Lajmet

Abbott: Të zhdukurit të mos përdoren për përfitime politike

Published

4 years ago

August 25, 2021

UBT news

Ambasadori britanik në Kosovë, Nicholas Abbot, ka deklaruar sot se Prishtina dhe Beogradi duhet të komunikojnë për të ndarë informatat për personat e zhdukur në mënyrë të hapur dhe në një frymë të bashkëpunimit e jo të konfrontimit.

Abbot, gjatë fjalës së tij në forumin “Nevoja për de-politizim të çështjes së personave të zhdukur!”, tha po ashtu se personat e zhdukur, familjet e tyre, dhe OJQ-të që merren me zbardhjen e fatit të të zhdukurve nuk duhet të përdoren si top futbolli në arenën politike në procesin e normalizimit të marrëdhënieve mes Kosovës dhe Serbisë.

Sipas tij, çështja e vuajtjeve njerëzore si ajo e personave të zhdukur nuk duhet të politizohet dhe as të përdoret për përfitime politike.

“Askush nuk duhet të përdorë këtë çështje për përfitime politike. Si Prishtina dhe Beogradi duhet të komunikojnë për të ndarë informatat në mënyrë të hapur dhe në një frymë të bashkëpunimit e jo të konfrontimit, dhe personat e zhdukur, familjet e tyre, dhe OJQ-të që merren me këtë çështje nuk duhet të përdoren si futboll në arenën politike në procesin e normalizimit të marrëdhënieve mes Kosovës dhe Serbisë. Politikanët në dy anët mund të marrin një pozicion që të mbrojnë politikat e tyre por ne dëshirojmë të shohim institucione relevante të Kosovës që angazhohen për të zhdukurit. Familjarët duhet të shfrytëzojnë të drejtën e tyre për të ditur gjithë atë legjislacion që është në dispozicion”, tha ai.

Drejtori ekzekutiv i QBPZH, Bajram Qerkinaj, tha se kanë organizuar këtë forum për të kërkuar de-politizim të çështjes së personave të zhdukur, pasi sipas tij, dikush duhet të marrë përgjegjësi për punët që nuk po kryhen.

Qerkinaj tha se zbardhja e fatit të personave të zhdukur mbetet kërkesë e familjarëve.

“Pushteti lokal flenë, nuk e dinë as në komunën e vet sa i ka të pagjetur. E kemi një Këshill (kuvendues), mjerisht edhe ai i politizuar. Sot jemi këtu për të gjetur një mënyrë për të hequr politikën prej kësaj çështjeje… Falënderime jena plot, falënderime, falënderime, falënderime, kërkojmë krejt në fund, ju lus, së pari familjarët të jenë edhe më të fortë, të jemi të bashkuar… Duhet Qeveria e Republikës së Kosovës të punojë më shumë me të rinjtë dhe jo me neve pleqve. Dhe, krejt në fund kërkojmë përgjegjësi… kush është ai që duhet të largojë politizimin, duke u nisur nga Qeveria e Kosovës”, tha ai.

Kurse zëvendësdrejtori i QBPZH-së, Negovan Mavriq, tha se 22 vite janë shumë dhe të rënda për familjarët që mos dinë asgjë për fatin e më të dashurve.

“Nëse kemi varre si në Kosovë dhe në Serbi, që gjenden në Kosovë ose në Serbi, nëse janë të lokalizuara, rekomandimi im është që të mos presim por t’i hapim ato varre, qysh sot… Është shumë e vështirë të dihet që ekzistojnë varrezat, p.sh. unë e di që ka familje serbe që e dinë, për shembull në Llapushnik (dhe Bresje), kështu që i lusim të gjithë që ta lënë politizimin. Jemi të vetëdijshëm që politika përzihet, por duhet të përzihet që ta zbardhim fatin e të pagjeturve dhe jo ta ngadalësojmë apo të pengojmë zbardhjen”, tha ai.

Forumi për depolitizim të çështjes së personave të zhdukur është organizuar me rastin e 30 gushtit, Ditës Ndërkombëtare të Viktimave të Zhdukjeve me Forcë.

Lajmet

IKSHPK bën thirrje për kujdes nga temperaturat e larta, këto janë udhëzimet

Published

34 minutes ago

July 26, 2025

UBTnews

Instituti Kombëtar i Shëndetësisë Publike (IKSHPK) bën thirrje që sot qytetarët të kenë kujdes nga temperaturat e larta.

Nga IKSHPK ka dale sot me udhëzime për mbrojtje nga të nxehtit dhe temperaturat e larta, që pritet të arrijnë deri në 40 gradë.

“Vala e të nxehtit që po mbizotëron këto ditë mund të ndikojë negativisht në shëndetin dhe mirëqenien e qytetarëve, veçanërisht të grupeve të cenueshme. Periudhat e gjata me temperatura të larta gjatë ditës dhe natës krijojnë stres në trup dhe rrisin rrezikun e sëmundjeve apo vdekjeve nga ekspozimi ndaj nxehtësisë”, thuhet në njoftim.

Sipas IKSHPK-së, veprimet që duhet të ndërmerren për t’u mbrojtur janë: Qëndroni larg të nxehtit: Shmangni daljet dhe aktivitetet e rënda gjatë orëve më të nxehta. Qëndroni në hije dhe kaloni 2-3 orë në një vend të freskët.

“Mbajeni trupin të freskët dhe të hidratuar: Përdorni veshje të lehta (pambuku), bëni dush të freskët, lagni lëkurën dhe pini ujë rregullisht (1 gotë/orë – 2-3 litra/ditë). Mbajeni shtëpinë të freskët: Ajroseni gjatë natës kur jashtë është më freskët. Ditën mbyllni dritaret dhe përdorni perde për të penguar rrezet e diellit”, thuhet në njoftim.

Po ashtu IKSHPK bën thirrje për kujdes për grupet e cenueshme: Për të moshuarit mbi 65 vjeç: Kontaktoni rregullisht sidomos ata me sëmundje kronike, paaftësi apo që jetojnë vetëm.

Po ashtu për fëmijët: Mos i lini kurrë në automjete të parkuara. Shmangni ekspozimin në diell gjatë orëve më të nxehta (10:00–17:00).

Lajmet

Sot shënohet Dita memoriale e policëve të rënë në detyrë

Published

36 minutes ago

July 26, 2025

UBTnews

Nën përkujdesjen e ministrit në detyrë të Punëve të Brendshme Xhelal Sveçla dhe drejtorit të përgjithshëm të Policisë së Kosovës Gazmend Hoxha, sot do të mbahen një sërë aktivitetesh me rastin e Ditës memoriale e punonjësve policorë të rënë në krye të detyrës.

Më 11 gusht të vitit 2021, Qeveria e Kosovës kishte propozuar dhe miratuar që 26 korriku të shënohet si Dita e Policëve të rënë në krye të detyrës. Kjo ditë ishte shënuar për herë të parë në korrik të vitit 2022 dhe përkon me rënien heroike të Enver Zymerit 14 vjet më parë.

Agjenda e aktiviteteve:

08:00 – Vizita te familja e zyrtarit policor të rënë në kryerje të detyrës Muhamed Lika. (Familja e Lika – në Kaçanik. Pjesëmarrës drejtori i Përgjithshëm i Policisë Gazmend Hoxha dhe menaxhmenti i PK-së)

09:00 – Homazhe shtetërore. (Lapidari i Policëve të rënë – Drejtoria e Përgjithshme e Policisë. Pjesëmarrës personalitetet e larta shtetërore)

10:00 – Homazhe te varri i Heroit Afrim Bunjaku. (Samadrexhë, Vushtrri. Pjesëmarrës personalitetet e larta shtetërore)

10:15 – Vizitë në familjen e Heroit Afrim Bunjaku. (Samadrexhë, Vushtrri. Pjesëmarrës personalitetet e larta shtetërore)

10:45 – Homazhe te varri i Heroit Enver Zymeri. (Dubovc, Vushtrri. Pjesëmarrës personalitetet të larta shtetërore)

11:30 – Vizitë në familjen e Heroit Enver Zymeri. (Familja e Heroit Enver Zymeri– në Vushtrri. Pjesëmarrës personalitetet e larta shtetërore)

12:30 – Homazhe tek lapidari në vendin e rënies së Heroit Enver Zymeri. (Varage – Zubin Potok, pjesëmarrës: personalitetet e larta shtetërore)

Në shënim të 14-vjetorit të rënies së Hero Enver Zymeri dhe Ditës Memoriale të zyrtarëve policorë të rënë në krye të detyrës, do të organizohen aktivitete sportive që përfshijnë ecje, çiklizëm, vozitje me motorë dhe gara me kajak. Marshutat e ekipeve përfshijnë zona/komuna nga jugu drejt veriut të Kosovës, përmes vendit të rënies së Heroit Enver Zymeri, Varage-Zubin Potok.

17:00 – Ceremonia e pritjes së marshuesve në Qendrën për trajnim për kërkim-shpëtim “Berim”, Zubin Potok- Ujman.

Lajmet

Sot tentimi numër 53 në Kuvend

Published

37 minutes ago

July 26, 2025

UBTnews

Deputetët e zgjedhor do t’iu drejtohen sërish sot ulëseve të tyre në përpjekjen e radhës, e pesëdhjetë e treta, për të konstituuar legjislaturën e nëntë, të dalë nga zgjedhjet e 9 shkurtit.

Vazhdimi i radhës mbahet nga ora katërmbëdhjetë, për herë të parë në më pak se dyzetetetë orë pasi Gjykata Kushtetuese ka vendosur masë të përkohshme ndaj seancave të Kuvendit, që nga e diela 27 korrik deri më 8 gusht.

Kuvendi sipas kësaj mase të përkohshme do t’i konsumojë ditët e mbetura të afatit 30 ditorë, por nuk do të mund të merr asnjë vendim tjetër deri më 8 gusht. Kjo masë ndërlidhet me kërkesat e parashtruara nga PDK dhe LDK.

Kujtojmë, Lëvizja Vetëvendosje, Guxo e Alternativa në seancat e deritanishme kanë dështuar të sigurojnë votat për kryetar të Kuvendit.

Lajmet

Arrest shtëpiak ndaj katër të pandehurve për keqpërdorim të pozitës zyrtare në Gjakovë

Published

18 hours ago

July 25, 2025

UBTnews

Gjykata Themelore në Gjakovë ka caktuar masën e arrestit shtëpiak në kohëzgjatje prej një (1) muaji ndaj të pandehurve A.B., E.B., A.L. dhe A.K., shtetas të Republikës së Kosovës, për shkak të dyshimit të bazuar se kanë kryer veprën penale “’Keqpërdorim i pozitës apo autoritetit zyrtare”.

Sipas kërkesës, gjatë viteve 2018 dhe 2019, ekziston dyshimi i bazuar se të pandehurit A.B., Drejtor i Drejtorisë për Urbanizëm dhe Mbrojtje të Mjedisit, dhe E.B., Udhëheqëse e Sektorit Urbanistik në Komunën e Gjakovës, duke shfrytëzuar pozitën zyrtare dhe në bashkëkryerje, me dashje dhe në kundërshtim me interesin publik, kanë lëshuar pëlqime për parcelim të paligjshëm të pronave publike në dobi të palëve të treta A.L., M.Ll. dhe Sh.B., duke u mundësuar këtyre bartjen e pronës publike në emër të tyre dhe duke dëmtuar pasurinë e Komunës së Gjakovës dhe KBI-së në Gjakovë.

Po ashtu, ekziston dyshimi se gjatë vitit 2019, A.L., Drejtoreshë për Kadastër, Gjeodezi dhe Pronë, dhe A.K., jurist, kanë tejkaluar kompetencat duke miratuar regjistrime të reja të parcelave në kundërshtim me ligjin për kadastër dhe atë për të drejtat e pronës së paluajtshme, duke i bartur në mënyrë të kundërligjshme parcela dhe objekte në emër të palëve A.L., M.Ll. dhe Sh.B., duke dëmtuar interesin publik dhe pronën e institucioneve publike.

“Me këto veprime të gjithë të pandehurit dyshohen se kanë kryer veprën penale të keqpërdorimit të pozitës apo autoritetit zyrtar, në bashkëkryerje”, thuhet në njoftim.

Në këtë procedurë Prokuroria Themelore e Gjakovës, ka kërkuar caktimin e masës së paraburgimit ndaj të pandehurve por gjyqtari i procedurës paraprake, Sulltan Dobraj, ka vlerësuar se në këtë fazë të procedurës penale masa e arrestit shtëpiak është e mjaftueshme për të siguruar praninë e katër personave të pandehur, të parandalojë përsëritjen e veprës penale dhe të sigurojë zbatimin e suksesshëm të procedurës penale.

Të pandehurit do të mbahen në arrest shtëpiak në kohëzgjatje prej një muaji, i cili do të llogaritet prej kohës së arrestimit më 23 korrik 2025 dhe do të zgjasë deri më 23 gusht 2025.