Njësia për Inteligjencë Financiare bashkë me Ambasadën e Mbretërisë së Bashkuar me Qeverinë e Kosovës kanë lansuar Rrjetin e përbashkët të inteligjencës kundër pastrimit të parave të Kosovës (JMLINK).

Flutura Blakçori Xërxa nga Njësia për Inteligjencë Financiare tha se ky rrjet është ndër kriteret kryesore për luftimin e pastrimit të parave dhe luftimin e terrorizmit.

Ajo tha se rruga përpara është e gjatë por me punë të vazhdueshme e me integritet do të kenë rezultate.

Ministri i Financave, Punës dhe Transfereve, Hekuran Murati theksoi se krijimi i këtij rrjeti është hap i rëndësishëm në përmbushjen e prioriteteve si qeverie për luftimin e pastrimit të parave, krimit të organizuar dhe financimit të terrorizmi.

Ministri i Punëve të Brendshme, Xhelal Sveçla tha se ky projekt do t’i forcoj aftësitë për të adresuar kërcënime që vijnë nga pastrimi i parave dhe financimi i terrorizmit.

Sveçla theksoi se Kosova mbetet e sfiduar nga financimi i terrorizimit dhe ky rrjet do ta vendos Kosovën në pozicion më të fuqishëm për parandalimin e këtyre krimeve./UBTNews/

Shefi i Grupit Parlamentar i PDK-së, Alberad Tahiri, tha se në seancën e radhës në Kuvend, do të kërkohet shtyrja e votimeve të marrëveshjeve ndërkombëtare, për të diskutuar rreth ngjarjeve të fundit.

Tahiri shprehet se deputetët duhet të diskutojnë se si terroristi, Milan Radojiçiq, ka vendosur për pagën minimale të Kosovës.

“Kryeterroristi Radoiçiq bashkë me qeverinë kanë përcaktuar pagën minimale në Kosovë. Jo vetëm kaq, nga kjo ata përjashtuan veteranët, familjarët e dëshmorëve, ata që lanë gjymtyrët për këtë vend. Zëvendësministri i Drejtësisë, paska qenë edhe më Mimozën edhe me Radoiçiqin. Ky Kuvend është i kriminalizur, vendimmarrje ka marr kryeterroristi Radoiçiqi”, tha Tahiri.

“Si mund të vazhdojë kjo legjislaturë kur kemi aq thellë të involvuar terroristë. Ne sot e kemi vazhdimin e seancës por do të kërkojmë vazhdimin e kësaj çështje, që të gjithë deputetët të flasin lidhur me këtë”./UBTNews/

Rrjeti i Përbashkët i Inteligjencës Kundër Pastrimit të Parave (JMLINK) është lansuar të enjten në Prishtinë. Me këtë rast ambasadori britanik Jonathan Hargreaves, tha se është habitur me stilin e jetesës së shtrenjtë në Kosovës. Për çka tha se është interesuar të dijë më shumë pse po ndodh një gjë e tillë.

Prandaj tha se institucionet duhet që të angazhohen në luftimin e pastrimit të parave, ngase pastrimi i parave mundëson që krimi të lulëzojë e kriminelët të jetojnë në luks.

“Është nder i madh të jem bashkë me ju në këtë ngjarje të lansimit. Ky moment shënon një zhvillim të rëndësishëm të luftimit dhe pastrimit të parave. Pastrimi i parave është diçka që ndodh nga rrugët e Prishtinës deri në rrugët e Londrës”.

“Pastrimi i parave mundëson krimin të lulëzoj dhe mundëson kriminelët të jetojnë në luks. Shkalla e pastrimit te parave në Britani është qindra miliarda. Çka është më e rëndësishme që kemi konstatuar që me JMLINK është bërë një sukses në parandalimin e krimit”.

“Jam habitur me stilin e jetesës së shtrenjtë në Kosovë, vetura të shtrenjta, dhe kam pyetur se si ka mundësi të ndodh kjo, nuk përputhet me të ardhurat dhe kjo është shenjë që duhet të hulumtohen këtë raste. Institucionet tuaja janë të gatshme që të fillojnë me këtë sfidë. Britania është e gatshme të punoj dhe të mbështet Kosovën në këtë drejtim. Kosova nga ky lansim do te del më e fortë”, ka thënë ai./UBTNews/

Këshilli Gjyqësor i Kosovës (KGJK) ka mbajtur një takim ku është diskutuar për ecurinë e punës së gjykatave gjatë tremujorit të tretë të vitit 2024, nga korriku deri në shtator. Gjatë këtij takimi, kryesuesi i KGJK-së, Albert Zogaj, theksoi rëndësinë e publikimit të vendimeve nga gjykatat, duke kërkuar që të gjitha Gjykatat Themelore të plotësojnë këtë detyrim.

Zogaj gjithashtu shprehu shqetësim lidhur me politikat e ulëta ndëshkimore të Gjykatës Themelore në Prizren, duke i cilësuar ato si një nga më të ulëtat në vend. Ai nënvizoi se kjo situatë dëmton procesin e ndërmjetësimit në Prokurori dhe Gjykatë, duke ndikuar negativisht në përmirësimin e politikës ndëshkimore. “Një politikë e ulët ndëshkimore po e favorizon një proces që nuk na jep shanse për avancim”, tha Zogaj.

Përveç kritikave, ai kërkoi që pas këtij takimi, të mos pranohet asnjë justifikim nga kryetarët e gjykatave për mosdorëzimin e vendimeve për publikim. Këto komente erdhën pas raportit të kryetares së Gjykatës Themelore në Prizren, Shpresa Emra. Ajo raportoi se për tremujorin e tretë, nga rastet penale, janë trashëguar 2,669 lëndë, janë pranuar 853 të reja, dhe janë zgjidhur 783, duke arritur një efikasitet prej 92%. Megjithatë, ajo pranoi se mbesin ende 2,739 lëndë të pa zgjidhura.

Në raportin e saj, Emra theksoi gjithashtu sfidat në departamentin për të mitur, si dhe situatën e vështirë në lëmin civil, ku kanë trashëguar 13,060 lëndë dhe kanë zgjidhur 2,329, me një efikasitet prej 62%. Ajo kërkoi mbështetje nga Këshilli për të menaxhuar fluksin e lëndëve, duke propozuar punë jashtë orarit.

Ky takim ka përfshirë gjithashtu analiza mbi performancën e gjykatave, transparencën, parashkrimin e lëndëve penale dhe kundërvajtëse, si dhe respektimin e rendit në gjykata./UBTNews/