Sulmuesi brazilian, Vinicius Junior, nuk po mendon largimin nga Real Madridi gjatë afatit kalimtar të verës dhe pritet të vazhdojë të jetë pjesë e skuadrës madrilene edhe për sezonin e ardhshëm.

Sipas raportimeve të mediumit spanjoll Diario AS, 25-vjeçari ka vendosur të mbetet në “Santiago Bernabeu”, pavarësisht spekulimeve të vazhdueshme për të ardhmen e tij dhe interesimit të klubit për përforcime të reja në repartin ofensiv.

Kontrata aktuale e Viniciusit me Real Madridin skadon në verën e vitit 2027, ndërsa negociatat për vazhdimin e bashkëpunimit janë duke vazhduar prej muajsh. Megjithatë, deri tani palët nuk kanë arritur një marrëveshje përfundimtare, kryesisht për shkak të kërkesave financiare të lojtarit brazilian.

Pas rizgjedhjes së Florentino Perezit në krye të klubit, drejtuesit madrilenë pritet të intensifikojnë bisedimet për rinovimin e kontratës menjëherë pas përfundimit të Kupës së Botës 2026. Presidenti i Real Madridit e sheh Viniciusin si një prej figurave kyçe të projektit afatgjatë të klubit dhe dëshiron ta mbajë atë në ekip për shumë vite.

Nga ana tjetër, vetë futbollisti ka shprehur në disa raste dëshirën për të vazhduar karrierën me fanellën e “Los Blancos”, duke e bërë të qartë se prioriteti i tij mbetet qëndrimi në Madrid.

Megjithatë, mbetet të shihet nëse klubi do të pranojë kushtet financiare të kërkuara nga braziliani për kontratën e re. Një paraqitje e suksesshme me Kombëtaren e Brazilit në Kupën e Botës 2026 mund ta forcojë edhe më shumë pozicionin e tij në negociatat me drejtuesit madrilenë.

Pavarësisht zërave për një largim të mundshëm, gjithçka tregon se Vinicius Junior do të vazhdojë të jetë një nga emrat kryesorë të Real Madridit edhe në sezonet e ardhshme.

Kosova do të jetë nikoqire e një tjetër ngjarjeje të rëndësishme sportive ndërkombëtare, pasi më 13 dhe 14 qershor 2026 në Istog do të mbahet turneu “Kosovo 7’s 2026”, në kuadër të Rugby Europe Sevens Conference 2.

Ndeshjet do të zhvillohen në Stadiumin “Demush Mavraj”, ku kombëtare të ndryshme do të garojnë gjatë dy ditëve për rezultate sa më të mira në këtë kompeticion evropian të ragbit.

Organizatorët premtojnë ndeshje dinamike, ritëm të lartë loje dhe një atmosferë të veçantë sportive, duke e shndërruar Istogun në qendrën e ragbit evropian gjatë fundjavës së ardhshme.

Përmes këtij eventi, Kosova vazhdon të dëshmojë aftësinë e saj për organizimin e garave ndërkombëtare, ndërsa tifozët do të kenë mundësinë të mbështesin nga afër përfaqësuesen e vendit në arenën ndërkombëtare.

Federata e Ragbit e Kosovës ka ftuar sportdashësit, tifozët dhe komunitetin e ragbit që të jenë pjesë e kësaj feste sportive dhe të përkrahin Kosovën në ndeshjet që do të zhvillohen në shtëpi.

Hyrja për të gjitha ndeshjet do të jetë falas për publikun.

Arbitri nga Somalia, Omar Artan, i konsideruar si një nga gjyqtarët më të mirë në Afrikë, nuk është lejuar të hyjë në Shtetet e Bashkuara të Amerikës, duke humbur kështu mundësinë për të marrë pjesë në Kupën e Botës në futboll.

34-vjeçari kishte udhëtuar drejt Miamit me synimin për t’u bërë arbitri i parë nga Somalia që do të drejtonte ndeshje në një Botëror. Megjithatë, sipas raportimeve, autoritetet kufitare amerikane e ndaluan atë sapo mbërriti në aeroport.

Artan ka bërë të ditur se u mbajt për 11 orë në një dhomë të posaçme dhe më pas u kthye në Stamboll, nga ku kishte nisur udhëtimin drejt SHBA-së.

“Jam shumë, shumë i dëshpëruar. Kam pasur të gjitha dokumentet dhe vizën e nevojshme. Jam vetëm një gjyqtar futbolli që po përpiqet të realizojë ëndrrën e jetës së tij, të marrë pjesë në Kupën e Botës”, ka deklaruar ai për The New York Times.

Sipas Artanit, autoritetet amerikane nuk i dhanë ndonjë arsye të qartë për refuzimin e hyrjes në vend.

“Mendoj se kanë probleme me vendin tim”, është shprehur ai.

Ndërkohë, një zëdhënës i Department of Homeland Security ka konfirmuar se arbitri somalez u konsiderua “i papranueshëm për shkak të shqetësimeve në procesin e verifikimit” dhe për këtë arsye iu mohua hyrja në SHBA.

Edhe pse FIFA kishte garantuar se pjesëmarrësit e Botërorit do të mund të hynin në SHBA, organizata ka pranuar se nuk ka kompetenca për të ndërhyrë në vendimet e autoriteteve kufitare amerikane.

Sipas raportimeve të The Athletic, rasti i Artanit ka shkaktuar shqetësim dhe keqardhje te shumë prej kolegëve të tij arbitra. Shumë prej tyre kanë shprehur solidaritet me somalezin, i cili mund të mos ketë më një mundësi të tillë në karrierën e tij.

“The Athletic” vlerëson se gjasat janë të mëdha që ëndrra e Artanit për të gjykuar në një Kupë Bote të mbetet e parealizuar, duke e bërë këtë një nga historitë më të dhimbshme të futbollit ndërkombëtar në prag të turneut më të madh të sportit.

Përfaqësuesja e Kosovës në konkurrencën e femrave ka arritur një sukses historik, duke siguruar kualifikimin në “play-off”-in e Kupës së Botës 2027 dhe avancimin në Ligën B të UEFA-s.

“Dardanet” e përmbyllën në mënyrë të shkëlqyer fushatën në Grupin 2 të Ligës C, pasi mposhtën Gjibraltarin në transfertë me rezultat të thellë 8:0. Falë kësaj fitoreje bindëse, Kosova e mbylli grupin në vendin e parë, me pikë të barabarta me Kroacinë, por me goldallim më të mirë.

Ky rezultat i siguroi Kosovës ngjitjen në Ligën B për ciklin e ardhshëm kualifikues, si dhe një vend në “play-off”-in e kualifikimeve për Kupën e Botës 2027.

Arritja konsiderohet historike për futbollin e femrave në vend, pasi vjen si rezultat i punës, përkushtimit dhe paraqitjeve të shkëlqyera të ekipit gjatë gjithë ciklit kualifikues. Futbollistet kosovare dëshmuan karakter, disiplinë dhe shpirt gare, duke besuar deri në fund te objektivi i tyre.

Ky sukses përbën një tjetër dëshmi të progresit të vazhdueshëm të futbollit të femrave në Kosovë dhe një hap të rëndësishëm drejt ngritjes së mëtejme në arenën ndërkombëtare.

Merita të mëdha për këtë arritje kanë futbollistet dhe stafi teknik, i udhëhequr nga përzgjedhësi Sami Sermaxhaj, të cilët arritën ta udhëheqin ekipin drejt një kapitulli të ri në historinë e futbollit kosovar.

Kosova tani do të synojë të vazhdojë rrugëtimin e saj të suksesshëm në fazën “play-off”, me ëndrrën për të siguruar një vend në Kupën e Botës 2027.

D.L