Policia ka ndaluar një veturë në Suharekë, ku gjatë kontrollit janë gjetur substanca të dyshuara narkotike dhe pajisje që dyshohet se janë përdorur për përpunimin dhe paketimin e tyre.

Rasti është regjistruar më 3 tetor 2026. Në veturë ndodheshin tre persona të dyshuar.

Gjatë kontrollit, policia ka sekuestruar 25.86 gramë substancë të dyshuar narkotike të llojit marihuanë dhe 0.83 gramë substancë të dyshuar narkotike të llojit kokainë.

Po ashtu, janë gjetur dhe sekuestruar dy peshore për matjen e substancave narkotike, një grinder për bluarjen e marihuanës, një brisk dhe 63 qese të vogla, të cilat dyshohet se shërbenin për paketimin e narkotikëve.

Në cilësi të provave materiale janë sekuestruar edhe tre telefona celularë dhe një shumë parash të gatshme.

Pas intervistimit dhe me vendim të prokurorit, dy nga të dyshuarit janë arrestuar dhe janë dërguar në mbajtje, ndërsa personi i tretë është liruar dhe rasti ndaj tij do të procedohet në procedurë të rregullt.

Rasti mbetet nën hetim nga organet kompetente.

D.L

Sipas raportit 24-orësh të Policisë së Kosovës, në Prishtinë është raportuar një rast i veprës penale “Ngacmim”, ku i një i dyshuar burrë ka ngacmuar një viktimë grua.

I dyshuari është shoqëruar në stacionin policor dhe pas intervistimit, me vendim të prokurorit kujdestar, është liruar në procedurë të rregullt. /E.A/

Një person ka ndërruar jetë si pasojë e plagëve të marra në një aksident trafiku në Prishtinë.

Sipas raportit të Policisë së Kosovës, aksidenti është raportuar më 3 tetor 2026. Viktima, ishte duke u trajtuar në Qendrën Klinike Universitare të Kosovës (QKUK), pasi ishte goditur nga një veturë.

Policia ka njoftuar se viktima ka ndërruar jetë më 4 tetor, gjatë kohës sa ishte duke marrë trajtim mjekësor.

Me vendim të prokurorit, trupi i pajetë është dërguar në Institutin e Mjekësisë Ligjore (IML) për obduksion.

Rasti është duke u hetuar nga organet kompetente.

D.L

Një rast i rëndë është raportuar në Obiliq, ku një person dyshohet se ka kryer veprën penale të dhunimit ndaj një gruaje.

Sipas të dhënave të Policisë së Kosovës, rasti është raportuar për periudhën 4 tetor 2026, nga mesnata deri në orën 09:00. I dyshuari është mashkull, shtetas i Kosovës, ndërsa viktima është femër, po ashtu shtetase e Kosovës.

Për rastin është njoftuar prokurori kompetent, ndërsa i dyshuari aktualisht ndodhet në kërkim policor.

Policia ka bërë të ditur se rasti është duke u hetuar dhe se procedurat hetimore janë në zhvillim.

D.L