Kronikë e zezë

Akuzohet se i tha zyrtarit të Komunës ma ke një gjak borxh, ish-deputeti kërkon hudhjen e aktakuzës

Ai ngarkohet me akuzën se kanosi me fjalët “ma ke borxh një gjak” drejtorin Ahmet Morina.

Published

on

Ish-deputeti i Nismës Socialdemokrate, Haxhi Shala ka kërkuar hudhjen e aktakuzës që e ngarkon atë me akuzën se kanosi me fjalët “ma ke borxh një gjak” drejtorin e Drejtorisë për Urbanizëm në Komunën e Malishevës, Ahmet Morina.

Në shqyrtimin e dytë të mbajtur të martën në Gjykatën Themelore në Gjakovë, dega në Malishevë, Shala dhe mbrojtësi i tij, avokati Xhevdet Smakiqi, kanë kërkuar që aktakuza e Prokurorisë Themelore në Gjakovë për këtë rast të hudhet poshtë, me arsyetimin se është e pabazuar.

“Aktakuza si dhe dispozitivi i saj, nuk e vërteton apo nuk përkon me elementet qenësore të veprës penale të kanosjes”, deklaroi avokati Smakiqi, raporton “Betimi për Drejtësi”.

Në anën tjetër, prokurori Kastriot Memaj deklaroi se kundërshtimet e provave dhe kërkesat për hudhje të aktakuzës janë tërësisht të pabazuara.

“Konsiderojmë se kërkesat e mbrojtjes duhet të refuzohen si të pabazuara dhe se janë plotësuar kushtet ligjore që në këtë çështje penale pas refuzimit të kërkesave të vazhdohet me shqyrtim gjyqësor”, tha prokurori Memaj.

Sipas gjykatësit Njazi Morina, seanca e radhës do të caktohet pas marrjes së vendimit lidhur me kërkesat për hudhje të aktakuzës.

Aktakuza e ngritur më 2 korrik 2021 nga Prokuroria Themelore në Gjakovë, ngarkon Haxhi Shalën se në gusht të 2020-ës në Kuvendin Komunal në Malishevë, seriozisht kanos personin zyrtar, drejtorin e Drejtorisë për Urbanizëm në Komunën e Malishevës, Ahmet Morina.

Në aktakuzë thuhet se këtë e ka bërë ashtu që me qëllim të frikësimit dhe shkaktimit të ankthit, pasi që i dëmtuari Morina merr vendim për anulimin e pëlqimit me të cilin i kishte lejuar kompanisë “Ylli Mineral”, për rregullimin e dokumentacionit me qëllim të shfrytëzimit të gurores në zonën kadastrale Gajrak.

Sipas aktit akuzues, i akuzuari Shala fillimisht e kërcënon përmes telefonit dhe më pas i shkon i revoltuar në zyrë të dëmtuarit, duke iu drejtuar me fjalët “më ke dëmtuar një milion euro që i kam investuar, ke me ma pa sherrin, nëse nuk e tërheq vendimin, deri të premten, ma ke borxh një gjak”.

Gjithnjë sipas aktakuzës, pikërisht të premten i dëmtuari informohet se tre persona kanë qenë në komunë dhe kanë pyetur për të dhe i frikësuar nga fjalët e të akuzuarit dhe interesimi i atyre personave, i dëmtuari shkon në polici dhe në atë moment i akuzuari e telefonon të dëmtuarin duke e pyetur se a e ka tërhequr vendimin dhe me këto veprime tek i dëmtuari shkakton shqetësim dhe frikë.

Për këtë, Shala akuzohet se ka kryer veprën penale “kanosja” nga neni 181, paragrafi 3, lidhur me paragrafin 1 të Kodit Penal, vepër kjo e dënueshme me burgim prej gjashtë muaj deri në pesë vjet. /BetimipërDrejtësi

Lajmet

​Vrasja e gjyqtarit Astrit Kalaja, lihen në burg Gjon Shkambi

Published

on

Në Gjykatën e Apelit sot u mbajt seanca për vrasjen e gjyqtarit Astrit Kalaja.

Gjykata e Apelit ka vendosur të lë në burg Gjon Shkambin dhe punonjësin e sigurisë, Banush Koxhaj.

Ndërkohë vrasësi i gjyqtarit Elvis Shkambi nuk e ka apeluar masën e arrestit me burg.

Gjon Shkambi akuzohet se kishte dijeni mbi planin e nipit, akuza të cilat i ka mohuar. Koxhaj dyshohet se shpërdoroi detyrën duke mos kontrolluar dhe mos vlerësuar alarmin e detektorit që tregoi se vrasësi po hynte me një pistoletë./S.K/KP/

Continue Reading

Lajmet

Aksidentoi dy turistët francezë, arrestohet 35-vjeçari në Korçë

Published

on

Policia e qarkut Korçë ka vënë në pranga një 35-vjeçar nga fshati Grabovicë, pasi u përfshi në një aksident rrugor ku u plagosën dy turiste franceze.

Sipas njoftimit zyrtar të Policisë, E. C., 35 vjeç, u arrestua në flagrancë për veprën penale “Shkelja e rregullave të qarkullimit rrugor”.

Ngjarja ndodhi një ditë më parë në aksin rrugor “Korçë–Pogradec”, ku automjeti që drejtohej prej tij u përplas me mjetin në të cilin ndodheshin dy shtetaset franceze.

Të plagosurat u dërguan fillimisht në Spitalin Rajonal të Korçës, dhe më pas u transportuan për trajtim të specializuar në Spitalin e Traumës në Tiranë, ku ndodhen nën kujdesin e mjekëve, në gjendje shëndetësore të stabilizuar.

Policia bën me dije se grupi hetimor po vijon punën për të përcaktuar me saktësi shkakun dhe rrethanat e aksidentit./S.K/KP/

Continue Reading

Lajmet

Sulmohen zyrtarët policorë në Ferizaj dhe Kaçanik

Published

on

Dy raste të sulmeve ndaj zyrtarëve policorë janë regjistruar në Ferizaj dhe Kaçanik. Sipas raportit të Policisë së Kosovës, zyrtarët policorë në të dy rastet kanë pranuar tretman mjekësor.

Në Ferizaj dy meshkuj kosovar nuk i janë përfillur urdhërave duke penguar e më pas sulmuar zyrtarët policorë në detyrë.

“Ferizaj / 26.10.2025 – 00:50. Janë arrestuar dy të dyshuar meshkuj kosovare pasi që të njëjtit duke mos përfillur urdhrat e ligjshëm, i kanë penguar dhe sulmuar zyrtarët policorë në kryerje të detyrës. Si pasojë, një zyrtar policor ka pësuar lëndime trupore dhe i njëjti ka pranuar tretman mjekësor. Me vendim të prokurorit të dyshuarit janë dërguar në mbajtje”.

Ndërkaq në Kaçanik, Policia e Kosovës pas njoftimit të një aksidenti kanë dalë në terren ku më pas njëri nga personat nuk ka zbatuar urdhërat duke sulmuar zyrtarët policorë.

“Kaçanik / 26.10.2025 – 18:00. Patrulla policore ka shkuar në një rast aksident trafiku dhe aty kanë hasur dy meshkuj kosovarë te përfshirë ne aksident. Njeri nga personat duke mos zbatuar urdhrat e zyrtareve policor, nuk iu është bindur dhe ka sulmuar zyrtaret policor. Zyrtarët kanë marrë tretman mjekësor. I dyshuari është arrestuar dhe me vendim të prokurorit është dërguar në mbajtje”, thuhet në raportin e Policisë së Kosovës./S.K/KP/

Continue Reading

Lajmet

Shqiptohen mbi 1 mijë e 400 gjoba trafiku shqiptohen brenda 24 orëve të fundit

Published

on

Policia e Kosovës ka njoftuar se kanë shqiptuar 1438 gjoba për kundërvajtësit e trafikut brenda 24 orëve të fundit.

Gjithashtu, brenda këtyre 24 orëve të fundit janë raportuar 37 aksidente trafiku me dëme materiale, kurse 34 aksidente trafiku kanë përfunduar me të lënduar.

Policia e Kosovës ka arrestuar 18 persona kurse 8 janë dërguar në mbajtje./S.K/PK/

Continue Reading

Të kërkuara