Të gjithë duam të kursejmë karburantin i cili po bëhet çdo ditë e më i shtrenjtë.

Më poshtë gjeni disa prej mënyrave që mund t’ju vijnë në ndihmë gjatë ngasjes.

9. Shmangni qëndrimin në vend me makinë ndezur!

Kjo është një nga mënyrat më të zakonshme. Jeni duke pritur një pasagjer që të hypë në makinë? Në vend që të mbani makinën ndezur për të dëgjuar muzikë, kini parasysh që muzika mund të dëgjohet edhe me makinë fikur. Keni ngelur për minuta të tëra në trafik pa lëvizur? Fikeni makinen dhe do të kurseni ndjeshëm. Makinat me sistemin Start/Stop janë bërë pikërisht për këtë arsye dhe, për kundër asaj që mund të mendohet, kjo nuk e dëmton aspak makinën.

8. Përdorni karburant cilësor

Shpesh herë joshemi nga cmimi i lirë i karburantit në disa pika shitjeje. Kjo nuk do të thotë domosdoshmërisht që ky karburant është jo cilësor, por shancet për këtë janë të konsiderueshme. Gjithashtu cmimi i lartë nuk është tregues i cilësisë së mirë. Gjithsesi, testoni disa pika shitjeje dhe më pas furnizohuni te më e mira.
Makinat e reja janë shumë të ndjeshme ndaj cilësisë së karburantit dhe nese kjo e fundit lë për të dëshiruar, atëherë edhe makina do ju kundërpërgjigjet me të njëjten monedhë. Një karburant jo cilësor nuk digjet plotesisht. Kjo bën që makina juaj të jetë e pafuqishme. Në këto kushte ju jeni i “detyruar” të shtypni pedalin e gazit edhe me shumë. Rrjedhimisht karburanti do të shkojë “lum”.

7. Zbrazeni bagazhin nga gjërat e panevojshme

Pesha e tepërt nuk është problem vetëm për sistemin e amortizimit. Ajo ndikon drejtëpërdrejt në konsumin e karburantit.
Një nga mënyrat për të kursyer karburant është pikërsht heqja e sendeve të panevojshme nga makina.

6. Mbani të pastër filtrin e ajrit

Njësoj si të keni bllokuar me rubinetë, pluhuri bllokon filtrin e ajrit duke sjellë rënien e performancës dhe me shumë mundësi edhe te nivelit të karburantit në depozitë. Filtrat e ajrit janë shumë të lirë dhe nuk kërkojne mjete të vecanta për t’u ndërruar. Blijeni një, ndërrojeni sa hap e mbyll sytë dhe ja ku i keni kursyer disa herë paratë e filtrit.

5. Kujdes nivelin e fryrjes së gomave

Statistikisht, gomave i’u kushtohet më pak vëmendje në një makinë. Madje mund të themi që disa shoferë kalojnë vite pa kontrolluar gomat. Sigurisht që një situatë e tillë shton rrezikun në rruge. Presioni i duhur i gomave ka ndikim parësor në konsumin e karburantit. Kjo, sepse me goma të shfryra rritet rezitenca në rrugë e cila duhet mposhtur. Presionin ideal për makinen tuaj do e gjeni te kapaku i karburantit ose te dera e shoferit. Prodhuesit e makinave shpenzojnë kohë të konsiderueshme për të përcaktuar se sa duhet të jenë fryer gomat në mënyrë që makina të kete eficencë maksimale. Kjo vlen edhe per sigurinë tuaj në rrugë.

4. Ndërroni vajin

Gjendja e mirë e vajit është vitale për një funksionim eficent te motorrat me djegie të brendshme. Vaji i motorrit ka detyrën më të vështirë në një makinë. Detyra e tij është të reduktojë fërkimin ndërmjet pjesëve, t’i ftohë ato dhe të mbajë motorrin të pastër duke e mbrojtur nga gërryerja. Nëse përdorni të njëjtin vaj për një kohë të gjatë, ai do të trashet dhe lëvizja e tij ndërmjet pjesëve do të vështirësohet. Kjo do të sjellë më shumë fërkim të pjesëve me njëra tjetrën. Pasojat e kësaj janë shumë të kushtueshme. Shpesh herë, për këtë shkak, makinat janë bërë të papardorshme. Ndërrojeni vajin në kohë dhe sipas udhëzimeve të prodhuesit dhe kjo do ju shpërblehet me jetëgjatësi të makinës dhe me konsum minimal.

3. Ngadalëso!

Në momentin që shpejtësia kalon 80-90 km/h, edhe konsumi i karburantit i kalon limitet e kursimit. Duke ecur më ngadalë do të kurseni jo pak. Shpenzoni më shumë kohë duke ecur ngadalë, por kurseni shumë më shumë se kaq.

2. Përdorni Auto-Pilot-in

A ka mënyrë më të mirë për t’u përqendruar plotësisht mbi rrugën sa se kur perdorni Auto-Pilot-in? Aktivizoje në një shpejtësi normale, relaksohu dhe lëre makinën të bëjë pjesën tjetër të punës. Auto-Piloti ndihmon në uljen e konsumit të karburantit duke përdorur minimalisht gazin. Duke ecur me shpejtësi konstante, inertësia e makinës shfrytëzohet maksimalisht. Kjo e ul konsumin e karburantit në minimum.

1. Parashikoni trafikun perpara jush

Se fundmi, një tjetër menyrë për të kursyer karburant është të qëndroni të vëmendshëm dhe të parashikoni sjelljen e trafikut që keni përpara. Nëse shikoni semaforin të kuq apo makinat përpara që frenojnë, mjafton të hiqni këmben nga gazi dhe të lini makinën të ngadalësojë. Nëse autokolona rifillon lëvizjen, ju do të keni avantazh inertësinë e makinës tuaj për të përshpejtuar duke harxhuar më pak karburant se sa do të harxhonit nëse do të niseshit nga vendi. “Ngarja Parashikuese” ju ndihmon të reduktoni konsumin e karburantit me 20%.