Lajmet

Aliu për projektet ujore: Asnjëri prej projekteve të shqyrtuara s’kanë pasur leje

Ai theksoi se këto çështje do t’i ngrisin si alarm dhe do të marrin masa korrekte drejt përmirësimit të proceseve.

Published

4 years ago

November 24, 2021

UBT news

Projektet kapitale në fushën e ujërave u bënë me një vlerësim ad hoc duke mos ndjekur një proces të vlerësimit profesional e të prioritetizimit të vlerësimit të kostove të përfitimeve dhe fezibilitetit të tyre. Shpeshherë inicimi i këtyre projekteve është bërë edhe nga stafi politik i kabinetit të ish-Ministrit të Mjedisit, Planifikimit Hapësinor dhe Infrastrukturës e pa pasur dokumente projektuese. Kështu tha ministri i MMPHI, Liburn Aliu derisa prezantoi raportin grupit punues për shqyrtimin e projekteve kapitale të zbatuara në fushën e ujërave.

Aliu në një konferencë për medie theksoi se këto çështje do t’i ngrisin si alarm dhe do të marrin masa korrekte drejt përmirësimit të proceseve që lidhen me fushën e projekteve jo vetëm të ujërave.

“Për më tepër shpeshherë inicimi i projekteve është bërë nga stafi politik i kabinetit të ministrit pa pasur dokument projektues për zbatimin e projektit që do të duhet të jetë parakusht për inicimin e procedurave të prokurimit […] Ministria e Mjedisit dhe Planifikimit Hapësinor ka paguar shuma të larta të parave për projekte që nuk janë i nënshtruar vlerësimit profesional. Pranimi i këtyre projekteve është bërë nga një komision prej tre anëtarësh e të cilët nuk kanë verifikuar fare as përmbajtjen e projektit, e as cilësinë por kanë pranuar vetëm pranimin e kopjeve fizike dhe elektronike të dokumentacionit projektues. Asnjëri prej projekteve të shqyrtuara nuk ka pasur leje të ndërtimit, leje ujore e as leje mjedisore. Pra, bëhet fjalë për projekte të investimeve kapitale që i ka investu Qeveria e Kosovës. Mos zbatimi i procesit të aplikimit për marrjen e lejes së ndërtimit ka pas si sikuencës mos shqyrtimin e dokumentacionit projektues nga autoriteti. Pra, me vetë faktin që nuk është aplikuar fare për leje, hartimi i këtyre projekteve nuk ka mundur të vlerësohet nga askush”, tha ai.

Ai shtoi se në këto projekte ka munguar edhe kontrolli i cilësisë së projektimit dhe zbatimit të këtyre projekteve. Sipas tij, e kjo do të shërbejë si një dritë e sensibilizimit që të bëhen analiza edhe në projekte të infrastrukturës.

“Detyrë e jona është se kur e shohim këtë gjendje ta ngrisim në nivel shumë të lartë gjendjen e alarmit dhe të marrim masa konkrete drejt përmirësimit të proceseve që lidhen me fushën e projekteve jo vetëm të ujërave por edhe projekteve të tjera. Kjo mbase na jep dritë të sensibilizimit që të bëjmë analiza të tilla të projekteve tjera të infrastrukturës dhe ne do të themelojmë edhe grup tjetër punues dhe do të merremi edhe me projekte të infrastrukturës dhe të shohim çka u bë atje. Detyrë e jona mbetet si në fazën e projektimit, ndërtimit, në fazën e operimit ne gjitha këto fazë të realizohet kontroll i cilësisë dhe të sigurohemi që punët janë realizuar ashtu siç është paraparë në projekt dhe të sigurohemi që projekti është realizuar tamam si e parasheh studimi”, tha Aliu.

Ndërsa i pyetur se për lëndët për hetim në Prokurori, Aliu tha se fillimisht është zyra e auditori kombëtar dhe është auditimi i ministrisë që do të merret me këto. E më pas do të jetë edhe dera e prokurorisë ku do të trokasin për këto çështje.

Aliu i është kundërpërgjigjur edhe aktivistes Shpresa Loshaj nga organizata jo-qeveritare “Pishtarët që deklaroi se Ministria e Ambient është duke planifikuar që të lëshojë leje të reja për hidrocentrale në Deçan, kompanisë private KELKOS. Përmes një komunikate për medie, kjo organizatë ka thënë se gjatë ditës së djeshme, ministri i Ambientit, Liburn Aliu, ka pranuar nga KELKOS-i një plan për restaurimin e Zallit të Rupes në Deçan.

“’Ministria e Ambientit është këtu për t’ia dhënë aminin çkado që Kelkos kërkon. Kjo është shpifje. Fshehurazi, mbrapa shpine. Unë i takoj ata në zyre. Kelkos si palë vjen takohet me mua në zyre dhe me ekspertët apo zyrtarët e fushës në prezencë të njëri tjetrit, nuk ka asnjë takim fshehurazi[…]zonja Shpresa Loshaj është nxituar nuk di pse, mbase është natyra e saj që nxitohet”, tha Aliu.

Lajmet

Vizita e Marta Kos në Prishtinë: BE kërkon stabilitet politik, Kurti insiston në statusin e kandidatit

Published

8 minutes ago

May 15, 2026

UBTNews

Komisionarja e Bashkimit Evropian për Zgjerim, Marta Kos, ka zhvilluar vizitën e saj të parë zyrtare në Kosovë, ku ka përcjellë një mesazh të qartë për spektrin politik që të gjejnë një gjuhë të përbashkët për t’i dhënë fund ngërçit të gjatë institucional dhe për të formuar institucione të qëndrueshme pas zgjedhjeve të qershorit. Gjatë qëndrimit në Prishtinë, Kos u prit fillimisht nga ushtruesja e detyrës së presidentit, Albulena Haxhiu, dhe më pas zhvilloi një takim me kryeministrin në detyrë, Albin Kurti.

Në një konferencë të përbashkët për media me kryeministrin në detyrë, komisionarja Kos vuri theksin te rëndësia e stabilitetit të brendshëm për procesin e integrimit evropian. Ajo bëri një thirrje të qartë për të gjithë aktorët politikë që të gjejnë një mënyrë për të kthyer stabilitetin institucional dhe kërkoi që, pas formimit të Kuvendit të ri, liderët të bashkohen për të zgjedhur edhe presidentin e ri përmes kompromisit.

Kos vlerësoi se Kosova ka një perspektivë të madhe evropiane dhe deklaroi se nuk ka siguri në Evropë pa Kosovën. Megjithatë, ajo tërhoqi vërejtjen se përsëritja e shpeshtë e zgjedhjeve ka krijuar një vit të humbur më 2025, duke ngadalësuar reformat kyçe dhe duke rënduar buxhetet shtetërore. Vizita e saj vjen në prag të zgjedhjeve të parakohshme parlamentare të caktuara për 7 qershor, të cilat janë të tretat me radhë që nga fillimi i vitit 2025.

Nga ana tjetër, kryeministri në detyrë, Albin Kurti, e cilësoi takimin si produktiv dhe të drejtpërdrejtë, duke e shfrytëzuar rastin për të ngritur sërish çështjen e statusit të vendit kandidat dhe hapjen e negociatave me bllokun.

Kurti kujtoi se kanë kaluar mbi 40 muaj që kur Kosova ka aplikuar për anëtarësim dhe se mbështetja publike për BE-në në vend qëndron vazhdimisht rreth 90%, duke qenë ndër më të lartat krahasuar me vendet e tjera. Ai po ashtu paralajmëroi se vakumi që lë Bashkimi Evropian në rajon synohet të mbushet nga aktorë të tjerë dashakeq që minojnë vlerat evropiane dhe rrezikojnë sigurinë e përbashkët, prandaj kërkoi që BE-ja të shtyjë përpara unitetin e brendshëm për avancimin e merituar të Kosovës.

Kosova mbetet vendi i vetëm në Ballkanin Perëndimor që ende nuk e ka marrë statusin e vendit kandidat që nga aplikimi i saj më 15 dhjetor të vitit 2022. Përveç krizës së brendshme politike, një nga pengesat kryesore për përparimin e saj mbetet mosnjohja e pavarësisë nga pesë shtetet anëtare të bllokut, që janë Greqia, Spanja, Rumania, Sllovakia dhe Qiproja.

Kjo ishte vizita e parë e Marta Kosit në Kosovë që nga marrja e mandatit të saj në Komisionin Evropian më 1 dhjetor 2024. Që nga ajo kohë, ajo kishte vizituar të gjitha shtetet e tjera të përfshira në procesin e zgjerimit, ndërsa mungesa e një vizite në Prishtinë gjatë vitit 2025 ishte arsyetuar nga zyrtarët evropianë me krizën politike dhe mungesën e institucioneve funksionale.

Lajmet

REL: Shqipëria bëhet gati për të dërguar trupa në Gazë

Published

1 hour ago

May 15, 2026

UBTNews

Shqipëria po përgatitet për t’u angazhuar në Rripin e Gazës, në kuadër të Forcës Ndërkombëtare të Stabilizimit.

Ministri i Mbrojtjes i Shqipërisë, Ermal Nufi tha në një konferencë për mediat në Tiranë se një skuadër shqiptare ka parë situatën në terren.

“Në kuadër të angazhimit në Bordin e Paqes, Shqipëria ka marrë masa për shqyrtimin e situatës në Gaza. Rripi i Gazës është nën sigurinë e Forcave të Mbrojtjes së Izraelit [IDF] dhe çdo lloj inspektimi trupash atje bëhet përmes Forcës Ndërkombëtare Stabilizuese dhe ushtrisë izraelite. Kemi dërguar një skuadër për të parë nga afër vendndodhjen dhe situatën në terren, që të kuptojmë se ku dhe si mund të vendosemi”, u shpreh ai.

Forca Ndërkombëtare Stabilizuese buron nga një plan 20-pikësh i presidentit amerikan, Donald Trump, për t’i dhënë fund luftës mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – në Rripin e Gazës.

Nufi bëri të ditur se Shtabi i Përgjithshëm i Forcave të Armatosura të Shqipërisë ka përgatitur planin konkret që pritet të zhvillohet në disa nivele dhe faza sa i përket angazhimit të Shqipërisë në Gazë, por nuk zbuloi më shumë rreth tij.

Shefi i Shtabit të Përgjithshëm, Arben Kingji, tha se aktualisht Shqipëria është në fazën e procedimit dhe hartimit të praktikës dhe dokumenteve ligjore për dërgimin e trupave në mision.

“Shtabi i Përgjithshëm po bën vlerësimin e saktë në lidhje me misionin, detyrat, sigurinë e personelit, rregullat e angazhimit dhe mbështetjen logjistike. Kontingjenti i parë shqiptar që mund të dislokohet në Gazë do të jetë pjesë e shtabit të Forcës Ndërkombëtare Stabilizuese, ndërsa më pas do të shqyrtohet mundësia e një kontributi më të gjerë me trupa”, u shpreh Kingji.

Në fillim të majit u bë e ditur se një ekip ushtarësh të Kosovës është dërguar në Gazë, për të bërë vlerësimin e vendit ku do të veprojë si pjesë e misionit paqeruajtës.

Ministri Nufi theksoi se Shqipëria mbetet një aleate e palëkundur e NATO-s dhe një partnere aktive në sigurinë rajonale dhe ndërkombëtare.

Duke folur për bashkëpunimin në fushën e mbrojtjes mes Shqipërisë, Kosovës dhe Kroacisë – shtete që kanë nënshkruar një deklaratë bashkëpunimin në fushën e sigurisë dhe mbrojtjes vitin e kaluar – po hyn në një fazë më konkrete, me zhvillimin e tre stërvitjeve të përbashkëta ushtarake gjatë këtij viti.

“Dy stërvitje do të zhvillohen në Kroaci ku jemi në fazën e planifikimit, kemi dhënë dakordësinë për t’u zhvilluar stërvitjet. Po kështu, një stërvitje do të zhvillohet në Shqipëri. Nuk do të jenë vetëm tre shtete pjesëmarrëse [Shqipëri-Kosovë-Kroaci], por do të ketë edhe shtete të tjera nga NATO-ja, qoftë edhe shtete partnere me të cilat bashkëpunojmë”, tha Kingji.

Bashkëpunimin mes Prishtinës, Tiranës dhe Zagrebit, Serbia e sheh si aleancë kundër serbëve dhe Serbisë – pretendim që është hedhur poshtë nga shtetet nënshkruese të deklaratës për bashkëpunim.

Po ashtu, autoritetet e mbrojtjes bënë të ditur se Shqipëria ka nisur zyrtarisht përgatitjet për organizimin e samitit të NATO-s që do të mbahet vitin e ardhshëm në Tiranë.

“Kemi ngritur një task-forcë për zhvillimin e samitit të NATO-s. Nuk e kemi ende të përcaktuar vendndodhjen e samitit, por NATO merr masa të jashtëzakonshme sigurie për organizimin e këtyre ngjarjeve”, deklaroi ministri i Mbrojtjes i Shqipërisë, Ermal Nufi. /REL/

Lajmet

Vdes Alush Gashi, një nga themeluesit e LDK-së dhe ish-ministër i Shëndetësisë

Published

3 hours ago

May 15, 2026

UBTNews

Ka ndërruar jetë në moshën 75-vjeçare Alush Gashi, një nga figurat qendrore të skenës politike dhe shëndetësisë në Kosovë, i njohur si një nga themeluesit e Lidhjes Demokratike të Kosovës (LDK) dhe ish-ministër i Shëndetësisë. Lajmin për ndarjen e tij nga jeta e kanë bërë të ditur familjarët, të cilët njoftuan se për detajet e ceremonisë së varrimit do të njoftojnë me kohë.

I lindur më 4 tetor 1950 në fshatin Prigodë të komunës së Istogut, Alush Gashi la gjurmë të thella si në fushën e mjekësisë, ashtu edhe në atë të shtetndërtimit të Kosovës. Ai përfundoi studimet për mjekësi në Universitetin e Prishtinës në vitin 1974, ndërsa gradën e doktorit të shkencave mjekësore e mori në Universitetin e Zagrebit në vitin 1979, duke u bërë një nga profesorët dhe kirurgët e njohur në vend.

Në vitin 1989, derisa shërbente si dekan i Fakultetit të Mjekësisë në Universitetin e Prishtinës, Gashi iu bashkua lëvizjes kombëtare për liri dhe pavarësi, duke u bërë pjesë aktive e themelimit të LDK-së.

Gjatë viteve të ’90-ta, ai luajti një rol kyç si sekretar për marrëdhënie me jashtë i LDK-së dhe shërbeu si këshilltar i lartë dhe bashkëpunëtor shumë i afërt i presidentit historik, Dr. Ibrahim Rugova. Gashi ishte pjesë e delegacioneve të rëndësishme që përfaqësonin Kosovën në arenën ndërkombëtare dhe mori pjesë në procese të shumta negociatash diplomatike për zgjidhjen e çështjes së Kosovës.

Pas çlirimit dhe shpalljes së pavarësisë, ai vazhdoi kontributin e tij në institucionet e Republikës së Kosovës, ku ndër të tjera shërbeu edhe si Ministër i Shëndetësisë, duke u angazhuar në reformimin e sistemit mjekësor pasluftës. Ndarja e tij nga jeta cilësohet si një humbje e madhe për komunitetin akademik, mjekësor dhe politik në Kosovë.

Lajmet

Biblioteka e Kosovës lidh marrëveshje bashkëpunimi me bibliotekën në Venecia

Published

4 hours ago

May 15, 2026

UBT News

Biblioteka Kombëtare e Kosovës “Pjetër Bogdani” ka nënshkruar një marrëveshje bashkëpunimi me Bibliotekën Nazionale Marciana në Venecia të Italisë.

Marrëveshja është bërë në kuadër të një projekti Kosovë-Shqipëri dhe synon bashkëpunim mes dy institucioneve në fushën e bibliotekarisë, kërkimeve dhe ruajtjes së trashëgimisë kulturore.

Gjatë vizitës në Venecia, stafi nga Kosova po merr trajnim nga ekspertë italianë dhe është njohur me arkivat, fondet dhe punën e bibliotekës Marciana. Projekti udhëhiqet nga Universiteti i Prishtinës dhe studiuesja italiane Lucia Nadin.