Fisnik Asllani nuk do të jetë i gatshëm për ndeshjen e parë të sezonit të ri në Bundesligën gjermane me Hoffenheimin.

Lajmin e ka konfirmuar të premten trajneri i skuadrës, Christian Ilzer, në konferencën për shtyp para ndeshjes me Kolnin.

“Fisit i duhet edhe pak kohë për të qenë plotësisht i gatshëm për skuadrën”, ka deklaruar Ilzer.

Sulmuesi 24-vjeçar i Kosovës i nisi me vonesë përgatitjet për sezonin e ri, për shkak të një problemi të lehtë në gju.

“Ai gradualisht do të marrë pjesë më shumë në stërvitje”, ka shtuar trajneri i Hoffenheimit.

Asllani gjatë kësaj vere ishte pranë transferimit te Leipzigu, por marrëveshja dështoi në momentet e fundit, raportohet për shkak të gjendjes së tij fizike. Më pas, në garë për shërbimet e tij u rikthye edhe Borussia Dortmundi, por e ardhmja e sulmuesit kosovar ende mbetet e paqartë.

Në sezonin e kaluar, Asllani ishte një prej lojtarëve më të spikatur të Hoffenheimit, duke realizuar 11 gola dhe 10 asistime në Bundesligë dhe Kupën e Gjermanisë.

Hoffenheimi e nis sezonin të shtunën, kur nga ora 15:30 përballet me Kolnin.

Në skuadrën e Hoffenheimit aktivizohen edhe dy futbollistë të tjerë me prejardhje kosovare, Leon Avdullahu dhe Albian Hajdari.

D.L

Dardan Cena e ka fituar edhe luftën e dytë në repesazh në kategorinë deri në 81 kilogramë në Lojërat Mesdhetare “Taranto 2026”.

Xhudisti kosovar triumfoi ndaj boshnjakut Mustafa Hebib në një përballje të zbehtë dhe me pak aksion.

Fituesi u përcaktua në kohën shtesë, kur Cena realizoi një aksion që i siguroi fitoren dhe mundësinë për të luftuar për medalje.

Në duelin për medaljen e bronztë, Cena do të përballet me xhudistin turk Vedat Albayrak.

Foto: Kosovapress

D.L

Federata e Futbollit e Argjentinës ka arritur marrëveshje me FIFA-n për mënyrën e vuajtjes së dënimeve të Leandro Paredesit dhe Nahuel Molinës, duke i dhënë mundësi dyshes së rëndësishme të jetë e gatshme për ndeshjet e mëdha të kombëtares.

Paredes dhe Molina ishin dënuar rëndë nga FIFA pas përleshjeve që pasuan finalen e Kupës së Botës ndaj Spanjës. Paredesi ishte suspenduar për 10 ndeshje, ndërsa Molina për shtatë.

Përveç suspendimeve, të dy futbollistët ishin gjobitur edhe me nga 77 mijë euro.

Megjithatë, Federata Argjentinase ka kërkuar që dënimet të llogariten edhe në ndeshjet miqësore të kategorisë A, krahas ndeshjeve zyrtare. Kërkesa është pranuar nga Komiteti Disiplinor i FIFA-s, bazuar në rregulloret aktuale.

“Federata e Futbollit e Argjentinës ka bërë kërkesë në FIFA që dënimet të llogariten në miqësoret e Klasës A dhe në ndeshjet zyrtare, cilado që vjen e para. Komiteti Disiplinor i FIFA-s e ka pranuar kërkesën në bazë të rregullave aktuale”, thuhet në komunikatën e federatës argjentinase.

Për këtë arsye, Argjentina pritet të zhvillojë një numër të madh ndeshjesh miqësore, në mënyrë që Paredesi, Molina dhe futbollistët e tjerë të përfshirë në incident ta vuajnë dënimin gjatë këtyre ndeshjeve.

Argjentina tashmë e ka siguruar kualifikimin në Kupën e Botës së ardhshme, ndërsa ndeshjet e ardhshme zyrtare për kampionët e botës pritet të jenë ato të Kupës së Amerikës 2028.

Në këtë mënyrë, dyshja Paredes–Molina synon të jetë e gatshme për sfidat më të rëndësishme të Argjentinës në turnetë e ardhshëm.

D.L

Erza Muminoviq e ka nisur garimin në Lojërat Mesdhetare “Taranto 2026”.

Xhudistja kosovare u mposht në çerekfinale të kategorisë deri në 48 kilogramë nga italiania Giulia Ghiglone.

Dueli ishte i luftuar, ndërsa italiania e siguroi fitoren me “Ippon” në kohën shtesë.

Megjithatë, gara nuk ka përfunduar për Muminoviqin. Ajo do të vazhdojë në repesazh, ku do ta kërkojë mundësinë për të luftuar për medaljen e bronztë.

D.L