Lajmet

Osmani për Trustin: Kuvendi të merr vendim që mbron interesin e qytetarëve

Published

3 years ago

June 1, 2022

UBT.News

Presidentja e Kosovës Vjosa Osmani ka komentuar sot tërheqjen e mundshme të parave nga Trusti deri në 30 për qind.

Ajo pas takimit me të parin e Pejës, Gazmend Muhaxheri, ka thënë se i takon Kuvendit që të merr vendime që mbrojnë interesin e qytetarëve.

“Ky siç e dini është vendim i Kuvendit të Kosovës. Presidenca e Republikës nuk e merr atë vendim. Ajo çka dua t’i inkurajoj deputetët e Kuvendit të Kosovës është që të marrin një vendim që mbron interesin afatgjatë të qytetarëve të Republikës sonë. Deputeti duhet të ndihet i lirë për të marrë vendim në interes të popullit, andaj të kontribuojmë të gjithë bashkërisht në këtë drejtim që deputeti të ndihet i lirë pavarësisht se cilës parti i takon dhe ta ketë për bazë edhe ekspertizën që jepen nga institucionet vendore e ndërkombëtare”, u shpreh ajo.

E pyetur për mundësinë që Kosova të ketë zgjedhje të reja, presidentja Osmani tha se duke parë stabilitetin politik dhe bashkëpunimin e fuqishëm me shtetet mike nuk e sheh që në një kohë të afërt të ketë zgjedhje Kosova.

“Sinqerisht nuk kam dëgjuar zëra të tillë ndoshta për shkak se shoh një stabilitet politik në Kosovë, të cilin nuk e kemi parë që një kohë të gjatë, stabilitet që dëshmohet jo vetëm në numrat në Kuvend, por edhe në projektet afatgjate të cilët janë duke u planifikuar në bashkëpunimin ndërmjet dikastereve qeveritare për t’i shtyrë përpara. Shoh një partneritet shumë të fuqishëm ndërmjet Kosovës dhe shteteve mike filluar nga SHBA-ja e shtetet e Bashkimit Evropian. Kur i shoh këto të gjitha bashkërisht, nuk shoh që një gjë e tillë është afër”, theksoi Osmani.

E para e vendit ka folur edhe rreth Festës së Abetares, organizuar nga komuna e Pejës, ku ishte raportuar se një grup nxënësish të komuniteteve rom, ashkali e egjiptas ishin injoruar. Osmani u shpreh se nga kryetari i kësaj komuna u njoftua se situata nuk është ashtu siç është paraqitur publikisht.

Ajo u shpreh se janë të përkushtuar që diskriminimi mos të gjejë vend në Kosovë.

“Në këtë 1 qershor dua të përsëris përkushtimin tonë të plotë që secili fëmijë i Kosovës, pavarësisht etnisë, statusit social të komunës ku jeton, të kenë të drejta të barabarta dhe t’u jepet shansi për të shkëlqyer. Përkundër faktit që situata nuk ka qenë e tillë siç është paraqitur publikisht, dua ta them kështu në përgjithësi që është detyrë e secilit prej nesh jo vetëm si institucione, por edhe detyrë morale që kudo që shohim raste të diskriminimit, t’i ndalojmë ato dhe t’i luftojmë ato, sepse nuk mund ta mohojmë që ato ndodhin në vende të ndryshme në Kosovë kohë pas kohe”, u shpreh ajo.

Në kuadër të kësaj vizitë në komunën e Pejës, presidentja e Kosovës, Vjosa Osmani do të vizitojë ekspozitën e përgatitur nga fëmijët me nevoja të veçanta, po ashtu do të zhvillojë takim me OJQ-të nga komunitetet jo-shumicë.

Lajmet

Autoritetet kosovare zhvillojnë aksion të ri kundër spiunazhit

Published

15 minutes ago

July 17, 2025

UBTnews

Autoritetet kosovare janë duke e zhvilluar një aksion në lidhje me dyshimet për spiunazh, duke intensifikuar luftën kundër rrjetit të spiunazhit, njoftoi Prokuroria Speciale e Kosovës të enjten.

Prokuroria tha se aksioni është duke u kryer në bashkëpunim me Inspektoratin Policor të Kosovës dhe Agjencinë e Kosovës për Inteligjencë.

Ajo tha se nuk mund të japë hollësi, për shkak ndjeshmërisë së hetimeve dhe pasi operacioni është ende në zhvillim e sipër.

Aksioni vjen në një kohë kur autoritetet kanë arrestuar, akuzuar e gjykuar serbë e shqiptarë nën dyshimet se po spiunonin për shërbimet e inteligjencës së Serbisë.

Në qershor, gjykata në Prishtinë dënoi Aleksandar Vllajiqin me pesë vjet burgim, pasi ai u deklarua fajtor për akuzat se ishte përfshirë në spiunazh si anëtar i Agjencisë serbe të Inteligjencës dhe Sigurisë (BIA).

Momentalisht, dy të dyshuar, Bedri Shabani dhe Muharrem Qerimi, po gjykohen për spiunazh për Serbinë në Gjykatën Themelore në Prishtinë.

Ata janë deklaruar të pafajshëm për akuzat se kishin dhënë informacione tek BIA serbe për disa institucione të sigurisë në Kosovë, për UÇK-në dhe masakrën e Reçakut.

Në Kosovë, spiunazhi përkufizohet si aktivitetet sekret i mbledhjes, transmetimit ose shpërndarjes së informacionit të ndjeshëm në një shtet, organizatë ose grup tjetër.

Sipas Kodit Penal të Kosovës, spiunazhi konsiderohet krim i rëndë dhe dënohet me të paktën pesë vjet burgim, nëse i dyshuari shpallet fajtor./REL

Lajmet

Sot përpjekja e 48-të për konstituimin e Kuvendit të Kosovës

Published

26 minutes ago

July 17, 2025

UBTnews

Sot, me fillim nga ora 11:00, do të zhvillohet seanca e radhës konstituive e Kuvendit të Kosovës, në përpjekjen e 48-të.

Në seancën e fundit, propozimi për formimin e komisionit që do të organizonte votimin e fshehtë për kryetarin e Kuvendit dështoi të kalojë, përkundër votave pro. Mungesa e kundërshtimeve apo abstenimeve bëri që propozimi të mos marrë mbështetjen e nevojshme, duke çuar në ndërprerjen e seancës.

Kryesuesi Avni Dehari njoftoi se seanca e radhës do të zhvillohet më 17 korrik.

Ky ngërç institucional po vazhdon, pavarësisht vendimit të Gjykatës Kushtetuese, e cila ka përcaktuar që Kuvendi duhet të konstituohet brenda 30 ditëve nga seanca e parë konstituive.

Pas përfundimit të seancës së 46-të, partitë e ish-opozitës qëndruan në sallë, duke i bërë thirrje Lëvizjes Vetëvendosje të reflektojë dhe të kontribuojë në një zgjidhje konsensuale sa më parë.

Zgjedhjet parlamentare janë mbajtur më 9 shkurt, ndërsa seanca e parë për konstituimin e Kuvendit është mbajtur më 15 prill. Që nga ajo kohë, çdo 48 orë po mbahen seanca të njëpasnjëshme pa arritur ndonjë marrëveshje përfundimtare.

Lajmet

Tri raste të dhunës në familje u raportuan në 24 orët e fundit, një person u dërgua në mbajtje

Published

46 minutes ago

July 17, 2025

UBTnews

Tri raste të dhunës në familje janë raportuar gjatë 24 orëve të fundit në Prishtinë, Istog dhe Malishevë.

Sipas raportit 24 orësh të Policisë, në Prishtinë u arrestua një i dyshuar se në gjendje të dehur ka kryer veprën dhunë në familje ndaj një familjari të tij.

“Është arrestuar i dyshuari mashkull kosovar, pasi që dyshohet se në gjendje të dehur ka kryer veprën e lartcekur ndaj viktimës mashkull kosovar. I dyshuari pas marrjes së tretmanit mjekësor në klinikën psikiatrike është liruar në shtëpi. Me vendim të prokurorit, rasti procedohet në procedurë të rregullt”, thuhet në njoftim.

Ndërsa, në Istog u arrestua një i dyshuar se ushtroi dhunë ndaj një gruaje.

“Është arrestuar i dyshuari mashkull kosovar, nën dyshimin se kishte ushtruar dhunë ndaj viktimës femër kosovare. Me vendim të prokurorit i dyshuari është liruar dhe rasti shkon në procedurë të rregullt”, njofton Policia.

Në Malishevë u arrestua një person nën dyshimin se ushtroi dhunë psikike ndaj një gruaje.

“Është arrestuar i dyshuari mashkull kosovar, pasi që dyshohet se kishte ushtruar dhunë psikike ndaj viktimës femër kosovare. Me vendim të prokurorit i dyshuari është dërguar në mbajtje”, njofton Policia. /BetimipërDrejtësi

Lajmet

Arrestohen katër persona të dyshuar për disa raste të vjedhjeve

Published

1 hour ago

July 17, 2025

UBTnews

Policia e Kosovës në Vushtrri ka arrestuar katër persona të dyshuar për tri raste të vjedhjeve të raportuara tri ditë më parë.

“Arrestimi i tyre është bërë mbi dyshime të arsyeshme dhe prova të siguruara se të njëjtit, në bashkëveprim mes vete, janë të përfshirë në tri raste të vjedhjeve të ndodhura në tre lokacione të ndryshme në komunën e Vushtrrisë”, ka njoftuar Policia e Kosovës.

Cak i këtyre vjedhjeve kanë qenë materiale ndërtimore, mjete të amvisërisë, një telefon dhe gjësende të tjera.

Disa nga sendet e vjedhura, si telefoni gjetur, i janë kthyer pronarit legjitim.

“Pas intervistimit, me aktvendim të Prokurorit kompetent, njërit nga të dyshuarit madhor i është caktuar masa e ndalimit policor prej 48 orësh, ndërsa tre të tjerët të moshës së mitur janë liruar në procedurë të rregullt”, ka bërë të ditur Policia.