Lajmet

A po i vjen fundi dashurisë mes Evropës Lindore dhe Kinës?

Published

5 years ago

on

Nga një marrëdhënie e ngrirë për investime me Bashkimin Evropian e deri te tërheqja e Lituanisë nga formati i Kinës për përfshirje në Evropën Qendrore dhe Lindore, Pekini e ka gjetur veten në situatë jo të mirë në javët e fundit.

Marrëveshja ambicioze e Kinës për tregti dhe investime në Bashkimin Evropian është në teren të rrëshqitshëm dhe situata nuk pritet të ndryshojë shpejt.

Parlamenti Evropian ka miratuar një rezolutë më 20 maj, që ndalon zbatimin e marrëveshjes derisa Kina të heqë sanksionet e vendosura ndaj ligjvënësve dhe institucioneve evropiane.

Këto sanksione kanë qenë përgjigje ndaj mospajtimeve që lidhen me trajtimin që i bën Pekini minoritetit ujgur dhe myslimanëve tjerë në Provincën Ksinjiang, si dhe për sanksionet e vendosura ndaj Kinës nga ana e Brukselit, në muajin mars.

Vendimi për të penguar zbatimin e marrëveshjes jep shenja për qasje më të ashpër ndaj Kinës në Evropë. Gjermania do të mbajë zgjedhjet në shtator të këtij viti, të cilat mund të ndikojnë në politikë të jashtme më të ashpër ndaj Pekinit, dhe e njëjta gjë mund të ndodhë me Republikën Çeke në tetor.

Opozita në Hungari po ashtu synon të largojë nga pushteti kryeministrin Viktor Orban më 2022, gjë që mund të kthejë mbrapsht qëndrimin e Budapestit pro-Kinës.

Ndërkohë, Lituania ka çimentuar largimin e saj nga formati 17+1, të lansuar nga Kina, me qëllim të angazhimit në shtetet e Evropës Lindore dhe asaj Qendrore.

Ministri i Jashtëm i Lituanisë Gabrielius Landsbergis ka thënë për mediumin Politico se ky format është përçarës. Ai u ka bërë thirrje vendeve tjera që t’i bashkohen Vilniusit dhe të tërhiqen.

Pse ka rëndësi kjo gjë?

Muaji i mjaltit me Kinën mund të ketë mbaruar, mirëpo kjo nuk nënkupton se divorci është mundësi në tavolinë.

Mirëpo duke gjykuar nga reagimet zyrtare të Pekinit, përmirësimi i marrëdhënieve tejet të tendosura, nuk do të ndodhë shpejt.

Pas bërjes publike të lajmit se marrëveshja nuk do të zbatohet, Kina ka fajësuar BE-në, dhe zëdhënësi i ministrisë së Jashtme kineze, ka thënë se Brukseli duhet të fokusohet “më pak në shpërthime emocionale dhe më shumë në mendim racional”.

Kjo gjë më pas është përcjellë nga Ministri i Jashtëm kinez Wang Yi, i cili ka kritikuar bllokun evropian pse ka vendosur sanksione për shkak të të drejtave të njeriut.

Duke folur përmes video-lidhjes në Konferencën për Siguri, të mbajtur në Mynih sa i përket akuzave për gjenocid në Ksinjiang, Wang ka thënë se “miqtë tanë evropianë e dinë çfarë është gjenocidi”.

Një grua ujgure duke mbajtur fëmijën e saj në Provincën Ksinjiang.

Mirëpo përtej fjalëve të ashpra, Pekini ka treguar po ashtu se strategjia e tij e madhe nuk ka devijuar rrugën plotësisht në rajon.

Kina ka organizuar një seri të takimeve të profilit të lartë me Kroacinë, Hungarinë, Poloninë, Serbinë dhe Slloveninë.

Kroacia dhe Polonia kanë ofruar përkrahje zyrtare për përfshirje të Kinës në rajon, derisa Serbia ka nënshkruar një mori marrëveshjesh me të.

Ekspertët: Kina përshtatet me një Lukashenka të çrregullt

Kur disa lexues kanë pyetur se si incidenti me aeroplan në Bjellorusi ndikon në lidhjet mes Minskut dhe Pekinit, disa përgjigje kanë qenë kështu:

“Incidenti i fundit me aeroplan në Bjellorusi do të ndikojë më shumë në rikrijim sesa dëmtim të lidhjeve në mes të Minskut dhe Pekinit. Për aq kohë sa Minsku të plotësojë kushtet kreditore të huasë kineze dhe sanksionet perëndimore të mos pengojnë tregtinë e Bjellorusisë, atëherë projektet dhe tregtia me Kinën do të vazhdojnë të zhvillohen, pavarësisht rrugës më pak të parashikueshme”, ka thënë Peter Braga, ekspert për marrëdhëniet në mes të Bjellorusisë dhe Kinës në Universitetin College të Londrës.

“Pekini ka kritikuar reagimet evropiane për incidentin në Bjellorusi, duke iu referuar rrëmbimit si ‘opinion dhe jo fakt’, si dhe i ka quajtur sanksionet të pabaza.

Tri rrëfime tjera nga Euroazia

Testimi i ujërave të mbrojtjes

Serbia ka shpenzuar 19.3 milionë dollarë në gjashtë dronë ushtarakë kinezë, sipas një hulumtimi të gazetares Milla Gjurgjeviq nga Shërbimi i Ballkanit i Radios Evropa e Lirë.

Dronët e tipit CH92-A janë blerë nga Beogradi në korrik të vitit 2020 dhe janë prezantuar në një konferencë për media nga presidenti serb Aleksandar Vuçiq.

Megjithatë, çmimi i dronëve nuk është bërë i ditur. Vuçiq ka refuzuar të përgjigjet kur është pyetur për çmimin, duke thënë se ky informacion është ‘sekret ushtarak”.

“Kjo gjë është e zakonshme dhe nuk ka të bëjë me Kinën, mirëpo këta dronë nuk janë të shtrenjtë”, ka thënë Vuçiq atëbotë.

Mirëpo gjatë një hulumtimi të databazën e Zyrës së Statistikave të Serbisë është parë se 19.3 milionë dollarë janë harxhuar për blerje të pajisjeve ajrore nga Kina më 2020.

Dronët kanë qenë të vetmit që janë bërë nga Kina gjatë atij viti.

Përveç çmimit të dronëve, kjo vlerë ka rëndësi pasi tregon për shtrirjen e Kinës në sektorin evropian të mbrojtjes.

Ndonëse dronët ushtarakë të Kinës janë parë në konfliktet në Lindje të Mesme dhe Afrikë Veriore, dërgimi i tyre në Serbi ka shënuar herën e parë që Kina ka eksportuar këto produkte në Evropë.

Sipas një raporti të muajit janar nga Instituti Mbretëror i Shërbimeve të Bashkuara, Kina ka synuar që të zgjerojë tregun e saj në Evropë për një kohë tashmë, mirëpo kjo gjë është penguar nga një embargo për armët që blloku evropian ka vënë më 1989, për shkak të shtypjes së protestave në Sheshin Tiananmen nga ana e Pekinit.

Ashtu si me shumë fusha të tjera të politikave – nga bashkëpunimi arsimor te teknologjitë e mbikëqyrjes – Serbia funksionon si një vitrinë në pragun e BE-së për industritë dhe iniciativat që Pekini po kërkon t’i zgjerojë.

Përforcues diplomatik për Azinë Qendrore

“Diplomacia me vaksina” e Kinës ka marrë vëmendje nga të gjitha mediat në botë, mirëpo sa po funksionojnë përpjekjet e Pekinit në Azinë Qendrore?

Ndonëse pesë vaksinat e ndryshme të Kinës kanë gjetur relativisht mbështetje në vendet në zhvillim – sidomos në Ballkan, Azinë Jugore dhe Afrikë – Azia Qendrore vazhdon të jetë rast interesant studimi.

Dozat e vaksinave janë duke mbushur zbrazëtirat që kanë mbetur në shpërndarje të vaksinave, mirëpo besimi në to në Azinë Qendrore është i ulët.

Vaksina më e preferuar në këtë rajon është Sputnik V e Rusisë.

Mirëpo prodhimi dhe furnizimi me vaksinën ruse është duke rënë, çka ka lënë këtë rajon të varur nga programi COVAX i Organizatës Botërore të Shëndetësisë, që synon të shpërndajë vaksina në vendet e varfra por edhe nga një përzierje e vaksinave kineze, me qëllim të plotësimit të kërkesave.

Kjo zonë është e komplikuar për të zbatuar “diplomacinë me vaksina”, pasi Taxhikistani pretendon se nuk ka regjistruar asnjë rast me koronavirus këtë vit derisa Turkmenistani ka thënë se nuk regjistruar kurrë persona të infektuar me koronavirus, pavarësisht të dhënave për të kundërtën.

Rruga në Podgoricë

Pekini është i gatshëm që t’i ofrojë Malit të Zi një greis periudhë për borxhin (një afat i caktuar për mospagim të kredisë) prej 1 miliard dollarësh që ka ndaj Bankës Eksport-Import të Kinës, për projektin kundërthënës të ndërtimit të autostradës.

Ky projekt ka bërë që Mali i Zi të futet në një situatë të vështirë financiare, ka raportuar Shërbimi i Ballkanit i Radios Evropa e Lirë.

Ky diskutim ka ardhur pas një bisede telefonike në mes të presidentit malazez Millo Gjukanoviq me presidentin kinez Xi Jinping më 26 maj.

Gjukanoviq, i cili ka qenë kryeministër kur është nënshkruar projekti për autostradën më 2014, ka mirëpritur më shumë investime kineze në këtë shtet, dhe ka diskutuar bashkëpunimin më të gjerë edhe në fusha tjetër, përfshirë turizmin dhe edukimin.

Xi po ashtu ka përmendur projektin e hekurudhave dhe ka ofruar mundësinë që afati i caktuar për mospagesë të kredisë të zgjatet në Podgoricë, e cila duhet të kryejë pagesat e para në korrik të këtij viti.

Ky çmim tejet i lartë ka fituar vëmendje ndërkombëtare më herët në pranverë, pasi zëvendëskryeministri i Malit të Zi Dritan Abazoviq ka kërkuar ndihmën e Bashkimit Evropian për t’i ndihmuar Malit të Zi që të paguajë huanë.

Më vonë Brukseli ka refuzuar kërkesën.

Ky projekt ka qenë kontrovers nga ditët e para, ndonëse kishte pranuar dritën e gjelbër nga mbështetësit kinezë dhe Qeveria e Gjukanoviqit, pavarësisht dështimit në dy studime fizibiliteti.

Hekurudha është e pakompletuar dhe vlerësohet se çmimi i saj është rritur me kalimin e kohës. Kina tani ka në dorë një të katërtën e borxhit të përgjithshëm të Malit të Zi, i cili ka arritur 103 për qind të bruto prodhimit të brendshëm vitin e kaluar.

Kina nëpër kontinent

Një komunë në Budapest ka riemëruar rrugët rreth zonës së propozuar për Univeristetin Fudan në Hungari në Rrugën Dalai Lama, Rruga e Martirëve Ujgurë dhe Rruga e Hong Kongut të lirë, ka raportuar Shërbimi hungarez i Radios Evropa e Lirë.

Qeveria serbe ka ndarë 19.5 milionë dollarë për ndërtim të një fabrike që do të prodhojë vaksinën Sinofarm të Kinës, ka raportuar Shërbimi i Ballkanit i Radios Evropa e Lirë.

Ministri i Jashtëm hungarez Peter Szijjarto ka njoftuar po ashtu gjatë një udhëtimi më 31 maj se Sinofarm do të prodhohet edhe në Hungari, në një fabrikë që aktualisht është duke u ndërtuar, ka raportuar Shërbimi hungarez i Radios Evropa e Lirë.

Kazakistani ka refuzuar që t’iu sigurojë shtetësinë tre kazakëve, të cilët kanë ikur nga rajoni Ksinjiang i Kinës dhe janë nisur ilegalisht në këtë shtet, duke u frikësuar se mund të dërgohen në kampe të internimit, ka raportuar gazetari Aigerim Toleukhanova nga Shërbimi kazak i Radios Evropa e Lirë.

Qaisha Aqan, Murager Alimuly, dhe Kaster Musakhanuly u është garantuar statusi i refugjatit në Kazakistan, mirëpo kjo nuk iu jep të drejta në këtë shtet, sikurse e drejta për të punuar. Meqë shtetësia u është refuzuar, e ardhmja e tyre mbetet e pasigurt.

Yang Jiechi, i cili drejton Komitetin Qendror të Kinës për Marrëdhënie me Jashtë, ka qenë në Moskë në periudhën 24-26 maj, për të diskutuar për sigurinë, në kohën e forcimit të lidhjeve në mes të Pekinit dhe Kremlinit, të cilat po rrisin konfrontimin me Shtetet e Bashkuara.

Beogradi dhe Pekini kanë shkruar një seri marrëveshjesh në mes të ministrive të tyre të brendshme më 27 maj, të cilat parashohin më shumë stërvitje dhe trajnim për luftim të terrorizmit dhe krimit të organizuar, ka raportuar Shërbimi i Ballkanit i Radios Evropa e Lirë.

Hulumtimi shtatëmujor nga agjencia e lajmeve Associated Press ka gjetur se një mori llogarish të rreme kanë shpërndarë deklaratat e diplomatëve kinezë dhe mediave shtetërore “duke tentuar të fshehurazi të shpërndajnë propagandën te qindra miliona persona”.

Ku duhet fokusuar?

Presidenti amerikan Joe Biden ka urdhëruar agjenci shtetërore të inteligjencës që të rrisin përpjekjet për të gjetur origjinën e koronavirusit, pasi teoria se virusi mund të ketë dalë nga Instituti i Vuhanit për Virologji është kthyer sërish në lojë.

Fillimisht e konsideruar si teori konspirative dhe e politizuar nga administrata e ish-presidentit Donald Trump, Biden është duke folur hapur për këtë teori pas sigurimit të informacioneve të reja nga inteligjenca amerikane.

Shumica e ekspertëve besojnë se virusi është bartur nga kafshët te njerëzit, mirëpo sekreti i Kinës rreth virusit ka nxjerrë në pah edhe mundësi tjera.

Në një letër të shkruar për revistën shkencore Science, një grup prej 18 shkencëtarësh kanë thënë se të dyja teoritë janë të mundshme dhe duhet trajtuar me seriozitet, derisa të sigurohen të dhëna tjera.

Zyrtarët kinezë kanë hedhur poshtë idenë se virusi ka dalë nga laboratori, mirëpo me rritjen e zërit nga administrata Biden për këtë teori, lufta e fjalëve në mes të Pekinit dhe Uashingtonit pritet të rritet sërish.

Related Topics:
Continue Reading

Lajmet

Përplasje në Kuvend për naftën: LDK kërkon uljen e akcizës, LVV e cilëson propozim populist

Published

2 hours ago

on

April 3, 2026

By

Seanca e jashtëzakonshme në Kuvendin e Kosovës këtë të premte është shoqëruar me një debate të ashpra mes Lidhjes Demokratike të Kosovës (LDK) dhe Lëvizjes Vetëvendosje (LVV) lidhur me çmimin e naftës. Përmes një rezolute, opozita ka kërkuar ndërhyrje emergjente në politika fiskale për të lehtësuar barrën e qytetarëve, ndërsa pushteti e ka refuzuar këtë nismë.

Shefja e Grupit Parlamentar të LDK-së, Jehona Lushaku-Sadriu, ka paralajmëruar se rritja e kostos së karburanteve po rrezikon të thellojë krizën sociale në vend. Ajo theksoi se nafta është çmim bazë që dikton zinxhirin e shtrenjtimeve në çdo sektor.

“Nafta është çmim bazë i ekonomisë dhe çdo rritje e saj përkthehet automatikisht në rritje të çmimeve të produkteve bazike, shërbimeve, transportit dhe ndërtimit. Qeveria nuk duhet të qëndrojë si spektatore në një kohë kur qytetarët përballen me rritje të kostos së jetesës,” deklaroi Lushaku-Sadriu.

Rezoluta e LDK-së propozon tri masa konkrete: Uljen e akcizës nga 36 në 20 centë për litër; Uljen e TVSH-së për karburante nga 18% në 8%; Subvencionimin e naftës për bujqit, transportin publik dhe prodhuesit vendorë.

Në anën tjetër, deputetja e LVV-së, Rozeta Hajdari, e ka kundërshtuar ashpër këtë kërkesë, duke argumentuar se ulja e të hyrave publike do të dëmtonte buxhetin e shtetit dhe financimin e sektorëve kyç si arsimi dhe shëndetësia.

“Ne si Grup Parlamentar me qeverisjen tonë kemi ndërhyrë aty ku duhet, kemi formalizuar tregun e naftës, kemi evituar kostot e panevojshme dhe kemi rritur transparencën. Këto masa janë efekt real dhe afatgjatë,” tha Hajdari, duke e quajtur propozimin e opozitës si ekonomikisht të papërgjegjshëm.

Hajdari shtoi se rritja e çmimeve është pasojë e krizave gjeopolitike globale dhe se masat e propozuara nga LDK-ja nuk garantojnë një ulje reale të çmimit në pompë për konsumatorët fundorë. Debati po vazhdon me akuza të ndërsjella, ku opozita kërkon veprim të menjëhershëm, ndërsa pozita mbron stabilitetin buxhetor.

 

Continue Reading

Lajmet

Prokuroria nis hetimet ndaj KEDS-it për njehsorët elektrikë: Dyshime për mashtrim me faturat

Published

4 hours ago

on

April 3, 2026

By

Prokuroria Themelore në Prishtinë njofton se ka nisur zyrtarisht grumbullimin e informatave lidhur me dyshimet për parregullsi në njehsorët elektrikë të kompanisë KEDS.

Sipas organit të akuzës, ekziston një dyshim i bazuar se këto pajisje nuk po bëjnë matjen e saktë të energjisë elektrike të shpenzuar nga konsumatorët.

Në këtë drejtim, Prokuroria dyshon se është kryer vepra penale “Mashtrimi”, sipas nenit 323 të Kodit Penal të Republikës së Kosovës. Për të zbardhur rastin, Prokurori i Shtetit ka autorizuar Policinë e Kosovës që të ndërmarrë të gjitha veprimet e nevojshme hetimore me qëllim sigurimin dhe grumbullimin e provave shtesë.

“Prokurori i Shtetit ka autorizuar Policinë e Kosovës për ndërmarrjen e të gjitha veprimeve të nevojshme hetimore, me qëllim të sigurimit dhe grumbullimit të provave shtesë lidhur me këtë rast, përfshirë edhe veprimet ndaj zyrtarëve të KEDS-it”, thuhet në njoftimin zyrtar.

Hetimet vijnë pas shqetësimeve se njehsorët nuk pasqyrojnë realisht shpenzimet, duke dëmtuar kështu qytetarët. Prokuroria ka theksuar se mbetet e përkushtuar në ushtrimin e kompetencave ligjore për të garantuar zbatimin e ligjit.

“Lidhur me rastin e parregullsive të dyshuara në njehësorët elektrikë të KEDS-it, ekziston dyshimi se këta njehësorë nuk bëjnë matjen e saktë të energjisë elektrike të shpenzuar… Prokuroria Themelore në Prishtinë mbetet e përkushtuar në ushtrimin e kompetencave ligjore, duke garantuar zbatimin e ligjit dhe mbrojtjen e interesit publik”, përfundon njoftimi i Prokurorisë.

Continue Reading

Lajmet

DITARI: Çfarë lajmesh kemi lexuar në çdo 3 prill, në vitet nëntëdhjetë

Published

4 hours ago

on

April 3, 2026

By

3 prill 1993

Lajm i plotë: Tre gazetarët ferizajas sërish në polici

Dje, në qendrën e sigurimit serb në Prishtinë, u morën përsëri tre gazetarët ferizajas, Rrahim Sadiku, Haki Braha dhe Avni Shabani. Ata u mbajtën në polici tri orë dhe u morën në pyetje për përmbajtjen e revistës “Zgjimi”, e cila u konfiskua para disa ditësh.

Këtyre gazetarëve iu tha që përsëri të paraqiten të hënën, në qendrën e policisë në Ferizaj.

 

Lajme të tjera:

“Bujku” edhe sot nuk u botua

Vazhdon aksioni “Ta mbrojmë ambientin”

U promovua romani “Udhëtimi arbdhetar” i Zejnullah Rrahmanit

Në Ferizaj tubime përkujtimore për të vrarët

Manifestim kushtuar 90-vjetorit të vdekjes së De Radës

Tubim proteste i studentëve ferizajas kundër burgosjes së rektorit dr.Ejup Statovci

Ahmet Gajtani u ftua në polici

Në Prishtinë bombat u gjetën në kontejnerë të mbeturinave

Në Prishtinë u plaçkitën 60 tonë miell

Policia maqedonase gjobit vozitësit shqiptarë

Kosova e përfaqësuar në kampionatin evropian në “full-kontakt”

Në Podujevë arritën pesëdhjetë policë financiarë nga Serbia

Në komunë të Pejës – keqtrajtime të përditshme

NATO bën kontrollin mbi qiellin e Bosnjës

Mas-mediumet serbe i japin publicitet “Traktit” të shpërndarë në Kosovë

 

 

3 prill 1995

Lajm i plotë: Dhuna e përditshme në Kosovë

Kamenicë: – Më 25 mars, policia serbe mori në rrugë të fshatit Rogaçicë, Samet Baxhakun të cilin e dërgoi në stacionin e policisë në Gjilan, nën prtetekst të dorëzimit të armës. Njoftohet se nga inspektorët Ramadan Sermaxhaj dhe njëfarë Sërgjani ai u keqtrajtua fizikisht për disa orë.

Më 20 mars, policia nën preteskt të kërkimit të armëve mori Hevzi Hotin nga Muçivërci, i cili dorëzoi një revole, ndërsa pas kësaj atij policia po i kërkon edhe një automatik.

Më 27 mars, policia mori Vehbi Klaiqin, sekretar i SHHB “Nënë Tereza” në Kamenicë, i cili u dërgua në stacionin e policisë në Gjilan dhe u pyet për kinse vizitën e një delegacioni të jashtëm humanitar.

Më 30 mars policët ndalën në rrugë veprimtarët Isa Kallubën, Skënder Canën dhe mjekun Naser Fetahu, të cilët i dërguan në stacionin e policisë në Kamenicë. Në polici ata u mbajtën rreth dy orë dhe u pyetën për angazhimin e tyre në ambulancën e SHBH “Nëna Terezë” në Kamenicë. Policët u interesuan edhe për mënyrën e sigurimit të barnave për këtë ambulancë dhe për çështje të tjera të aktivitetit politik shqiptar në Kamenicë.

Më 30 mars policia serbe, me pretekst të kërkimit të armëve, mori në shtëpitë e tyre Mehdi M.Morinën dhe Hamëz A.Morinën nga fshati Topanicë. Ata u dërguan në stacionin e policisë ku policët i urdhëruan që të dorëzojnë nga një revole.

Vushtrri: – Më 1 prill, në stacionin e policisë në Vushtrri u malretua rëndë fizikisht Ragip Krasniqi nga Vushtrria. Për shkak të lëndimeve që pësoi nga rrahja ai u detyrua të kërkojë ndihmë mjekësore.

Gjilan:- Më 3 mars, rreth orës 12:30 minuta, policia serbe ndërpreu një turnir futbolli në Gjilan. Turniri ishte organizuar në kuadër të aksionit “Vullneti 95” nga FR i LDK-së, Dega në Gjilan. Policët morën me vete delegatin e ndeshjes Shemsedin Mustafën dhe një refer.

 

Lajme të tjera:

Tubim i madh i shqiptarëve në Bruksel

U nënshkruan dy marrëveshje mes Shqipërisë dhe Suedisë

Beogradi po përgatit “institucionalizimin” e dominimit serb mbi shqiptarët në Kosovë

Intensifikohen planet dhe aksionet e spastrimit etnik të Kosovës

Një program serb për kolonizimin e Kosovës

Kanali TV turk HBB: Pse nuk njihet Kosova?

U ndihmuan 42 familje

Rudina Hatipi kampione e Suedisë në vallëzim

Kërkohet Shpejtim Thaçi

 

 

3 prill 1997

Lajm i plotë: U kthyen rreth 100 azilkërkuesit e parë nga Gjermania në Kosovë

Paralajmërimet e palës gjermane për kthimin e azilkërkuesve shqiptarë nga ky vend, mbrëmë filluan të zbatohen me kthimin e organizuar të tyre në Kosovë. Në orën 19. 15 minuta, në aeroportin e Prishtinës arriti fluturakja e parë nga Gjermania me afro 100 azilkërkues shqiptarë. Ky është kontigjenti i parë që kthehet nga Gjermania në mënyrë të organizuar, njofton gazeta “Bujku”.

Reporteri i kësaj gazete arriti të mësojë nga disa azilkërkues të kthyer se ky kontigjent është nga rethina e Shtutgarit. Në mesin e të kthyerve kishte edhe shumë fëmijë e gra, por kryesiht ishin të rinj. Një azikërkues nga rethi i Suharekës tha se gruaja dhe fëmijët kishin mbetur në Gjermani dhe nuk dinin asgjë për fatin e tij. Po ashtu, të kthyerit thanë ata ishin kapur nga policët gjermanë në rastësi dhe ishin mbajtur në aeroportin e Shtutgardit që nga mëngjesi i ditës së martë. Shumica prej tyre nuk kishin asgjë me vete.

Në aeroportin e Prishtinës nuk pati keqtrajtime të të kthyerve. Ata vazhduan rrugën për në shtëpit e tyre.

 

Lajme të tjera:

Ushtria e Shqipërisë krijon “forcën speciale” për bashkëveprim me forcën ndërkombëtare

Parlamenti shqiptar rishqyrtoi dhe miratoi projektligjin për një amnisti të gjerë

BE konfirmon dërgimin e ndihmave për Shqipërinë

Leka I kthehet në Shqipëri

Merren në pyetje aktivistë të LDK-së në Baran

 

 

3 prill 1997

Lajmet kryesore:

Kryetari Rugova priti ambasadorin e Spanjës

Pala shqiptare e përjashtuar plotësisht nga kthimi i refugjatëve të Kosovës

Demaçi priti diplomatë amerikanë

Në Pacaj të Gjakovës policia bastisi një familje dhe keqtrajtoi katër të rinj

Ndihmuan Shkollën Fillore të Vidishiqit me 550 DM

 

 

Edicioni i parë (Ora 11:30)

Lajmet kryesore:

Konferencë për gazetarë e kryetarit të Republikës së Kosovës dr. Ibrahim Rugova

Një anëtar i Kryesisë së Degës së LDK-së në Shtime u keqtrajtua nga policia

Hungarezët e Vojvodinës nuk duan të shërbejnë në forcat serbe në Kosovë

Serbia shprehet me referendum për (mos)pjesëmarrjen e përfaqësuesve të huaj në zgjidhjen e problemeve në Kosovë

Kaçanik: Policia konfiskon armët me leje

Istog: Tri familje u bastisën për armë

Lipjan: Të mos bihet nën ndikimin e dezinformatave

Nga Lipjani u larguan 20 refugjatë serbë

 

 

Edicioni i dytë (Ora 15:30)

Lajm i plotë: Ia vizatuan me thikë kryqin në këmbë

Dje rreth orës 11, dy policë serbë arrestuan në rrugë Driton Hazir Brahimin (18), nga Korrotica e Ulët, nxënës i vitit IV të shkollës së mesme teknike në Gllogoc.

KI i Degës së LDK-së në Gllogoc njofton se policët e ndaluan Dritonin, që po shkonte në shkollë, dhe e dërguan në postbllokun e Komoranit ku e keqtrajtuan rëndë fizikisht. Policët gjithashtu, duke e gërvishur me thikë, ia “vizatuan” atij kryqin mbi gjurin e këmbës së majtë.

Më pas Dritoni u lirua.

 

Lajme të tjera:

Idriz Rrecaj: Nevojitet ndërhyrje ndërkombëtare me qëllim të largimit të njësive speciale serbe nga Skenderaj

U arrestua Kryetari i Degës së LDK-së në Gllogoc

Medlin Ollbrajt: “Territori i Kosovës mbahet i okupuar nga një forcë armiqësore”

Shqipëria përshëndet Rezolutën e Këshillit të Sigurimit të OKB-së për vendosjen e embargos së armëve ndaj Beogradit

Bërns: “Autoritetet serbe menjëherë duhet të fillojnë bisedimet me shqiptarët e Kosovës”

Kofi Anan i shkruan presidentit Meidani lidhur me Kosovë

Shtypi amerikan për zhvillimet e fundit në Kosovë

U lirua objekti i gjimnazit në Podujevë

Për një koordinim sa më të mirë në grumbullimin dhe shpërndarjen deri në destinacion të ndihmave për Drednicën

Një kontigjent me ndihma u nis nga Gjakova për Drenicë

Vazhdojnë të arrijnë ndihmat për Drenicën

Në Australi vazhdon muaji i solidaritetit për Kosovën

Shqiptarët në Mal të Zi pa të drejta në shumë fusha

Edhe një gazetë e re shqipe në Maqedoni

Doli nga shtypi revista “Theatri”

 

Edicioni i tretë (Ora 16:00)

Lajm i plotë: Nuk është hequr asnjë postbllok i policisë

Duke filluar nga shkurti i këtij viti, policia serbe ka vendosur në komuna të shumta të Kosovës postblloqe të reja policore, krahas postblloqeve të vendosura që nga pushtimi i Kosovës. Në këto postblloqe, të gjithë kalimtarët ndalohen, kontrollohen rreptësisht dhe shpesh keqtrajtohen fizikisht.

Sipas shënimeve të grumbulluara nga degët e LDK-së në Kosovë, postblloqe policore janë vendosur në këto komuna:

Skënderaj – Në Klinë të Epërme, në Runik, në Tërnoc dhe në Skënderaj. Në komunën e Skënderajt koncentrime të përhershme të forcave të reja serbe ka mbi kodrën mbi fshatin Llaushë, në Tërnoc, në Skënderaj, në Fabrikën e Municionit të Gjuetisë, në Kopiliq të Ulët, në Brojë e tjerë;

Mitrovicë – postblloqe janë vendosur në të gjitha hyrje-daljet e qytetit dhe në Shipol në rrugën Mitrovicë-Skënderaj. Koncentrime të forcave serbe ka edhe në ndërtesën e Shoqatës së Zjarrfikësve, në garnizonin e ushtrisë serbe, në hotelin “Tre” në Zveçan dhe në fshatin Frashër;

Vushtrri – postblloku është i vendosur në fshatin Nedakoc në magjistralen Prishtinë-Mitrovicë;

Prizren – postblloku policor në fillim të shkurtit u vendos në Lubizhdë afër Prizrenit, ndërsa postblloqet të herëpashershme policore vendosen në Landovicë, Dushanovë, në Gjonaj e tjerë;

Junik – vendoset herë pas herësh një postbllok policor në vendin e quajtur “Kulla e Malokut” në afërsi të vendbanimit të refugjatëve, ndërsa koncentrime të forcave policore ka pasur në tërë teritorin e Junikut dhe në fshatrat që shtrihen në zonën kufitare;

Çabër – postblloku policor është i vendosur tash sa vite në Gazivodë, ndërsa koncentrime të herëpashershme të forcave policore ka në poligonin rezervë ushtarak po në Gazivodë.

Klinë – pos dy postblloqeve në lagjen “Përlika” të Klinës dhe në rrugën Klinë-Skënderaj, postblloqe policore janë vendosur pas shkurtit edhe në rrugën Pogragjë-Jashanicë, në magjistralën Pejë-Prishtinë – në Dollc, si dhe në Kijevë. Koncentrime të forcave ka në Pogragjë, në objektin e Kombinatit Bujqsor “Malishgani” – rreth 1000 sish;

Suharekë – postbllok është vendosur te stacioni i policisë;

Gllogoc – postblloqe ka në Komoran e Morinë, ndërsa koncentrime të forcave policore ka në Komoran dhe në Gllogoc;

Kamenicë – postbllok ka në vendin e quajtur “Crepane”, në trekëndëshin rrugor Kamenicë-Bujanoc-Gjilan, ndërsa postblloqe të reja janë vendosur pas shkurtit, në vendin e quajtur “Dheu i bardhë”, në Katushnicë, midis fshatrave Hodonoc, Rogaçicë dhe Novosellë, dhe në Koretin, te Fabrika e Pllakave, midis Berivojcës dhe Koretinit. Koncentrime të forcave serbe ka në fshatrat e banuara me serbë në Ranillugë, Rapotovë, Bozhec, Rajnoc etj. Fshati Bozhevc ruhet me pizgauerë e autoblinda. Ndërkohë janë hequr postblloqet te “Dheu i bardhë” dhe në Koretin;

Kaçanik – postblloku policor është i vendosur në rrugën Ferizaj-Kaçanik në fshatin Gërlicë;

Zhur – pos postblloqeve në Vlashnjë, Zhur e Vërnicë, pas shkurtit të sivjemë është vendosur edhe një postbllok në rrugën për Biluzhë, Vlashnjë, Zhur, Shkozë e Vërmicë, ndërsa ka koncentrime të forcave serbe si dhe lëvizje të forcave ushtarake në brezin kufitar me Shqipërinë;

Fushë-Kosovë – ndonëse nuk është vendosur ndonjë postbllok policor, vërehet prani e shpeshtë e policisë në Sllatinë në rrugën për në aeroport;

Podujevë – postblloku policor është vendosur para disa vitesh në magjistralen Prishtinë-Nish në hyrje të Podujevës;

Leposaviq – postbllok ka në lokalitetin e quajtur “Ballaban”. Ky postbblok qe vendosur në tetor të vitit të kaluar, u hoq në dhjetor dhe u vendos sërish në shkurt të këtij viti. Forca ushtarako-policore janë të stacionuara në fabrikën e këmishave në Banjskë. Vazhdon kontrolli i rreptë policorë ndërsa banorëve të fshatit Koshtovë u është tërheuqr vërjejtja që të mos kalojnë kodrave përballë vendit ku janë vendosur forcat serbe;

Dragash – që nga viti 1989 postblloku policor është vendosur në fshatin Zym. Vërehet koncentrim i një numri më të madh ushtarësh në karakollin në fshatin Bresanë;

Istog – postblloku policor është vendosur në Gurrakoc në rrugën Pejë-Mitrovicë-Klinë;

Njëkohësisht burime të degëve të LDK-së në komunat e Kosovës njoftojnë se, përkundër kërkesave të Grupit të Kontaktit për tërheqjen e forcave të policisë speciale nga Kosova, ditëve të fundit është shtuar numri i postblloqeve si dhe numri i këtyre forcave, ndërsa ato nuk janë tërhequr nga asnjë postbllok.

 

Lajme të tjera:

Gjendje e rëndë në komunën e Deçanit

Klinë: Një qytetar u keqtrajtua brutalisht

U themelua Këshilli Organizativ i Protestave në nivel republikan

Policia serbe keqtrajton shqiptarët me pretekst të pjesëmarrjes në protesta

Foto: Ballina e gazetës “Bujku”

Continue Reading

Lajmet

Miratohet projektligji për Lojërat Mesdhetare “Prishtina 2030”, hapet rruga për organizimin e ngjarjes madhore

Published

4 hours ago

on

April 3, 2026

By

Qeveria e Kosova ka miratuar projektligjin për organizimin e Lojërat Mesdhetare Prishtina 2030, duke shënuar një hap të rëndësishëm drejt zhvillimit sportiv dhe afirmimit ndërkombëtar të vendit.

Institucionet e kanë cilësuar këtë nismë si projekt me interes të lartë publik dhe kombëtar, që pritet të ndikojë drejtpërdrejt në zhvillimin ekonomik, përmirësimin e infrastrukturës sportive dhe rritjen e imazhit të shtetit në arenën ndërkombëtare.

Kryeministri Albin Kurti theksoi rëndësinë strategjike të projektligjit, duke nënvizuar standardet që synohen me organizimin e kësaj ngjarjeje:
“Ky projektligj, i bazuar në marrëveshjen për organizimin e Lojërave Mesdhetare ‘Prishtina 2030’, është projekt me interes të lartë publik dhe kombëtar. Ai garanton që organizimi i kësaj ngjarjeje madhore të bëhet me përgjegjësi të plotë institucionale, me standarde të larta transparence, integriteti dhe menaxhimi efikas të fondeve publike. Ky është një investim në rininë tonë, në sportin tonë dhe në imazhin ndërkombëtar të shtetit”.

Nga ana tjetër, ministri i Rinisë dhe Sportit, Blerim Gashani, dha detaje mbi aspektin financiar dhe organizativ të projektit:
“Përmes këtij ligji, qeveria do të miratojë shfrytëzimin e fondeve publike në shumën prej të paktën 253 milionë euro. Burimi kryesor i financimit do të jetë buxheti i shtetit, ndërsa projektligji rregullon edhe kompetencat e institucioneve përkatëse, përfshirë Komitetin Olimpik të Kosovës dhe komunat që do të përfshihen në organizim”.

Projektligji përcakton qartë rolet dhe përgjegjësitë e institucioneve shtetërore, duke krijuar një kornizë të plotë ligjore për organizimin e kësaj ngjarjeje të madhe sportive.

Pas votimit në Kuvend, pritet të nisin përgatitjet konkrete për Lojërat Mesdhetare Prishtina 2030, me synimin që Kosova të radhitet ndër organizatorët e rëndësishëm të eventeve sportive ndërkombëtare.

Continue Reading

Të kërkuara