Në seancën e mbajtur më 11 shkurt 2026, Albulena Haxhiu është zgjedhur kryetare e Kuvendit të Republikës së Kosovës.

Haxhiu mori 66 vota për, 44 vota kundër dhe 8 abstenime, duke siguruar kështu mbështetjen e nevojshme për të marrë drejtimin e institucionit legjislativ.

Seanca konstituive u kryesua nga deputeti më i moshuar i Kuvendit, Avni Dehari nga Lëvizja Vetëvendosje, i cili u asistua nga deputetja më e re në moshë, Fatma Taçi nga KDTP.

Me zgjedhjen e kryetares së Kuvendit, pritet të vazhdojnë procedurat e tjera për konstituimin e plotë të legjislaturës së re.

Në Kosovë u mbajtën më 28 dhjetor 2025 zgjedhjet e jashtëzakonshme parlamentare pas një ngërçi politik që la vendin pa qeveri funksionale për mbi një vit.

Lëvizja Vetëvendosje (LVV), e udhëhequr nga Albin Kurti, fitoi qartë me 51.10% të votave, duke siguruar 57 ulëse në Kuvend, një rekord që nga pavarësia e vendit.

Partia Demokratike e Kosovës (PDK) dhe Lidhja Demokratike e Kosovës (LDK) morën respektivisht 22 dhe 15 mandate, ndërsa Aleanca për Ardhmërinë e Kosovës (AAK) dhe Lista Serbe siguruan disa ulëse të tjera.

Pjesëmarrja në zgjedhje ishte rreth 47.5%, e ngjashme me zgjedhjet e mëparshme, duke reflektuar sfidën e mobilizimit të votuesve.

Komisioni Qendror i Zgjedhjeve certifikoi rezultatet dhe seanca konstituive e Kuvendit u caktua për 11 shkurt 2026, duke hapur rrugën për krijimin e institucioneve funksionale dhe miratimin e buxhetit. Këto zgjedhje shënojnë një hap vendimtar për kapërcimin e ngërçit politik dhe stabilizimin e qeverisjes në Kosovë.

Komandanti i Forcës së Sigurisë së Kosovës, Gjenerallejtënant Bashkim Jashari, mori pjesë në takimin trilateral me Shefat e Shtabeve të Shqipërisë dhe Kroacisë, i mbajtur në Republikën e Shqipërisë, duke shënuar një hap të rëndësishëm në forcimin e bashkëpunimit rajonal në fushën e sigurisë dhe mbrojtjes.

Në këtë takim, Gjeneral Jashari, Gjeneral Arben Kingji dhe Gjeneral Robert Hranj (Kundid) zhvilluan një diskutim të hapur dhe konstruktiv mbi sfidat aktuale të sigurisë, thellimin e bashkëpunimit ushtarak dhe rritjen e ndërveprueshmërisë ndërmjet forcave respektive.

“Ky takim konfirmon përkushtimin tonë të përbashkët për paqe, stabilitet dhe siguri të qëndrueshme në rajon,” u theksua gjatë takimit, duke vënë në pah rëndësinë e koordinimit strategjik dhe avancimit të kapaciteteve mbrojtëse në përputhje me standardet euroatlantike.

Ndër të tjera, u potencua gatishmëria për zgjerimin e bashkëpunimit përmes trajnimeve dhe ushtrimeve të përbashkëta, si dhe përmes shkëmbimit të përvojave profesionale.

“Iniciativa trilaterale përfaqëson një shembull të partneritetit të fortë dhe vizionit të përbashkët për një rajon më të sigurt dhe më të qëndrueshëm,” u tha ndër të tjera në njoftimin e FSK-së.

Takimi trilateral rikonfirmoi angazhimin e tre vendeve për të thelluar bashkëpunimin strategjik dhe për të kontribuar në stabilitetin afatgjatë të rajonit.

 

Sonte zhvillohen ndeshjet e kthimit të gjysmëfinaleve të Kupës së Kosovës në basketboll, me dy përballje që premtojnë shumë emocione dhe rivalitet të fortë.

Në takimin e parë, Trepça e ka marrë një avantazh të madh pas fitores 87:64 ndaj Borës, duke qenë shumë pranë kualifikimit në finale për herë të parë. Për të kaluar tutje, kryeqytetasit e Borës duhet të fitojnë me të paktën 24 pikë dallim – një sfidë e vështirë ndaj kampionëve aktualë të Kupës, fitues të edicionit të kaluar dhe shpallur gjithashtu kampion dhe fitues i Superkupës.

Në përballjen tjetër, Sigal Prishtina pret Bashkimin e Prizrenit. Pas fitores 83:67 të Prizrenit në ndeshjen e parë, kryeqytetasit duhet të fitojnë me të paktën 17 pikë diferencë për të arritur finalen.

Të dyja takimet premtojnë emocione dhe spektakël të vërtetë për adhuruesit e basketbollit kosovar.

Orari i gjysmëfinaleve të kthimit:

• 17:00 – Bora vs Trepça
• 20:00 – Sigal Prishtina vs Bashkimi

Finalja e Kupës së Kosovës është e planifikuar më 18 shkurt, dhe tifozët presin dy përballje shumë interesante që mund të ndryshojnë gjithçka.

D.L.

Prosper: Dëshmitarët ndërkombëtarë kanë ekspertizë të thellë, por prokuroria i injoron

Avokati Pierre-Richard Prosper, pjesë e ekipit mbrojtës se Hashim Thaçi, ka vazhduar kritikat ndaj prokurorisë për mosvlerësimin e dëshmive të dëshmitarëve ndërkombëtarë.

“Pra, këta persona, dëshmitarët ndërkombëtarë – ishin pjesë e NATO-s dhe përfaqësonin vendet e tyre. Ata kanë qenë këshilltarë politikë dhe i kanë studiuar këto çështje ditë pas dite. Jack Covey, i caktuar nga sekretari i përgjithshëm si këshilltar për çështje diplomatike, erdhi këtu dhe dha këndvështrimin e tij, por prokuroria e hodhi poshtë përvojën e tij,” tha Prosper.

Ai theksoi veçanërisht përvojën e ambasadorit Hill, i cili, sipas avokatit, ka shërbyer gjashtë herë si ambasador dhe ka qenë i dërguar i posaçëm për Kosovën. “Pjesa më e rëndësishme është fakti që ai u detyrua të zbulonte rolin e secilit dhe çfarë ndodhte në marrëdhëniet Kosovë–Serbi. Por prokuroria don që ne të besojmë se informacioni i tij ishte i kufizuar,” tha Prosper.

Avokati shtoi se edhe shtetet si SHBA, Mbretëria e Bashkuar, Franca, Italia, Gjermania dhe Rusia duhet të ishin të vetëdijshëm për rolin dhe aktivitetet e secilit individ, dhe pyeti retorikisht: “Ju besoni se këta u kthyen në vendet e tyre dhe thanë: ‘Zonja sekretare, informacioni është sipërfaqësor’?”

Prosper argumentoi se përvoja dhe ekspertiza e këtyre dëshmitarëve duhet të merret seriozisht, dhe nuk mund të hidhet poshtë si e pakët ose e pavlerë nga prokuroria.

Prosper kritikon hedhjen poshtë të dëshmive në rastin e Thaçit

Avokati Pierre-Richard Prosper, pjesë e ekipit mbrojtës të Hashim Thaçi, ka kritikuar ashpër vlerësimin e dëshmive nga tribunali, duke e cilësuar atë si “të pabesueshme” dhe një “gjest dëshpërimi”.

Në një deklaratë të fundit, Prosper theksoi rëndësinë e dëshmive të profesionistëve që kanë pasur detyrën të analizojnë dhe vlerësojnë situatat për të ruajtur sigurinë ndërkombëtare. “Të rrezosh menjëherë përvojat e dëshmitarëve, të cilët kanë shërbyer për vite në fushën e sigurisë ndërkombëtare, është e gabuar dhe për mua është një gjest dëshpërimi,” tha ai.

Ai shtoi se kjo qasje ka pasoja serioze për besueshmërinë e tribunaleve ndërkombëtare: “Nuk është për tu çuditur që tani më qeveritë dyshojnë në besueshmërinë e tribunaleve ndërkombëtare. Kur profesionistët dalin para trupit gjykues dhe tregojnë se çfarë ka ndodhur, dhe deklaratat e tyre hidhen poshtë nga persona që nuk kanë qenë as në vendin përkatës, kjo është shumë problematike.”

Prosper theksoi gjithashtu rolin e tribunaleve si instrumente të sistemit ndërkombëtar: “Duhet të kemi parasysh që këto tribunale janë mjete të sistemit ndërkombëtar, dhe personat që kanë qenë përpara jush janë pjesë e këtij sistemi që vendosin nëse duhet të ketë tribunal dhe drejtësi.”

Deklaratat e tij vijnë ndërsa procesi gjyqësor ndaj Thaçit vazhdon, dhe shqetësimet për besueshmërinë e dëshmive dhe vendimeve të tribunaleve mbeten në fokus të vëmendjes ndërkombëtare.

Tavakoli: Qeveria e Përkohshme nuk ishte plan kriminal

Mbrojtësja e Hashim Thaçit, Nina Tavakoli, ka kundërshtuar pretendimet e Zyrës së Prokurorit të Specializuar (ZPS) se Qeveria e Përkohshme ishte një strukturë e krijuar dhe e kontrolluar nga të akuzuarit për të avancuar qëllime të përbashkëta kriminale.

“Sipas Prokurorisë, Qeveria e Përkohshme ka qenë një prej strukturave dhe mekanizmave të kompetencës së krijuar dhe të zbatuar ose të kontrolluar nga të akuzuarit për të avancuar qëllime të përbashkëta kriminale. Sipas prokurorisë, ajo ishte një mjet për të ekzekutuar dhe realizuar planin e tyre kriminal,” tha Tavakoli.

Megjithatë, ajo theksoi se ekzistojnë të paktën tre faktorë që, sipas saj, krijojnë dyshim të arsyeshëm ndaj këtij pretendimi: përbërja shumëpartiake e Qeverisë së Përkohshme, mbështetja e gjerë ndërkombëtare dhe realiteti politik i kohës, që sipas saj e bënte të pamundur që ajo të funksiononte si një mekanizëm pushteti në kuptimin e pretenduar nga prokuroria.

“Qeveria e Përkohshme është mbështetur nga SHBA-ja, Britania e Madhe dhe shtete të tjera evropiane si mënyrë për t’i unifikuar shqiptarët e Kosovës. Kjo mbështetje ndërkombëtare në vetvete ngre dyshim të arsyeshëm se ajo është krijuar si një shtysë për të ekzekutuar një plan të përbashkët kriminal për të akuzuarit për të marrë kontroll mbi Kosovën,” u shpreh ajo.

Tavakoli shtoi se, për të mbështetur tezën e saj, ZPS do të duhej të pretendonte se edhe shtetet perëndimore që e mbështetën këtë strukturë ishin në dijeni apo mbështetëse të një plani të tillë kriminal.

“Si është e mundur që klienti ynë, i cili në atë kohë ishte vetëm 29 vjeç, t’i ketë gënjyer të gjithë ata (ndërkombëtarë)?” deklaroi Tavakoli.

Mishetiq: ZPS nuk ka dhënë prova për përfshirjen e Thaçit në mbështetje logjistike

Avokati i ish-presidentit Hashim Thaçi, Luka Mishetiq, ka deklaruar se Zyra e Prokurorit të Specializuar (ZPS) nuk ka paraqitur prova që e lidhin drejtpërdrejt klientin e tij me mbështetjen logjistike të pretenduar për UÇK-në dhe qendrat e ndalimit.

Sipas Mishetiqit, pretendimi i prokurorisë është se Thaçi dhe Shtabi i Përgjithshëm në mënyrë kolektive kanë siguruar mbështetje logjistike për vartësit e UÇK-së, përfshirë edhe funksionimin e qendrave të ndalimit. Ai theksoi se ZPS i referohet edhe intervistave të Zyrës për Rregullimin e Punëve të Brendshme (ZYRAPI), ku përmendet mbështetja logjistike nga Shtabi i Përgjithshëm, por sipas tij kjo ka ndodhur pas një ristrukturimi të brendshëm.

“Pretendohet se ka pasur mbështetje logjistike nga struktura e përgjithshme, por nuk ka asnjë provë që kjo mbështetje është dhënë nga Hashim Thaçi personalisht,” tha Mishetiq.

Ai shtoi se, edhe pse ZPS pretendon se Thaçi ka qenë pjesë e një ndërmarrjeje të përbashkët kriminale (NKP), nuk ekzistojnë prova konkrete që ai të ketë urdhëruar furnizime me armë apo mbështetje tjetër logjistike.

“Nuk ka dëshmi që Thaçi, apo edhe Selimi, Veseli dhe Krasniqi, të kenë dhënë urdhra për furnizim me armë. Pretendimet e prokurorisë mbeten të pambështetura me prova konkrete,” deklaroi avokati Mishetiq.

Ai ritheksoi se mbrojtja do të vazhdojë të kundërshtojë akuzat, duke argumentuar se përfshirja e Thaçit në çfarëdo forme mbështetjeje logjistike nuk është e provuar.

Avokati i Thaçit: ZPS-ja ka nxjerrë nga konteksti deklaratat

Avokati Mishetiq gjatë mbrojtjes së Thaçit në Hagë, ka kundërshtuar disa deklarata të Prokurorisë në lidhje me pjesëmarrjen e Thaçit në mbledhjet e Shtabit të Përgjithshëm.

Madje për këtë ai tha se këto deklarata nuk i ka faktuar prokuroria dhe se në këtë kohë kur prokuroria e përmend që Thaçi ka qenë pjesë e këtyre takimeve, ai nuk ka qenë në Kosovë.

“Nuk ka prova që Thaçi ka marrë pjesë ndonjëherë në ndonjë takim të tillë (Shtabit të përgjithshëm), apo edhe që ka qenë në Kosovë në fillim të korrikut. Nga ana tjetër ZYRAPI që ZPS-ja e konsideron të besueshëm kur ju treguan rregulloret e përkohshme tha që rregullorja është miratuar në fund të 98-tës si pjesë e ristrukturimit dhe këto dokumente janë përkthyer nga ushtritë e Perëndimit”

Tutje avokati i Thaçit ka thënë së ZPS-ja në një rast ka nxjerrë nga konteksti deklarata që kishin të bëjnë më UCK-në.

“ZPS-ja i referohet deklaratës politike numër tetë në paragrafin 10 të dosjes së saj- ku ZPS-ja një fjali e nxjerrë nga konteksti. Kjo fjali është që Kosova ose do të jetë e jona ose do të jetë në shkrumb e hi, por pjesa tjetër e tekstit vazhdon e bën të qartë se kjo pjesa “Kosova do të jetë e jona”  i referohet popullit të Kosovës dhe jo anëtarëve të pretenduar të NPK-së i”, tha avokati.

Mishetiq: Një padrejtësi ligjore dhe historike

Avokati i Thaçit, Luka Mishetiq gjatë fjalëve përmbyllës ka kritikuar ashpër qasjen e Prokurorisë në këtë proces.

Mishetiq ka thënë se qëllimi i ZPS-së është që Thaçin ta nxjerrin fajtor, përderisa as udhëheqësit serbë nuk u dënuan për kontroll efektiv.

“ZPS- ja po ju kërkon juve që të përfundoni që pavarësisht presidenti serb i një shteti të organizuar nuk ka pasur përgjegjësi penale për krimet masive në luftë dhe krime kundër njerëzimit për shkak se nuk ka pasur kontroll efektiv. Vetëm bazuar mbi këtë ju duhet të konkuldoni që udhëheqësi politik i shqiptarëve të Kosovës i UÇK-së, një grup i armatosur jo- shtetëror i cili ka ekzistuar për vetëm disa muaj ka pasur kontroll efektiv dhe ka marrë përgjegjësi penale. Ky rezultat do të jetë një progresion historik dhe një padrejtësi ligjore dhe historike”, ka deklaruar avokati i Thaçit.

Mbrojtja e Thaçit i rikujton gjykatës dëshmitë e ndërkombëtarëve

Deri sa po vazhdon fjalët përfundimtare mbrojtja e Thaçit, avokati Mishetiq e ka ballafaquar gjykatën me dëshmitë e ndërkombëtareve.

Ish- zyrtari i lartë amerikan James Rubin dhe gjenerali amerikan Wesley Clark janë dy prej dëshmitareve që avokati Mishetiq i përmendi gjatë fjalëve përfundimtare të mbrojtjes.

Ndërsa, u tha se James Rubin kishte hetuar për pretendimet e gazetës New York Times së Thaçi u përfshi në “krime lufte” dhe nuk gjeti asgjë.

“Ju keni dëgjuar nga dëshmitarë ndërkombëtarë të shumtë se Hashim Thaçi nuk dyshohej për përfshirje në krime lufte, këta ndërkombëtarë ju thanë së ishin të informuar për ngjarjen në terren përmes burimeve diplomatike, shërbimeve inteligjencës dhe përmes përvojave të tyre personale përfshirë ato me Hashim Thaçin. Ju i keni dëgjuar këto p.sh. nga ish asistenti i sekretarit të shteti Jaims Rubin i cili ju tha se në fund të qershorit të 1999 -së, ai konkretisht hetoi pretendimet e bëra ne gazetën Neë York Times lidhur me Thaçin, kontrolli, verifikoj burimet e informacioneve të disponueshme qe Qeveria e SHBA-së i kishte dhe nuk arriti të gjente ndonjë provë që lidhte Thaçin me krime lufte”, tha Mishetiq.

Tutje, avokati i Thacit përmendi edhe dëshminë e Clark, ku u tha se nuk është në dijeni të asnjë prove për përfshirjen e Thaçit në “krime lufte”.

“Wesley Clark ju tha juve se nuk beson se do të ishte e drejtë që t’i atribuoj sjellja e gabuar e të tjerëve Hashim Thaçit dhe se ai nuk është në dijen të asnjë prove se ai personalisht ka kryer ndonjë akt të dhunshëm”, deklaroi avokati Mishetiq.

Mishetiq: Thaçi është i pafajshëm

Avokati Luka Mishetiq e ka nisur fjalën e vet para trupit gjykues duke deklaruar se ish-presidenti i Kosovës, Thaçi është i pafajshëm dhe që kjo është pikënisja prej ku duhet të merret vendimi.

“Kur t’i filloni kuvendimet tuaja, ju do të filloni nga qëndrimi se Hashim Thaçi është i pafajshëm dhe më pas ju do të vlerësoni nëse provat e paraqitura nga Zyra e Prokurorit të Specializuar ju kanë bindur juve, jashtë dyshimit të arsyeshëm, se Hashim Thaçi është fajtor”, u ka thënë Mishetiq gjyqtarëve.

Tutje ai tha se ky proces nuk ka të bëjë verifikimin e jetës së Thaçit, por me pretendimet e Zyrës së Prokurorisë Speciale që i janë drejtuar këtij të fundit.

“Ky proces ka ardhur këtu sepse ZPS kanë ngritur pretendime se ata kanë prova që vërtetojnë përtej dyshimit të arsyeshëm se ata janë fajtor dhe për më shumë se pesë viti ka nisë ky proces. Ky gjykimi nuk është një ekzaminim apo shqyrtim, apo verifikim i jetës së Hashim Thaçit, por kjo është  verifikimi i pretendimi të ZPS-së”, tha ai.

Sot ka filluar dita e tretë e deklaratave përmbyllëse në gjyqin kundër ish-presidentit të Kosovës, Hashim Thaçi, ish-kryeparlamentarëve, Kadri Veseli dhe Jakup Krasniqi, dhe ish-deputetit, Rexhep Selimi në Gjykatën Speciale, me seli në Hagë.

Ish-eprorët e UÇK-së akuzohen për krime lufte dhe krime kundër njerëzimit, për të cilat të katërtit janë deklaruar të pafajshëm.

Prokuroria, e cila tashmë i ka thënë të gjitha, ka kërkuar nga 45 vjet burgim për secilin të akuzuar, ndërsa ekipi për mbrojtjen e viktimave ka bërë thirrje që në vendim të dëgjohet zëri i tyre.

Në këtë proces gjykohen krimet që pretendohet se janë kryer midis muajit mars të vitit 1998 dhe shtatorit të vitit pasues në disa lokacione në Kosovë dhe në veri të Shqipërisë.

Pas përmbylljes së deklaratave, çështja do të kalojë te trupi gjykues. Gjykatësit kanë tre muaj kohë që të marrin një vendim për çështjen, ose të kërkojnë zgjatjen e afatit për marrjen e vendimit.