Lajmet

Haxhiu fton prokurorët e gjyqtarët të vazhdojnë punën

Ajo ka kërkuar nga ata që të mos punojnë për interesa personale, por për interesat e qytetarëve të Kosovës.

Published

3 years ago

November 24, 2022

Betim Gashi

Ministrja e Drejtësisë, Albulena Haxhiu ka ftuar prokurorët e gjyqtarët që të vazhdojnë punën dhe të mos veprojnë për interesa personale. Sipas saj, vendimi i ish-kryeministrit Ramush Haradinaj ka qenë antiligjor dhe se nuk mund të mbetet në fuqi si i tillë. Haxhiu gjatë së enjtes ka potencuar se projektligji i miratuar dje në qeveri, nivelizon pagat për gjyqtarët dhe rrit ato në të gjitha kategoritë. Po ashtu, shtoi se kjo nismë ligjore shmang rritjet aksidentale, abuzimin dhe arbitraritetin.

Në konferencën para fillimit të 16 ditëve të aktivizmit, Haxhiu ka folur për qëllimin e dy projektligjeve të miratuara nga kabineti qeveritar.

“Siç e dini, në mbledhjen e djeshme të qeverisë janë votuar të dy këto projektligje. Dhe qëllimi i të dyja këtyre projektligjeve është që të bëhet reforma në Administratën Publike, por edhe që të kemi paga të barabarta, dinjitoze për të gjithë që të mos privilegjohet asnjë shtresë e shoqërisë”, ka deklaruar Haxhiu.

Qeveria aktuale, siç tha Haxhiu, nuk ndërhyn në punën e sistemit të drejtësisë, vetëm kërkon që ta kryejnë punën e tyre. Sipas Haxhiut, rritja e pagave nuk e ka shtuar punën e prokurorëve dhe gjyqtarëve.

“Projektligji i ri përveç se nivelizon pagat për gjyqtarët dhe prokurorë dhe gjithashtu rrit pagat e pothuajse të gjitha kategorive, kjo nismë reformuese gjithashtu shmang rritjet aksidentale, abuzimin dhe arbitraritetin në këtë proces mjaft të rëndësishëm. Siç e dini, në kohën kur është votuar ky vendim nga qeveria Haradinaj, qëllimi ka qenë që ta rrisin pagën vetvetes, në atë kohë, ish-kryeministri Haradinaj dhe ministrat e kabinetit qeveritar. Dhe ata fare nuk kanë qenë në dijeni që pastaj mund të ndikojë në rritjen e pagave për sistemin e drejtësisë. Duke qenë që ka qenë konflikt i drejtpërdrejt i interesit, ne kemi kundërshtuar këtë vendim aso kohe”, ka shtuar ministrja Haxhiu.

Sipas saj, ky ka qenë konflikt i drejtpërdrejt i interesit, për çka ka konstatuar edhe Agjencia Kundër Korrupsion. Megjithatë, siç tha ajo, qeveria e atëhershme nuk ishte tërhequr nga ky vendim. Po ashtu, edhe pas kallëzimit penal në Prokurorinë Speciale nuk është vepruar.

“Ligji i Pagave që ka shkuar dje në kuvend rrit pagat për gjyqtarët dhe prokurorët dhe ne nuk mund ta mbajmë në jetë një vendim që është i paligjshëm. Sa i përket bashkëpunimeve me Këshillin Gjyqësor dhe Këshillin Prokurorial, për shkak të reformave që ka nisur Ministria e Drejtësisë, gjithnjë është përcjellur me probleme të ndryshme. Ne kemi nisur vettingun ata e kanë bojkotuar, prapë jemi takuar, sërish kanë bojkotuar. Mirëpo mendoj që të gjithë ne së bashku duhet të punojmë vetëm për një gjë: vetëm për interesat e qytetarëve të Kosovës”, tha ajo.

Ajo ka ftuar prokurorët e gjyqtarët që të vazhdojnë punën.

“Nuk kuptoj qasjen e KGjK-së dhe KPK-së dhe i ftoj ata që të vazhdojnë punën dhe të mos punojnë për interesa personale, por për interesat e qytetarëve të Kosovës”, ka përfunduar ajo.

Gjatë ditës së djeshme, kabineti qeveritar ka miratuar projektligjin për Zyrtarët Publik dhe atë për Pagat.

Lajmet

Ndeshja Ballkani dhe FC Floriana: Pesë gola në pjesën e parë

Published

1 minute ago

July 23, 2025

UBT News

Pjesa e parë e sfidës mes Ballkanit dhe FC Florianës në raundin e dytë të UEFA Conference League ka qenë një festival i vërtetë golash, me plot pesë realizime të shënuara në stadiumin “Fadil Vokrri” në Prishtinë.

Ishin mysafirët nga Malta që e hapën serinë e golave. Në minutën e 8-të, Grech zhbllokoi rezultatin dhe kaloi Florianën në epërsi. Ballkani reagoi shpejt dhe barazoi në minutën e 13-të me golin e sulmuesit Arbër Tolaj.

Por miqtë rikthyen epërsinë në minutën e 25-të me golin e Jah, duke e çuar rezultatin në 1-2. Megjithatë, gëzimi i Florianës zgjati vetëm tri minuta, pasi në minutën e 28-të, Adetunji shënoi për 2-2 dhe riktheu ekuilibrin.

Epërsia erdhi për herë të parë për suharekasit në minutën e 32-të, kur Arbër Tolaj realizoi golin e dytë personal dhe të tretin për Ballkanin, duke përmbysur gjithçka në vetëm pak minuta.

Përballja mbetet e hapur dhe interesante, ndërsa 45 minutat e dyta pritet të përcaktojnë fatin e kësaj ndeshjeje emocionuese në kuadër të Ligës së Konferencës.

Aktualitet

Një person humb jetën në vendin e punës, policia e cilëson si vdekje e dyshimtë

Published

7 minutes ago

July 23, 2025

UBT News

Një person ka vdekur në vendin e punës në Skenderaj, ku në këtë rast Policia e Kosovës e ka cilësuar si “vdekje e dyshimtë”. Sipas njoftimit policor të martën rreth orës 16:00, policia në Skenderaj është njoftuar se një person kishte probleme shëndetësore dhe gjendej i shtrirë në vendin e punës në rrugën “17 Shkurti” në Skenderaj.

Gjithashtu ata thanë se është njoftuar menjëherë emergjenca mjekësore dhe në vendin e ngjarjes kishte shkuar një ekip mjekësore dhe njësitë policore.

“Mjeku kujdestar kishte konfirmuar vdekjen e personit në vendin e ngjarjes. Personi pa shenja jete është i moshës 44 vjeçare”, njoftoi Policia.

Më tej thuhet se në vendin e ngjarjes kanë dalë hetuesit e Njësisë Rajonale të Hetimeve dhe të krim teknikës e po ashtu edhe inspektorët e punës të cilët kanë kryer veprimet hetimore dhe procedurat e nevojshme ligjore.

“Me urdhër të prokurorit kujdestar, trupi i pa jetë dërgohet në Institutin e Mjekësisë Ligjore në Prishtinë ndërsa iniciohet rasti dhe hetimet do të vazhdojnë për ndriçimin e plotë të rrethanave të këtij rasti”, thuhet në njoftim.

Për këtë ngjarje tragjike ka reaguar edhe kryetari i Skenderajt, Fadil Nura.

“Për shkak të vdekjes së papritur të bashkëqytetarit tonë, të riut Robert Veliu, ish-basketbollist profesionist, dhe në respek të thellë ndaj familjes së pikëlluar Veliu, programi i sotëm muzikor në festival anulohet. I shpreh ngushëllimet më të thella familjes Veliu, shokëve dhe dashamirëve”, ka shkruar Nura.

Pak ditë më parë, dy persona vdiqën në vendin e tyre të punës në Gjakovë duke rënë nga kati i tretë i një objekti i cili ishte në ndërtim.

Aktualitet

Ambasada Amerikane: Kosova ka potencial të nxisë rritjen ekonomike

Published

16 minutes ago

July 23, 2025

UBT News

Ambasada e Shteteve të Bashkuara në Prishtinë, ka thënë se Kosova ka potencial të nxisë rritjen ekonomike dhe të bëhet kontribuues kyç në sigurinë globale, i nxitur nga partneritetet e forta me kompanitë amerikane.

Sipas një njoftimit, Ambasada amerikane në Kosovë u shpreh krenare që i është bashkuar Ministrisë së Mbrojtjes së Republikës së Kosovës, Forcës së Sigurisë së Kosovës dhe Dhomës Amerikane të Tregtisë në Kosovë në diskutime të rëndësishme mbi zhvillimin e industrisë mbrojtëse kosovare.

“Krenar të bashkohemi MM dhe FSK-së dhe Odës Ekonomike Amerikane për diskutime të rëndësishme mbi industrinë e mbrojtjes së Kosovës. Ky sektor ka potencial jo vetëm të nxisë rritjen ekonomike, por edhe ta pozicionojë Kosovën si kontribues kyç në sigurinë globale të nxitur nga inovacioni dhe partneritetet e forta me kompanitë amerikane. Një industri e qëndrueshme, moderne e mbrojtjes forcon të dy kombet tona”, shkruan Ambasada në Facebook.