Dy hakera, të njohur me pseudonimet Saber dhe cyb0rg, kanë arritur të fitojnë akses në kompjuterin e një hakeri që dyshohet të jetë i angazhuar nga Qeveria e Koresë së Veriut. Gjatë një periudhe prej rreth katër muajsh, ata analizuan informacionet e siguruara dhe identifikuan prova që lidhin sulmuesin me operacione të spiunazhit kibernetik të organizuara nga regjimi verikorean, si dhe me mjetet dhe infrastrukturën e përdorur në këto sulme.

Bazuar në të dhënat e mbledhura, dy hakera kanë evidentuar sulme aktive ndaj subjekteve në Korenë e Jugut dhe Tajvan, të cilave iu janë dërguar njoftime për situatën. Përveç operacioneve të spiunazhit, grupet e lidhura me Korenë e Veriut janë të njohura për kryerjen e grabitjeve të mëdha në kriptovaluta dhe për operacione të tjera financiare që synojnë mbështetjen e programeve bërthamore të regjimit.

Nga analiza e sjelljeve dhe materialeve të kompjuterit të sulmuesit, dyshohet se individi, i identifikuar me pseudonimin “Kim”, mund të ketë prejardhje kineze dhe të jetë i angazhuar për të dy qeveritë, pasi janë vërejtur përdorime të përkthimeve nga gjuha koreane në kinezishten e thjeshtuar dhe mungesë aktiviteti gjatë pushimeve kineze.

Saber dhe cyb0rg nuk kanë dhënë detaje mbi mënyrën e fitimit të aksesit në sistemin e “Kim”, duke argumentuar se metodat e përdorura mund të përdoren për të hyrë në sisteme të tjera të lidhura me aktivitetet kibernetike të Koresë së Veriut.

Megjithë paligjshmërinë e veprimeve të tyre, dy hakera theksojnë rëndësinë e publikimit të këtyre të dhënave për të ndihmuar komunitetin ndërkombëtar të sigurisë kibernetike në identifikimin dhe bllokimin e sulmeve nga aktorët shtetërorë.

Sony ka njoftuar se do të rrisë çmimet e të gjitha modeleve të konsolave PlayStation 5 në Shtetet e Bashkuara duke filluar nga e enjtja, 21 gusht. Rritja arrin deri në 50 dollarë, me modelin më të shtrenjtë, PS5 Pro, që tani do të ketë një çmim të rekomanduar prej 749.99 dollarësh.

Në një postim në blog, Isabelle Tomatis, zëvendëspresidente e marketingut global në Sony Interactive Entertainment, tha se vendimi është marrë për shkak të një “mjedisi ekonomik sfidues” dhe rritjes së kostove.

Modeli standard i PlayStation 5 do të kushtojë 499.99 dollarë, ndërsa çmimet e aksesorëve të kësaj linje do të mbeten të pandryshuara. Kompania nuk ka bërë të ditura ndryshime të tjera për tregjet jashtë SHBA-së.

Rritja vjen në një kohë kur kompanitë teknologjike po përballen me tarifa të reja për importet nga Japonia dhe me një ngadalësim të përgjithshëm të tregut të videolojërave. Sony kishte zbatuar rritje të ngjashme më herët këtë vit edhe në tregje si Mbretëria e Bashkuar dhe Europa. Kompani të tjera, përfshirë Nintendo, kanë ndjekur një qasje të ngjashme në rritjen e çmimeve të produkteve të tyre.

Dhoma e ulët e Parlamentit të Indisë ka miratuar një ligj të ri që ndalon të gjitha lojërat online me para të vërteta, pavarësisht nëse ato bazohen në aftësi apo fat. Ligji, i quajtur “Ligji për Promovimin dhe Rregullimin e Lojërave Online, 2025”, gjithashtu ndalon reklamat dhe transaksionet financiare që lidhen me këto lojëra.

Sipas autoriteteve indiane, qëllimi i ligjit është mbrojtja e shoqërisë nga dëmet financiare dhe sociale, sidomos pas disa rasteve tragjike të vetëvrasjeve të lidhura me humbjet në lojërat online. Lojërat e thjeshta dhe esports pa para reale nuk preken nga ky ligj.

Ata që shkelin ligjin mund të përballen me burg deri në tre vjet dhe gjoba të mëdha financiare. Edhe figurat publike që reklamojnë këto lojëra mund të ndëshkohen.

Megjithatë, industria e lojërave online në Indi ka reaguar me shqetësim, duke paralajmëruar se ndalimi do të favorizojë platformat e paligjshme jashtë vendit dhe mund të shkaktojë mbylljen e mbi 400 kompanive, humbjen e më shumë se 200,000 vendeve pune, si dhe dëm ekonomik prej miliarda dollarësh.

Ligji pritet të dërgohet për miratim edhe në dhomën e lartë dhe tek presidenti. Në anën tjetër, disa kompani në fushën e esports dhe lojërave të thjeshta pa pagesë e kanë përshëndetur këtë hap si një mundësi për zhvillim më të qartë të tregut.

Kompania HMD ka prezantuar modelin e saj më të ri, HMD Fuse, një telefon inteligjent i dizajnuar posaçërisht për fëmijë, me fokus në sigurinë dhe mbrojtjen nga përmbajtjet e dëmshme në internet.

Një nga veçoritë kryesore të këtij modeli është HarmBlock+, një teknologji e re që synon të mbrojë fëmijët duke bllokuar dërgimin, marrjen, ruajtjen apo shikimin e përmbajtjeve të papërshtatshme, përfshirë edhe përmbajtjet me natyrë seksuale. Kjo teknologji është zhvilluar në bashkëpunim me SafeToNet dhe funksionon në nivel sistemi operativ me ndihmën e inteligjencës artificiale dhe kontrolleve prindërore të avancuara.

HMD Fuse vjen me ekran 6.56 inç HD+, frekuencë rifreskimi 90Hz dhe ndriçim deri në 600 nits. Pajisja fuqizohet nga procesori Snapdragon 4 Gen 2, 6GB RAM dhe 128GB memorie të brendshme.

Në aspektin e kamerës, ofron një sistem të dyfishtë në pjesën e pasme me sensor kryesor 108MP, ndërsa kamera e përparme për selfie ka 50MP me fokus automatik. Pajisja mbështet karikim të shpejtë 33W, ka një bateri prej 5,000mAh, Bluetooth 5.1, Android 15, port kufjesh 3.5 mm, skaner gjurmësh gishtash të integruar anash, si dhe vlerësim IP54 për rezistencë ndaj ujit dhe pluhurit.

Ky model vjen si pjesë e vizionit të përbashkët të HMD dhe partnerëve të saj për zhvillimin e telefonëve “pa varësi”, të përshtatshëm për moshat e reja, dhe tregon një përpjekje konkrete drejt teknologjisë së sigurt për fëmijët.