Rreth nëntë mijë qytetarë nga rajoni i Prishtinës janë vaksinuar kundër gripit sezonal, ndërkaq tre mijë doza të tjera janë ende në dispozicion. Nga Qendra Kryesore e Mjekësisë Familjare (QKMF) iu bëjnë thirrje grupeve më të ndjeshme që të vaksinohen deri në fund të dhjetorit.

Grupet më të rrezikuara konsiderohen të moshuarit, personat me sëmundje kronike dhe punëtorët shëndetësorë të cilët janë në kontakt të drejtpërdrejtë me pacientët.

Sipas punëtorëve shëndetësorë, shtimi i rasteve me grip sezonal në Kosovë është një shqetësim i zakonshëm për këtë periudhë të vitit – në temperatura të ulëta dhe kur aktivitetet kufizohen në ambiente të mbyllura.

Mjeku në QKMF, Rushit Ismajli thotë se kohëve të fundit numri i pacientëve që kërkojnë shërbime mjekësore është rritur.

Por ai tregon se ky grip tejkalohet “vetvetiu ose me një trajtim të thjeshtë”.

“Kohëve të fundit kemi pasur një numër më të rritur të pacientëve që kërkojnë ndihmë në institucionin tonë shëndetësor dhe për shkak të sezonës, por edhe arsye të tjera, dhe është bërë edhe ngarkesë e shërbimeve shëndetësore. Në qoftë se flasim për dëmet, zakonisht nuk janë shumë të mëdha që shkaktohen nga gripi sezonal, sepse simptomat janë të thjeshta – temperaturë, kollitje, dhimbje muskuj, fyti – shpesh kalon vetvetiu ose me një trajtim të thjeshtë, nuk ka nevojë që të shqetësohen shumë, përveç në raste shumë të rralla kur kanë temperaturë shumë të lartë, kanë vështirësi në frymëmarrje, kanë dhimbje gjoksi”, thotë Ismajli.

Ismajli shton se qytetarët nuk duhet të marrin antibiotik pa përshkrim nga profesionistët shëndetësorë.

Kjo për shkak të dëmeve dhe efekteve anësore që mund të shkaktohen.

“Janë edhe masat specifike, vaksinimi i cili në komunën e Prishtinës është duke shkuar mjaft mbarë, deri tani ne i kemi diku nëntë mijë vaksina në Prishtinë me rrethinë, akoma rezervë [3 mijë] 12 mijë vaksina [i kemi pasur në total]. I ftoj qytetarët e Prishtinës që të vijnë të vizitojnë qendrën tonë dhe të vaksinohen kundër gripit sezonal, kanë kohë deri nga fundi i dhjetorit që të marrin këtë vaksinë dhe të jenë të vaksinuar, punëtorët shëndetësorë janë në këtë kategori duke përfshirë dhe grupe të tjera fëmijët, gratë shtatzëna, të moshuarit sidomos ata që kanë sëmundje bashkëshoqëruese si tension diabet sëmundje kronike të mushkërive rekomandohet shumë që të marrin vaksinën por edhe të gjithë qytetarët e tjerë është mirë që të vaksinohen ndaj gripit sezonal. Qytetarët nuk duhet të marrin antibiotikë vet nuk duhet të shkojnë në barnatore që të marrin antibiotik pa përshkrim nga ana e mjekut”, ka shtuar ai.

Vaksinimi kundër gripit sezonal është një masë kyçe për të parandaluar komplikimet që mund të shkaktojë ky grip, sidomos tek grupet e rrezikuara.

Edhe një muaj ka mbetur deri në përfundimin e afatit të aplikimit për regjistrim si votues jashtë Kosovës për zgjedhjet parlamentare të 9 shkurtit 2025, ndërkohë që në KQZ tregojnë se çfarë do të ndodhë me bashkatdhetarët që janë refuzuar deri më tash.

Zëdhënësi i KQZ-së, Valmir Elezi tha se deri më 22 nëntor, përmes platformës elektronike janë regjistruar afro 19 mijë votues.

Ai tregon se në rastet kur një shtetasi i refuzohet aplikimi për t’u regjistruar si votues jashtë Kosovës, i njëjti mund të aplikojë serish.

“Është e rëndësishme ta theksojmë se procesi i regjistrimit të votuesve jashtë Kosovës, nuk është përjashtues. Kjo do të thotë se nëse një shtetas i refuzohet aplikimi, ky nuk është një refuzim përfundimtar, pasi i njëjti ka të drejtë të ri-aplikojë. KQZ i informon individualisht aplikuesit e refuzuar për arsye të refuzimit të kërkesës së tyre dhe gjithashtu aplikuesit e refuzuar njoftohen se mund të ri-aplikojnë për regjistrim dhe të bashkëngjisin dokumentet e nevojshme për të përmbushur kërkesën e tyre në përputhje me udhëzimet e KQZ-së”, tha Elezi.

Elezi tregon numrin e aplikimeve të refuzuara qe nga fillimi i periudhës për regjistrim jashtë vendit dhe të atyre që janë regjistruar pasi kanë aplikuar serish.

“Qe nga fillimi i procesit të regjistrimit të votuesve jashtë Kosovës, në përgjithësi janë 2,559 aplikime që janë refuzuar, por rreth 1.290 kanë ri-aplikuar, duke plotësuar dokumentet që kërkohen nga KQZ apo kanë ndjekur udhëzimet që parashihen me procedurë dhe kësisoj kanë arritur të regjistrohen në listën e votuesve jashtë Kosovës. Aktualisht, në listën e aplikimeve të refuzuara janë rreth 1,270 raste. Këta persona, por edhe rastet tjera që mund të refuzohen ditëve në vazhdim, kanë të drejtë të ri-aplikojnë dhe të arrijnë të regjistrohen si votues jashtë Kosovës”, tha Elezi.

Elezi sqaron se në rastet kur aplikuesit konsiderojnë të padrejtë refuzimin për regjistrim si votues jashtë vendit, atëherë ka të drejtën e ankesës fillimisht në KQZ përmes e-mail, e më pas në Panelin Zgjedhor për Ankesa dhe Parashtresa (PZAP).

Më 29 gusht ka nisur aplikimi për regjistrimin e votuesve jashtë Kosovës për zgjedhjet parlamentare, e cila periudhë do të përfundojë më 26 dhjetor 2024.

Po ashtu, gjatë kësaj periudhe, në momentin e regjistrimit votuesit mund të përcaktohen individualisht për mënyrën e votimit: të votojnë fizikisht në njërën nga përfaqësitë diplomatike të Kosovës, duke dërguar fletëvotimin përmes postës në kutinë postare të KQZ-së në Kosovë apo duke dërguar fletëvotimin përmes postës në njërën nga kutitë postare të hapura nga KQZ-ja jashtë Kosovës.

Dallimet ndërmjet presidentes së Kosovës, Vjosa Osmani me kryeministrin, Albin Kurti, që dolën së fundmi në pah edhe në adresimin vjetor të së parës së shtetit në Kuvendin e Kosovës, për partinë pushtet, Lëvizjen Vetëvendosje nuk paraqet ndonjë problem. Sipas tyre, krerët institucional mund të kenë dallime në nuanca, por se qëllimi është gjithnjë i njëjtë.

Përfaqësues të kësaj partie thonë se Presidenca dhe Qeveria mund të kenë dallime në çështje të caktuara por që sipas tyre, kjo nuk pengon që në hapat tutje të gjejnë gjuhën e përbashkët për interesa të Kosovës. Ndërkaq, opozita dhe analist politik, qëndrimet e presidentes Osmani kundër kryeministrit Kurti i shohin si të vonuara.

Presidentja Osmani para deputetëve të enjten adresoi një mori kritikash ndaj Kurtit, veçmas në ruajtjen e raporteve me aleatët, madje siç theksoi ajo luajtja bixhoz me ta cenon shtetësinë e vendit.

Deputeti i Lëvizjes Vetëvendosje, Agon Batusha thotë, se pavarësisht dallimeve në mes Kurtit dhe Osmanit, e rëndësishme është që qëllimet e tyre janë të njëjta dhe të palëkundura.

“Nuk pres që të gjitha institucionet të kenë të njëjtat ide në të gjitha situatat. Natyrisht mund të ketë dallime, por e rëndësishme është që të kenë qëllimi i përbashkët dhe të ketë qëndrime bërthamë të përbashkët dhe të njëjtat nuk lëvizin…Në nuanca mund të dallojmë, prandaj presidentja i tha ato që ajo mendon. Qeveria i ka qëndrimet e veta por kjo nuk pengon që në hapat tutje të gjejmë gjuhën e përbashkët për interesa të Kosovës”, tha ai.

Megjithatë, deputeti i mazhorancës është më i rezervuar në raport me idenë e presidentes Osmani sa i përket zbatimit të njëanshëm të marrëveshjes së Brukselit.

“Secila ide, sidomos kur vjen nga presidentja, kryeministri apo kryeparlaemntari duhet të diskutohet dhe shqyrtohet. Pas këtyre diskutimeve ne mund të shohim a është e duhur apo jo. Momentalisht nuk kemi informata më të detajuara si është menduar kjo çështje…Marrëveshjet të cilat bëhen janë marrëveshje ndërkombëtare dhe të cilat nuk mund njëanshëm t’i zbatojmë pasi nëse pala tjetër nuk i pranon atëherë i bie se nuk kemi marrëveshje. Me aleatët tanë kemi interesa të tjera siç është konsolidimi i mëtejmë i shtetësisë së Kosovës dhe pranimi në organizata ndërkombëtare”, shton Batusha.

Në anën tjetër, deputetja e PDK-së, Blerta Deliu thotë, se deklarimet e presidentes Osmani janë të vonuara. Sipas saj, një presidente që është e thirrur të mbrojë kushtetutshmërinë dhe ligjshmërinë, do të duhej të kishte guxim që më herët të reagonte ndaj kryeministrit Kurti.

“Është qasje e vonë. Është absolutisht qasje e vonë. Një presidente e cila ka marrë mandat nga ky kuvend dhe është votuar si e para e vendit është dashur që të ketë të paktën guximin që për këto katër vite njëherë të vetme të deklarohet në shpërputhje me qëndrimet e qeverisë. Deri tash kemi pa harmoni të plotë të saj në deklarimet e qeverisë. Asnjëherë as në raport me mediat që janë cenuar dhe sulmuar, po ashtu kur janë atakuar institucionet e pavarura… Një presidente që është e thirrur të mbrojë kushtetutshmërinë dhe ligjshmërinë do të duhej të kishte guxim, jo vetëm institucional por edhe moral dhe qytetarë se këto që po ndodhin e dëmtojnë demokracinë dhe stabilitetin e një vendi demokratik. Prandaj këto i shoh absolutisht si qëndrime të vonuara në raport me keqqeverisjen që po dominon në Kosovë”, deklaron ai.

Se qëndrimi i presidentes Osmani është i vonuar e thotë edhe analisti politik, Arton Demhasaj.

Gjithsesi, ai e sheh si pozitive propozimin për të ecur përpara në dialog dhe largimin nga status-quo-ja.

“Është e vonshme ky qëndrim i presidentes për shkak se po flasim për katër vite të kësaj qeverie, përafërsisht edhe katër vjet mandat të presidentes që vazhdimisht kanë ngulur këmbë…Në vend që të koncentrohen se qysh me jep një zgjidhje pasi Kosova ka mbetur në status-qou dhe qysh me u nxjerr nga status-qou. Unë mendoj se Kosova mund të dal nga status-qou edhe nëse Serbia s’pranon me zbatu marrëveshjen e Brukselit. Kosova është dashur të ulet me BE-në dhe ShBA-në dhe të merr garanca nga ta se nëse Kosova fillon me zbatu njëanshëm marrëveshjet çfarë garanca jepen. Qoftë për njohjen e pesë vendeve të BE-së që nuk e njohin pavarësinë e Kosovës. Kosovës t’iu hapet perspektiva në BE dhe NATO”, thekson ai.

Kryeministri Kurti deri më tani si ka komentuar deklarimet e presidentes Osmani se luajtja bixhoz me aleatët cenon shtetësinë e Republikës së Kosovës.