Lajmet

Aliu: Kemi paguar 120 milionë euro shpronësime të mbetura borxh

Aliu ka thënë se shumë projekte rrugore është dashur që të tenderohen nga fillimi.

Published

2 years ago

January 24, 2024

Betim Gashi

Ministri i Infrastrukturës, Liburn Aliu ka përmendur disa nga projektet më kryesore për infrastrukturën e vendit. Ai në një konferencë për media sot tha se gjatë 2024-së do të përmbyllet projekti i autostradës Prishtinë-Gjilan dhe rruga Dollc-Gjakovë. Aliu ka thënë se shumë projekte rrugore është dashur që të tenderohen nga fillimi.

“Ajo çka dua të them, në vitin që do të kemi para nesh, një pjesë e madhe e projekteve nga e kaluara që ka qenë litarë për qeverinë tonë do të arrijmë t’i përfundojmë. Kjo është diçka që jam i gëzuar që do të arrijmë të përmbyllim projektet me shumë telashe, siç është autostrada Prishtinë-Gjilan, ajo Prishtinë -Mitrovicë, të cilën besoj që brenda ditëve në vijim dhe brenda muajit janë arritur të nënshkruhen kontrata dhe të nisin punimet. Pastaj rruga Dollc -Gjakovë, kemi arritur një pjesë të madhe të shpronësimeve t’i realizojmë dhe të bëjmë shpejt të qarkullueshme me katër shirita, përpos një segmenti që mbetet në gjykatë. Pastaj Drenas -Skenderaj, hyrje-daljet e Ferizajt, ato të Gjilanit, rruga Prizren-Prevallë. Këtë vit do të përfundojnë edhe (rruga) Prishtinë- Podujevë, e cila ka qenë një segment që dukej se do të zgjasë pafundësisht, por pas ritenderimit të segmenteve tjera do të mund të realizohet në gjithë gjatësinë e saj”, theksoi Aliu.

Aliu tha se sfidë kryesore kanë pasur borxhet e mbetura. Ai tha se mbi 120 milionë euro kanë paguar vetëm shpronësime të mbetura.

“Projektet kryesore që i kemi pasur, pengesa për shkak të shpronësimeve, rreziqet nga penallti e shumta, qoftë me fonde të huaja apo me kredi, kemi arritur që mbi 120 milionë euro pagesa të realizojmë brenda tri vjetësh të shkuara dhe presim që me 20 milionë të tjera të zvogëlojmë dukshëm mbetjen e borxhit për vitet në vijim”, tha Aliu.

Aliu theksoi se do të fillojnë qendrat e riciklimit si dhe prioritet për këtë vit do të jetë edhe hapja e korridoreve ajrore me Malin e Zi. Ai tha se me hapjen e korridoreve ajrore qytetarët do të kenë shpenzime të vogla dhe kohë në lëvizjen tyre.

“Me ndihmën e Bashkimit Evropian, GIZ-i gjerman do të fillojmë të ndërtojmë qendrat e riciklimit dhe adresën e radhës të materialeve të ndara, të cilat do të mund të riciklohen më tej. Tash para nesh kemi këtë vit prioritet hapjen e korridoreve ajrore me Malin e Zi. Kjo do të jetë shkurtim i rrugës për qytetarët të cilët mund të lëvizin lirshëm në BE, pasi që janë liberalizuar vizat dhe të kenë shpenzime të vogla në pagesë të biletave dhe në kohë në lëvizjen e tyre”, tha Aliu.

Krahas kësaj, ministri Aliu foli edhe për raportimet për shkëmbim të pronave komunale në Prishtinë me prona në Badoc, ku nënvizoi se pa interes publik të qartë nuk mund të ketë shpronësime e as këmbim të pronave.

“Shpronësimet dhe këmbimet e pronave përherë duhet të kenë arsyetimin e plotë të interesit publik. Pa pasur interes publik të qartë, nuk mund të ketë as shpronësime e as këmbim të pronave”, tha ministri Aliu.

Related Topics:borxh Liburn Aliu shpronesime

Up Next

Maqedonci takohet me komandantin e KFOR-it, flasin për intensifikimin e patrullimit kufitar pas Banjskës

Don't Miss

Kurti: Hapja e korridoreve ajrore me Shqipërinë sjell përfitime mjedisore dhe ekonomike

Aktualitet

UBT shpall thirrjen për Konferencën Ndërkombëtare të Gjuhës dhe Kulturës 2025

Published

23 hours ago

September 27, 2025

Driton Iseni

UBT ka bërë hapjen e thirrjes për pjesëmarrje në Konferencën Ndërkombëtare të Gjuhës dhe Kulturës 2025 (IC-LAC), e cila këtë vit organizohet në kuadër të Konferencës së 14-të Ndërkombëtare të UBT-së për Biznes, Teknologji dhe Inovacion.

Ky aktivitet shkencor do të bashkojë studiues, akademikë, studentë të cikleve të avancuara, doktorantë, ekspertë të fushës dhe profesionistë të arsimit nga vende të ndryshme të botës, me synim shkëmbimin e njohurive, përvojave dhe praktikave më të mira mbi gjuhën, kulturën dhe ndërthurjen e tyre në sistemet bashkëkohore arsimore.

Tema kryesore e këtij edicioni është: “Ndërtimi i sistemeve arsimore reziliente për një të ardhme të qëndrueshme.”

Datat kryesore:

Dorëzimi i abstrakteve: 10 tetor 2025
Njoftimi i pranimit & rishikimi shkencor: 17 tetor 2025
Regjistrimi i hershëm: deri më 17 tetor 2025
Regjistrimi i vonuar: deri më 20 tetor 2025
Dorëzimi i punimit të plotë: 14 nëntor 2025

Qëllimet dhe objektivat

Konferenca IC-LAC synon të hapë një hapësirë të gjërë diskutimi mbi rolin e gjuhës dhe kulturës në shoqëritë moderne, duke nxitur qasje multidisiplinare për edukimin dhe komunikimin ndërkulturor.

Fushat e diskutimit përfshijnë:

Gjuha dhe kultura në arsim
Përdorimi i teknologjisë në mësimdhënie dhe të nxënë
Komunikimi ndërkulturor dhe shumëgjuhësia
Praktikat e qëndrueshme në edukimin gjuhësor
Inteligjenca artificiale dhe ndikimi i saj në të nxënit e gjuhëve
Përkthimi, interpretimi dhe komunikimi global
Rezilienca arsimore dhe dizajnimi i kurrikulave

Dorëzimi i punimeve

Punimet e paraqitura duhet të jenë origjinale, të papublikuara më parë dhe të mos jenë në proces shqyrtimi në konferenca të tjera. Gjatësia maksimale e një punimi është 6 faqe. Punimet që nuk respektojnë kriteret e formatimit nuk do të merren në konsideratë.

Organizatorët ftojnë të gjithë të interesuarit që të kontribuojnë me hulumtimet e tyre shkencore dhe praktikat profesionale, duke u bërë pjesë e një platforme ndërkombëtare shkëmbimi idesh që synon të forcojë lidhjen mes gjuhës, kulturës dhe arsimit për një të ardhme më të qëndrueshme.

Lajmet

Gjykata spanjolle liron Dani Alves-in

Published

2 days ago

September 26, 2025

UBT News

Gjykata e Lartë e Katalonjës ka rrëzuar të premten dënimin për përdhunim ndaj ish-futbollistit brazilian Dani Alves, duke arsyetuar se çështja kishte mospërputhje dhe kontradikta në dëshmitë e paraqitura.

Alves, 41 vjeç, ishte dënuar vitin e kaluar me katër vjet e gjysmë burg për përdhunimin e një gruaje në një klub nate në Barcelonë në vitin 2022. Megjithatë, gjykata e apelit vendosi se dëshmia e akuzueses nuk kishte besueshmëri të mjaftueshme, duke theksuar se mungonin prova të qarta për të mbështetur akuzën.

“Dani Alves është shumë i lumtur. Ai është i pafajshëm, kjo është demonstruar. Drejtësia ka folur,” deklaroi avokatja e tij, Ines Guardiola.

Ndërkohë, avokatja e akuzueses, Ester Garcia, paralajmëroi se do ta çojë çështjen në Gjykatën Supreme të Spanjës, proces që mund të zgjasë deri në një vit./S.K/KP/Morung Express/

Lajmet

Caktohet data, Pogba rikthehet në fushë

Published

2 days ago

September 26, 2025

UBT News

Paul Pogba është shumë pranë rikthimit në futboll pas një periudhe të gjatë mungese tha trajneri i Monacos, Adi Hütter. Ai zyrtarisht ka konfirmuar se mesfushori francez po përparon ndjeshëm.

“Fizikisht dhe mendërisht po shkon mirë. Është stërvitur për tre muaj dhe është afër kthimit në skuadër,” deklaroi Hütter.

Sipas mediave franceze, Pogba pritet të jetë i disponueshëm më 5 tetor, në ndeshjen e Ligue 1 kundër Nice në Stade Louis II.

Ndërkohë, rikthimi në sfidën e së shtunës kundër Lorient shihet më pak i mundshëm.

Ish-mesfushori i Juventusit nuk ka luajtur një ndeshje zyrtare që prej 3 shtatorit 2023, kur u aktivizua ndaj Empolit.

Pak javë më vonë, ai u pezullua për doping dhe u dënua fillimisht me katër vite jashtë fushave. Megjithatë, në tetor 2024, Gjykata e Arbitrazhit Sportiv uli ndalimin në 18 muaj, që skadoi më 11 mars 2025.

Pas ndarjes me Juventusin, Pogba refuzoi një transferim në MLS dhe verën e kaluar nënshkroi një kontratë dyvjeçare me Monacon, e vlefshme deri më 30 qershor 2027.

Klubi monegask e ka regjistruar 31-vjeçarin edhe për Ligën e Kampionëve, ku pritet të rikthehet në tetor.

Ky rikthim do të shënojë një moment të rëndësishëm për kampionin e botës 2018, i cili synon të rifitojë formën dhe të lërë pas periudhën më të vështirë të karrierës së tij./S.K/KP/CNN/