Shqipëria është renditur destinacioni më i lirë për pushime verore në Evropë për vitin 2026, sipas një studimi të realizuar nga kompania britanike e kartave të kreditit “Aqua”, të publikuar nga e përditshmja britanike Daily Express.

Studimi ka krahasuar koston e një qëndrimi njëjavor në destinacione turistike në Britaninë e Madhe dhe në Evropë, në një kohë kur 47 për qind e britanikëve që planifikojnë të udhëtojnë kanë vendosur të ulin shpenzimet për shkak të rritjes së kostos së fluturimeve.

Sipas analizës, Shqipëria ofron raportin më të mirë mes kostos dhe përvojës së pushimeve. Fluturimet vajtje-ardhje kushtojnë mesatarisht rreth 100 paund, ndërsa një javë akomodim për dy persona gjatë muajit korrik kushton mesatarisht 381 paund (rreth 447 euro).

Ky vlerësim vjen në një kohë kur turizmi në Shqipëri po vazhdon të rritet me ritme të shpejta. Sipas të dhënave të përfshira në studim, numri i vizitorëve në vend u rrit me 89 për qind në vitin 2025 krahasuar me vitin 2019, duke e bërë Shqipërinë destinacionin turistik me rritjen më të shpejtë në Evropë.

10 destinacionet më të lira në Evropë për pushime verore në vitin 2026:

• Shqipëri
• Pragë
• Porto
• Madrid
• Lisbonë
• Costa del Sol
• Budapest
• Tenerife
• Blackpool
• Lanzarote

Filmi i ri “Moana”, versioni live-action i animacionit të suksesshëm të Disney të vitit 2016, pritet të dalë në kinema këtë javë, por parashikimet tregojnë se mund të mos arrijë suksesin e pritur në arkëtime.

Sipas analistëve të industrisë së filmit, “Moana” pritet të fitojë mes 50 dhe 85 milionë dollarë gjatë fundjavës së parë në SHBA, dukshëm më pak se remake-u “Lilo & Stitch”, i cili pati një hapje shumë më të fortë.

Që nga publikimi i trailerit të parë në muajin mars, filmi është përballur me kritika të shumta. Një nga temat më të diskutuara ishte paraqitja e Dwayne Johnson, i cili rikthehet në rolin e Maui, ndërsa paruka e tij u bë objekt talljesh në rrjetet sociale.

Ekspertët vlerësojnë se një nga arsyet kryesore të mungesës së entuziazmit është fakti se animacioni origjinal u publikua vetëm në vitin 2016, duke e bërë shumë të hershëm realizimin e një versioni live-action. Për më tepër, suksesi i “Moana 2”, që u publikua në vitin 2024 dhe kaloi shifrën e 1 miliard dollarëve në arkëtime globale, ka bërë që remake-u të mos perceptohet si një ngjarje e veçantë.

Edhe pse filmi ruan pothuajse të njëjtën histori si versioni i animuar, kritikët theksojnë se nuk arrin të përcjellë të njëjtën magji vizuale dhe emocionale që e bëri origjinalin një nga filmat më të dashur të Disney-t./BBC//A.K/

Ylli kanadez i muzikës pop, Justin Bieber, do t’i bashkohet një liste emrash të njohur botërorë për të performuar në spektaklin historik të pjesës së parë të finales së Kupës së Botës FIFA 2026, që do të zhvillohet më 19 korrik në New York.

Për herë të parë në historinë e turneut, FIFA do të organizojë një shfaqje të stilit Super Bowl gjatë pushimit mes pjesëve të finales. Krahas Bieber, në skenë do të ngjiten edhe Madonna, Shakira dhe grupi i famshëm koreano-jugor BTS.

Në program do të performojnë gjithashtu Burna Boy, dirigjenti Gustavo Dudamel, kori PS22 Chorus me pjesëmarrjen e Coldplay, si dhe personazhet e njohur të Sesame Street.

“Kupa e Botës FIFA i bashkon njerëzit në një mënyrë që nuk e bën asnjë ngjarje tjetër”, është shprehur Justin Bieber.

Spektakli 11-minutësh është kuruar nga Chris Martin, vokalisti i Coldplay, dhe do të mbështesë FIFA Global Citizen Education Fund, një iniciativë që synon të mbledhë 100 milionë dollarë për financimin e arsimit të fëmijëve në mbarë botën.

Ndërkohë, turneu më i madh në historinë e Kupës së Botës, me 48 kombëtare, vazhdon fazën çerekfinale, ndërsa në garën për “Këpucën e Artë” kryeson Lionel Messi me tetë gola, i ndjekur nga Kylian Mbappé dhe Erling Haaland me nga shtatë gola./BBC//A.K/

Anne Hathaway tërhoqi vëmendjen në premierën londineze të filmit “The Odyssey”, ku u shfaq në tapetin e kuq me një paraqitje elegante, duke vënë në pah shtatzëninë e saj. Aktorja, e cila së fundmi njoftoi se është në pritje të fëmijës së tretë, pozoi me dorën mbi barkun e rrumbullakosur, duke tërhequr vëmendjen e mediave dhe fansave.

Hathaway u paraqit në kinemanë Odeon Luxe Leicester Square me një fustan pa rripa në nuancë blu të ndezur.

Në filmin e ri të regjisorit Christopher Nolan, ajo interpreton rolin e Penelopës, mbretëreshës së Itakës, e cila pret kthimin e bashkëshortit të saj, Odiseut, nga Lufta e Trojës, ndërsa përballet me pretendentët që synojnë ta marrin për bashkëshorte.

Në krah të saj në kast janë Matt Damon në rolin e Odiseut dhe Tom Holland si Telemaku, djali i tyre. Në premierën e filmit morën pjesë edhe emra të tjerë të njohur të kastit, përfshirë Zendaya, ndërsa eventi në Londër shënoi ndalesën kryesore të promovimit të filmit para daljes së tij në kinema./A.K/