Sport

Ardian Ismajli dallohet menjëherë si titullar, një nga më të mirët e ndeshjes

Published

5 years ago

December 21, 2020

Betim Gashi

Spezia humbi të dielën ndeshjen me gjigantin italian, Interin, me rezultatin 2:1. Por skuadra italiane “fitoi” një mbrojtës për ndeshjet e ardhshme. Bëhet fjalë për mbrojtësin kosovar, Ardian Ismajli.

Mbrojtësi i Përfaqësueses së Shqipërisë ishte ndër më të mirët në ndeshjen e tij të parë si titullar në kampionatin italian, Serie A. Ai luajti gjatë tërë ndeshjes që i takoi xhiros së 13-të të elitës së futbollit italian. Ismajli mori notën 7, bashkë me partnerin e tij në mbrojtje, Claudio Terzi, dyshe që nuk i lejoi hapësirë të madhe dyshes së sulmit të Interit, Romelu Lukakut dhe Lautaro Martinezit.

Vetë Ismajli thotë se është i kënaqur me paraqitjen e tij, derisa lëvdatat nuk i kanë munguar as nga të tjerët. Atij i vjen keq që me ekipin pësoi disfatë.

“Të luash kundër Interit dhe të kesh paraqitje të mirë, sigurisht që të bën të ndihesh mirë. Kam kaluar periudhë të keqe, sepse erdha me vonesë, pastaj koronavirusi. Më mori kohë ambientimi, por i kam lënë anash dhe jam duke menduar tash për të ardhmen. Mora komplimente nga trajneri dhe bashkëlojtarët. Më vjen keq që nuk arritëm ta shmangim humbjen, por me paraqitje jam i kënaqur”, ka thënë Ismajli të dielën për Kohën.

Në fakt, për Ismajlin ishte vetëm ndeshja e dytë. Ai debutoi ndaj Juventusit më 1 nëntor. Luajti dy minutat e fundit të ndeshjes që Spezia e humbi me rezultatin 4:1.

Por mbrojtësi nga Prishtina thotë se paraqitja ndaj Interit i ka shërbyer për vetëbesim.

“Kjo ndeshje më ka shërbyer shumë për vetëbesim përballë një kundërshtari të fortë, ndaj sulmuesve të fortë”, është shprehur ai.

Ismajli, 24-vjeçar, te Spezia u transferua në shtator të këtij viti nga skuadra e Hajdukut të Splitit. Ai pret që të luajë rregullisht deri në fund të këtij edicioni te Spezia.

“Edhe pse në kohë pandemie, unë arrita ta realizoj transferimin nga Kroacia në Serie A. Është një e arritur e madhe, por unë nuk jam kënaqur me kaq, kam punuar që nga dita e parë kur iu bashkova Spezias. Kam punuar për ta siguruar vendin e titullarit. Tani pas kësaj paraqitjeje që e pata ndaj Interit, sigurisht që pres të luaj rregullisht deri në fund. Ndoshta do të kisha mundur të luaja edhe në ndeshjet e tjera, nëse nuk do t’i kisha telashet e fillimit. Por nuk do ta kthej kokën prapa, do të vazhdoj ta shoh të ardhmen. Nuk ka tjetër, vetëm se të luaj rregullisht”, ka deklaruar ai.

Ismajli është ambientuar edhe me jetën në Itali. Thotë se nuk i mungon asgjë. Me Spezian synon ta sigurojë mbijetesën në Serie A. Spezia zë vendin e 17-të me 11 pikë.

“Është gjithçka në rregull tani. Jam ambientuar mirë, të gjithë më kanë pritur mirë. Me klubin synojmë mbetjen në elitë. Shpresojmë ta arrijmë këtë synim e më pas të shohim”, ka deklaruar reprezentuesi i Shqipërisë.

Ismajli karrierën e ka nisur te 2 Korriku i Prishtinës. Pak ka qëndruar edhe te Prishtina si i huazuar, derisa te Hajduku i Splitit u transferua në fillim të vitit 2016. Fillimisht te ekipi i dytë i Hajdukut, por për një periudhë shumë të shkurtër ai u bë titullar te ekipi i parë i klubit kroat.

Atëbotë ishte pjesë e Shpresave të Kosovës. Luajti edhe në miqësoren e vitit 2018 për Përfaqësuesen A të Kosovës në fitoren 3:0 ndaj Shqipërisë. Por më pas vendosi të bëhej pjesë e Përfaqësueses së Shqipërisë. Për Shqipërinë që nga viti 2018 ka shënuar një gol në 14 paraqitje. Ai shpreson të ketë suksese edhe me Përfaqësuesen e Shqipërisë.

Related Topics:UBTSPORT Ardian Ismajli Spezia

Up Next

Mourinho nuk pajtohet me rezultatin e ndeshjes: Rezultati diçka tjetër, realiteti diçka tjetër

Don't Miss

Salah lëkund Liverpoolin: Është në duart e klubit, nuk e dimë të ardhmen

Lajmet

Akil Gjakova mbetet pa medalje, Kosova kthehet me të artën e Distrisë

Published

11 hours ago

April 17, 2026

UBTNews

Dita e dytë e Kampionatit Evropian të xhudos në Gjeorgji nuk ka sjellë medalje të reja për ekipin e Kosovës, pasi Akil Gjakova u mposht në sekondat e fundit të luftës për vendin e tretë.

Gjakova, i cili garoi në kategorinë deri në 73 kilogramë, e nisi ditën me dy fitore të rëndësishme ndaj garuesve nga Austria dhe Britania e Madhe, por lufta maratonë me këtë të fundit ndikoi në energjinë e tij për çerekfinalen kundër legjendës gjeorgjiane, Lasha Shavdatiashvili.

Edhe pse arriti të rikthehej me një fitore në repesazh ndaj moldavit Adil Osmanov, Akili u ndal në duelin për medaljen e bronztë nga turku Bilal Çiloglu, i cili shfrytëzoi një moment pakujdesie për të fituar me “Uazari”.

Në këtë kampionat u paraqitën edhe Dardan Cena dhe Laura Fazliu, por pa arritur të lënë gjurmë.

Cena u eliminua nga kampioni olimpik i Azerbajxhanit pas një fitoreje fillestare, ndërsa Laura Fazliu dëshpëroi me një eliminim të papritur që në luftën e parë kundër sllovenes Kaja Kajzer. Megjithatë, bilanci i Kosovës mbetet pozitiv falë Distria Krasniqit, e cila të enjten u shpall kampione e Evropës në kategorinë deri në 52 kilogramë.

Ky sukses i Distrisë bën që Kosova të fitojë medalje në kampionatet evropiane për të 14-tin vit radhazi, duke konfirmuar nivelin e lartë në mesin e 400 xhudistëve pjesëmarrës në Tbilisi.

Sport

Fundjava sjell duele të zjarrta në Premier League dhe Bundesliga

Published

13 hours ago

April 17, 2026

UBTNews

Fundjava sjell përballje mjaft interesante në Premier League dhe Bundesliga, me duele që pritet të ndikojnë në garën për titull dhe zonat evropiane.

Të shtunën, vëmendja në Angli nis që në orën 13:30 me përballjen mes Brentford dhe Fulham. Në orën 16:00 zhvillohen dy ndeshje të tjera, ku Leeds United pret Wolverhampton Wanderers, ndërsa Newcastle United përballet me AFC Bournemouth.

Mbrëmja sjell dy sfida të forta: në 18:30 Tottenham Hotspur përballet me Brighton & Hove Albion, ndërsa në 21:00 luhet derbi mes Chelsea dhe Manchester United.

Në Gjermani, në kuadër të Bundesligës, të shtunën në orën 15:30 Bayer Leverkusen përballet me FC Augsburg, ndërsa TSG Hoffenheim pret Borussia Dortmund.

Edhe e diela premton spektakël në Premier League. Në orën 15:00 zhvillohen tri ndeshje: Aston Villa ndaj Sunderland, Everton përballet me Liverpool në derbin e qytetit, si dhe Nottingham Forest kundër Burnley.

Kryendeshja e ditës zhvillohet në orën 17:30, ku Manchester City përballet me Arsenal në një duel direkt për kreun e tabelës.

Në Bundesliga, të dielën në orën 15:30 Bayern Munich luan ndaj VfB Stuttgart, ndërsa SC Freiburg përballet me 1. FC Heidenheim.

Një fundjavë e pasur me futboll cilësor, ku çdo pikë mund të jetë vendimtare në garën për objektivat sezonalë.

Sport

Akil Gjakova një fitore larg medaljes së bronztë në Evropian

Published

14 hours ago

April 17, 2026

UBTNews

Xhudisti kosovar Akil Gjakova ka mbajtur gjallë shpresat për medalje në Kampionatin Evropian të xhudos që po zhvillohet në Tbilisi, pasi ka fituar përballjen e parë në repesazh.

Gjakova u tregua më i mirë ndaj moldavit Adil Osmanov, të cilin e mposhti me “Ippon”, duke siguruar një hap të rëndësishëm drejt medaljes së bronztë në kategorinë deri në 73 kilogramë.

Me këtë fitore, ai është vetëm një duel larg podiumit. Në ndeshjen vendimtare për medalje, Gjakova do të përballet me turkun Bilal Ciloglu, ku fituesi siguron medaljen e bronztë.

Në këtë kampionat, Kosova ka shënuar tashmë sukses të madh, pasi Distria Krasniqi fitoi medaljen e artë në kategorinë deri në 52 kilogramë.

Sport

FFK dënon disa klube dhe zyrtarë pas xhiros së 28-të të Superligës

Published

14 hours ago

April 17, 2026

UBTNews

Komisioni Disiplinor dhe i Etikës i Federatës së Futbollit të Kosovës (FFK) ka marrë një sërë vendimesh disiplinore ndaj klubeve dhe individëve të përfshirë në ndeshjet e xhiros së 28-të të Albi Mall Superliga e Kosovës.

KF Llapi është dënuar me një ndeshje si vendas pa praninë e tifozëve, si dhe me gjobë prej 2000 eurosh, pas incidenteve në ndeshjen ndaj KF Drenica. Sipas raportit zyrtar, janë evidentuar ofendime nga tribuna, hedhje mjetesh në fushë dhe dëmtime të pronës së klubit mysafir.

Po ashtu, ndihmëstrajneri i KF Ferizaj, Luan Alija, është pezulluar për dy ndeshje për shkak të sjelljes ndaj gjyqtarëve në ndeshjen kundër FC Drita.

Nga KF Vëllaznimi, futbollistët Arbër Shala dhe Drilon Cenaj janë dënuar me nga dy ndeshje moslojë për kartonë të kuq dhe sjellje josportive në takimin ndaj FC Dinamo.

Ndërkohë, ndihmëstrajneri i FC Ballkani, Radostin Aleksandrov, është pezulluar për tri ndeshje në garat e Kupës dhe është gjobitur me 1000 euro, pas ofendimeve ndaj gjyqtarit në ndeshjen ndaj KF Dukagjini.

Po ashtu, futbollisti i Ferizajt, Argjend Mahmuti, është dënuar me dy ndeshje moslojë për reagim ndaj gjyqtarit në ndeshjen kundër Llapit.

Palët e pakënaqura kanë të drejtë ankese në afatin e paraparë, por ankesa nuk e pezullon ekzekutimin e vendimeve.