Reshjet e dendura të shiut dhe erërat e forta që kanë përfshirë territorin e Komunës së Lipjanit kanë shkaktuar dëme në disa zona, duke prekur sektorin e bujqësisë, infrastrukturën publike dhe rrjetin energjetik.

Sipas Komunës së Lipjanit, dëme janë evidentuar në shkollën e Gadimes, Sallën Sportive dhe shtigjet e ecjes, ku në disa segmente janë rrëzuar drunj, duke paraqitur rrezik për qytetarët. Gjithashtu, në disa lokalitete janë dëmtuar dhe rrëzuar shtylla elektrike, çka ka shkaktuar ndërprerje të furnizimit me energji elektrike.

Ekipet e shërbimeve publike, në bashkëpunim me strukturat emergjente dhe institucionet përkatëse, kanë dalë në terren dhe po punojnë në vlerësimin e situatës, sanimin e dëmeve dhe largimin e pengesave, me qëllim rikthimin e gjendjes në normalitet dhe garantimin e sigurisë së qytetarëve.

Komuna u ka bërë thirrje qytetarëve të tregojnë kujdes të shtuar gjatë lëvizjes në zonat e prekura dhe të shmangin qëndrimin pranë objekteve, pemëve dhe shtyllave të dëmtuara, të cilat mund të paraqesin rrezik.

Po ashtu, qytetarëve u është rekomanduar të jenë të kujdesshëm edhe gjatë ditëve në vijim, pasi sipas parashikimeve meteorologjike priten reshje intensive dhe erëra të fuqishme./A.K/

Arkeologët kanë zbuluar një nekropol rreth 2,500-vjeçar nën fabrikën historike të makaronave “Garofalo” në Gragnano, pranë Napolit, gjatë gërmimeve të kryera për një zgjerim industrial.

Sipas Institucionit të Arkeologjisë, Arteve të Bukura dhe Peizazhit për Zonën Metropolitane të Napolit (Soprintendenza ABAP Napoli), varrezat datojnë nga periudha arkaike, midis shekujve VIII dhe VI para erës sonë, kur rajoni i Kampanias ishte një qendër ku ndërthureshin kulturat vendase, greke dhe etruske.

Në vendngjarje janë zbuluar 85 varre, të cilat besohet se i përkisnin, të paktën pjesërisht, elitës së pasur të shekullit VI para erës sonë.

Gërmimet nxorën në dritë enë qeramike të zbukuruara, stoli, armë, si dhe objekte të importuara nga Egjipti dhe Etruria. Veçanërisht të rëndësishme konsiderohen materialet organike të ruajtura brenda disa varreve, përfshirë pëlhura, objekte druri dhe shporta të thurura, të cilat zakonisht shkatërrohen me kalimin e kohës.

Sipas ekspertëve, zbulimi dëshmon për lidhjet tregtare dhe kulturore që Kampania kishte me Greqinë, Egjiptin, Etrurinë dhe Mesdheun lindor, ndërsa ofron informacion të ri për zakonet e varrimit dhe jetën e përditshme në periudhën pararomake.

“Zbulimi i nekropolit të Via dei Pastai në Gragnano është rezultat i një bashkëpunimi të suksesshëm publiko-privat. Artefaktet e gjetura dhe gjendja e jashtëzakonshme e ruajtjes së tyre ofrojnë njohuri të reja për zhvillimin e vendbanimeve në këtë rajon gjatë periudhës arkaike”, ka deklaruar Luigi La Rocca, drejtues i Departamentit për Mbrojtjen e Trashëgimisë Kulturore në Ministrinë italiane të Kulturës.

Pas dokumentimit, zona do të mbulohet sërish, ndërsa studiuesit do të vazhdojnë analizat mbi artefaktet dhe mbetjet njerëzore, me synim të zbulojnë më shumë rreth jetës dhe kushteve të banorëve të asaj kohe./A.K/

Breshëri dhe moti i ligë që goditi Komunën e Skenderajt një ditë më parë kanë shkaktuar dëme të konsiderueshme në bujqësi. Drejtori i Drejtorisë për Bujqësi, Pylltari dhe Zhvillim Rural në Skenderaj, Sabit Ferizi, i shoqëruar nga zyrtarët e drejtorisë, ka zhvilluar vizita në terren në fshatrat Vajnik, Burojë, Likoc dhe Izbicë për të parë nga afër gjendjen e kulturave të dëmtuara të drithërave, pemëve dhe perimeve. Sipas vlerësimeve të para, vetëm në fshatin Vajnik janë dëmtuar rreth 60 hektarë të mbjella me grurë.

Gjatë inspektimit në terren, drejtori Sabit Ferizi u shpreh se situata e krijuar kërkon ndërhyrje të shpejtë për t’u dalë në ndihmë bujqve të dëmtuar.

“Pamja në terren është me të vërtetë e rëndë. Vetëm në fshatin Vajnik kemi rreth 60 hektarë grurë të dëmtuar plotësisht nga breshëri, pa llogaritur pemët dhe perimet në fshatrat e tjerë. Ne jemi pranë fermerëve në këtë moment të vështirë; procesi i pranimit të kërkesave ka filluar sot dhe komisionet tona do të jenë në çdo arë e pemishte për të bërë vlerësimin e saktë të çdo dëmi,” tha Ferizi.

Nga dita e sotme, fermerët e zonave të prekura kanë filluar zyrtarisht paraqitjen e kërkesave, ndërsa Komisioni Komunal për Vlerësimin e Dëmeve nga Fatkeqësitë Natyrore pritet të dalë së shpejti në terren për verifikimin e detajuar.

Drejtori Ferizi konfirmoi se hapat procedurialë do të ndiqen me shpejtësi për t’i hapur rrugë kompensimit nga niveli qendror.

“Pasi të përfundojmë raportin dhe ta miratojmë në Kuvendin Komunal, do t’i drejtohemi menjëherë Komisionit Qendror Qeveritar. Do të bëjmë të pamundurën që raporti të procedohet sipas rregullave ligjore dhe fermerët tanë të kompensohen për humbjet e pësuara,” përfundoi ai. /E.A/

Aktorja amerikane Kaylee Hottle, e njohur për rolin e saj si Jia në filmat “Godzilla vs. Kong”, ka ndërruar jetë në moshën 18-vjeçare, pas një aksidenti me veturë në shtetin amerikan të Marylandit.

Lajmin e ka konfirmuar babai i saj, Joshua Hottle, përmes një videoje të publikuar në Facebook në gjuhën amerikane të shenjave. Edhe Shkolla e Teksasit për Personat e Shurdhër, ku Hottle kishte studiuar, shprehu ngushëllimet për humbjen e saj.

Sipas autoriteteve në Frederick County, aksidenti ndodhi në orët e para të mëngjesit të së martës në zonën e Ijamsville. Policia bëri të ditur se dyshohet se shpejtësia e tepërt ishte një nga faktorët që çoi në aksidentin me një automjet.

Shoferi 19-vjeçar u dërgua në spital me lëndime që nuk rrezikojnë jetën, ndërsa një pasagjer tjetër refuzoi trajtimin mjekësor. Autoritetet kanë kërkuar që të mos ketë spekulime rreth rrethanave të aksidentit.

Hottle, e cila ishte e shurdhër, fitoi vlerësime për interpretimin e personazhit Jia, një vajzë jetime, në filmin “Godzilla vs. Kong” të vitit 2021, rol të cilin e ripërsëriti edhe në vazhdimin “Godzilla x Kong: The New Empire” në vitin 2024.

Për interpretimin e saj në filmin e fundit, ajo ishte nominuar për çmimin Saturn Award në kategorinë e aktores së re më të mirë. Pas lajmit për vdekjen e saj, edhe Warner Bros. i bëri homazhe aktores përmes një postimi në rrjetet sociale./A.K/