Vendimi i fundit i Konfederatës Afrikane të Futbollit (CAF) ka shkaktuar reagime të shumta, pasi Senegali është zhveshur zyrtarisht nga titulli i kampionit të Afrikës, i cili i është dorëzuar Marokut.

Ndonëse Senegali e kishte fituar finalen e janarit me rezultat 1-0 në kohën shtesë, ky rezultat është anuluar dhe është regjistruar si fitore 3-0 në tavolinë për Marokun.

Shkak për këtë vendim drastik është bërë braktisja e fushës nga lojtarët senegalezë për rreth 20 minuta gjatë kohës së rregullt, në shenjë proteste ndaj një penalltie të akorduar për Marokun pas rishikimit me VAR.

Sipas rregulloreve të CAF-it (Nenet 82 dhe 84), çdo ekip që refuzon të vazhdojë lojën ose largohet nga fusha pa lejen e gjyqtarit konsiderohet se e ka humbur ndeshjen.

Federata e Futbollit të Senegalit e ka cilësuar vendimin si të padrejtë dhe të pabazuar ligjshmërisht, duke paralajmëruar ankimim në Gjykatën e Arbitrazhit Sportiv (CAS). Ndërkohë, lojtarët senegalezë kanë reaguar me ironi në rrjetet sociale, duke postuar foto me trofeun dhe duke shprehur revoltën e tyre për humbjen e titullit jashtë vijave të fushës.

Deri më tani, Gjykata e Arbitrazhit Sportiv (CAS) nuk ka nxjerrë ende një vendim përfundimtar, pasi procedurat e ankimimit zakonisht kërkojnë kohë për t’u shqyrtuar. Megjithatë, Federata e Futbollit të Senegalit ka konfirmuar se ka dorëzuar zyrtarisht lëndën, duke kërkuar pezullimin e menjëhershëm të vendimit të CAF-it.

Në anën tjetër, Maroku ka filluar përgatitjet për ceremoninë e pranimit të trofeut, ndërsa opinioni sportiv në Afrikë mbetet i ndarë: disa e shohin këtë si zbatim strikt të rregulloreve kundër braktisjes së fushës, ndërsa të tjerë e konsiderojnë një goditje të rëndë për integritetin e futbollit të luajtur në fushë.

Finalja e Ligës Unike do të dhurojë një përballje tërësisht kosovare mes dy skuadrave të forta të basketbollit të femrave.

KBF Peja 03 do të përballet me KBF Bashkimin në një duel që pritet të jetë shumë i luftuar dhe me atmosferë të zjarrtë në tribunë.

Ndeshja finale zhvillohet më 18 mars 2026, me fillim nga ora 19:30, në Palestrën Sportive “Sezai Surroi”.

Të dyja ekipet synojnë trofeun, duke premtuar spektakël dhe rivalitet deri në fund.

Manchester City dhe Chelsea, përballen me një mision shumë të vështirë për të siguruar kualifikimin në çerekfinale të UEFA Champions League.

Të dy skuadrat pësuan humbje të thella në ndeshjet e para, City u mposht 3:0 nga Real Madrid në “Santiago Bernabeu”, ndërsa Chelsea humbi 5:2 ndaj Paris Saint-Germain në Paris. Ndeshjet e kthimit zhvillohen sot nga ora 21:00.

Përmbysja e disavantazheve të tilla ndaj skuadrave si Real Madridi dhe PSG konsiderohet shumë e vështirë, duke pasur parasysh cilësinë dhe përvojën e tyre në garat evropiane. Megjithatë, te City mbizotëron besimi. Kapiteni Bernardo Silva theksoi se skuadra do të luftojë deri në fund, pavarësisht rezultatit të parë negativ.

Nga ana tjetër, Chelsea synon reagim në shtëpi, edhe pse përballet me mungesën e kapitenit Reece James për shkak të lëndimit. Trajneri Liam Rosenior ka kërkuar përqendrim maksimal dhe shmangie të gabimeve ndaj kampionit në fuqi.

Në kampin e PSG-së, Ousmane Dembele theksoi se skuadra e tij do të hyjë në fushë për fitore, duke paralajmëruar një tjetër ndeshje të fortë ndaj londinezëve.

Në takimet e tjera, Sporting CP përballet me Bodo/Glimt, ku norvegjezët kanë epërsi 3:0 nga ndeshja e parë. Ndërkohë, Arsenal FC dhe Bayer Leverkusen nisin nga barazimi 1:1, duke lënë gjithçka të hapur për kualifikim.