Në darkën e shtruar për shefen e diplomacisë evropiane Kaja Kallas, kryeministri në detyrë Albin Kurti tha se diskutuan për marrëdhëniet ndërmjet Kosovës dhe Bashkimit Evropian, progresin në reforma, demokraci dhe ekonomi, bashkëpunimin reciprok dhe e integrimit evropian të vendit tonë.

Në një postim në Facebook, Kurti ka shprehur mirënjohje për angazhimin e Kallas për largimin e masave kufizuese dhe njoftimin se ato kanë nisur të largohen gradualisht.

“Ky është hap pozitiv dhe një lajm i mirë për vendin, edhe pse masat janë vendosur padrejtësisht dhe se ato duhet të largohen plotësisht”, ka shkruar Kurti.

Institucionet e Kosovës janë të përkushtuara dhe angazhohen çdo ditë për sundim të ligjit, siguri publike dhe mirëqenie e shërbime për qytetarët tanë, pa dallim, tha Kurti.

Instituti i Shëndetit Publik në Maqedoninë e Veriut njoftoi këtë të premte se janë konfirmuar dy raste të para të lisë së majmunëve në vend. Ky është konstatimi i parë zyrtar i këtij infeksioni viral në territorin e Maqedonisë së Veriut dhe ka shkaktuar menjëherë reagim nga autoritetet shëndetësore.

Sipas njoftimit të ISHP-së, të dy pacientët e infektuar janë referuar nga Klinika e Sëmundjeve të Lëkurës si të dyshuar për li majmuni, dhe në përputhje me protokollet mjekësore, iu janë bërë një sërë analizash, përfshirë testime për HIV, sifiliz dhe herpes. Pas këtyre ekzaminimeve, analizat laboratorike të kryera me tre metoda të ndryshme e konfirmuan praninë e virusit të lisë së majmunëve.

“Me marrjen e rezultateve pozitive, është aktivizuar menjëherë një plan reagimi institucional. Janë njoftuar të gjitha strukturat përkatëse, përfshirë Ministrinë e Shëndetësisë, Klinikën e Sëmundjeve të Lëkurës dhe Klinikën e Sëmundjeve Infektive”, bëhet e ditur në deklaratën e ISHP-së.

Për të identifikuar burimin e infeksionit dhe për të kufizuar përhapjen e mundshme, epidemiologët e ISHP-së kanë nisur një anketim të hollësishëm epidemiologjik me të dy pacientët. Anketa është në proces dhe synon të mbledhë të dhëna të rëndësishme që do të shërbejnë për vendimmarrje të mëtejshme shëndetësore.

“Ekspertët tanë janë kthyer menjëherë në terren për të ndjekur gjurmët e kontaktit dhe për të ndërmarrë çdo masë parandaluese të nevojshme. Pacientëve të prekur u është rekomanduar të ndjekin trajtim dhe vëzhgim të mëtejshëm në Klinikën e Sëmundjeve Infektive”, thuhet më tej nga ISHP.

Instituti siguroi qytetarët se aktualisht nuk ka arsye për panik. Të gjitha masat e nevojshme janë marrë në kohë dhe po zbatohen në përputhje me udhëzimet ndërkombëtare për trajtimin dhe parandalimin e lisë së majmunëve. Në të njëjtën kohë, është theksuar se janë mobilizuar të gjitha kapacitetet institucionale për të menaxhuar situatën dhe për të kufizuar çdo rrezik potencial për popullatën.

“Vazhdimisht do të monitorojmë nga afër situatën dhe do të informojmë publikun për çdo zhvillim të mëtejshëm. Qytetarët duhet të qëndrojnë të informuar vetëm përmes burimeve zyrtare dhe të ndjekin udhëzimet e autoriteteve shëndetësore”, përfundon deklarata e ISHP-së.

Kryetarja e partisë Guxo, Donika Gërvalla, ka thënë se kriza aktuale politike në Kosovë është e papranueshme dhe duhet gjetur zgjidhje e menjëhershme. Ajo akuzoi partitë që deri tani ishin në opozitë se po bllokojnë konstituimin e Kuvendit. Sipas saj, betejat politike nuk duhet bërë për Kuvendin mirëpo për formimin e qeverisë.

Gërvalla pas dështimit për herë të njëzet të konstituimit të Kuvendit, tha se kryetari i Nisma-s, Fatmir Limaj nuk mund të kërkojë pozicionin e kryeparlamentarit dhe se për një gjë të tillë pajtohen të gjithë partnerët e koalicionit, LVV-Guxo-Alternativa.

“Kjo situatë është e papranueshme dhe kërkon zgjidhje të menjëhershme. Mirëpo për të gjetur zgjidhje kërkon reagim racional nga deputetët e opozitës të cilët bllokojnë Kuvendin. Duke bllokuar Kuvendin bllokojnë edhe mundësinë e tyre për të ushtruar kontrollin e Kuvendit mbi institucionet e pavarura të Kosovës. Kjo qasje bllokuese të ndalet pasi beteja politike bëhet për zgjedhje të qeverisë. Ajo nuk bëhet për një temë e cila është e vetëkuptueshme. Kushtetuta ia njeh të drejtën ekskluzive për propozim fituesit të zgjedhjeve. Është seanca e dhjetë që jemi duke votuar për procedurë”, tha ajo.

Sipas saj, ata janë të gatshëm për koalicion me Limajn, nëse ai është i gatshëm për bashkëpunim parimor.

“Çështjen e kërkesës për kryeparlamentar e kemi diskutuar. Por pozicioni i deputetëve të partisë Guxo nuk ka qenë i ndryshëm nga LVV-ja dhe Alternativa. Të gjithë jemi të njëmendje që një parti që ka tre deputetë në Kuvend nuk mund të kërkojë pozicionin e dytë në shtet. Zgjidhjet dhe marrëveshjet duhet të jenë parimore. Nëse Limaj është i gatshëm për një bashkëpunim parimor në kuadër të institucioneve atëherë ne jemi të treguar të gatshëm për bashkëpunim”, theksoi Gërvalla.

Sa i përket deklarimeve të deputetes nga komunitetit boshnjak, Duda Balje se individë nga Maqedonia e Veriut i kanë ofruar asaj postin e profesoreshës në Universitetin e Tetovës në këmbim të votës për koalicionin LVV-Guxo-Alternativa, ajo tha se nuk ka informacione për një gjë të tillë.

Ajo i bëri thirrje deputetes Balje por edhe deputetin nga komuniteti goran, Adem Hoxha që të heqin dorë siç tha ajo nga qasja bllokuese për formimin e institucioneve të reja pas zgjedhjeve të 9 shkurtit.

Gërvalla e cila është edhe ushtruese e detyrës së Ministres së Punëve të Jashtme, foli edhe për porositë e përfaqësueses së lartë të BE-së për politikë të jashtme, Kaja Kallas, e cila po qëndro për vizitë zyrtare në Kosovë.

Duke folur për dialogun me Serbinë, ajo tha se i njëjti nuk është ndërpre asnjëherë, derisa tha se takimet trilaterale nuk mund të ndodhin derisa Serbia të dëshmon përkushtimin e saj në këtë proces.

Ajo bëri thirrje për ekstradim të Milan Radoiçiq në Kosovë, derisa tha se s’ka asnjë mirëkuptim për të gjithë ata që kërkojnë që Kosova të bëjë lëvizje në dialog, ndërkaq s’ka asnjë konsekuencë për Serbinë.

“Rikthimi në dialog nuk është i nevojshme. Dialogu nuk e kemi ndërpre asnjëherë. Sorensen ka qenë në Kosovë e Serbi. Ka pasur biseda të vazhdueshme me zotëri Bislimi. Nëse ajo thotë rikthimi në dialog ndoshta e ka fjalën për takime trilaterale. Mirëpo jemi larg asaj, Serbia duhet të dëshmojë përkushtimin e saj në dialog, jo vetëm për zbatimin e marrëveshjes së Brukselit por edhe ekstradimin e Radoiçiqit. Në vazhdimësi Vuçiq iu jep premtime se do të arrestojë Radoiçiqi, mirëpo shkuan shkuan muaj e muaj dhe vit dhe s’ka lëvizje. Nuk kam asnjë pikë mirëkuptim për të gjithë ata që kërkojnë që Kosova të bëjë lëvizje të mëtejme nëse s’janë të gatshëm të angazhohen që një kriminel si Radoiçiq të shëtitet i lirë në Serbi dhe s’ka asnjë konsekuencë për Serbinë”, përfundoi ajo.

Në shenjë pakënaqësie rreth mos konstituimit të Kuvendit dhe ndikimit të kësaj bllokade në mbrojtjen e fëmijëve, Koalicioni i Organizatave për Mbrojtjen e Fëmijëve – KOMF, organizoi një aktivitet simbolik “Karriget tuaja nuk vlejnë më shumë se jeta dhe mirëqenia e fëmijëve”.

Drejtoresha e KOMF-it, Donjeta Kelmendi tha se kjo bllokadë po shkakton stagnime në reforma dhe procese të ndryshme të mbrojtjes së fëmijëve, derisa përmend politikat sociale.

Ajo tha se disa projektligje kanë mbetur të pa miratuara siç është ai për ndihmën e asistencës sociale, i cili pritet të ndikojë në reduktimin e varfërisë së fëmijëve dhe fuqizimin e familjes.

Kelmendi u bëri thirrje deputetëve që të reflektojnë dhe të ngrisin përgjegjësinë e tyre institucionale përballë nevojave, vështirësive dhe realitetit të rëndë të fëmijëve në Kosovë.

“Jemi në këtë aktivitet ndërgjegjësues për të shprehur pakënaqësinë tonë për moskonstituimin e Kuvendit të Kosovës dhe ndikimin që kjo bllokadë ka në proceset e mbrojtjes së fëmijëve. Kjo bllokadë po shkakton stagnime në refroma dhe procese të ndryshme të mbrojtjes së fëmijëve. Jemi këtu bashkë me organizata anëtare për të bërë thirrje drejt deputetëve që të reflektojnë dhe të ngrisin përgjegjësinë e tyre institucionale përballë nevojave, vështirësive dhe realitetit të rëndë të fëmijëve në Kosovë. Procese të shumta janë stagnuar sa i përket mbrojtjes së fëmijëve. Duke filluar me politikat sociale për mbrojtjen e familjes dhe fëmijëve. Një mori projektligjesh kanë mbetur të pa miratuara. Projektligji për të drejtat, njohjet, vlerësimin dhe përfitimet dhe shërbimet për personat me aftësi të kufizuar, i cili pritet të ndikojë në rritjen dhe qëndrueshmërinë e shërbimeve për të gjithë fëmijët me aftësi të kufizuara”, tha Kelmendi.

Drejtoresha e KOMF-it, Donjeta Kelmendi tha se krahas fushës sociale, si pasojë e bllokadës në kuvend, stagnime ka po ashtu edhe në fushën e shëndetësisë.

Ndër të tjera, ajo përmendi Projektligjin për shëndetin mendor si dhe atë për ndalimin e pijeve energjike për personat nën 18 vjet.

Kelmendi theksoi se pa Kuvend të konstituar nuk mund të ketë as investime në fushën e mbrojtjes së fëmijëve.

“Krahas fushës sociale, stagnime ka po ashtu edhe në fushën e shëndetësisë. Një mori e ligjeve kanë mbetur të pa miratuara. Projektligji për shëndetësi, Projektligji për shëndetin mendor, Projektligji për ndalimin e pijeve energjike për personat nën 18 vjet. Pa kuvend të konstituar nuk mund të kemi edhe investime në fushën e mbrojtjes së fëmijëve. Shërbimet sociale në vazhdimësi përballen me krizë të financimit sikurse sektori publik ashtu edhe joqeveritar dhe projektligji për financat e pushtetit lokal po ashtu procesi rreth miratimit të tij ka stagnuar. Ky projektligj parasheh krijimin e një grandi të veçantë për shërbime sociale”, tha Kelmendi.

Kuvendi i Kosovës nuk arriti të konstituohet as në përpjekjen e njëzet. Tentimi i radhës i Lëvizjes Vetëvendosje për të formuar Komisionin për votimin e fshehtë të kryeparlamentarit nuk mori përsëri mbështetjen e partive të tjera politike. Seanca u ndërpre dhe vazhdimi i saj do të bëhet më 25 maj në orën 11:00.