në një pikë karburanti që ndodhet në afërsi të urës së Brrylit, shkruan atsh, transmeton KosovaPress.

Nga shpërthimi kanë mbetur të lënduar tre punonjës të karburantit, të cilët janë transportuar në spital për të marrë ndihmë mjekësore.

Në vendngjarje kanë mbërritur menjëherë forcat zjarrfikëse, të cilat kanë bërë të mundur shuarjen e zjarrit, ndërsa policia ka nisur hetimet për zbardhjen e rrethanave të ngjarjes.

“Tek “Brryli”, në një karburant, dyshohet se ka shpërthyer një bombul gazi, gjatë kohës që po furnizohej me karburant një automjet. Si pasojë, janë dëmtuar 3 persona, punonjës të karburantit, të cilët janë dërguar në spital për mjekim, jashtë rrezikut për jetën”, thuhet në njoftimin e Policisë.

Grupi hetimor vijon punën për sqarimin e rrethanave të rastit./A.K/

Lëvizja Vetëvendosje do propozojë Albulena Haxhiun për kryetare të Kuvendit.

KosovaPress ka mësuar se LVV-ja do të propozojë emrin e kryetarit të legjislativit për t’i hapur rrugë konstituimit të legjislaturës së njëmbëdhjetë.

Sot do të mbahet vazhdimi i seancës konstituive të Kuvendit, pasi në dy tentime paraprake në muajin gusht, LVV-ja kishte kërkuar kohë për të arritur marrëveshje politike për çështjen e presidentit.

Ndërkohë, KosovaPress ka mësuar nga burime brenda LVV-së se ka ende pikëpyetje nëse sot do të formohet edhe qeveria e re.

LVV dhe LDK më 31 gusht kishin arritur marrëveshje që Bekim Sejdiu të propozohet për president të vendit. Këto dy parti, bashkë me minoritetet jo-serbe, i kanë 80 vota të nevojshme për ta zgjedhur presidentin.

Mirëpo, në mbledhjen e Grupit Parlamentar të LDK-së më 1 shtator u bë e ditur se gjashtë deputetë të kësaj partie nuk do të mundësojnë zgjedhjen e Sejdiut për president.

Pavarësisht kritikave se Kuvendi nuk është konstituuar brenda afatit tridhjetëditor, PDK dhe LDK kanë konfirmuar se deputetët e tyre do të jenë të pranishëm në Kuvend./KosovaPress/A.K/