Futbollisti brazilian, Vinicius Junior, vazhdon të jetë në qendër të spekulimeve lidhur me të ardhmen e tij te Real Madridi. Ai ka kontratë me klubin spanjoll deri më 30 qershor 2027, por deri tani negociatat për rinovimin e saj nuk kanë përparuar.

Real Madridi i ka ofruar lojtarit një kontratë pesëvjeçare që do ta mbante të lidhur me skuadrën deri në vitin 2030, me një pagë neto prej 20 milionë eurosh në vit. Megjithatë, Vinicius kërkon të paktën 25 milionë euro në vit, duke bërë që negociatat të ngelen në vend.

Klubi është i shqetësuar se performanca e brazilianit mund të ndikojë në ofertat e ardhshme, duke iu referuar edhe rastit të ish-kapitenit Sergio Ramos, i cili përfundoi duke nënshkruar për pagë më të ulët sesa ajo që kishte kërkuar fillimisht.

Sipas raportimeve të mediumit spanjoll Okdiario, Vinicius po konsideron mundësinë e largimit nga Real Madridi para përfundimit të afatit të verës, një informacion që deri më tani nuk është konfirmuar nga burime të tjera.

Një klub i panjohur nga Arabia Saudite raportohet se po përgatit një ofertë prej 130 milionë eurosh për brazilianin, në një përpjekje për të testuar seriozitetin e Realit për ta mbajtur atë në skuadër.

Spekulimet për të ardhmen e Vinicius u shtuan edhe pas paraqitjes së tij si zëvendësues në ndeshjen e fundit të La Liga-s kundër Real Oviedo, duke ngritur dyshime mbi vendosmërinë e trajnerit dhe klubi për të llogaritur te numri 7 i skuadrës.

Vinicius njihet për karakterin impulsiv dhe pasionin e tij në fushë, dhe në disa raste ka marrë vendime ose ka shprehur mendime që më pas i ka rishqyrtuar. Megjithatë, ai ka theksuar se dëshira e tij mbetet të qëndrojë te Real Madridi, nëse ndihet i vlerësuar si një prej yjeve kryesorë të skuadrës.

Barcelona ka konfirmuar se nuk ka ndërmend të largojë mesfushorin e ri, Fermin Lopez (22 vjeç), pavarësisht interesimit të madh nga klubi anglez, Chelsea, sipas gazetarit Gerard Romero.

Klubi katalanas, megjithëse përballet me kufizime të rrepta nga fair play financiar, është i gatshëm të shqyrtojë një transferim vetëm nëse vetë lojtari shpreh dëshirën për të ndryshuar ambient. Në të kundërtën, Barcelona e konsideron Lopezin një element kyç të skuadrës së trajnerit Hansi Flick.

Sipas raportimeve të “The Athletic”, Chelsea ka nisur bisedimet me përfaqësuesit e futbollistit për të testuar gatishmërinë e tij për një kalim në “Stamford Bridge”. Tek klubi anglez, mesfushorit i është premtuar një rol udhëheqës nga trajneri i ri, Enzo Maresca.

Në sezonin 2025/26, Lopez ka pasur minuta të kufizuara si titullar në dy ndeshjet e para të La Liga-s, për shkak të konkurrencës nga Dani Olmo dhe Raphinha. Megjithatë, ai ka shprehur hapur besnikërinë ndaj Barcelonës, klubit ku është rritur si futbollist.

Trajneri Hansi Flick e sheh 22-vjeçarin si një pjesë të rëndësishme të strategjisë së tij me presion të lartë dhe dinamizëm në mesfushë. Çdo ofertë që mund të arrijë në shifra prej 50-75 milionë eurosh nuk do të merret parasysh, përveç në rast se vetë lojtari kërkon largimin.

Përfaqësuesja e Kosovës në futboll ka fituar një përforcim të rëndësishëm me afrimin e Leon Avdullahut, i cili ka vendosur të përfaqësojë Kosovën në arenën ndërkombëtare. Lajmi është konfirmuar nga Federata e Futbollit të Kosovës (FFK), dhe ka marrë vëmendje të madhe në rrjetet sociale.

Një nga reagimet e para erdhi nga Xherdan Shaqiri, ish-lojtari i përfaqësueses së Zvicrës, i cili e pëlqeu publikimin e FFK-së dhe të presidentit Agim Ademi në rrjetet sociale, duke treguar mbështetje për këtë hap të Avdullahut.

Në një prononcim për gazetën zvicerane Blick, Shaqiri u shpreh se vendimi i Avdullahut ishte temë që kishin diskutuar më herët, kur të dy ishin pjesë e klubit FC Basel dhe fituan së bashku dy trofe.

“Kemi folur shpesh për këtë”, tha Shaqiri, duke theksuar se ai nuk kishte ushtruar ndikim të drejtpërdrejtë në vendimin e 20-vjeçarit. “Mendoj se ai ka një shans më të mirë për të luajtur për Kosovën sesa për Zvicrën. Me siguri i janë paraqitur perspektiva më të mira sportive – përndryshe nuk do ta kishte bërë këtë hap”, shtoi ai.

Avdullahu, i lindur dhe i rritur në Zvicër, konsiderohet një lojtar me potencial të lartë dhe përfshirja e tij në radhët e Kosovës shihet si një zhvillim pozitiv për të ardhmen e ekipit kombëtar.

Kristjan Asllani është tashmë zyrtarisht pjesë e Torinos. Mesfushori shqiptar u transferua te skuadra nga Piemonte mbrëmjen e së hënës, në formë huazimi nga Interi, me një pagesë prej 1.5 milionë eurosh dhe me të drejtë blerjeje për 12 milionë euro në fund të sezonit.

23-vjeçari, i cili ka qenë pjesë e Interit që nga viti 2022, është përshëndetur me klubin dhe tifozët zikaltër përmes një mesazhi të publikuar në rrjetet sociale.

“Ka ardhur momenti të përshëndetemi, dhe besomëni, nuk është e lehtë të gjej fjalët e duhura. Të vesh fanellën e Interit ka qenë një ëndërr që e kam ruajtur që fëmijë”, shkruan Asllani, duke falënderuar klubin për mundësinë dhe tifozët për mbështetjen gjatë këtyre dy sezoneve.

Mesazhi i tij përfshinte edhe mirënjohje për shokët e skuadrës dhe stafin teknik, duke theksuar se ka dhënë maksimumin për të respektuar fanellën e klubit.

Asllani largohet nga Milano pas dy sezonesh në të cilat pati hapësira të kufizuara, por mbetet një nga lojtarët e perspektivës në futbollin italian dhe me rëndësi për Kombëtaren shqiptare.