Lajmet nga UBT

Akademia Verore për Ekonomi, Financa, Banka dhe Sigurime vazhdon me aktivitete të pasura dhe edukative

Published

on

Me një program gjithëpërfshirës dhe aktivitete të fokusuara në ndërlidhjen mes teorisë dhe praktikës, po vazhdon suksesshëm puna në kuadër të Akademisë Verore për Ekonomi, Financa, Banka dhe Sigurime, e cila këtë vit po tërheq vëmendjen e të rinjve të interesuar për zhvillim profesional dhe akademik në këto fusha kyçe.

Në kuadër të këtyre aktiviteteve, u mbajt një ligjëratë e veçantë nga Drejtori i Përgjithshëm i Agjencisë së Statistikave të Kosovës (ASK), Avni Kastrati, i cili theksoi rëndësinë strategjike të statistikave në hartimin e politikave publike dhe në mbështetjen e vendimmarrjes së bazuar në të dhëna.

Ai prezantoi mënyrat konkrete se si statistikat ndihmojnë në parashikimin e trendeve ekonomike, planifikimin institucional, matjen e ndikimit të politikave si dhe në shmangien e gabimeve të politikëbërjes. Pjesë e prezantimit ishin gjithashtu edhe fushat kyçe të statistikave, si ato sociale, demografike, bujqësore, të ambientit dhe të teknologjisë së informacionit.

Në vazhdim, një tjetër ligjëratë me vlerë u mbajt nga Prof. Artan Haziri, i cili u fokusua në strukturën dhe funksionimin e sistemit tatimor në Kosovë. Ai analizoi komponentët kryesorë të këtij sistemi, përfshirë Tatimin mbi Vlerën e Shtuar (TVSh), Tatimin në të Ardhurat Personale, Tatimin në të Ardhurat e Korporatave si dhe tatimin në pronë.

Prof. Haziri solli në vëmendje edhe kuadrin ligjor, rolet e institucioneve zbatuese si Administrata Tatimore e Kosovës (ATK) dhe ndikimin e tyre në zhvillimin ekonomik të vendit, si dhe në funksionimin e bizneseve dhe mirëqenien e qytetarëve.

Ndërkohë, një tjetër temë aktuale dhe me interes të gjerë u trajtua nga Prof. Arta Mulliqi, e cila foli për tregtinë ndërkombëtare dhe ndikimin e saj në mjedis. Me fokus të veçantë në aspektet e eksporteve dhe investimeve të qëndrueshme, ajo analizoi mënyrat se si bashkëpunimi ekonomik ndërkombëtar mund të ndikojë pozitivisht në ruajtjen e ambientit, si dhe në zhvillimin afatgjatë të ekonomive vendore.

Ky edicion i Akademisë Verore po dëshmon rëndësinë e krijimit të hapësirave interaktive për edukim, ku të rinjtë përfitojnë nga ekspertiza e profesionistëve dhe praktikuesve të fushës, duke ndërtuar ura lidhëse ndërmjet dijes teorike dhe praktikës reale.

Lajmet nga UBT

Ndërmjetësimi në qendër të Akademisë Verore të Juridikut në UBT – Një qasje moderne drejt zgjidhjes së konflikteve

Published

on

Në kuadër të Global UBT Fest 2025, aktivitetit më të madh ndërdisiplinar në Kosovë dhe rajon, u zhvillua me sukses hapja zyrtare e Akademisë Verore të Fakultetit Juridik të UBT-së, e cila këtë vit është fokusuar në një nga mekanizmat më bashkëkohorë dhe efektivë të drejtësisë – ndërmjetësimin në zgjidhjen e mosmarrëveshjeve.

Ceremonia u mbajt në Dukagjini Center, ku të pranishmit u mirëpritën nga koordinatorja e kësaj akademie Prof. Asoc. Dr. Egzone Osmanaj. Në fjalët hyrëse, Osmanaj theksoi rëndësinë e akademive verore si platforma edukative që i tejkalojnë kufijtë e teorisë dhe nxisin përvojat praktike, duke krijuar ura të forta ndërmjet edukimit universitar dhe realitetit të profesionit juridik.

Pjesa qendrore e ditës së parë të akademisë ishte ligjërata dhe sesioni praktik i udhëhequr nga Ganimete Xhelili, Kryetare e Odës së Ndërmjetësve të Kosovës, e cila së bashku me Prof. Asoc. Dr. Jorida Xhafaj, prezantuan temën:

“Roli i ndërmjetësimit në zgjidhjen e mosmarrëveshjeve”, përmes një ligjërate interaktive dhe një seance të simuluar të ndërmjetësimit, duke përfshirë të gjitha etapat dhe rolet kyçe të procesit.

Studentët e Fakultetit Juridik dhe pjesëmarrësit patën mundësinë që jo vetëm të kuptojnë në teori këtë metodë të re, por edhe të përjetojnë në mënyrë praktike se si ndërmjetësuesit ndihmojnë palët të arrijnë marrëveshje me mirëkuptim dhe konsensus – pa qenë e nevojshme ndërhyrja e gjykatës.

Kjo përvojë u vlerësua si shumë e vlefshme për zhvillimin profesional të të rinjve juristë dhe një hap i rëndësishëm në formimin e tyre si profesionistë të së drejtës me aftësi ndërmjetësimi dhe menaxhimi të konflikteve.

Akademia Verore e Juridikut është pjesë e strategjisë së Fakultetit për të ofruar arsimim të integruar me tregun e punës, duke përfshirë trajnime, simulime, ligjërues nga praktika dhe ekspertë të fushave të ndryshme juridike.

Në ditët në vijim, kjo akademi do të vazhdojë me aktivitete tematike, punëtori dhe ligjërata të fokusuara në drejtësinë bashkëkohore, duke përfshirë çështje të rëndësishme të të drejtës civile, penale, ndërkombëtare dhe kushtetuese.

Continue Reading

Lajmet nga UBT

Në UBT hapet Akademia Verore e Inxhinierisë së Mekatronikës – Fokus në Elektronikën Energjetike dhe Ngasësit

Published

on

Në kuadër të aktivitetit më të madh akademik dhe kulturor në vend, Global UBT Fest 2025, është hapur zyrtarisht Akademia Verore e Fakultetit të Inxhinierisë së Mekatronikës, me temën qendrore: “Elektronika Energjetike dhe Ngasësit”.

Aktiviteti u zhvillua në Kampusin e UBT-së në Lipjan, ku morën pjesë studentë, profesorë, inxhinierë dhe të apasionuar pas teknologjisë dhe energjisë, për të diskutuar mbi trendet e fundit në fushën e elektronikës energjetike – një ndër fushat kyçe për të ardhmen e industrisë, automatizimit dhe energjisë së ripërtërishme.

Në fjalën hyrëse gjatë ceremonisë së hapjes, përfaqësues të fakultetit theksuan rolin kritik të inxhinierisë së mekatronikës në zhvillimet moderne teknologjike dhe industrinë 4.0. Ata nënvizuan rëndësinë që UBT i kushton përgatitjes profesionale të studentëve përmes edukimit praktik, laboratorëve të avancuar dhe shkëmbimit të përvojave në nivel ndërkombëtar.

Programi i Akademisë Verore nisi me ligjëratën: “Hyrje në elektronikën energjetike dhe komponentët kryesorë”, ku pjesëmarrësit u njohën me bazat dhe funksionimin e komponentëve më të rëndësishëm në qarkoret energjetike – përfshirë transistorët, diodat, rregullatorët dhe sistemet e menaxhimit të energjisë.

“DC/AC konvertuesit dhe aplikimet e tyre”, u trajtua përdorimi praktik i konvertuesve në sisteme industriale, energji të ripërtërishme dhe automjetet elektrike. U diskutua për rëndësinë e efikasitetit energjetik, menaxhimin e ngarkesës dhe integrimin në rrjete inteligjente.

Akademia Verore e Inxhinierisë së Mekatronikës në UBT synon të shërbejë si një platformë praktike dhe ndërdisiplinare ku studentët dhe profesionistët ballafaqohen me zgjidhje reale, pajisje moderne dhe risi që ndihmojnë në përgatitjen e gjeneratës së ardhshme të inxhinierëve.

Ky aktivitet është pjesë e qindra punëtorive, trajnimeve dhe ngjarjeve që po zhvillohen në kuadër të Global UBT Fest 2025, i cili përfshin fushat më të rëndësishme të arsimit, teknologjisë, shëndetësisë, kulturës dhe inovacionit.

Continue Reading

Lajmet nga UBT

Hapet Akademia Verore “BioMedTech 2025” në UBT: Inovacione dhe teknologji të avancuara në Biokimi Mjekësore

Published

on

Në ambientet e Kampusit të UBT-së në Lipjan u hap zyrtarisht Akademia Verore: BioMedTech 2025, një aktivitet multidisiplinar në kuadër të Akademisë Verore të UBT-së dhe ngjarjes madhore Global UBT Fest 2024, që po shënon një platformë ndërkombëtare për shkëmbim dijesh dhe përvojash inovative.

Kjo shkollë verore e dedikuar Biokimisë Mjekësore dhe Teknologjive të Aplikuara në Mjekësi, mblodhi studiues, profesionistë të fushës, studentë dhe të rinj të pasionuar pas kërkimit shkencor dhe zhvillimeve më të fundit në shkencat biomjekësore.

Në fjalën hyrëse, Fisnik Laha, Dekan i Fakultetit Biokimi Mjekësore në UBT, theksoi rëndësinë e integrimit të biokimisë mjekësore me teknologjitë e reja, si dhe rolin e UBT-së në avancimin e praktikave laboratorike dhe të kërkimit shkencor në shëndetësi. Ai vuri në pah përkushtimin e institucionit për të ofruar edukim të përparuar dhe bashkëkohor në këtë fushë.

Programi i ditës vazhdoi me një seri prezantimesh nga profesionistë të fushës:

Dr. Armend Cana foli për Zoonozat – sëmundjet që transmetohen nga kafshët te njeriu, duke trajtuar sfidat aktuale të shëndetit publik në kontekstin e globalizimit dhe ndryshimeve klimatike.

Fisnik Laha prezantoi rëndësinë e standardit ndërkombëtar ISO 15189:2022 si një mjet strategjik për menaxhimin e cilësisë në laboratorët mjekësorë, me fokus në kompetencë, siguri dhe minimizim të rrezikut.

Demokrat Nuha trajtoi një temë kërkimore me potencial të lartë klinik, duke folur për zhvillimin dhe vlerësimin biologjik të derivateve tiazol-piridinë si terapi të synuar kundër kancerit të mushkërive, një sëmundje me prevalencë të lartë globale.

Dr. Lulzim Thaqi prezantoi studimin mbi potencialin terapeutik të gazit radon në praktikën mjekësore, një temë e debatueshme por inovative në terapitë alternative.

Në vazhdim, Dr. Zafer Gashi solli në vëmendje rezultatet e një studimi të rëndësishëm mbi vlerat e ferritinës në serum tek gratë me kancer të gjirit, duke e ndërlidhur me diagnostikimin dhe ecurinë klinike të pacientëve.

Në fund të sesioneve, pjesëmarrësit patën mundësinë të marrin pjesë në një forum pyetjesh dhe diskutimesh të udhëhequr nga Demokrat Nuha, ku u trajtuan dilema shkencore, u ndanë përvoja profesionale dhe u diskutuan tendencat e ardhshme të kërkimit në biokimi dhe mjekësi.

Shkolla Verore “BioMedTech 2025” synon të shndërrohet në një traditë të përvitshme për studentët dhe profesionistët që dëshirojnë të thellojnë njohuritë në biokimi, bioteknologji dhe mjekësi laboratorike, duke krijuar ura bashkëpunimi me tregun e punës dhe industrinë e shëndetit në nivel kombëtar dhe ndërkombëtar.

Continue Reading

Lajmet nga UBT

UBT organizon gara sportive në kuadër të Akademisë Verore 2025

Published

on

Fakulteti i Shkencave të Sportit dhe të Lëvizjes në UBT ka paralajmëruar një sërë aktivitetesh dinamike dhe garuese në kuadër të Akademisë Verore 2025, me qëllim të promovimit të shëndetit fizik, frymës së ekipit dhe aktivizimit të studentëve gjatë muajve të verës.

Aktivitetet do të përfshijnë gara në Pingpong, Volejboll dhe Futsall, që do të mbahen në Kampusin e UBT-së në Lipjan nga data 9 deri më 11 korrik 2025. Organizimi i këtyre ngjarjeve është pjesë e përkushtimit të Fakultetit për të nxitur angazhimin fizik të studentëve dhe për të ofruar një ambient miqësor e motivues për të gjithë.

Sipas agjendës së publikuar:

  • Gara në Pingpong do të mbahet më 09.07.2025, duke filluar nga ora 10:00, dhe për pjesëmarrje studentët mund të paraqiten në e-mailin: [email protected].
  • Gara në Volejboll, e cila do të zhvillohet më 10.07.2025 nga ora 10:00, do të lejojë pjesëmarrjen e ekipeve të përziera (meshkuj dhe femra). Paraqitjet bëhen në adresën: [email protected].
  • Gara në Futsall do të organizohet më 11.07.2025, duke filluar nga ora 09:00, me paraqitje në e-mailin: [email protected]. Ekipet mund të përbëhen nga maksimumi 10 lojtarë, ndërsa loja do të luhet në formatin 5+1. Secili ekip duhet të ketë një emër identifikues.

Organizatorët ftojnë të gjithë studentët e interesuar që të bëjnë paraqitjen e ekipeve më së voni deri më 08.07.2025, në ora 16:00, në mënyrë që të bëhen përgatitjet e nevojshme për organizim të suksesshëm.

Vërejtje: Pjesëmarrësit duhet të jenë studentë aktivë në Kolegjin UBT dhe gjatë garave duhet të paraqesin ID-kartelën studentore si dëshmi. Pa këtë dokument, pjesëmarrja nuk do të lejohet.

Këto aktivitete janë pjesë e angazhimit të UBT-së për të ofruar një përvojë studentore gjithëpërfshirëse dhe për të ndërtuar komunitet përmes sportit, bashkëpunimit dhe garës së shëndetshme.

Continue Reading

Të kërkuara