Gjykimi ndaj Naim Murselit, Granit Plavës dhe Kushtrim Kokallës për vrasjen e Liridona Ademajt po i afrohet fundit.

Sot, duke filluar nga ora 9:30, palët pritet të japin fjalët e tyre përfundimtare para trupit gjykues. Sipas aktakuzës, vrasja dyshohet se u planifikua nga bashkëshorti i viktimës, Naim Murseli, i cili si pasojë e raporteve të acaruara martesore, dyshohet se organizoi krimin si hakmarrje.

Plani i detajuar në aktakuzë tregon se Murseli fillimisht kontaktoi Kushtrim Kokallën, i cili më pas mundësoi lidhjen me Granit Plavën. Ky i fundit, sipas marrëveshjes, do të paguhej 30 mijë euro për kryerjen e vrasjes. Arma e krimit u sigurua nga Tom Dodaj, i cili pas pranimit të fajësisë, u dënua me tre vite burgim nga Gjykata e Apelit.

Edhe pse Murseli u deklarua i pafajshëm në seancën fillestare të vitit 2025, prokuroria pretendon se ai është truri i gjithë këtij organizimi tragjik.

Pas fjalëve të sotme përfundimtare, gjykata do të mbetet të shpallë verdiktin për tre të akuzuarit kryesorë në një nga rastet që ka tronditur më së shumti opinionin publik.

Në kuadër të angazhimit për të ofruar një edukim të avancuar dhe të orientuar drejt praktikës, Fakulteti i Psikologjisë në UBT organizoi një ligjëratë të ftuar me Fatime Sahiti Bekteshi, specialiste klinike për fëmijë dhe adoleshentë në Klinikën EMOS.

Aktiviteti u realizua nën organizimin e Asst. Prof. Elona Krasniqi dhe u fokusua në trajtimin e çrregullimeve neurozhvillimore, duke përfshirë shenjat klinike, procesin diagnostikues, si dhe opsionet bashkëkohore të trajtimit dhe ndërhyrjes. Një vëmendje e veçantë iu kushtua çrregullimit të spektrit të autizmit, në kuadër të muajit të ndërgjegjësimit për autizmin.

Ligjërata u zhvillua me pjesëmarrjen aktive të studentëve të programit master në Psikologji, si pjesë e lëndës së Psikopatologjisë, duke u karakterizuar nga diskutime ndërvepruese, analiza të rasteve klinike dhe reflektime mbi qasjet moderne në vlerësim dhe ndërhyrje.

Gjatë aktivitetit u theksua rëndësia e identifikimit të hershëm, përdorimi i metodave të bazuara në evidencë dhe roli i bashkëpunimit multidisiplinar në mbështetjen e fëmijëve me nevoja neurozhvillimore, si në kontekstin klinik, ashtu edhe në atë edukativ.

Organizimi i ligjëratave të tilla me profesionistë të fushës është pjesë e qasjes së Fakultetit të Psikologjisë në UBT për të ndërlidhur teorinë me praktikën, duke u ofruar studentëve përvoja të drejtpërdrejta dhe njohuri të aplikueshme në tregun e punës.

Përmes këtyre aktiviteteve, UBT vazhdon të forcojë kapacitetet profesionale të studentëve dhe të krijojë ura bashkëpunimi me ekspertë dhe institucione relevante, duke kontribuar në formimin e psikologëve të rinj të përgatitur për sfidat reale të profesionit.

Sipas vendimit të fundit të Ministrisë së Industrisë, Ndërmarrësisë dhe Tregtisë (MINT) të datës 05.04.2026, janë përcaktuar çmimet tavan për derivatet e naftës që do të jenë në fuqi sot, më 17 prill 2026.

Konsumatorët në Kosovë do të furnizohen me naftë për 1.74 euro për litër, benzinë për 1.43 euro dhe gas për 0.88 euro.

Ky rregullim i çmimeve vjen si masë për të mbrojtur qytetarët nga luhatjet e shpejta të tregut global.

Ky shtrenjtim  reflekton edhe situatën e brishtë gjeopolitike, ku Irani aktualisht gjendet në një udhëkryq diplomatik mes luftës dhe bisedimeve për armëpushim me SHBA-në.

Megjithëse po tentohet një marrëveshje paqeje përmes ndërmjetësimit të Pakistanit, bllokada në Ngushticën e Hormuzit dhe sulmet e fundit në rajon kanë krijuar pasiguri në furnizimin botëror me naftë, duke mbajtur çmimet në nivele të larta.

Sot në orën 10:00, Kuvendi i Kosovës do të mbajë një seancë plenare me një rend dite mjaft të ngjeshur, ku tema më e rëndësishme është shqyrtimi i vendimit të Qeverisë për dërgimin e pjesëtarëve të Forcës së Sigurisë së Kosovës në një mision ndërkombëtar në Gazë.

Ky vendim, i cili u procedua për miratim në Kuvend më 30 mars, vjen pas ftesës zyrtare nga Komanda Qendrore e Shteteve të Bashkuara dhe synon që trupat tanë të bëhen pjesë e Forcës Ndërkombëtare Stabilizuese.

Ministri i Mbrojtjes, Ejup Maqedonci, ka theksuar se ky angazhim jashtë vendit mbështetet plotësisht në vullnetin politik të shprehur në Bordin e Paqes dhe në legjislacionin aktual që rregullon dërgimin e FSK-së në misione të tilla.

Përveç kësaj pike kyçe, deputetët pritet të shqyrtojnë në parim edhe Projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme, një nismë kjo me peshë për sistemin e drejtësisë në vend.

Agjenda e sotme përfshin gjithashtu propozimin e dy kandidatëve për gjyqtarë në Gjykatën Kushtetuese të Republikës së Kosovës, si dhe pikat e rregullta rutinë që nisin punimet e seancës.

Këtu përfshihen miratimi i procesverbalit nga mbledhja e kaluar, deklarimet jashtë rendit të ditës ku ligjvënësit shprehin qëndrimet e tyre për tema aktuale, si dhe pyetjet parlamentare drejtuar kabinetit qeveritar.