Një gjykatëse në Nevada ka vendosur se një regjistrim i një interviste policore të vitit 2008 me Duane “Keffe D” Davis mund të përdoret si provë në gjyqin e ardhshëm për vrasjen e reperit të njohur Tupac Shakur.

Gjyqtarja Carli Kierny e ka pranuar si dëshmi regjistrimin e intervistës, ndërsa procesi gjyqësor ndaj Davis, 63-vjeçarit të akuzuar për vrasjen e Shakur, pritet të nisë më 10 gusht në Las Vegas dhe të zgjasë rreth katër javë.

Prokuroria ka argumentuar se nuk ekziston bazë ligjore për përjashtimin e kësaj interviste nga provat e gjyqit. Ndërkaq, mbrojtja ka pretenduar se intervista duhej të mbetej konfidenciale, duke thënë se hetuesit e kishin siguruar Davis se deklaratat e tij nuk do të përdoreshin kundër tij.

Rasti i vrasjes së Tupac Shakur mbeti për shumë vite një nga misteret më të mëdha kriminale në Shtetet e Bashkuara. Hetimi mori hov sërish pasi Davis foli publikisht për ngjarjen, përfshirë edhe në një libër ku ai pretendoi se ishte në automjetin nga i cili u sigurua arma e përdorur në sulm.

Tupac Shakur u qëllua më 7 shtator 1996 në Las Vegas, ndërsa ndodhej në një veturë pranë themeluesit të “Death Row Records”, Marion “Suge” Knight. Një Cadillac i bardhë u afrua pranë tyre dhe nga automjeti u hap zjarr.

Shakur u plagos rëndë dhe vdiq gjashtë ditë më vonë, ndërsa Knight pësoi lëndime më të lehta. Rasti për vite me radhë u konsiderua një nga vrasjet më të famshme të pazgjidhura në historinë e muzikës hip-hop./A.K/

Turneu botëror i Bad Bunny, “DeBÍ TiRAR MáS FOToS”, është mbyllur në Bruksel, duke shënuar një arritje historike për muzikën latine. Sipas Billboard, ai është bërë artisti i parë latino-amerikan që ka gjeneruar mbi 1 miliard dollarë të ardhura nga turnetë koncertale, me të gjitha performancat e realizuara në gjuhën spanjolle.

Ekspertja e muzikës latine, Leila Cobo, vlerëson se ky sukses pasqyron rritjen e tregut global të koncerteve dhe popullaritetin gjithnjë e më të madh të muzikës në gjuhën spanjolle.

Sipas saj, muzika latine është segmenti me rritjen më të shpejtë në industrinë muzikore, ndërsa ndikimi i artistëve latinë po zgjerohet vazhdimisht në mbarë botën.

Edhe të dhënat e Federatës Ndërkombëtare të Industrisë Fonografike (IFPI) tregojnë se të ardhurat nga muzika e regjistruar në Amerikën Latine u rritën me 17.1% gjatë vitit 2025, duke shënuar vitin e 16-të radhazi me rritje.

Bad Bunny ka vendosur edhe më herët rekorde historike. Në vitin 2020, albumi “El Último Tour del Mundo” u bë albumi i parë në gjuhën spanjolle që arriti vendin e parë në Billboard 200, ndërsa në vitin 2022 ai u bë artisti i parë joanglishtfolës që kryesoi renditjen vjetore “Top Artists” të Billboard./A.K/

Këngëtarja shqiptare me famë botërore, Rita Ora, ka folur hapur për rrugëtimin e saj nga një fëmijë refugjat nga Kosova në një prej artisteve më të suksesshme në botë, duke theksuar se ndihet krenare për origjinën e saj dhe për faktin që është emigrante.

Në një intervistë për The Times, artistja 35-vjeçare kujtoi se familja e saj u largua nga Prishtina në fillim të viteve ’90 për shkak të përndjekjes së shqiptarëve në Kosovë. Në Britaninë e Madhe, nëna e saj, Vera, u rikualifikua si psikiatre, ndërsa babai, Besniku, nisi një jetë të re duke menaxhuar një lokal në Londër.

“Gjithçka që di është se jam gjithmonë mirënjohëse për arsimin që kam marrë dhe krenare që jam emigrante”, u shpreh Ora, duke shtuar se shumë emigrantë kanë një motivim të veçantë për të dëshmuar veten.

Ajo zbuloi gjithashtu se do të dëshironte të luante në një film të bashkëshortit të saj, regjisorit Taika Waititi.

“Absolutisht. Çuditem që nuk ka ndodhur ende. Gjithçka varet nga skenari dhe historia, por është një nga ëndrrat tona”, tha këngëtarja.

Në një intervistë tjetër për Women’s Health UK, Ora tregoi se kishte ngrirë vezët në moshën 24 dhe 27-vjeçare, pas këshillës së mjekëve, duke e cilësuar atë si një nga vendimet më të mira që ka marrë.

Ajo tha se tani, së bashku me Taika Waititin, po mendojnë seriozisht për të zgjeruar familjen.

“Më pëlqen shumë koha që kaloj me vajzat e Taikas dhe do të doja ta zgjeronim familjen. Dikur mendoja se me karrierat tona kjo ishte e pamundur, por Jacinda Ardern më frymëzon. Ajo tregoi se një grua mund të jetë njëkohësisht nënë dhe e suksesshme në punë”, u shpreh Rita Ora.

Ora dhe Waititi u njohën në vitin 2018, ndërsa lidhja e tyre romantike nisi tre vjet më vonë. Çifti janë të martuar prej gati katër vjetësh./A.K/

Aktori Ryan Gosling do t’i bashkohet Universit Kinematografik të Marvelit (MCU), ku do të interpretojë personazhin kryesor në filmin e ri “Ghost Rider”.

Lajmi u bë i ditur gjatë një prezantimi surprizë në festivalin San Diego Comic-Con, ku Gosling tha se është një rol që “ka dashur ta luajë për një kohë të gjatë”.

Filmi i ri pritet të publikohet në vitin 2028 dhe do të jetë projekti i tretë kinematografik për anti-heroin me motor. Ai vjen pas filmave “Ghost Rider” të vitit 2007 dhe “Ghost Rider: Spirit of Vengeance” të vitit 2011, ku rolin kryesor e kishte luajtur Nicolas Cage.

Regjinë e filmit do ta bëjë Shawn Levy, i cili më herët ka drejtuar edhe “Deadpool & Wolverine”. Gosling e ka cilësuar Levy si “regjisorin e vetëm” për këtë projekt.

Personazhi i Ghost Rider lidhet me Johnny Blaze, një marifetist me motor i cili fiton fuqi mbinatyrore pasi lidhet me shpirtin e hakmarrjes Zarathos.

Ndërkohë, në të njëjtin event, Marvel zbuloi edhe detaje të reja për projekte të tjera, përfshirë filmin “Avengers: Doomsday” dhe konfirmimin se “Black Panther 3” do të publikohet në vitin 2028. Ryan Reynolds gjithashtu bëri një paraqitje surprizë si Deadpool gjatë panelit të Marvelit./BBC/A.K/