Përfaqësuesi i Posaçëm i Bashkimit Evropian për Dialogun Kosovë-Serbi, Peter Sorensen, ka paralajmëruar vonesa në dialog për shkak të vonesave në formimin e institucioneve në Kosovë. Megjithatë, ai theksoi se dialogu Kosovë-Serbi është gjallë dhe ende aktiv.

Ai pas takimeve me presidenten Vjosa Osmani dhe kryeministrin në detyrë, Albin Kurti, tha se ka biseduar lidhur me implementimin e Marrëveshjes Bazë të Brukselit dhe aneksit të Ohrit, të arritur në vitin 2023 mes Kosovës dhe Serbisë.

Sorensen, në një adresim të shkurtër para mediave, tha se situata politike në Kosovë do të bëjë që gjërat të zgjasin më shumë në procesin e dialogut. Kosova, edhe gjashtë muaj pas zgjedhjeve parlamentare të 9 shkurtit, ende nuk ka formuar institucionet e reja, si pasojë e bllokadës në konstituimin e Kuvendit.

“Sapo pata një takim me z. Kurti. E takova presidenten herët në mëngjes. Jam këtu si pjesë e diskutimeve të mandatit tim se si të zbatohet marrëveshja e Ohrit, situata në terren. Sigurisht, situata politike këtu do të thotë që gjërat mund të zgjasin pak më shumë. E di këtë, kështu që ky është një takim i rregullt dhe jam shumë i lumtur që jam këtu sot dhe që më pritën në atë mënyrë siç më kanë pritur”, tha ai.

Diplomati danez, kur u pyet për statusin e dialogut Kosovë-Serbi momentalisht, tha se i njëjti është gjallë dhe aktiv.

Sorensen po qëndron për vizitë zyrtare të mërkurën në Kosovë. Kjo është vizita e tij e tretë në vend, ndërsa ditë më parë Bashkimi Evropian tha për KosovaPress, se po punojnë me palët drejt një normalizimi të plotë të raporteve Kosovë-Serbi, duke adresuar të gjitha çështjet e pazgjidhura. Të njëjtit shtuan se mundësia e takimeve të reja trilaterale në Bruksel varet nga gatishmëria e palëve.

Rëndësinë e dialogut Kosovë-Serbi e ka përmendur edhe presidenti francez, Emmanuel Macron, javën e kaluar, pas një bisede me presidentin serb, Aleksandër Vuçiq.

Kryetari i komunës së Prishtinës, Përparim Rama, ka marrë vendim që të gjithë autobusët e transportit publik në kryeqytet të jenë pa pagesë gjatë ditës së nesërme.

Ky vendim është marrë në mbështetje të protestës së paralajmëruar nga veteranët e UÇK-së kundër Gjykatës Speciale, e cila pritet të mbahet në Prishtinë.

Ky hap është interpretuar si një shenjë solidariteti me kërkesat e veteranëve të luftës, të cilët kanë kritikuar ashpër veprimet e Gjykatës Speciale ndaj ish-pjesëtarëve të Ushtrisë Çlirimtare të Kosovës.

Bullgaria do të presë startin e një prej ngjarjeve më të mëdha sportive, Giro d’Italia (Turneu i Italisë), në vitin 2026, tha Ministri i Turizmit Miroslav Borshosh gjatë një takimi të përbashkët informues me Ministrin e Sportit Ivan Peshev në Këshillin e Ministrave.

“Të mërkurën, qeveria mbështeti propozimin nga të dy ministritë për të finalizuar negociatat për organizimin e këtij eventi prestigjioz sportiv,” tha Borshosh. Në negociata, Bullgaria konkurroi me disa vende të tjera. “Ky është një event që transformon vendin që pret startin,” tha Borshosh. “Giro d’Italia do ta vendosë vendin tonë në hartën globale të turizmit dhe do ta bëjë Bullgarinë një destinacion të njohur,” shtoi ministri.

Sipas tij, përfitimet shtesë për imazhin e Bullgarisë nga ky event janë të mëdha.

Starti i Giro d’Italia (Grande Partenza) në Bullgari do të zhvillohet në vitin 2026 dhe do të përfshijë dhjetëra komuna, gjë që është jashtëzakonisht e rëndësishme për zhvillimin e tyre, tha Borshosh, shkruan BTA.

“Gara do të përbëhet nga tre etapa, që fillojnë në një pjesë të Bullgarisë dhe përfundojnë në një tjetër. Datat dhe itineraret e sakta do të shpallen më vonë, së bashku me buxhetin, tha Borshosh.

Fillimi i Giro d’Italia, i njohur shpesh si Grande Partenza, shënon fillimin zyrtar të garës dhe është një ngjarje shumë prestigjioze. Zakonisht zhvillohet jashtë Italisë çdo disa vjet si pjesë e promovimit ndërkombëtar. Nisjet e mëparshme të huaja kanë përfshirë vende si Holanda, Izraeli, Irlanda e Veriut, Hungaria dhe Danimarka.

Kryeministri në detyrë i Kosovës, Albin Kurti, ka bërë të ditur detaje nga “takimi i gjatë” me emisarin e Bashkimit Evropian për dialogun Kosovë–Serbi, Peter Sorensen. Gjatë këtij takimi, Kurti ka kërkuar nga BE-ja më shumë vlerësim dhe mirënjohje për përpjekjet e Kosovës në integrimin e komunitetit serb.

“Komuniteti serb në Kosovë gëzon të gjitha të drejtat kushtetuese, përfshirë përfaqësimin me ulëse të rezervuara në Kuvend dhe përdorimin e gjuhës serbe në të gjitha nivelet institucionale,” theksoi Kurti.

Ai shtoi se pas largimit të rreth 500 pjesëtarëve serbë nga Policia e Kosovës, janë rekrutuar 199 kadetë të rinj serbë, duke dëshmuar përkushtimin institucional ndaj përfshirjes së këtij komuniteti në strukturat shtetërore.

“Prej më shumë se dy vjetësh, shqiptarët dhe serbët punojnë bashkë në katër komunat veriore, pa asnjë incident. Kërkova që të ketë më shumë mirënjohje për Kosovën për këtë realitet,” u shpreh Kurti.

Ai nënvizoi se të gjitha veprimet e qeverisë janë në përputhje me marrëveshjet ndërkombëtare dhe kanë për synim integrimin e plotë të komunitetit serb në shoqërinë kosovare.