Presidenti i Shteteve të Bashkuara, Donald Trump, e ka arritur të enjten një fitore të madhe politike, pasi Kongresi e miratoi projektligjin e tij të madh për taksat dhe shpenzimet.

Projektligji vuri në pah mbizotërimin e presidentit mbi Partinë Republikane, e cila ishte kapluar nga dilemat rreth përmbajtjes së tij, pasi projketligji pritet ta rrisë ndjeshëm borxhin kombëtar dhe ta shkurtojë ndihmën shëndetësore dhe sociale.

Një grup i vogël kundërshtarësh brenda partisë në fund u pajtuan për ta votuar atë, pasi kryetari i Dhomës së Përfaqësuesve, Mike Johnson, punoi gjatë gjithë natës së kaluar për t’i bindur kundërshtarët në Dhomën e Përfaqësuesve ta mbështesnin “Projektligjin e Madh dhe të Bukur”.

Projektligji kaloi në votimin përfundimtar me 218 për dhe 214 kundër.

Shtëpia e Bardhë tha se Trump do ta nënshkruajë projektligjin të shtunën, më 5 korrik, për ta kthyer atë në ligj.

“Një nga projektligjet më të rëndësishme ndonjëherë. SHBA-ja është vendi më i ‘NXEHTË’ në botë, pa diskutim!!!” shkroi Trump në rrjetet sociale pasi u miratua projektligji.

Koha e votimit u shty pasi udhëheqësi i pakicës demokrate, Hakeem Jeffries, foli për afro nëntë orë për t’i vonuar procedurat.

Dëbime masive dhe ulje taksash

Projektligji voluminoz kaloi në Senat të martën dhe duhej të kthehej në Dhomën e Përfaqësuesve për t’i miratuar ndryshimet e bëra nga senatorët.

Paketa përmbush shumë nga premtimet elektorale të Trumpit: rritje të shpenzimeve ushtarake, financim për një fushatë të dëbimit të imigrantëve dhe një zotim prej 4.5 trilionë dollarësh për t’i zgjatur lehtësimet tatimore nga mandati i tij i parë.

“Sot po vendosim një gur themel të rëndësishëm për Epokën e Artë të re të Amerikës”, tha Johnson.

Por, pritet që kjo t’i shtojë 3.4 trilionë dollarë të tjerë mbi deficitin në rritje të vendit gjatë një dekade, ndërkohë që shkurton ndjeshëm ndihmën ushqimore federale dhe bën shkurtimet më të mëdha në programin Medicaid – sigurimi shëndetësor për amerikanët me të ardhura të ulëta – që nga krijimi i tij në vitet ‘60.

Disa vlerësime tregojnë se deri në 17 milionë njerëz mund të humbasin mbulimin e sigurimeve shëndetësore sipas këtij projektligji. Dhjetëra spitale rurale pritet të mbyllen.

Shpenzimet shtesë për ushtrinë dhe sigurinë kufitare do të financohen pjesërisht përmes ndërprerjes së subvencioneve për energjinë e pastër dhe automjetet elektrike – një faktor që ka nxitur një përplasje të ashpër publike mes Trumpit dhe ish-mbështetësit të tij, Elon Musk./REL

Presidenti amerikan, Donald Trump, ka bërë të ditur se do të flasë në telefon me presidentin rus, Vladimir Putin, në orën 14:00GMT, transmeton Anadolu.

“Do të flas me presidentin Putin të Rusisë në orën 10:00 paradite. Faleminderit!”, shkroi Trump në platformën Truth Social.

Putin gjithashtu iu referua bisedës me Trumpin gjatë një ekspozite të markave ruse në zhvillim në Moskë.

“Sot, unë do të flas me presidentin e SHBA-së dhe patjetër do t’i sugjeroj që ai ta përdorë këtë material për ta promovuar atë në tregun amerikan”, tha Putin.

Lajmi për telefonatën vjen derisa SHBA-ja kërkon të ndërmjetësojë luftën midis Rusisë dhe Ukrainës. Trump e ka pozicionuar veten si një ndërmjetës i mundshëm i paqes në negociatat midis dy vendeve fqinje.

Diskutimet zakonisht trajtojnë çështjet dypalëshe së bashku me shqetësime më të gjera të sigurisë rajonale,

Në mandatin e dytë presidencial të Trumpit, ai dhe Putin janë angazhuar në disa telefonata, duke filluar me bisedën e tyre të parë më 12 shkurt.

Bashkimi Evropian (BE) ka aktivizuar mekanizmin e Mbrojtjes Civile pasi zjarret në pyje kanë filluar të prekin shumë vende në Evropë, transmeton Anadolu.

Në një deklaratë me shkrim nga Komisioni Evropian thuhet se zjarret pyjore kanë filluar të prekin shumë vende në Evropë dhe se 650 zjarrfikës nga 14 vende evropiane janë pozicionuar në zona me rrezik të lartë në Francë, Greqi, Portugali dhe Spanjë.

BE-ja gjithashtu do të rrisë numrin e zjarrfikësve në secilin vend si pjesë e përgatitjeve të saj verore për zjarret në pyje. Përveç kësaj, 22 avionë zjarrfikës dhe katër helikopterë janë vendosur në 10 shtete anëtare për të reaguar nëse është e nevojshme.

Këto burime, të koordinuara dhe të bashkëfinancuara përmes mekanizmit të Mbrojtjes Civile të BE-së, synojnë të ndihmojnë në uljen e rreziqeve dhe të ofrojnë reagim më të shpejtë dhe më të fortë ndaj krizave.

Unioni gjithashtu do të ofrojë ndihmë në kuadër të mekanizmit të Mbrojtjes Civile nëse kërkohet.

Kancelari gjerman Friedrich Merz ka bërë thirrje për një marrëveshje të shpejtë me Shtetet e Bashkuara të Amerikës për të shmangur tarifat ndaj mallrave të BE-së – më pak se një javë përpara përfundimit të afatit të caktuar nga presidenti i SHBA-së, Donald Trump.

“Aktualisht, nuk bëhet fjalë për një marrëveshje tregtare gjithëpërfshirëse dhe të hartuar me hollësi me Shtetet e Bashkuara të Amerikës, e cila është negociuar në çdo detaj”, tha Merz në një konferencë bankare në Berlin.

“Por, bëhet fjalë për zgjidhjen e shpejtë të një mosmarrëveshjeje doganore”, theksoi ai.

Merz theksoi rëndësinë e sektorëve kryesorë industrialë të Gjermanisë, duke përfshirë kimikatet, prodhimin e automjeteve, farmaceutikën, inxhinierinë mekanike, aluminin dhe çelikun.

“Tani duhet të arrihet një rezultat i shpejtë”, shtoi ai.

“Më mirë shpejt dhe lehtë sesa një proces i gjatë dhe i ndërlikuar dhe ende në status negociues për muaj të tërë”, theksoi Merz.

Uashingtoni dhe Brukseli kanë negociuar për javë të tëra për një marrëveshje tregtare, me qëllim parandalimin e një përshkallëzimi të mëtejshëm të mosmarrëveshjes tarifore.

Tarifat ndaj mallrave të BE-së do të hyjnë në fuqi më 9 korrik nëse nuk arrihet një marrëveshje. /atsh