Përzgjedhësi i Kosovës, Franco Foda, është shprehur i kënaqur me paraqitjen e “Dardanëve” në ndeshjen ndaj Irlandës, duke vlerësuar në veçanti organizimin defensiv dhe disiplinën taktike të skuadrës.

Foda theksoi se Kosova nuk i lejoi irlandezët të krijonin raste të rrezikshme, ndërsa lavdëroi qetësinë e lojtarëve dhe paraqitjen e tyre në të gjitha repartet.

“Sot më pëlqeu reparti defensiv. Irlandezët nuk krijuan asnjë mundësi. Më pëlqeu qetësia e skuadrës. Sidomos pas pjesës së parë, u thashë lojtarëve të qëndronin të qetë, pasi goli do të vinte. Në përgjithësi jam i kënaqur edhe me krahët. Edhe me Zhegrovën, i cili luajti 70 minuta pasi kishte një kohë të gjatë pa luajtur. Edhe me Batonin jam i kënaqur”, ka thënë Foda.

Ai veçoi edhe paraqitjen e mesfushorëve Leoni dhe Veldin, të cilët, sipas tij, kishin detyra të ndryshme në aspektin taktik.

“Leoni dhe Veldini bënë punë të mirë në mesfushë, pasi kishin role të ndara. Leoni kishte rol defensiv, ndërsa Veldini ofensiv. Nuk lejuan hapësira dhe ky ishte edhe plani ynë”, u shpreh trajneri gjerman.

Foda: Me Austrinë do të jetë ndryshe

Pas ndeshjes ndaj Irlandës, Kosova tani e ka vëmendjen te sfida e radhës, ku të dielën do të përballet me Austrinë në Vjenë.

Foda pret një ndeshje dukshëm më të vështirë, duke theksuar se Austria karakterizohet nga një lojë më e shpejtë.

“Kundër Austrisë do të jetë një ndeshje tjetër. Sot e kishim pak më të lehtë, ndërsa Austria luan më shpejt. Këtu kishim detyrë t’i ndalnim topat e gjatë”, ka deklaruar Foda.

Përzgjedhësi i Kosovës e njeh mirë futbollin austriak, pasi më parë ka qenë trajner i përfaqësueses së Austrisë. Nën drejtimin e tij, Austria u paraqit në Kampionatin Evropian të vitit 2020.

Megjithatë, Foda theksoi se skuadra austriake ka ndryshuar dhe se përballja e së dielës do të kërkojë përgatitje maksimale.

“Isha trajner i Austrisë, por skuadra ka ndryshuar. Këto ditë do të shohim dhe do të përgatitemi maksimalisht për ndeshjen ndaj Austrisë. Besoj se do ta kemi edhe në Vjenë mbështetjen e shqiptarëve, të cilët janë në numër të madh”, ka përfunduar Foda.

D.L

Në fushë ishte një përballje e fortë futbolli ku Kosova doli fituese 1-0, por jashtë saj, atmosfera në Prishtinë u shndërrua në një histori falënderimi dhe respekti që kapërcen sportin.

Media e njohur sportive irlandeze, Balls.ie, i ka kushtuar një artikull të veçantë mikpritjes mbresëlënëse që tifozët e Irlandës morën në Kosovë, duke zbuluar arsyen e fortë pse kosovarët e ruajnë me kaq shumë dashuri emrin e Irlandës.

Gjithçka nis në vitet e vështira të pasluftës. Pas shkatërrimit të viteve 1998–1999, ku mbi 10,800 kosovarë u vranë dhe qindra mijëra u dëbuan nga shtëpitë e tyre, Irlanda u rendit ndër shtetet e para që u doli në ndihmë. Prej vitit 1999 e deri në vitin 2010, mbi 3,000 ushtarë irlandezë shërbyen në kuadër të misionit paqeruajtës në Kosovë, duke ndihmuar në rindërtimin e vendit dhe sigurinë e qytetarëve, thuhet në artikullin e Balls.ie.

Kjo ndihmë nuk është harruar absolutisht.

“Përderisa Irlanda dhe Kosova nuk kishin ndonjë histori të madhe në futboll, shumë njerëz në këtë vend kanë një simpati të jashtëzakonshme për shtetin tonë. Një pjesë e madhe e kësaj daton që nga vitet ’90, kur forcat paqeruajtëse irlandeze luajtën një rol jetik në Kosovë,” shkruan Balls.ie.

Gazeta irlandeze tregon se si tifozët që udhëtuan drejt Prishtinës mbetën të befasuar kur vendasit i ndalonin nëpër rrugë e kafene, jo si kundërshtarë të futbollit, por për t’u shprehur falënderime për kontributin e ushtarëve të tyre dekada më parë.

“Shumë nga tifozët tanë mbetën pa fjalë nga përzemërsia dhe respekti me të cilin u pritën. Kosova tregoi se e kujton me shumë mirënjohje rolin e Irlandës gjatë asaj periudhe të vështirë historike,” përfundon artikulli i Balls.ie.

Kjo ndeshje vërtetoi edhe një herë se për kosovarët, ndihma e dhënë në ditët më të errëta mbetet e gdhendur përgjithmonë në memorie.

Përfaqësuesja e Kosovës e ka nisur në mënyrën më të mirë të mundur fushatën e saj në Grupin B3 të UEFA Nations League, duke mposhtur Republikën e Irlandës me rezultat 1–0 në stadiumin “Fadil Vokrri” në Prishtinë.

Kjo fitore e merituar erdhi pas një paraqitjeje dominuese nga dardanët, ndërsa rrjeti prestigjioz britanik BBC Sport raporton se vendasit e mbizotëruan plotësisht kundërshtarin gjatë gjithë 90 minutave.

Kosova tregoi energji të lartë që nga fillimi i takimit, duke e vënë vazhdimisht në presion mbrojtjen irlandeze. Rreziku kryesor erdhi përmes Baton Zabergjës nga krahët dhe sulmuesit Vedat Muriqi, i cili krijoi probleme të njëpasnjëshme për mysafirët.

Vendimi i ndeshjes erdhi vetëm shtatë minuta para fundit. Pas një goditjeje të Ermal Krasniqit që u kthye nga traveza, Muriqi reagoi më së shpejti duke shënuar me kokë për 1–0 dhe duke ndezur festën në shkallët e stadiumit. Edhe pse lojtarët irlandezë pretenduan për një faull gjatë aksionit, goli u konfirmua pas rishikimit nga sistemi VAR.

Në krahun tjetër, BBC e përshkroi paraqitjen e Irlandës si mjaft të dobët në sulm, me vetëm një goditje në kuadrat përgjatë tërë ndeshjes. Rastin më të mirë për mysafirët e shpërdoroi Chiedozie Ogbene në pjesën e parë, kur goditi mbi travezë.

Pas ndeshjes, edhe vetë përzgjedhësi i Irlandës, Heimir Hallgrímsson, pranoi superioritetin e vendasve. “Ata e merituan fitoren, po të jam plotësisht i sinqertë. Nuk kishte asgjë që nuk e dinim për mënyrën se si do të luanin, por ishte një ditë e dobët për shumë nga lojtarët tanë,” u shpreh ai.

Me këtë fitore, Kosova merr tri pikët e para në grup, ndërsa Irlanda mbetet pa pikë pas xhiros së parë. /E.A/

Kosova ka shënuar më në fund golin e parë. Pas një gjuajtjeje të Ermal Krasniqit, topi u përplas fillimisht në traversë pas një devijimi, ndërsa Vedat Muriqi realizoi nga afërsia me kokë, duke e dërguar topin në rrjetë.

Muriqi golin ia dedikoi ish-udhëheqësve të Ushtrisë Çlirimtare të Kosovës, të cilët javën e kaluar u dënuan me gjithsej 81 vjet burgim.

Pas golit, para shikuesve, sulmuesi i Kosovës ngriti fanellën me mbishkrimin “Drejtësi për çlirimtarët”, duke përcjellë mesazhin e tij në një moment emocionues për tifozët.

D.L