Kryetari i Lidhjes Demokratike të Kosovës (LDK), Lumir Abdixhiku, ka reaguar pas marrjes në pyetje të ministrit në detyrë të Bujqësisë, Faton Peci, nga Prokuroria e Shtetit nën dyshimet për keqpërdorim të detyrës zyrtare në rastin e fabrikës për përpunimin e mbetjeve nën shtazore.

Përmes një postimi në rrjete sociale, Abdixhiku e ka cilësuar këtë zhvillim si një shenjë të një epoke të re për drejtësinë në vend. Ai tha se pas shumë vitesh pritjeje, ka ardhur koha që pasuria publike të mbrohet dhe keqpërdoruesit të japin llogari.
“Le të shpresojmë e besojmë, se pas aq shumë vitesh pritjeje, një guxim i tillë tashmë ka lindur. Dhe me të, ka lindur dhe një epokë e re e popullit tonë,” ka shkruar Abdixhiku.
Ai theksoi se në këtë epokë të re, askush nuk do të jetë mbi ligjin dhe çdo cent i vjedhur do t’i kthehet qytetarëve të Kosovës.
“Në këtë epokë, një e vërtetë e pashmangshme do të qëndrojë gjithëherë – se paratë e vjedhura nga ata që e shohin veten mbi shtet, ligj e vend, do të kthehen cent më cent. Nga të gjithë!”, shtoi ai.
Kreu i LDK-së gjithashtu shprehu besimin se edhe në Kosovë do të dalin në pah prokurorë e hetues me integritet dhe guxim për të hetuar çdo akt korruptiv – përfshirë ata të kryer nga zyrtarët më të lartë të shtetit.
“Edhe në Kosovë, si në çdo shtet tjetër evropian, do të dalin prokurorë e prokurore, djem e vajza të reja me guxim e integritet, që do të trajtojnë secilin akt korruptiv, sidomos atë të pushtetarëve”, theksoi Abdixhiku.
Ndërkohë, ministri në detyrë i Bujqësisë, Faton Peci, është liruar në procedurë të rregullt pas intervistimit disa orësh nga Prokuroria Speciale. Ai është marrë në pyetje lidhur me dyshimet për keqpërdorime në procesin e tenderimit për funksionalizimin e fabrikës për mbetjet nën shtazore.
Hetimet përfshijnë edhe bastisje në katër institucione: Ministrinë e Bujqësisë, Agjencinë për Zhvillimin e Bujqësisë, Agjencinë e Ushqimit dhe Veterinarisë, si dhe kompaninë përfituese të kontratës.